Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Paris se wapsi par uski zindagi ke ek naye phase ka aaghaz hua. Ibtedaai taur par wo Islamabad mein us ghair mulki bank mein kaam karta raha. Phir kuch arsey baad wo usi bank ki ek nayi branch ke sath Lahore chala aaya. Use Karachi jaane ka mauqa mil raha tha magar usne Lahore ka intekhaab kiya. Use yahan Dr Sabt Ali ke saht waqt guzaarney ka mauqa mil raha tha.
Pakistan mein uski masroofiyaat ki nauiyat badal gayi thi magar un mein kami nahin aayi thi. Wo yahan bhi din raat masroof rehta tha. Ek exceptional maahir-e-maashiyaat ke taur par uski shohrat uske sath sath safar kar rahi thi. Hukumati halqon ke liye uska naam naya nahin tha magar Pakistan aa jaane ke baad finance ministry mukhtalif mawaqey par apne zair-e-tarbiyat officer ko diye jaane wale lectures ke liye use bulwati rehti. Lectures ka ye silsila bhi uske liye naya nahin tha. Yale mein zair-e-taalim rehne ke baad wo wahan mukhtalif classes ko lecture deta raha tha. Ye silsila New York muntaqil hone ke baad bhi jaari raha jahan wo Columbia university mein human development par hone wale seminars mein hissa leta raha. Baad mein uski tawajjoh phir economics ki taraf mabzool ho gayi.
Pakistan mein bahot jald wo un seminars ke sath involve ho gaya tha jo IBA, LUMS aur FAST jaise adaarey karwa rahe the. Economics aur human development waahid mauzu’aat the jin par khamushi ikhteyaar nahin karta tha. Wo uske pasandeeda mauzoo-e-guftgu the aur seminars mein uske lectures ka feedback hamesha bahot zabardast raha tha.
Wo mahiney ke ek weekend gaon mein apne school mein guzaara karta tha aur wahan rehne ke dauraan wo zindagi ke ek naye rukh se shanasaai haasil kar raha tha.
“Ham ne apni ghurbat apne deyhaat mein chhupa di hai. Bilkul usi tarah jaise log mitti ko carpet ke niche chupa dete hain.”
Is school ki taamir ka aaghaz karte hue Furqan ne ek baar usse kaha tha aur wahan guzaarey jaane wale din use is jumley ki haulnaaki ka ehsaas dilaate. Aisa nahin tha ke wo Pakistan mein ghurbat ki maujoodgi se naa aashna tha. Wo UNESCO aur UNICEF mein kaam ke dauraan dusrey Asian mumaalik ke sath Pakistan ke barey mein bhi bahot saari reports dekhta raha tha magar Pakistan mein ghurbat ki aakhri hadon ko bhi paar kar jaane wale logon ko wo pehli baar zaati taur par dekh raha tha.
“Pakistan ke 10-15 badey shehron se nikal jaayein to ehsaas hota hai ke chhotey shehron mein rehne wale log teesri nahin baarhawin duniya mein rehte hain. Wahan to logon ke paas na rozgaar hai na sahoolatein. Wo apni aadhi zindagi khwahish mein guzaar dete hain aur aadhi hasrat mein mubtala ho kar. Kaun si ikhlaaqiyaat sikha sakte hain aap us shakhs ko jis ka din sookhi roti se shuru hota hai aur faaqey par khatm ho jaata hai. Aur ham……… ham logon ki bhook mitaaney ke bajaye masjidon par masjidein taamir karte hain. Aalishaan masjidein, pur shikoh masjidein, marble se aarasta masjidein. Baaz auqaat to ek hi sadak par 10-10 masjidein khadi ho jaati hain, namaaziyon se khaali masjidein.”
Furqan talkhi se kehta tha.
“Is mulk mein itni masjidein ban chuki hain ke agar pura Pakistan ek waqt ki namaaz ke liye masjidon mein ikattha ho jaaye to bahot si masjidein khaali reh jayengi. Main masjidein banane par yaqeen nahin rakhta. Jahan log bhook se khud kushiyan karte phir rahe hon, jahan kuch khaas tabqon ki puri nasl jahalat ke andheron mein bhatakti phir rahi ho, wahan masjid ke bajaye madarsey ki zarurat hai. School ki zarurat hai. Taalim aur sha’oor hoga aur rizq kamane ke mawaqey, to Allah se mohabbat hogi warna sirf shikwa hoga.
Wo Furqan ki baatein khamushi se sunta tha. Usne mustaqil taur par gaon jaana shuru kiya to use andaza hua tha ke Furqan theek kehta tha. Ghurabt logon ko kufr tak le gayi thi. Chhoti chhoti zaruratein un ke aasaab par sawaar thin aur jo un maamuli zaruraton ko pura kar deta wo jaise uski ghulami karne par tayyar ho jaate. Usne jis weekend par gaon jaana hota school mein log apne chhote mote kaamon ke liye jama ho jaate. Baaz dafa logon ki qataarein hotin.
“Bete ko shaher ki kisi factory mein kaam par rakhewa dein. Chaahe hazar rupya hi mil jaaye magar kuch paisa to aaye.”
“2 hazar rupye mil jaate to main apni beti ki shadi kar deta.”
“Barish ne saari fasl kharab kar di. Agli fasl lagane ke liye beej kharidney tak ke liye paise nahin hain. Aap thode paise qarz ke taur par de dein. Main fasl kaatne ke baad de dunga.”
“bete ko police ne pakad liya hai, qusoor bhi nahin batate bas kehte hain hamari marzi jab tak chahein andar rakhein.”
“Patwaari meri zameen par jhagda kar raha hai. Kisi aur ko allot kar raha hai. Keha hai mere kaghaz jaa’li hain.
“Beta kaam ke liye paas ke gaon jaata hai. Roz 8 meel chal kar aana padta hai. Aap ek cycle le dein maherbani hogi.”
“Ghar mein paani kam hand pump lagwana hai aap madad karein.”
Wo ta’jjub se un darkhwaston ko sunta ha. Kya logon ke ye maamuli kaam bhi unke liye pahaad ban chuke hain. Aisa pahaad jise uboor karne ke liye wo zindagi ke kai saal zaaye kar dete hain. Wo sochta.
Mahine ke ek weekend par jab wo wahan aata to apne sah 10-15 hazar rupaye zyada le kar aata. Wo rupaye chhote chhote tukdon mein bahot se logon ko ki bazaahir badi laikin bahot chhoti zaruratein puri kar dete the. Unki zindagi mein kuch aasaniyan le aate. Uske likhe hue chand sifaarishi ruq’e aur phone calls logon ke kandhon ke bojh aur pairon mein naa nazar aane wali bediyon ko kaise utaar dete, iska ehsaas shayad khud Salar ko bhi nahin tha.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-133/
Prev episode:
https://theothermeunfolded.com/blog/peer-e-kaamil-roman-urdu-umera-ahmed-episode-131/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar