Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Wo so rahi thi jab hadbada kar uthi. Koi uska darwaza baja raha tha.
“Imama!Imama!” Waseem darwaza bajate hue buland aawaz mein uska naam pukaar raha tha.
“Kya hua? Kyun chilla rahe ho?” darwaza kholte hi usne kuch hawaas baakhtgi ke aalam mein waseem se pucha jis ka rang uda hua tha.
“First aid box hai tumhare paas?” Waseem ne use dekhte hi fauran pucha.
“Haan, kyun?” wo mazeed pareshaan hui.
“Bas use le kar mere saath aa jao.” Waseem ne kamre ke andar daakhil hote hue kaha.
“Kya hua?” uske pairon ke niche se jaise zameen khisakne lagi.
“Chuchu ne phir khud kushi ki koshish ki hai. Apni kalayi kaat li hai. Mulaazim aaya hua hai niche uska, tum mere sath chalo.”Imama ne be-ikhteyaar itmenaan ka saans bhara.
“Tumhare is dost ko mental hospital mein hona chahiye jis tarah ki ye harkaten karta hai.”Imama ne nagawaari se apne bed par pada hua dopatta odhte hue kaha.
“Main to use dekhte hi bhaag aaya hoon, abhi wo hosh mein tha.” Usne mud kar Imama ko bataya. Wo dono ab aage piche seedhiyaan utar rahe the.
“Tum use hospital le jate.”Imama ne aakhri seedhi par pahonch kar kaha.
“Wo bhi le jaunga, pehle tum uski kalayi waghaira to baandho, khoon to band ho.”
“Waseem! Main use koi bahot achi qism ki first aid to nahin de sakti. Pata nahin usne kis cheez se apni kalayi kaati hai aur zakhm kitna gehra hai. Uske apne ghar wale kahan hain?” Baat karte karte Imama ko khayaal aaya.
“Uske ghar mein koi bhi nahin hai, sirf mulaazim hain. Wo to koi phone call aayi thi jis par mulaazim use bulane ke liye gaya aur jab andar se koi jawab nahin aaya to pareshan ho kar dusre mulaazimo ke sath mil kar usne darwaza tod diya.” Wo dono sath sath chalte hue ab apne ghar se bahar nikal aaye.
“Tumhare jo ye dost hai na……….”Imama ne naarazi ke aalam mein Waseem ke sath chalte hue Salar ke barey mein kuch kehne chaha magar Waseem ne ghusse mein palat kar use jhidak diya.
“For god’s sake. Apni laanat malaamat band nahin kar saktin tum. Uski haalat serious hai aur tum uski buraiyon mein masroof ho.”
“Aisi harkatein karne walon ke liye mere paas koi hamdardi nahin hai.” Wo dono ab Salar ke lounge mein pahonch chuke the.
Chand qadam chalne ke baad Waseem ek mod muda aur kamre ke andar daakhil ho gaya. Imama uske piche hi thi magar phir jaise current kha kar ruk gayi. Kamre ke darwaaze se andar daakhil hote hi samne qad aadam khidkiyon par kuch models aur actresses ki badi badi uryaan tasweeren is tarah lagayi gayi thin ke ek lamhe ke liye Imama ko yun laga jaise wo tamaam ladkiyan haqeeqi taur par us kamre mein maujood hain. Uska chehra surkh ho gaya. Ek taraf bed par pade hue zakhmi ke barey mein uski raaye kuch aur kharaab ho gayi. Wo tasweeren uske kirdaar ki pasti ka ek aur saboot thin aur kamre mein 3-4 logon ki maujoodgi mein usk eliye wo tasweeren khaasi khiffat aur sharmindagi ka ba’as ban rahi thin. Un tasweeron se nazar churate hue wo tez raftaari se double bed ki taraf aa gayi jahan Salar leta hua tha. Waseem uske paas bed par baitha first aid box khol raha tha jab ke Imama ka bada bhai Salar ki us kalayi ko bed sheet ke ek latke hue kone ke saath daba kar khoon rokne ki koshish ka raha tha jab ke khud Salar nashe mein doobe hue kisi insaan ki tarah apna hath chudane ki koshish kar raha tha. Wo Waseem aur waha mulaazimon se kuch keh bhi raha tha.
Imama ke aage badhte hi uske bade bhai ne us kursi ko chod diya jis par wo baithe hue the.
Iske zakhm ko dekho, main ne chaadar se khoon rokne ki koshish ki hai magar main kaamyaab nahin hua.” Unhon ne uski kalayi Imama ko thamaate hue kaha. Imama ne kursi par baithte hi us ki kalayi ke gird lipta hua kona hataya. Zakhm bahot gehra aur lamba tha. Ek nazar daalte hi use andaza ho gaya tha.
Salar ne phir ek jhatke ke sath apna hath chudane ki koshish ki magar Imama mazbooti se kalayi ke niche se uska baazu pakde rahi.
“Waseem bas bandage nikaal do. Ye zakhm bahot gehra hai.Yahan kuch nahin ho sakta. Bandage se khoon ruk jayega phir tum log ise hospital le jao.” Usne ek nazar niche carpet par jazb hote khoon par dali. Waseem tezi se first aid box mein se bandage nikaalne laga.
Salar ne bed par lete lete apne sar ko jhatka diya aur aankhein kholne ki koshish ki. Uski aankhon ke saamne ab dhundhlaahat thi magar uske bawajood usne apne bed se kuch faasle par baithi hui us lakdi aur uske hath mein maujood apne baazu ko dekha.
Kuch mushta’il ho kar usne ek aur jhatke ke sath apna hath us ladki ke hath se aazad karane ki koshish ki. Hath aazad nahin hua magar dard ke ek tez laher ne be-ikhteyaar use karaahne par majboor kiya tha. Use chand lamhon ke liye yahi mehsoos hua tha ke uski jaan nikal gayi magar agle hi lamhe wo ek baar phir hath chudaane ki koshish kar raha tha.
“Tum log dafa ho…..jao……..kahan se………aa gaye……..ho? Usne kuch mushta’il ho kar ladkhadate hue lehje mein kaha. “Ye mera…..kamra hai………tum logon……..ko andar………..aane ki jurrat kaise……..hui………..tum………tum………..Waseem. tum………. dafa………. ho jao………. get lost…….just……..get lost………bloody bastard.”
Usne buland aawaz mein magar ladkhadati zabaan se kaha. Imama ne uske munh se nikalne wali gal ko suna. Ek lamhe ke liye uske chehre ka rang badla magar wo phir uska hath mazbooti se pakde baithi rahi. Usne Waseem se cotton le kar karaahte hue Salar ki kalayi ke zakhm par rakh di jo hath ko khinchne aur hilane se baaz nahin aa raha tha aur Waseem ke hath se bandage le kar lapetna shuru kar diya. Salar ne dhundlayi hui aankhon ke sath apni kalayi ke gird kisi chiz ki narmi ko mehsoos kiya.
Kuch be basi aur jhunjhlahat ke aalam mein Salar ne apne bayen hath ke zor se apne dayen hath ko chudane ki koshish ki thi. Dhundlayi aaknhon ke sath uska aage badhne wala baayan hath ladki ke sar se takraya tha. Uske sar se na sirf dopatta utra tha balke uske baal bhi khul gaye the.
Imama ne hadbada kar use dekha jo ek baar phir apna baayan hath aage la raha tha. Imama ne apne bayen hath se uski kalayi ko pakde rakah jab ke dayen hath mein pakdi hue bandage chod kar apni puri quwwat se apna dayan hath uske bayen gaal par maara. Thappad itna zannate daar tha ke ek lamhe ke liye Salar ki aankhon ke saamne chaayi hui dhund chat gayi. Khule munh aur aankhon ke sath wo dam bakhud usne us ladki ko dekha tha jo surkh chehre ke sath buland aawaz mei usse keh rahi thi.
“Ab agar tum hile to main tumhara dusra hath bhi kaat dungi, suna tumne?”
Salar ne us ladki ke aqab mein Waseem ko kuch kehte suna magar wo kuch samajh nahin paya. Uska zahen mukammal taur par taareeki mein doob raha tah magar usne phir ek aawaz suni, niswaani aawaz. “Iska blood pressure check karo……..” Salar ko be-ikhteyaar chand lamhe pehle apne gaal par padne wala thappad yaad aaya. Wo chahne ke bawajood aankhen na khol saka. Wahi niswaani aawaz phir goonji thi magar is baar wo aawaz ko koi mafhoom nahin pehna saka. Uska zahen mukammal taur par taareeki mein doob gaya tha.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-44/
Prev episode:
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar