Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
“Kal shaam ko ham log Asjad ke sath tumhara nikaah kar rahe hain. Tumhari rukhsati bhi sath hi kar denge.”
Hashim Mubeen ne raat ko uske kamre mein aa kar ukhde hue lehje mein kaha.
“Baba! Main inkaar kar dungi…….. Aap ke liye behtar hai aap is tarah zabardasti meri shadi na karein.”
“Tum inkaar karogi to main tumhein usi waqt shoot kar dunga, ye baat tum yaad rakhna.” Wo sar uthaye unhein dekhti rahi.
“Baba! Main shadi kar chuki hoon.” Hashim Mubeen ke chehre ka rang ud gaya. “Main isliye shadi se inkaar kar rahi thi.”
“Tum jhoot bol rahi ho.”
“Nahin, main jhoot nahin bol rahi hoon. Main 6 maah pehle shadi kar chuki hoon.”
“Kis ke sath?”
“Ye main aap ko nahin bata sakti.”
Hashim Mubeen ko andaza nahin tha ko wo is aulaad ke hathon itna khwaar honge. Aag bagoola ho kar wo Imama par lapke aur unhon ne yake-baad-deegrey uske chehre par thappad maarne shuru kar diye. Wo chehre ke samne dono hath karte hue khud ko bachane ki koshish karne lagi magar wo is mein buri tarah naakaam rahi. Kamre mein hone wala shor sun kar Waseem sab se pehle wahan aaya tha aur usi ne Hashim Mubeen ko pakad kar zabardasti Imama se door kiya. Wo diwar ke sath pusht tikaaye roti rahi.
“Baba! Aap kya kar rahe hain, sara maamla aaram se hal kiya ja sakta hai.” Waseem ke piche ghar ke baaqi log bhi andar chale aaye the.
“Is ne……. Is ne shadi kar li hai kisi se.” Hashim Mubeen ne gham-o-ghusse ke aalam mein kaha.
“Baba! Jhoot bol rahi hai, shadi kaise kar sakti hai. Ek baar bhi ghar se nahin nikli.” Ye Waseem tha.
“6 maah pehle shadi kar li hai is ne.”Imama ne sar ne uthaya.
“Nahin, main nahin maanta. Aisa nahin ho sakta, ye aisa nahin kar sakti.” Waseem uski rag rag se waqif tha. Imama ne dhundlaayi aankhon se use dekha aur kaha.
“Aisa ho chuka hai.”
“Kya saboot hai…….. Nikaah-naama hai tumhare paas?” Waseem ne akkhad lehje mein kaha.
“Yahan nahin hai,Lahore mein hai, mere saaman mein.”
“Baba! Main kal Lahore se iska saaman le aata hoon. Dekh lete hain.” Waseem ne Hashim Mubeen se kaha. Imama be-ikhteyaar pachtayi. Saman se kya mil sakta tha.
“Shadi kar bhi li hai to koi baat nahin, talaaq dilwa kar tumhari shadi Asjad se karwaunga aur us aadmi ne talaaq na di to phir use qatl karwa dunga.” Hashim Mubeen ne surkh chehre ke sath wahan se jaate hue kaha. Kamra aahista aahista khali ho gaya. Wo apne bed par baith gayi. Use pehli baar ehsaas ho raha tha ke jaal me phansne ke baad ke ehsaasaat kya hote hain. Ye ek ittefaaq tha ke nikaah naame ki copy Salar ne usko nahin bhijwayi thi. Agar uske paas hoti to tab bhi wo use Hashim Mubeen ko nahin de sakti thi warna Salar Sikandar ka naam nikaah naame par dekhne ke baad unke liye us tak pahonchna aur usse chutkara haasil karna minton ka kaam tha aur uske saman se nikah naama nahin milega to use is bayaan par kisi ko yaqeen na aa sakta ke wo nikaah kar chuki thi.
Usne kamre ke darwaze ko lock kiya aur mobile par Sala ko call karne lagi. Usne use saari surat-e-haal se aagah kar diya tha.
“Tum ek baar phir Lahore jao aur Jalaal ko mere barey mein batao……… Main ab is ghar mein nahin reh sakti. Mujhe yahan se nikalna hai aur uske alawa main kahin nahin ja sakti. Tum mere liye ek wakeel hire karo aur usse kaho ke wo mere parents ko mere shauhar ki taraf se mujhe Habs-e-be-jaa mein rakhne ke khilaaf ek court notice bhijwaye.”
“Tumhare shauhar yaani meri taraf se.”
“Tum wakeel ko apna naam mat batana bal ke ye behtar hai ke apne kisi dost ke zariye wakeel ko hire karo aur mere shauhar ka koi bhi farzi naam de sakte ho. Tumhara naam wakeel ke zariye unhein pata chalega to wo tum tak pahonch jayenge aur main ye nahin chahti.”
Imama ne use ye nahin bataya ke use kya khadsha ha aur na hi Salar ne andaza lagane ki koshish ki.
Usse baat karne ke baad Imama ne phone band kar diya. Agle roz 10-11 baje ke qareeb kisi wakeel ne phone kar ke Hashim Mubeen se Imama ke silsiley mein baat ki aur unhein Imama ko zabardasti apne ghar rakhne ke barey mein uske shauhar ki taraf se kiye jane wale case ke barey mein bataya. Hashim Mubeen ko mazeeh kisi saboot ki zaroorat nahin rahi thi. Wo ghusse mein phunkaarte hue uske kamre mein gaye aur use buri tarah maara.
Tum dekhna Imama! Tum kis tarah barbaad hogi………. Ek ek shay ke liye tarsogi tum………… Jo ladkiyan tumhari tarah apne maan baap ki izzat ko neelaam karti hain unke sath yahi hota hai. Tum hamein court tak le gayi ho……… Tum ne wo saare ehsaan faramosh kar diye jo ham ne tum par kuye. Tumhare jaisi betiyon ko waqai paida hote hi dafan kar dena chahiye.”
Wo badi khamushi se pit’ti rahi. Apne baap ki kaifiyaat ko samajh sakti thi magar wo apni kaifiyaat aur ehsaasaat unhein nahin samjha sakti thi.
“Tum ne hamein kisi ko munh dikhane ke qaabil nahin chhoda, kisi ko nahin. Hamein zinda dar-gor kar diya hai tumne.”
Salma unke piche kamre mein daakhil hui thin magar unhon ne Hashim Mubeen ko rokne ki koshish nahin ki. Wo khud bhi buri tarah mushta’il thin, wo janti thin ke Imama ka ye qadam kis tarah unke poore khaandaan ko muta’ssir karne wala tha aur khaas taur par unke shauhar ko.
“Tum ne hamare aitmaad ka khoon kiya hai. Kaash tum meri aulaad na hotin. Kahi mere khaandaan mein paida na hotin. Paida ho hi gayi thi to tab hi mar jati……. Ya main hi tumhein maar deta.”Imama aaj unki baaton aur pitayi par nahin royi thi. Usne mudaafe’at ki koi koshish nahin ki thi. Wo sirf khamushi ke saath pit’ti rahi phir Hashim Mubeen jaise thak se gaye aur use maarte maarte ruk gaye. Unka saans phool gaya tha. Wo bilkul khamushi se unke saamne diwar ke sath lagi khadi rahi.
“Tumhare paas abhi bhi waqt hai, sab kuch chod do. Us ladke se talaaq le lo aur Asjad se shadi kar lo. Ham sab maaf kar denge, bhula denge.” Is baar Salma ne tez lehje mein kaha.
“Nahin, wapas aane ke liye Islam qubool nahin kiya, mujhe wapas nahin jana.”Imama ne maddham magar mustehkam aawaz mein kaha. “Aap mujhe is ghar se chale jane dein, mujhe aazad kar dein.”
“Is ghar se nikal jaogi to duniya tumhein bahot thokrein maaregi…….Tumhein andaza hi nahin hai ke bahar ki duniya mein kaise magarmach tumhein hadap karne ke liye baithe hain. Jis ladke se shadi kar ke tum ne hamein zaleel kiya hai to tumhein bahot khwaar karega. Hamare khaandaan ko dekh kar usne tumhare sath is tarah chori chupe rishta joda hai, jab ham tumhein apne khaandaan se nikaal denge aur tum paai paai ki mohtaaj ho jaogi to wo bhi tumhein chod kar bhaag jayega, tumhein kahin panaah nahin milegi, koi thikaana nahin milega.” Salma ab use dara rahi thin. “Abhi bhi waqt hai Imama! Tumhare paas abhi bhi waqt hai.”
“Nahin Ammi! Mere paas koi waqt nahin hai, main sab kuch tay kar chuki hoon. Main apna faisla aap ko bata chuki hoon. Mujhe ye sab qubool nahin. Aap mujhe jaane dein, apne khaandaan se alag karna chahte hain, kar dein. Jaidaad se mehroom karna chahte hain, kar dein. Main koi aitraaz nahin karungi magar main karungi wahi jo main aap ko bata rahi hoon. Main apni zindagi ke raaste ka intekhaab kar chuki hoon. Aap ya koi bhi ise badal nahin sakta.”
“Aisi baat hai to tum is ghar se nikal kar dikhao, main tumhein jaan se maar dunga laikin is ghar se tumhein jaane nahin dunga……….. Aur us wakeel ko to main achi tarah dekh lunga. Tumhein agar ye khush fehmi hai ke koi court ya adaalat tumhein meri tehweel se nikaal sakti hai to ye tumhari bhool hai, main tumhein kabhi bhi kahin bhi jaane nahin dunga. Main bailiff ke aane se pehle is ghar se kahin aur muntaqil kar dunga phir main dekhunga ke tum kis tarah apne faisle ko tabdeel nahin kartin aur mujhe agar wo ladka na mila jis se tum ne shadi ki hai to phir main is baat ki parwaah kiye baghair ke tumhara nikaah ho chuka hai, Asjad se tumhari shadi kar dunga. Tumhari shadi sirf meri marzi se hogi , uske alawa nahin.” Wo mushta’il andaaz mein kehte hue Salma ke sath bahar nikal gaye. Wo wahin diwar ke sath khadi khauf zada aur pareshan nazron se darwaze ko dekhti rahi. Usne jis maqsad ke liye shadi ki thi uska koi fayda hota nazar nahin aa raha tha. Hashim Mubeen Ahmad apni baat par chattaan ki tarah ade hue the.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-70/
Prev episode:
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar