Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Jalaal se hone wali chand mulaqaaton ke baad Imama ne poori koshish ki thi ke wo dobara kabhi uska saamna na kare, na uske barey mein soche, na Zainab ke ghar jaye. Hatta ke usne Zainab ke sath apne talluqaat ko bhi apni taraf se mehdood karne ki koshish ki thi. Uski har hifaazati tadbeer bure tareeqe se nakaam hoti gayi.
Har guzarte din ke sath Imama ki be basi mein izaafa hota ja raha tha aur phir usne guthne tek diye the.
“Is aadmi mein koi chiz aisi hai jis ke saamne meri har mazaahemat dam tod jaati hai.” Aur shayad uska ye aitraaf hi tha jisne use ek baar phir Jalaal ki taraf mutawajjoh kar diya tha. Pehle uske liye uski be-ikhteyaari la-sha’oori taur par thi phir usne sha’oori taur par Jalaal ko Asjad ki jagah de di.
“Aakhir is mein burayi kya hai agar main us shakhs ka saath chahun jis ki aawaz mujhe baar baar apne Paighambar ﷺ ki taraf lautne par majboor karti rahi. Main kyun us shakhs ke husool ki khwahish na karun jo Hazrat Mohammad Mustafa ﷺ se mujhe se bhi zyada mohabbat rakhta hai. Kya muzaayeqa hai agar main us shakhs ko apna muqaddar banaye jane ki dua karun, jis ke liye main uns rakhti hoon aur jis ke kirdaar se main waqif hoon. Kya bura hai agar main chahun ke Main Jalaal Ansar ke naam se shanaakht paun. Us wahid aadmi ke naam se, jise sunte, jise dekhte mujhe us par rashk aata hai.” Uske paas har daleel, har taujeeh maujood thi.
Bahot ghair mehsoos tariqe se wo har us jagah jane lagi jaha Jalaal ke paaye jane ka imkaan hota aur wo aksar wahan paya jata. Wo Zainab ko us waqt phone karti, jab Jalaal ghar par hota kyun ke ghar par hote hue phone hamesha wahi receive karta. Dono ke darmiyaan choti moti guftgu rafta rafta taweel hone lagi, phir wo milne lage.
Jaweriya, Rabiya aur Zainab ko Imama aur Jalaal ke in badhte hue talluqaat ke bare mein pata nahin tha. Jalaal house job kar raha tha aur Imama aksar uske hospital jane lagi. Baqaaida izhaar-e-mohabbat na karne ke bawajood wo dono apne liye ek dusre ka jazbaat se waqif the. Jalaal janta tha ke Imama use pasand karti thi aur ye pasandeedgi aam nauiyat ki nahin thi. Khud Imama bhi ye jaan chuki thi ke Jalaal uske liye kuch khaas qism ke jazbaat mehsoos karne laga hai.
Jalaal is qadr mazhabi tha ke usne kabhi is baat ka tasawwur bhi nahin kiya tha ke wo kisi ladki ki mohabbat mein giraftaar ho jayega, na sirf ye ke wo mohabbat karega balke is tarah usse mila karega……….. Magar ye sab kuch bahot ghair mehsoos andaaz mein hota gaya. Usne kabhi Zainab se is baat ka zikr nahin kiya ke uske aur Imama ke darmiyaan kisi khaas nauiyat ka talluq hai. Agar wo ye inkeshaaf kar deta to Zainab use yaqeenan Imama ki Asjad ke sath tay shuda nisbat se aagaah kar deti. Bahot shuru mein hi wo Imama ki aisi kisi nisbat ke barey mein jaan leta to wo Imama ke barey mein bahot mohtaat ho jata. Phir kam az kam Imama ke liye is had tak involve hone ka sawaal hi paida nahin hota jis had tak wo ho chuka tha.
Unke darmiyaan hone wali aisi hi ek mulaqaat mein Imama ne use propose kiya tha. Use Imama ki jur’at par kuch hairaani hui thi kyun ke kam az kam wo khud bahot chahne ke bawajood bhi ye baat nahin keh saka.
“Aapka house job kuch arsey mein mukammal ho jayega, uske baad aap kya karenge?”Imama ne us din usse pucha.
“Uske baad main specialization ke liye bahar chala jaunga.” Jalaal ne badi sahoolat se kaha.
“Uske baad?”
“Uske baad wapas aaunga aur apna hospital banaunga.”
“Aap ne apni shadi ke barey mein socha hai?” Usne agla sawaal kiya tha. Jalaal ne hairaan muskurahat ke sath use dekha tha.
“Imama! Shadi ke bare mein har koi sochta hai.”
“Aap kise se karenge?”
“Ye tay karna abhi baqi hai.”
Imama chand lamhe khamoosh rahi. “Mujh se shadi karenge?”
Jalaal dam bakhud use dekhne laga. Use Imama se is sawaal ki tawaqqo nahin thi. “Aap ko meri baat buri lagi hai?”
Imama ne use gum sum dekh kar pucha. Wo ek dam jaise hosh mein aa gaya.
“Nahin, aisa nahin hai.” Usne be-ikhteyaar kaha. “Ye sawaal mujhe tum se karna chahiye tha. Tum mujh se shadi karogi?”
“Haan.”Imama ne badi sahoolat se kaha.
“Aur aap?”
“Main……….Main……….Haan, ofcourse. Tumhare alawa main aur kis se shadi kar sakta hoon.” Usne apne jumle par Imama ke chehre par ek chamak aate dekhi.
“Main house job khatm hone ke baad apne maan baap ko tumhare haan bhijwaunga.”
Wo is baar jawaab mein kuch kehne ki bajaye chup si ho gayi.
“Jalaal! Kya aisa ho sakta hai ke main aap se apne ghar walon ki marzi ke baghair shadi kar lun?”
Jalaal uski baat par hakka bakka reh gaya. “Kya matlab?”
“Ho sakta hai mere parents is shadi par tayyar na hon.”
“Kya tum ne apne parents se baat ki hai?”
“Nahin.”
“To phir tum ye baat kaise keh sakti ho.”
“Kyun ke main apne parents ko achi tarah se janti hoon.” Usne rasaaniyat se kaha.
Jalaal ek dam kuch pareshan nazar aane laga. “Imama! Main ne kabhi ye socha hi nahin ke tumhare parents ko ham dono ki shadi par koi aitraaz kyun ho sakta hai. Main to samajh raha tha ke aisa nahin hoga.”
“Magar aisa ho sakta hai. Aap mujhe sirf ye batayen ke kya aap is soorat mein mujhe se shadi kar lenge?”
Jalaal kuch der khamoosh baitha raha. Imama izteraab ke aalam mein use dekhti rahi. Kuch der baad Jalaal ne apni khamushi ko toda.
“Haan, main tab bhi tum hi se shadi karunga. Mere liye ye mumkin nahin hai ke ab main kisi dusri ladki se shadi kar sakun. Main koshish karunga ke tumhare parents is shadi par raza mand ho jayen laikin agar wo nahin hote to phir hamein unki marzi ke baghair shadi karni hogi.”
“Kya aap ke parents is shadi par raza mand ho jayenge?”
“Haan, main unhein mana lunga. Wo meri baat nahin taaltey.” Jalaal ne fakhriya andaaz mein kaha.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-51/
Prev episode:
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar