Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
“Baji! Main aapka kamra saaf kar dun?” Mulaazma ne darwaze par dastak dete hue Imama se kaha.
“Nahin, tum jao.”Imama ne hath ke isharey se use jane ke liye kaha. Mulaazma jane ke bajaye darwaza band kar ke uske paas aa gayi.
“Main ne tum se kaha hai na ke tum………”Imama ne kuch kehne ki koshish ki magar phir uski baat halaq mein hi reh gayi. Mulaazma ne apni chaadar ke andar se ek mobile nikala. Imama hairat se use dekhne lagi.
“Baji! Ye meri maan ne diya hai, wo keh rahi thi ke sath wale Salar sahab ne aapke liye diya hai.” Usne Imama ki taraf ujlat ke aalam mein wo mobile badhaya. Imama ne tezi se mobile ko jhapat liya. Uska dil tezi se dhadak raha tha.
“Dekho, tum kisi ko batana mat ke tum ne mujhe koi mobile la kar diya hai.”Imama ne use takeed ki.
“Nahin baji! Aap be fikr rahein, main nahin bataungi. Agar aap ko bhi koi cheez Salar sahab ke liye deni ho to mujhe de dein.”
“Nahin, mujhe kuch nahin dena, tum jao.” Usne apne hawaas par qaabu paate hue kaha.
Mulaazma ke kamrey se nikalte hi usne kamre ko lock kar liya. Kaanpte hathon aur dil ki be qaabu hoti dhadkanon ke sath usne daraaz se mobile aur nikala aur us par Jalaal ka number dial karna shuru kiya. Wo use tafseel se saari baat batana chahti thi. Phone Jalaal ki ammi ne uthaya.
“Beta! Jalaal to bahar gaya hua hai, wo to raat ko hi aayega. Tum Zainab se baat kar lo. Use bula doon?” Jalaal ki ammi ne kaha.
“Nahin aunty! Mujhe kuch jaldi hai, main Zainab se phir kabhi baat kar lungi. Bas main ne usne chand kitabon ka kaha tha, mujhe un hi ke barey mein puchna tha. Main dobara phone kar lungi.”Imama ne phone band karte hue kaha.
Imama ne us din do paher ko bhi khana nahin khaya. Wo sirf raat hone ka intezaar kar rahi thi take Jalaal ghar aa jaye aur wo usse dobara baat kar sake. Shaam ke waqt mulaazma ne use Asjad ke phone ki ittelaa di.
Wo jis waqt niche aayi, us waqt lounge mein sirf Waseem baitha hua tha. Wo use mukammal taur par nazar andaaz karte hue phone ki taraf chali gayi. Phone ka receiver uthate hi dusri taraf Asjad ki aawaz sunayi di. Be-ikhteyaar Imama ka khoon khaulne laga. Ye janne ke bawajood ke is shadi ko tay karne mein Asjad se zyada khud Hashim Mubeen ka hath tha. Imama ko us par ghussa aa raha tha.
Wo uska haal dariyaaft kar raha tha.
“Asjad! Tum is tarah mere saath dhoka kaise kar sakte ho?”
“Kaisa dhoka Imama!”
“Shadi ki tareekh tay karna……… Tum ne is silsiley mein mujh se baat kyun nahin ki?” Wo khaulte hue boli.
“Kya uncle ne tum se baat nahin ki?”
“Unheon ne mujh se pucha tha aur main ne unse kaha tha ke main abhi shadi nahin karna chahti.”
“Baher haal ab to kuch nahin ho sakta………. Aur phir kya farq padta hai ke shadi ab ho ya kuch saalon baad” Asjad ne qadrey laparwahi se kaha.
“Asjad! Tumhein farq padta ho ya nahin, mujhe padta hai. Main apni taleem mukammal karne tak shadi nahin karna chahti……….. Aur ye baat tum achi tarah jaante the.”
“Haan, main jaanta hoon magar is saare maamle mein, main to kahin bhi involve nahin hoon. Tumhein bata raha hoon, shadi uncle ke israar par ho rahi hai.”
“Tum ise roko.”
“Tum kaisi baatein kar rahi ho Imama! Main ise kaise rukwa dun.” Asjad ne kuch hairaani se kaha.
“Asjad please!”
“Imama! Main aisa nahin kar sakta, tum meri position samjho. Ab to waise bhi card chap chuke hain, dono gharon mein tayyariyan ho rahi hain aur………..”
“Imama ne uski baat sune baghair receiver patakh diya. Waseem ne us puri guftgu mein koi mudaakhlat nahin ki thi. Wo khamushi se Asjad ke saath hone wali uski guftgu sunta raha tha jab Imama ne phone band kar diya to Waseem ne usse kaha.
“Tum khwaamakhwaah ek fizool baat par itna hangama khada kar rahi ho. Kal bhi to tum ne shadi Asjad ke sath hi karni hai phir is tarah kar ke tum khud apne liye masail paida kar rahi ho. Baba tumse bahot naaraz hain.”
“Main ne tum se tumhari raye nahin maangi, tum apne kaam se kaam rakho. Jo kuch tum mere sath kar chuke ho wahi kaafi hai.”
Imama us par ghurrayi aur phir wapas kamre mein aa gayi.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-59/
Prev episode:
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar