Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Wo Salar ke sath Khana-e-Kaaba ke sehan mein baithi hui thi. Salar uske dayen jaanib tha. Wo wahan unki aakhri raat thi. wo pichhley 15 din se wahan the. Kuch der pehle unhon ne tahajjud ada ki thi. wo tahajjud ke nawafil ke baad wahan se chale jaaya karte the. Aaj nahin gaye, aaj wahin baithe rahe. Un ke aur Khana-e-Kaaba ke darwazey ke darmiyaan bahot log the aur bahot faasla tha. Iske bawajood wo donon jahaan baithey the wahan se Khana-e-Kaaba ke darwazey ko bahot aasani se dekh sakte the.
Wahan baithtey waqt un donon ke zahen mein ek hi khwaab tha. Wo us raat ko ab apni aankhon se dekh rahe the. Haram-e-Paak ke farsh par us jagah ghutnon ke bal baithe hue Salar Surah Rehman ki tilawat kar raha tha. Imama jaan boojh kar uske barabar baithney ki bajaye bayen jaanib uske aqab mein baith gayi. Salar ne tilawat karte hue gardan mod kar use dekha phir uska hath pakad kar aahistagi se apne barabar wali jagah ki taraf ishaara kiya. Imama utha kar uske barabar baith gayi. Salar ne uska hath chhod diya. Wo ab Khana-e-Kaaba ke darwazey par nazar jamaye hue tha. Imama bhi Khana-e-Kaaba ko dekhne lagi. Wo Khana-e-Kaab ko dekhte hue us khush-ul-haan aawaz ko sunti rahi jo uske shauhar ki thi.
Fabi’ayyi aalai rabbikuma tukazzibaan
(tum apne parwardigaar ki kaun kaun si neymaton ko jhutlaogey?)
9 saal pehle Hashim Mubeen ne uske chehrey par thappad maartey hue kaha tha.
“Saari duniya ki zillat aur ruswaai, badnaami aur bhook tumhara muqaddar ban jayegi.”
Unhon ne uske chehrey par ek aur thappad maara.
“Tumhare jaisi ladkiyon ko Allah zaleel-o-khwaar karta hai. Kisi ko munh dikhane ke qaabil nahin chhodta.”
Imama ki aankhein nam ho gayin.
“Ek waqt aayega jab tum dobara hamari taraf lautogi. Mannat samajat karogi, gidgidaogi. Tab ham tumhein dhutkaar denge. Tab tum cheekh cheekh kar apne munh se apne gunaah ki maafi maangogi. Kahogi ke main ghalat thi.”
Imama ashk baar aankhon se muskurayi.
“Meri khwahish hai baba!” Usne zair-e-lab kaha. “Ke main zindagi mein ek baar aap ke saamne aaun aur aap ko bata dun ke dekh lijiye, mere chehrey par koi zillat, koi ruswaai nahin hai. Mere Allah aur mere Paighambar ﷺ ne meri hifaazat ki. Mujhe duniya ke liye tamasha nahin banaya, na duniya mein banaya hai na hi aakhrat mein main kisi ruswaai ka saamna karungi aur main aaj agar yahan maujood hoon to sirf is liye kyun ke main seedhey raastey par hoon aur yahan baith kar main ek baar phir iqraar karti hoon ke Muhammad ﷺ Allah ke aakhri Rasool hain. Unke baad koi paighambar na aaya hai aur na hi kabhi aayega. Main iqraar karti hoon ke wahi Peer-e-Kaamil hain. Main iqraar karti hoon ke unse kaamil tareen insaan dusra koi nahin. Unki nasl mein bhi koi unke barabar aaya hai na hi kabhi aayega. Aur main Allah se dua karti hoon ke wo mujhe aane wali zindagi mein bhi kabhi apne sath shirk karwaye na hi mujhe aakhri Paighambar Muhammad ﷺ ke barabar kisi ko laa khada karne ki jurrat ho. Main dua karti hoon ke Allah zindagi bhar mujhe seedhey raastey par rakhe. Bey shak main uski kisi neymat ko nahin jhutla sakti.”
Salar ne Surah Rehman ki tilawat khatm kar li thi. wo chand lamhon ke liye ruka phir sajdey mein chala gaya. Sajdey se uthne ke baad wo khada hote hue ruk gaya. Imama aankhein band kiye donon hath phailaye dua kar rahi thi. wo uski dua khatm hone ke intezaar mein baitha gaya. Imama ne dua khatm ki.
Salar ne uthna chaha, wo uth nahin saka. Imama ne bahot narmi ke sah uska dayan hath pakad liya. Wo hairat se use dekhne laga.
“Ye jo log kehte hain na ka jis se mohabbat hui wo nahin mila. Aisa pata hai kyun hota hai?”
Raat ke is pichhley paher narmi se uska hath thaamey wo bheegi aankhon aur muskuratey chehrey ke sath keh rahi thi.
“Mohabbat mein sidq na ho to mohabbat nahin milti. 9 saal pehle main ne jab Jalaal se mohabbat ki to purey sidq ke saath ki. Duayein, wazeefey, mannatein, kya tha jo main ne nahin kar chhoda magar wo mujhe nahin mila.”
Wo ghutnon ke bal baithi hui thi. Salar ka hath uske hath ki narm giraft mein uske ghutney par dhara tha.
“Pata hai kyun? Kyun ke us waqt tum bhi mujh se mohabbat karne lage the aur tumhari mohabbat mein meri mohabbat se zyada sidq tha.”
Salar ne apne hath ko dekha. Uski thoodi se tapakney wale aansu ab uske hath par gir rahe the. Salar ne dobara Imama ke chehrey ki taraf dekha.
“Mujhe ab lagta hai ke Allah ne mujhe bahot pyaar se banaya tha. Wo mujhe kisi aise shakhs ko saunpney par tayyar nahin tha jo meri naa qadri karta, mujhe zaaye karta aur Jalaal, wo mere sath yahi sab kuch karta. Wo meri qadr kabhi na karta. 9 saal mein Allah ne mujhe har haqeeqat bata di. Har shakhs ka andar aur bahar dikha diya aur phir usne mujhe Salar Sikandar ko saunpa kyun ke wo jaanta tha ke tum wo shakhs ho jis ki mohabbat mein sidq hai. Tumhare alawa aur kaun tha jo mujhe yahan le kar aata. Tum ne theek kaha tha, tum ne mujh se paak mohabbat ki thi.”
Wo bey his-o-harkat use dekh raha tha. Wo ab uske hath ko narmi se chumtey hue baari baari apni aankhon se laga rahi thi.
“Mujhe tum se kitni mohabbat hogi, main nahin jaanti. Dil par mera ikhteyaar nahin hai magar main jitni zindagi tumhare sath guzarungi tumhari wafadaar aur farmaan bardaar rahungi. Ye mere ikhteyaar mein hai. Main zindagi ke har mushkil marhaley, har aazmaish mein tumhare sath rahungi. Main achchey dinon mein tumhari zindagi mein aayi hoon, main burey dinon mein bhi tumhein akela nahin chhodungi.” Usne jitni narmi se uska hath thaama tha usi narmi se chhod diya. Wo ab sar jhukaaye donon hathon se apne chehrey ko saaf kar rahi thi.
Salar kuch kahe baghair uth kar khada ho gaya. Wo Khana-e-Kaaba ke darwazey ko dekh raha tha. Bila shubah use zameen par utaari jaane wali saaleh aur behtreen aurton mein se ek bakhsh di gayi thi. Wo aurat jis ke liye 9 saal usne har waqt aur har jagah dua maangi thi.
Kya Salar Sikandar ke liye neymaton ki koi had reh gayi thi? Aur ab jab wo aurat uske sath thi to use ehsaas ho raha tha ke wo kaisi bhaari zimmey daari apne liye le baitha tha. Use us aurat ka kafeel bana diya gaya tha jo neki aur paarsaai mein usse kahin aage thi.
Imama uth khadi hui. Salar ne kuch kahe baghair uska hath thaam kar wahan se jaane ke liye qadam badha diya. Use us aurat ki hifaazat saunp di gayi thi jis ne apne ikhteyaar ki zindagi ko uski tarah kisi aalaish aur ghalazat mein nahin duboya. Jis ne apni tamaam jismani aur jazbaati kamzoriyon ke bawajood apni rooh aur jism ko uski tarah nafs ki bhent nahin chadhaya. Uska hath thaamey qadam badhate hue use zindagi mein pehli baar paarsaai aur taqwa ka matlab samajh mein aa raha tha. Wo usse chand qadam peechey thi. wo Haram-e-Paak mein baithey logon ki qataaron ke darmiyaan se guzar rahe the.
Wo apni puri zindagi ko jaise film ki kisi screen par chalta dekh raha tha aur use bey tahaasha khauf mehsoos ho raha tha. Gunaahon ki ek lambi fehrist ke bawajood usne sirf Allah ka karam dekha tha aur iske bawajood is waqt koi usse zyada Allah ke ghazab se khauf nahin kha raha tha. Wo shakhs jis ka IQ level 150 tha aur jo photographic memory rakhta tha, 9 saal mein jaan gaya tha ke in donon cheezon ke sath bhi zindagi ke bahot saarey muqamaat par insaan kisi andhey ki tarah thokar kha kar gir sakta tha. Wo bhi gira tha, bahot baar ……… bahot muqamaat par ……….. tab uska IQ level uske kaam aaya tha na uski photographic memory.
Sath chalti hui ladki wo donon cheezein nahin rakhti thi. uski mutthi mein hidayat ka ek nanha sa jugnu tha aur wo us jugnu se umadti raushni ke sahaarey zindagi ke har ghup andherey se koi thokar khaye baghair guzar rahi thi.
THE END
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-196/
Prev episode:
https://theothermeunfolded.com/blog/peer-e-kaamil-roman-urdu-umera-ahmed-episode-194/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar