Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Furqan Anita ki shadi mein waqai aa gaya tha. Wo khaasi der wahan ruka magar Salar ko mehsoos hua ke wo kuch hairaan ha.
“Tumhari family to khaasi maghrib zadah hai.” Salar ko us ki uljhan aur hairaani ki wajah samajh mein aa gayi.
“Mera khayal tha ke tumhari family kuch conservative si hogi kyun ke tum ne bataya tha ke tum hafiz-e-Quran ho aur tumhara lifestyle mujhe kuch saada sa laga agar mujhe yahan aa kar hairaani hui. Tum aur tumhari family mein bahot farq hai. I think you are the odd one out.”
Wo apne aakhri jumley par khud hi muskura diya. Wo donon ab Furqan ki gaadi ke qareeb pahonch chuke the.
“Main ne sirf do saal pehle Quran hifz kiya aur 2-3 saal se hi main odd one out hua hoon. Pehle main apni family se bhi zyada maghrib zadah tha.” Usne Furqan ko bataya.
“2 saal pehle Quran paak hifz kiya. America mein apni studies ke dauraan, mujhe yaqeen nahin aa raha.” Furqan ne be yaqeeni se kaha. “Kitne arsey mein kiya?”
“Taqreeban 8 maah mein.”
Furqan kuch der tak kuch nahin keh saka, wo sirf hairat se uska chehra dekhta raha. Phir usne ek gehra saans le kar sataaishi nazron se use dekha.
“Tum par Allah ka koi khaas hi karam hai, warna jo kuch tum mujhe bata rahe ho ye aasan kaam nahin hai. Main flight mein bhi tumhare kaarnaamon se kaafi muta’assir hua tha, kyun ke jis umr mein UNICEF mein jis seat par kaam kar rahe ho har koi nahin kar sakta.” Usne badi garm joshi ke saath Salar se hath milaya. Chand lamhon ke liye Salar ke chehrey ka rang tabdeel hua.
“Allah ka khaas karam! Agar main ise ye bata doon ke main saari zindagi kya karta raha hoon to ye………” Salar ne usse hath milate hue socha.
“Tum parson kisi school ki baat kar rahe the.” Salar ne daanista taur par mauzoo badla. “Tum Islamabad mein nahin rehte?”
“Nahin, main Islamabad mein hi rehta hoon magar mera ek gaon hai. Aabayi gaon, wahan hamari kuch zameen hai, ek ghar bhi tha.” Furqan use tafseel se batane laga. “Kai saal pehle mere waldain Islamabad shift ho gaye the. Mere walid ne federal service se retirement ke baad wahan apni zameenon par ek school bana liya. Us gaon mein koi school nahin tha. Unhon ne primary school banwaya tha. 7-8 saal se main use dekh raha hoon. Ab wo secondary school ban chuka hai. 4 saal pehle main ne wahan ek dispensary bhi banwayi. Tum us dispensary ko dekh kar hairaan reh jaaoge. Bahot jadeed samaan hai us mein. Mere ek dost ne ek ambulance bhi gift ki hai aur ab sirf mere gaon ke hi nahin balke ird gird ke bahot saare gaon ke log bhi school aur dispensary se faayda utha rahe hain.”
Salar uski baatein tawajjoh se sun raha tha.
“Magar tum ye sab kyun kar rahe ho. Tum ek surgeon ho, tum se sab kaise kar lete ho aur is ke liye bahot paise ki zarurat hai.”
“Kyun kar raha hoon, ye to main ne apne aap se kabhi nahin pucha. Mere gaon mein itni ghurbat thi ke ye sawaal puchne ki mujhe kabhi zarurat hi nahin padi. Ham log bachpan mein kabhi kabhaar apne gaon jaaya karte the. Ye hamare liye tafreeh thi. Hamari haveli ke alawa gaon ka koi makaan pakka nahin tha aur sadak ka to sawaal hi paida nahin hota. Ham sab ko yun lagta tha jaise ham jungle mein aa gaye hain, ab agar ham jaanwar hote to hamein koi farq nahin padta. Shaher ki tarah ham jungle mein dandanaate phirte. Yahi soch kar ke gaon ke log ham sab se mar’oob hain aur koi bhi hamare jaisa nahin. Na koi hamari tarah rehta hai, na hamare jaisa khata hai, na hamare jaisa pahenta hai magar insaan ho kar ye bardaasht karna mushkil ho jaata hai ke hamare ird gird ke insaan jaanwaron jaisi zindagi guzaarne par majboor hain. Ho sakta hai kuch insaanon ko is se khushi mehsoos hoti ho ke unhein har neymat mayassar hai aur baaqi sab taras rahe hain magar hamara shumaar aise logon mein nahin hota. Ab sawaal ye paida hota tha ke kya kiya jaaye. Mere paas koi jaadu ki chhadi to thi nahin ke main use hilaata aur sab kuch badal deta, na hi bey shumaar wasail. Tumhein main ne bataya hai na ke mere waalid civil servant the, imaandaar qism ke civil servant. Main aur mera bhai donon shuru se hi scholarship pa padhte rahe, isliye ham par hamare waldain ko zyada kharch nahin karna pada. Khud wo bhi koi fizool kharch nahin the, isliye thodi bahot bachat hoti rahi. Retirement ke baad mere waalid ne socha ke Lahore ya Islamabad ke kisi ghar mein akhbaar padh kar, walk kar ke ya TV dekh kar zindagi guzaarne ki bajaye, unhein apne gaon jaana chahiye. Wahan kuch behtari laane ki koshish karni chahiye.”
Wo donon gaadi ke andar baithe hue the.
“Mushkilaat ka to tum andaza nahin kar sakte. Gaon mein na bijli thi, na saaf paani, kuch bhi nahin tha. Baba ne pata nahin kahan kahan bhaag kar ye saari cheezein manzoor karwayin. Jab wahan primary school ban gaya, ek sadak bhi aa gayi, bijli aur paani jaisi sahoolatein bhi aa gayin to government ko achaanak wahan ek school banane ka khayal aaya. Mere waldain ko khushi thi ke government unke school ko apni zair-e-nigraani le le. Usmein apni teachers bhi bhijwaye aur kuch arsey baad us school ko upgrade kar de, magar mohakma-e-taleem ke sath chand raabton mein hi baba ko andaza ho gaya ha ke aisa hone ki surat mein unki saari mehnat par paani phir jayega. Baba wahan bachchon ko sab kuch dete the. Kitaabein, kaapiyaan, uniform aur aisi kuch zaruri cheezein. Unhon ne baqaaida iske liye funds rakhe hue the, magar tum andaza kar sakte ho ke government ke paas chale jaane ke baad us school ka kya hashr hota. Sab se pehle wo funds jaate phir baaqi sab kuch. Isliye baba khud hi school ko chalate rahe.
Mohakma-e-taleem ne wahan school phir bhi khola magar wahan ek bachcha bhi nahin gaya phir haar maan kar unhon ne wo school band kar diya aur hamare school ko upgrade kar diya. Baba ke kuch doston ne is silsiley mein unki madad ki, isi tarah iski upgrading hoti gayi. Main un dinon London mein padhta tha aur main rupaye bacha bacha kar bheja karta tha. Abhi bhi ham isko aur taraqqi de rahe hain. Aas paas ke gaon ke log bhi apne bachon ko hamare paas bhijwaatey hain. Main jab Pakistan wapas aaya to main ne wahan ek baa zaabta qism ki dispensary qayem ki. Gaon ki aabadi bhi ab bahot badh gayi hai laikin gaon mein ghurbat abhi bhi mukammal taur par khatm nahin hui. Taleem se itna zarur hua hai ke gaon ke kuch bachche bahar shaher mein aage padhne ke liye jaane lage hain. Kuch mukhtalif hunar seekh rahe hain. Wo jo ghurbat ka ek chakkar tha wo khatm ho raha hai. Un ki ye naslein nahin to agli naslein shayad tumhare aur mere jaise taleemi adaaron se aala degrees le kar niklein, kaun keh sakta hai.” Wo muskuratey hue bola.
“Main har maah ek weekend par ghar jaata hoon, wahan 2 compounder hain magar koi doctor nahin hai. Ek weekend par main wahan jaata hun, baaqi 3 weekends par bhi ham kisi na kisi ko wahan bhijwa dete hain. Phir wahan main har 3 maah baad ek medical camp lagwata hoon.”
“Aur is sab ke liye paisa kahan se aata hai?”
“Shuru mein to ye baba ka rupya tha. Un hi ki zameen par school bana, unki graduity se uski tameer hui. Meri ammi ne bhi apne paas maujood raqm se unki madad ki, phir baba ke kuch dost bhi maali imdaad karne lage. Uske baad main aur Mehraan bhi is mein shaamil ho gaye phir mere kuch dost bhi. Main apni income ka ek khaas hissa har maah gaon bhijwa deta hoon. Is se dispensary aaram se chalti rehti hai, jo doctors whan mahine ke 3 weekends par jaate hai wo kuch charge nahin karte, unke liye ye social work hai. Medical camps bhi isi tarh ke lag jaate hain aur school ke paas ab itne fixed deposits ho chuke hain ke un se aane wali raqm teachers ki tankhwaah aur dusrey akhraajaat ke liye kaafi hoti hai. Ham chand saalon mein wahan technical education ke liye bhi kuch kaam karna chahte hain.”
“Tum kab jaa rahe ho wahan?”
“Main to subah nikal raha hoon.”
“Agar main tumhare sath jaana chahun?” Salar ne kaha.
“Most welcome………. Magar kal to walima hoga, tum yahan masroof hoge.” Furqan ne yaad dilaya.
“Walima to raat ko hai, saara din to main faarigh hi rahunga. Kya raat ak pahonchna mushkil hoga?”
“Nahin, bilkul bhi nahin. Tum bahot aasani se pahonch sakte ho. Sirf subah kuch jaldi nikalna padega. Agar tum waqai wahan chand ghantey guzaarna chahte ho, warna phir tum wapas aa kar khaasey thak jaoge.” Furqan ne usse kaha.
“Main nahin thakunga, main UNICEF ki teams ke sath kaise kaise ilaaqon mein safar karta raha hoon, tumhein iska andaza nahin ho sakta. Main Fajr ke baad tayyar rahunga, tum mujhe waqt bata do.”
“Saadhe paanch.”
“okay, tum ghar se nikalte hue mujhe ek baar mobile par call kar lena aur 2-3 baar horn dena yahan aa kar, main nikal aaunga.”
Us ne Furqan se kaha aur phir khuda hafiz kehta hua andar mud gaya.
Agli subah Furqan theek 5:30 baje uske gate par horn de raha tha aur Salar pehli hi horn par bahar tha.
“Tum wapas Pakistan kyun aa gaye? Tum England mein bahot aage jaa sakte the.” Gaadi shaher se bahar wali sadak par daud rahi thi. Unhein safar karte hue aadha ghanta ho gaya tha jab Salar ne achanak usse pucha.
“England ko meri zarurat nahin thi, Pakistan ko thi, isliye main Pakistan aa gaya.” Furqan ne bade normal andaaz mein kaha.
“Wahan ek Dr. Furqan ke na hone se koi farq nahin padta. Yahan ek Dr. Furqan ke na hone se bahot farq pad jaata. yahan meri khidmaat ki zarurat hai.” Usne aakhri jumley par zor dete hue kaha.
“Magar wahan itne saalon mein tum bahot aage jaa sakte the. Phir professionally bhi tum bahot kuch seekhte. Financially bhi tum is project ke liye zyada rupya haasil kar sakte the, jo tum ne shuru kiya hai. Afterall, Pakistan mein tum itne kaamyaab nahin ho sakte.” Salar ne kaha.
“Agar kaamyaabi se tumhari muraad Pounds ki taadaad aur sahulaton se hai to haan, donon jaghon ka koi muqaabla nahin hai laikin agar tumhara ishaara ilaaj ki taraf hai to main yahan zyada logon ko zindagi baant raha hoon. Jo itmenaan doctor apne sehat yaab hone wale mareez ko dekh kar haasil karta hai tum uska andaza nahin kar sakte. England Oncologists se bhara hua hai. Pakistan mein unki taadaad ungliyon par gini jaa sakti hai. Main wahan reh kar paison ka dher bhi yahan bhijwata rehta to koi farq na padta. Jahan ek fard ki kami hoti hai, wahan us fard se hi wo kami puri hoti hai. Rupya ya dusri koi cheez uski jagah nahin le sakta. Main bahot qaaney hoon Salar! Meri puri family bahot qaaney hai. Agar main ne koi cheez seekhi hai to wo sab se pehle mere apne logon ke kaam aani chahiye. Main apne logon ko marta chhod kar dusre logon ki zindagi nahin bacha sakta. Pakistan mein kuch bhi saheeh nahin hai, sab kuch kharaab hai, kuch bhi theek nahin, sahulaton se khaali hospitals aur had se zyada bura aur corrupt health system. Jis buraai aur khaami ka socho wo yahan hai magar is jagah ko chod nahin sakta. Agar mere hath mein shifa hai to phir sab se pehle ye shifa mere apne logon ke hissey mein aani chahiye.”
Salar bahot der tak kuch nahin bol saka. Gaadi mein ek dam khamushi chhaa gayi.
“Tum ne mujh se to ye sawaal puch liya hai ke main Pakistan kyun aa gaya, kya ab main tum se ye sawaal puchun ke tum Pakistan kyun nahin aa jate?” Furqan ne kuch der ki khamushi ke baad muskurate hue kaha.
“Main yahan nahin reh sakta.” Salar ne be ikhteyaar kaha.
“Tum paison aur sahulaton ki wajah se ye keh rahe ho?”
“Nahin, paisa aur sahulatein mera mas’ala nahin, na ab, na hi pehle kabhi. Tum mera family background jaan chuke ho.”
“Phir?”
“Phir……… kuch bhi nahin. Bas main yahan nahin aa sakta.” Us ne qatai lehjey mein kaha.
“Yahan tumhari zarurat hai.”
“Kis ko?”
“Is mulk ko.”
Salar be ikhteyaar muskuraya. “Main tumhari tarah ki hubbul-watni nahin rakhta. Mere baghair bhi sab kuch theek hai yahan. Ek doctor ki aur baat hai magar ek economist to kisi ko zindagi aur maut nahin de sakta.”
“Tum jo services wahan de rahe ho, wo yahan ke adaaron ko de sakte ho. Jo kuch apne lectures mein wahan ki universities mein sikha rahe ho, yahan ki universities mein sikha sakte ho.”
Uska dil chaha, wo Furqan se kahe ke wo yahan aa kar kuch bhi sikhaane ke qaabil nahin reh sakega, magar wo khamushi se uski baat sunta raha.
“Tum ne Africa ki ghurbat, bhuk aur bimari dekhi hai. Tum yahan ki ghurbat, bhuk aur bimari dekhoge to hairaan reh jaoge.”
“Yahan surat-e-haal un mulkon ki tarah kharaab nahin hai Furqan! Yahan utni pasmaandagi nahin hai.”
“Islamabad ke jis sector mein tum pale badhe ho wahan reh kar ird gird ki zindagi ka andaza lagana bahot mushkil hai. Tum Islamabad ke qareebi gaon mein chale jao to tumhein andaza ho jayega ke ye mulk kitna khush haal hai.”
“Furqan! Main tumhare project mein kuch contribution karna chahta hoon.” Salar ne ek dam baat ka mauzoo badalna chaha.
“Salar! Mere is project ko filhaal kisi madad ki zarurat nahin hai. Tum agar aisa koi kaam karna chahte ho to tum khud kisi gaon mein is tarah ka kaam shuru karo, tumhare paas funds ki kami nahin hogi.”
“Mere paas waqt nahin hai, main America mein baith kar ye sab kuch nahin chala sakta. Tum agar ye chahte ho ke kisi dusrey gaon mein bhi koi school qayem kiya jaaye to main use support karne ko tayyar hoon. Mere liye zaati taur par waqt dena mushkil hai.”
Furqan is baar khamush raha. Shayad use andaza ho gaya tha ka Salar ab uske is israar par kuch jhunjhla raha tha. Baat ka mauzoo ek baar phir Furqan ke gaon ki taraf mud gaya.
Wo din Salar ki zindagi ke yaadgaar tareen dinon mein se tha. Wo us school ko dekh kar waqai bada muta’assir hua tha magar usse bhi zyada muta’assir wo us dispensary ko dekh kar hua tha jahan wo gaya tha. Use ek chota hospital kehna zyada behtar tha. Doctor ke na hone ke bawajood wo bade munazzam tariqey se chalaya jaa raha tha. Us din Furqan ki aamad mutawaqqa tha aur uske intezaar mein mareezon ki ek badi taadaad bhi maujood thi, Furqan aate hi masroof ho gaya. Hospital ka ahaata mareezon se bhara hua tha. Wahan har umr aur har tarah ke mareez the. Nau zaaida bachche, aurtein, budhey, jawaan.
Salar ahaatey mein laa sha’oori taur par chahel qadmi karta raha. Wahan maujood chand logon ne use bhi doctor samjha aur uske qareeb chale aaye. Salar unse baat cheet karne laga.
Zindagi mein pehli baar wo cancer ke ek specialist ko ek physician ke taur par check up karte aur nuskhey likhte dekh raha tha aur usne aitraaf kiya. Usne zindagi mein Furqan se acha doctor kabhi nahin dekha tha. Wo bey had professional aur bey had narm mizaaj tha. Is tamaam amal mein uske chehrey ki muskuraahat ek lamhey ke liye bhi ghayab nahin hui thi. Salar ko yun laga jaise usne apne honton par muskurahat ko kisi cheez ke sath chipkaya hua tha. Kuch waqt guzarne ke baad usne Salar ko ek aadmi ke sath school bhijwa diya tha. Wo wahan uske waldain se mila.
Wo uski aamad se pehle hi baa khabar the. Yaqeenan Furqan ne unko phone par bata diya tha. Wo unke sath school mein pirta raha. School ki imaarat uski tawaqqo’aat se bar-aks bahot wasee aur bahot achi bani hui thi. Use wahan maujood bachchon ki taadaad dekh kar bhi hairat ho rahi thi.
Wahan kuch ghantey rukne ke baad wo un dono ke sath unki haveli mein aa gaya. Haveli ke bairooni darwaze se andar daakhil hote hi be ikhteyaar uska dil khush hua tha. Use is gaon mein is qism ke shaandaar lawn ki tawaqqo nahin thi. Wahan paudon ki bharmaar thi magar bey tarteebi nahin thi.
“Bahot shaandaar lawn hai, bahot artistic.” Wo tareef kiye baghair nahin reh saka.
“Ye Shakeel sahab ka shauq hai.” Furqan ki ammi ne kaha.
“Mera aur Nausheen ka.” Furqan ke walid ne izafa kiya.
“Nausheen?” Salar ne sawaliya andaaz mein kaha.
“Furqan ki biwi……ye artistic touch usi ka hai.” Unhon ne muskuratey hua kaha.
“Furqan ne mujhe bataya tha ke uski family Lahore mein hoti hai.” Salar ko yaad tha.
“Haan, wo log Lahore mein hi hote hain magar Furqan mahiney mein ek weekend yahan guzaarta hai to wo apni family bhi yahan laata hai.Ye slides us ke bachchon ke liye lagwai hain. Nausheen bhi doctor hai. Abhi bachche chote hain, isliye practice nahin karti magar jab yahan aati hai to Furqan ke sath dispensary jaati hai. Is baar wo apne bhai ki shadi mein masroof thi is liye Furqan ke sath nahin aa saki.” Wo idhar udhar nazrein daudaata un ki baatein sunta raha.
Wo unke sath lunch karne ke liye ghar aaya tha aur uska khayal tha ke kuch der tak Furqan bhi aa jayega magar jab khana lagna shuru ho gaya to usne Furqan ke barey ein pucha.
“Wo do paher ka khana nahin khata. Sirf ek sandwish aur chai ka cup leta hai. Us mein bhi 5 minute se zyada nahin lagte. Uske paas mareez itne hote hain ke wo shaam tak bilkul faarigh nahin hota. Khana wana bilkul bhool jaata hai.”
Furqan ki ammi ne usse kaha. Wo un ke sath batein karte hue khana khane laga. Furqan ke walid finance division mein kaam karte rahe the aur 20th grade mein retire hue the. Ye jaan kar ke Salar ka talluq bhi finance se hi tha, unke josh mein kuch izafa ho gaya tha. Salar ko un se baat karte hue waqt guzarne ka ehsaas tak nahin hua. Salar ne un se is school ke hawaley se baat ki.
“School ke liye hamein filhaal kisi cheez ki zarurat nahin hai. Hamare paas khaasey funds hain. Furqan ka ek dost ek naya block bhi banwa raha hai balke ban hi chuka hai, tum ne to dekha hi hai. Haan, tum agar kuch karna chahte ho to dispensary ke liye kar do. Hamein ek mustaqil doctor ki zarurat hai aur ham uske liye health ministry mein bahot dafa darkhwaastein de chuke hain. Furqan ne apne talluqaat bhi istemaal kiye hain magar koi bhi doctor yahan mustaqil taur par aa kar rehne ko tayyar nahin aur hamein ek doctor ki ashad zarurat hai. Tum ne mareezon ki taadaad to dekhi hi hogi. Ek qareebi gaon mein ek dispensary aur doctor hai, magar doctor mustaqil chutti par hai aur agla doctor bhi aane se pehle hi chutti par chala jaata hai.”
“Main is silsiley mein jo kuch kar saka zarur karunga laikin main chahta hoon ke is school ke liye bhi kuch karun. Main wapas jaane ke baad koshish karunga ke aap ko UNICEF ki taraf se kisi NGO ke zariye har saal kuch grant milti rahe.”
“Laikin hamein is ki zarurat nahin hai. Ye sab kuch jo tum ne dekha hai ye sab ham logon ne khud kiya hai. Hamari family, rishtey daaron ne, family friends ne, mere waaqif kaaron ne, mere bachchon ke doston ne. hamein kabhi kisi bain-ul-aqwaami agency ki grant ki zarurat nahin padi. Kab tak UNICEF aa kar hamare logon ki bhuk, jahaalat aur bimari khatm karti rahegi. Jo kaam ham apne wasail se kar sakte hain wo hamein apne wasail se hi karne chahiyen.”
“Main sirf ye chahta tha ke aap is project ko aur badhayein.” Salar be ikhteyaar bolte hue ladkhadaya.
“Ye bahot badh jayega, tum 20 saal baad yahan aa kar dekhoge to ye gaon tumhein ek mukhtalif gaon milega. Jitni ghurbat tum ne aaj yahan dekhi hai wo tab nahin hogi. Un ka kal aaj se mukhtalif hoga.”
Furqan ke walid ne bey had itmenaan se kaha. Salar chup chaap unhein dekhta raha.
Seh paher ke qareeb use Furqan ne dispensary se phone kiya. Kuch der rasmi guftgu ke baad usne Salar se kaha.
“Ab tumhein wapas Islamabad ke liye nikal jaana chahiye. Main chahta tha ke khud tumhein wapas chod kar aaun magar yahan bahot rush hai. Jo log dusre gaon se aate hain agar main unhein aaj check nahin kar saka to unhein bahot zehmat hogi, is liye main apne dispenser ko bhijwa raha hoon. Wo gaadi mein tumhein Islamabad chod aayega.” Use ne program tay kiya.
“Okay.” Salar ne kaha.
“Jaane se pehle dispensary aa kar mujhe mil lena.” Usne phone band karte hue kaha.
Salar ne ek baar phir Furqan ke waldain ke sath chai pi. Gaadi tab tak wahan aa chuki thi, phir wo wahan aa chuki thi, phir wo wahan se gaadi mein Furqan ke paas chala gaya. Subah wali bheed ab kam ho chuki thi. Wahan ab sirf 25-30 ke qareeb log the. Furqan ek budhey aadmi ka moaina kar raha tha. Salar ko dekh kar muskuraya.
“Main 2 minute mein inhein chod kar aata hoon.”
Usne mareez se kaha aur phir uth kar khada ho gaya. Salar ke sath chalta hua wo bahar gaadi tak aaya.
“Tum kab tak Pakistan mein ho?” Us ne Salar se pucha.
“Dedh hafta.”
“Phir to dobara mulqaat nahin ho sakegi tum se kyun ke main to ab agle hi maah Islamabad aur yahan aaunga laikin main tumhein phone karunga, tumhari flight kab hai?”
Salar ne uske sawaal ko nazar andaaz kiya.
“Mulaqaat kyun nahin ho sakti, main Lahore aa sakta hoon, agar tum invite karo.” Furqan kuch hairaan andaaz mein muskuraya.
Salar usse hath milate hue gaadi mein baith gaya.
Salar nahin jaanta tha use kaun si cheez is tarah achanak Furqan ke qareeb le aayi thi. Wo ye bhi nahin jaanta tha ke wo Furqan ko kyun itna pasand kar raha tha. Wo iski wajah samajhne se qaasir tha.
Furqan ke sath uska gaon dekhne ke 4 din baad wo Lahore gaya. Wo wahan ek din ke liye gaya tha aur usne Furqan ko phone par iski ittelaa di. Furqan ne use airport par pick karne aur apne sath rehne ki offer ki, magar usne inkaar kar diya.
Wo Furqan se tay shudah program ke mutabiq 4 baje ke qareeb uske ghar pahoncha. Wo ek ache ilaaqey mein ek imaarat ke ground floor ke ek flat mein rehta tha. Darwazey ke saath maujood bell daba kar wo khamushi se khada ho gaya. Andar se ek dam kisi bachche ke bhaagne ki aawaz aayi. Ek 4-5 saal ki bachchi door chain ke wajah se darwazey mein aane wali jhurri se usko dekh rahi thi.
“Aap ko kis se milna hai?” Salar use dekh kar dostaana andaz mein muskuraya tha magar us bachchi ke chehrey par koi muskurahat nahin aayi. Wo badi sanjeedgi se Salar se puch rahi thi.
“Beta! Mujhe aap ke papa se milna hai.”
Us bachchi aur Furqan ke chehrey mein itni mumaaslat thi ke uske liye ye andaza lagana mushkil nahin tha ke wo Furqan ki beti thi.
“Papa is waqt kisi se nahin milte.” Use badi sanjeedgi se ittelaa di gayi.
“Mujh se mil lenge.” Salar ne qadrey mehzooz hote hue kaha.
“Aap se kyun mil lenge?” Fauran jawaab aaya.
“Kyun ke main unka dost hoon, aap unhein jaa kar batayengi ke Salar uncle aaye hain to wo mujh se mil lenge.” Salar ne muskuratey hue narmi se kaha. Wo uski muskurahat se muta’assir nahin hui.
“Laikin aap mere uncle to nahin hain.”
Salar ko be ikhteyaar hansi aa gayi.
“Aap na hansein.” Wo be ikhteyaar bigdi. Salar panjon ke bal uske muqaabil baith gaya.
“Aap is frock mein bahot achi lag rahi hain.” Wo ab kuch qareeb se uska jaaiza lete hue bola. Uski taarif ne darwazey ki jhurri mein se jhaankti hui mohtarma ke ta’assuraat aur mood mein koi tabdeeli nahin ki.
“Laikin aap mujhe ache nahin lage.”
Uske jumley se zyada uske ta’assuraat ne Salar ko mehzooz kiya. Wo ab kuch dur se flat ke andar kisi ke qadmon ki aawaz sun raha tha.koi darwazey ki taraf aa raha tha.
“Kyun, main kyun acha nahin laga?” Us ne muskurate hue itmenaan se pucha.
“Bas ache nahin lage.” Us ne nagawari se gardan ko jhatka.
“Naam kya hai aap ka?” Wo kuch der use dekhti rahi phir usne kaha.
“Imama!” Salar ke chahrey ki muskurahat ghayab ho gayi. Us ne darwazey ki jhurri mein se Imama ke aqab mein Furqan ko dekhta. Wo Imama ko uthate hue darwaza khol raha tha.
Salar khada ho gaya. Furqan naha kar nikla tha, uske baal geeley aur bey tarteeb the. Salar ne muskurane ki koshish ki wo fauri taur par kaamyaab nahin ho saka. Furqan ne usse hath milaya.
“Main tumhara hi intezaar kar raha tha.” Wo uske sath andar jaate hue bola. Wo dono ab drawing room mein daakhil ho rahe the.
Imama Furqan ki godi mein chadhi hui thi aur use musalsal kaan mein kuch batane ki koshish kar rahi thi, jise Furqan musalsal nazar andaaz kar raha tha.
“Uncle Salar se mili hain aap?” Furqan ne Salar ko baithne ka ishaara karte hue Imama se pucha. Wo ab khud bhi sofe par baith raha tha.
“Ye mujhe ache nahin lagte.” Us ne baap tak apni naa pasandeedgi pahonchai.
“Bahot buri baat hai Imama! Aise nahin kehte.” Furqan ne sarzanish karne wale andaaz mein kaha.
“Aap uncle ke paas jayein aur un se hath milayein.”
Usne Imama ko niche utaar diya. Wo Salar ki taraf jaane ki bajaye ek dam bhaagtey hue bahar chali gayi
“Hairaani ki baat hai ke use tum ache nahin lage, warna us ko mera har dost acha lagta hai. Aaj uska mood kuch off hai.” Furqan ne muskurate hue wazahat ki.
“Ye naam ka asar hai mujhe hairaani hoti agar use main acha lagta.” Salar ne socha.
Chai peete hue wo donon aapas mein baatein kar rahe the aur baaton ke dauraan Salar ne usse kaha.
“1-2 haftey tak tum logon ki dispensary mein doctor aa jayega.” Us ne sarsari andaaz mein kaha.
“Ye to bahot achi khabar hai.” Furqan ek dam khush hua.
“Aur is baar wo doctor wahan rahega. Agar na rahe to mujhe batana.”
“Meri samajh mein nahin aata main tumhar shukriya kaise ada karun. Dispensary mein ek doctor ki dastiyaabi sab se bada mas’ala raha hai.”
“Uski zarurat nahin hai.” Wo ruka. “Wahan jaane se pehle mujhe ye tawaqqo nahin thi ke tum aur tumhari family is kaam ko is scale par aur utne organized andaaz mein kar rahe ho. Main tum logon ke kaam se dar haqeeqat bahot muta’assir hua hoon aur meri offer abhi bhi wahi hai. Main is project ke silsiley mein tumhari madad karna chahunga.”
Usne sanjeedgi se Furqan se kaha.
“Salar! Main ne tum se pehle bhi kaha hai ke main chahunga, tum isi tarah ka koi project wahan kisi dusrey gaon mein shuru karo. Tumhare paas mujh se zyada zaraa’y hain aur tum mujh se zyada ache tareeqey se ye project chala sakte ho.”
“Main ne tum se pehle bhi kaha tha mera mas’ala waqt ka hai, main tumhare jitna waqt nahin de sakta aur phir main Pakistan mein reh bhi nahin sakta. Tumhari tarah mere family members bhi is maamley mein meri madad nahin kar sakte.” Salar ne apna mas’ala bataya.
“Chalo is par baad mein baat karenge, abhi to tum chai piyo phir main tumhein apne sath le kar jaunga.” Furqan ne mauzoo badalte hue kaha.
“Kahan?”
“Ye to main tumhein raaste mein hi bataunga.” Wo ajeeb andaz mein muskuraya.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-119/
Prev episode:
https://theothermeunfolded.com/blog/peer-e-kaamil-roman-urdu-umera-ahmed-episode-117/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar