Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Wo hotel aa kar samaan pack kar raha tha jab Furqan ne darwazey par dastak di. Furqan ko dekh kar wo hairaan hua. Use andaza nahin tha ke wo itni jaldi uske peechey aa jayega.
“Ajeeb insaan ho tum Salar………” Furqan use dekhte hi naraazi se bolne laga.
“Yun kisi ko bataye baghair Sameer ke clinic se chale aaye, mujhe pareshan kar diya. Upar se mobile ko bhi off kar rakha hai.”
Salar ne kuch nahin kaha. Wo langdaata hua ek baar phir apne bag ke paas aa gaya jis mein wo apni cheezein pack kar raha tha.
“Tum jaa rahe ho?” Furqan bag dekh kar chaunka.
“Haan……….” Salar ne ek lafzi jawaab diya.
“Kahan?” Salar ne bag ki zip banf kar di aur bed par baith gaya.
“Islamabad?” Furqan uske saamne sofe par aa kar baith gaya.
“Nahin.” Salar ne use dekhte hue kaha.
“Phir……..?”
“Karachi jaa raha hoon.”
“Kis liye?”
“Flight hai meri.”
“Paris ki?”
“Haan……..”
“4 din baad hai tumhari flight, abhi jaa kar kya karoge?” Furqan use dekhne laga. Sameer ka andaza theek tha. Uske chehrey ke ta’assuraat bey had ajeeb the.
“Kaam hai mujhe wahan.”
“Kya kaam hai?”
Wo jawaab dene ke bajaye bed par baitha palkein jhapkaaye baghair chup chaap use dekhta raha. Furqan psycologist nahin tha phir bhi saamne baithe hue shakhs ki aankhon ko padhne mein use koi mushkil nahin hui. Salar ki aankhon mein kuch bhi nahin tha. Sirf sard mohri thi. Yun jaise wo kisi ko jaanta hi na ho. Use aur apne aap ko bhi. Wo depress tha. Furqan ko koi shubah nahin tha magar uska depression use kahan le jaa raha tha, Furqan ye jaanne se qaasir tha.
“Tumhein aakhir kya pareshani hai Salar?” Wo puche baghair nahin reh saka.
Salar ne tawaqquf kiya phir kandhey jhatkey.
“Koi pareshani nahin hai.”
“To phir……..” Salar ne Furqan ki baat kaat di.
“Tum jaante ho mujhe migrane hai. Kabhi kabhaar is tarah ho jaata hai mujhe.”
“Main doctor hoon Salar!” Furqan ne sanjeedgi se kaha. “Migrane ko koi mujh se zyada behtar nahin jaanta. Ye sab kuch migrane ki wajah se nahin tha.”
“To tum batao kya wajah ho sakti hai?” Salar ne ulta usse sawaal kiya.
“Kisi ladki ka problem hai?” Salar palkein jhapak nahin saka. Furqan kahan jaa pahoncha tha.
“Haan………” wo nahin jaanta usne ‘nahin’ kyun nahin kaha.
“Kisi mein involve ho tum?” Furqan ko apne andazey ke saheeh hone par jaise yaqeen nahin aaya.
“Haan………”
Furqan bahot der chup baitha raha. Yun jaise apni bey yaqeeni par qaabu paane ki koshish kar raha ho.
“Kis ke sath involve ho?”
“Tum use nahin jaante.”
“Shadi nahin ho saki tumhari uske sath?”
“Ho gayi thi.” Uske lehjey mein aanch thi.
“Shadi ho gayi thi?” Furqan ko phir yaqeen nahin aaya.
“Haan……..”
“Phir………talaaq ho gayi?” usne pucha
“Nahin.”
“To……….?” Salar ke paas aagey batane ke liye kuch nahin tha.
“To bas………”
“Bas kya……….?” Salar uske chehrey se nazrein hata kar apne bayen hath ki ungli dayen hath mein maujood dil ki lakeer par pherta raha.
“Kya naam hai uska?” Furqan na maddham aawaz mein pucha. Wo ek baar phir usi tarah lakeer ko chhutey hue bahot der tak khamush raha. Bahot der……….. phir usne kaha.
“Imama Hashim……….” Furqan ne bey ikhteyaar saans liya. Use ab samajh mein aaya ke wo uski chhoti beti ko dheron ke hisaab se tahaaif kyun diya karta tha. Pichhley arsey mein jab se Salar se uski shanasaai hui thi aur Salar ka uske ghar aana jaana shuru hua tha Salar aur Imama ki bahot dosti ho gayi thi. Wo Pakistan ke baad bhi use wahan se kuch na kuch bhijwata rehta tha magar Furqan ko aksar sirf ek baat par hairaani hoti. Wo kabhi Imama ka naam nahin leta tha aur wo khud usse baat karta to use naam ke baghair mukhaatib karta. Furqan ko chand ek baar ye baat mehsoos hui thi magar usne nazar andaaz kar diya tha laikin ab Imama Hashim ka naam sun kar wo jaan gaya tha ke wo kyun uska naam nahin leta tha.
Wo ab ruk ruk kar bey rabt jumlon mein maddham aawaz mein use apne aur Imama ke barey mein bata raha tha. Furqan dum saadhey sun raha tha. Jab wo sab kuch batane ke baad khamush hua to der tak Furqan bhi kuch bol na saka. Uski samajh mein nahin aa raha tha ke use tasalli de ya phir kuch aur kahe………. Koi naseehat…………
“Tum use bhool jao.” Usne bil aakhir kaha. “Soch lo ke wo jahan bhi hai khush hai aur mehfooz hai. Zaruri nahin uske saath koi saaneha hi hua ho. Ho sakta hai wo bilkul mehfooz ho.” Furqan keh raha tha. “Tum ne uski madad ki, jis had tak tum kar sakte the. Pachhtawon se apne aap ko nikaal lo. Allah madad karta hai. Tumhare baad ho sakta hai use tum se behtar koi aur mil gaya ho tum kyun is tarah ke wahem liye baithe ho. Main nahin samajhta ke Jalaal se uski shadi na hone ki wajah tum the. Jo kuch tum ne mujhe Jalaal ke barey mein bataya hai. Mera andaza yahi hai ke wo kisi surat mein Imama se shadi nahin karta, chahe tum beech mein aate na aate, koshish karte na karte. Jahan tak Imama ko talaaq na dene ka sawaal hai use chahiye tha ke wo tum se dobara raabta karti. Wo aisa karti to yaqeenan tum use talaaq de dete. Agar is maamley mein tum se koi ghalti hui bhi hai to Allah tumhein maaf kar dega kyun ke tum pachhtaa rahe ho.tum Allah se maafi bhi maangtey rahe ho. Ye kaafi hai magar is tarah depression ka shikaar hone se kya hoga.”
Salar ki khamushi se use ummid bandhi ke shayad us ki koshish rang laa rahi thi magar ek lambi taqreer ke baad jab wo khamush hua to Salar uth kar apna brief case kholne laga.
“Kya kar rahe ho?”
“Meri flight ka time ho raha hai.” Wo ab apne brief case mein se kuch papers nikaal raha tha. Furqan ki samajh mein nahi aaya wo kya kare.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-130/
Prev episode:
https://theothermeunfolded.com/blog/peer-e-kaamil-roman-urdu-umera-ahmed-episode-128/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar