Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
“Ab kaisa hai tumhara dost? Gaye the tum uski khairiyat dariyaft karne?”Imama Waseem ke sath market ja rahi thi ke achanka use Salar ka khayaal aaya.
“Pehle se to haalat kaafi behtar hai uski. Shayad kal parson tak discharge ho jaye.” Waseem ne ues Salar ke barey mein tafseelaat se Aagaah kiya. “Tum chalogi wapsi par usko dekhne?” Waseem ko achaanak khayaal aaya.
“Main?”Imama hairaan hui. “Main kya karungi ja kar.”
“Khairiyat dariyaaft karna aur kya karna hai tumhein.” Waseem ne sanjeedgi se kaha.
“Acha.”Imama ne kuch ta’ammul se kaha.
“Chalo theek hai chalenge. Haalanke is tarah ke mareezon ki ayaadat karna fizool hai.” Usne laparwahi se kandhe uchkate hue kaha.
“Aise mujhe tawaqqo thi ke uske parents hamare ghar aayenge, shukriya waghaira ada karne ke ham ne unke bete ki jaan bachali.. Kis qadr bar-waqt madad ki ham ne, maar unhon ne to bhoole se bhi hamara rukh nahin kiya.”Imama ne tabsara kiya.
“Tum un becharon ki condition ka andaza hi nahin kar saktin. Kis munh se wo shukriya ada karne aayein aur phir agar koi ye pooch baithe ke aap ke bete ne aisi harkat kyun ki to wo dono kya jawaab denge……. Wo bechare ajeeb mushkil mein phanse hue hain.”
Waseem ne qadre afsos karne wale andaaz mein kaha. “Waise uske parents ne mera bahot shukriya ada kiya hai aur ammi aur baba parson jab uski khairyat dariyaft karne gaye the to unhon ne wahan bhi un dono ka bahot shukirya ada kiya hai. Ye to ammi aur baba ki samajhdaari thi ke unhon ne unse koi sawaal nahin kiya Salar ke bare mein, warna to udhar bhi khaasi khiffat ka saamna karna padta unhein.” Waseem ne gaadi modte hue kaha.
“Magar aakhir tumhare us dost ka mas’ala kya hai, kyun baithe bithaaye is tarah ki aihmaqaana harkatein karne lagta hai?”Imama ne pucha.
“Tum mujh se is tarah puch rahi ho jaise wo mujhe sab kuch bata kar ye sab karta hoga. Mujhe kya pata wo kis liye ye sab karna hai kyun karta hai.”
“Tumhara itna gehra dost hai, tum puchte kyun nahi usse?”
“Itna gehra bhi nahin hai ke aisi baton ke barey mein bhi mujhe batane lage aur waise bhi main kyun kuredun, hoga uska koi mas’ala.”
“To phir ye behtar nahin hai ke tum aise doston se kuch faasle par raho, aise logon se dosti achi nahin hoti. Agar kal to tumne bhi is tarah ki harkatein shuru kar din to……?”
“Waise tum ne us din jo harkat i thi wo agar use yaad rahi to hamari dosti mein khud hi khaasa farq aa jayega.” Waseem ne kuch jataane wale andaaz mein kaha.
“Main nahin samajhti ke use wo thappad yaad hoga. Wo saheeh taur par hosh mein to nahin tha. Tum se zikr kiya usne is barey mein?”Imama ne pucha.
“Nahin mujh se kaha to nahin magar ho sakta ke use yaad ho. Tum ne acha nahin kiya tha.”
“Usne harkat hi aisi ki thi. Ek to apna hath kheench raha tha dusre gali de raha tha upar se mera dopatta bhi kheench liya.”
“Usne dopatta nahin kheencha tha, uska hath laga tha.” Waseem ne Salar ka difaa karte hue kaha.
“Jo bhi tha, us waqt to mujhe bahot ghussa aaya tha magar baad mein mujhe bhi afsos hua tha aur main ne to Allah ka bahot shukr ada kiya ke wo bach gaya. Agar kahin wo mar jata to mujhe to bahot hi pachtawa hota apne us thappad ka.”Imama ne qadre maazrat khwahaana andaaz mein kaha.
“Chalo tum aaj ja rahi ho to maazrat kar lena.” Waseem ne mashwara diya.
“Kyun excuse karun, ho sakta hai use kuch yaad hi na ho phir main khwaahmakhwaah gade murde ukhaadun. Use yaad dilaun ke main ne uske sath aisa kiya tha.”Imama ne fauran kaha.
“Aur farz karo use sab kuch yaad hua to……?”
“To…….to kya hoga……..wo kaun sa hamara rishte daar hai ke usse talluqaat kharaab ho jayenge ya mail-jol mein farq padega.”Imama ne laparwahi se kaha.
Shopping karne ke baad Waseem use clinic le aya jahan Salar zair-e-ilaaj tha..
Wo dono jis waqt us kamre mein daakhil hue us waqt wo soup pine mein masroof tha.
Salar ne Waseem ke sath aane wali ladki ko dekha aur fauran pehchaan liya tha. Agarche us raat us haalat mein wo use shanaakht nahin kar saka magar us waqt use dekhte hi wo use pehchaan gaya tha. Apni mummy se ye baat wo pehle hi jaan chuka tha ke Waseem ki bahen ne use first aid di thi magar use wo first aid yaad nahin thi, bas wo zannatey-daar thappad yaad tha jo us raat use pada tha. Isliye Imama ko dekhte hu wo soup pte pite ruk gaya.
Uski chubhti hui nazron se Imama ko andaza ho gaya ke use yaqeenan us raat hone wale waqe’aat kisi na kis had tak yaad the.
Rasmi alaik-salaik ke baad uski mummy Imama ka shukriya ada karne lagin, jabke Salar ne soup peete hue gehri nazron se use dekha. Waseem se dosti ko kayi saal guzar chuke the aur usne Waseem ke ghar mein Imama ko bhi kayi baat dekha tha magar usne pehle kabhi tawajjoh nahin di thi. Us din pehli baar wo qadrey tanqeedi andaaz mein ghaur kar raha tha. Uske dil mein Imama ke liye tashakkur ya ehsaan mandi ke koi jazbaat nahin the. Uski wajah se uske saare plan ka bedaa gharq ho gaya tha.
Imama uski mummy se guftgu mein masroof thi magar waqtan-fauqtan apne upar padne wali nazron se bhi waqif thi. Zindagi mein pehli baar use kisi ki nazrein itni buri lagi thin.
Ek lamhe ke liye uska dil chaha ke uth kar bhaag jaye. Salar ke barey me uski raye aur bhi kharaab ho gayi thi. Wo apne us thappad ke liye maazrat ke iradey se waha aayi thi magar is waqt uska dil chaha use 2-4 thappad aur laga de.
Thodi der wahan baithne ke baad fauran hi wo wapas jane ke liye uth khadi hui aur wapas jate hue usne Salar se alaik-salaik bhi takalluf nahin kiya tha. Wo sirf uski mummy ke sath dua salaam ke baad Salar ki taraf dekhe baghair bahar nikal aayi thi aur bahar aa kar usne sukoon ka saans liya tha.
“Is tarah ke dost banaye hue hain tumne?” bahar aa kar usne Waseem se kaha jis ne hairaani se use dekha.
“Kyun, ab kya hua hai?”
“Use dekhne tak ki tameez nahin hai. Is baat tak ka ehsaas nahin hai ke main uske dost ki bahen hoon aur uske dost ke sath uske kamre mein maujood hoon.”
Waseem uski baat par kuch khafeef sa ho gaya.
“Ye aadmi is qaabil nahin hai ke iski ayaadat ke liye jaaya jaye aur tum is ke saath mail-jol band karo.”
“Acha theek hai main mohtaat rahunga. Ab tum baar baar us baat ko na dohrao.” Waseem ne mauzoo badalne ki koshish karte hue kaha. Imama danista taur par khamoosh ho gayi magar Salar uske na pasandeeda afraad ki list mein shaamli ho chuka tha.
Ye ek ittefaaq hi tha ke wo un dinon kuch chuttiyaan guzaarne Islamabad aayi hui thi warna shayad Salar se uska itna qareebi aur itna na pasandeeda taaruf aur talluq kabhi paida na hota.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-46/
Prev episode:
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar