Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
“Main wahan jaa kar karunga kya?” Salar ne gaadi mein baithe hue Furqan se pucha.
“Wahi jo main karta hoon.” Wo signal par gaadi roktey hue bola.
“Aur tum wahan kya karte ho?”
“Ye tum wahan pahonch kar dekh lena.”
Furqan use kisi Dr. Sabt Ali ke paas le kar jaa raha tha jis ke paas wo khud bhi jaaya karta tha. Wo koi mazhabi aalim the aur Salar ko mazhabi ulma se koi dilchaspi nahin thi. Wo pichley chand saalon mein itne mazhabi ulma ke asli chehrey dekh chuka tha ke wo ab mazeed un jaghon par waqt zaaye nahin karna chahta tha.
“Frankly speaking Furqan! Main is type ka nahin hoon jis type ka tum mujhe samajh rahe ho.” Us ne kuch der khamush rehne ke baad Furqan ko mukhaatib kiya.
“Kis type ke?” Furqan ne gardan mod kar kaha.
“Yahi peeri muridi…….. ya bai’at waghaira……… ya jo bhi tum samajh lo.” Us ne qadrey saaf goi se kaha.
“Isliye to main tumhein wahan le jaa raha hoon, tumhein madad ki zarurat hai?” Salar ne chaunk kar use dkeha. Wo sadak ko dekh raha tha.
“Kaisi madad?”
“Agar koi hafiz-e-Quran raat ko ek parah padhe aur phir bhi neend laane ke liye use neend ki goliyaan khani padin to phir kahin na kahin kuch na kuch ghalat zarur hai. Kai saal pehle mujhe bhi ek baar bahot depression hua tha. Mera zahen bhi bahot ulajh gaya tha phir koi mujhe doctor sahab ke paas le kar gaya tha. 8-10 sal ho gaye hain mujhe ab wahan jaate hue. Tum se mil kar mujhe ehsaas hua ke tumhein bhi meri arah kisi ki madad ki zarura hai, rehnumayi ki zarurat hai.” Furqan ne narm lehje mein kaha.
“Tum kyun meri madad karna chahte ho?”
“Kyun ke kehta hai ke tum mere bhai ho.” Us ne mod modtey hue kaha. Salar ne gardan seedhi kar li. Wo usse mazeed kya puchta.
Use mazhabi ulma se koi dilchaspi nahin thi. Har aalim apne firqey ki taarif mein zameen aur aasman ke qalaabey milane mein maahir tha. Har aalim to apne ilm par ghuroor tha. Har aalim ka lab-e-lubaab yahi hota tha. Main acha hoon, baaqi sab burey hain. Main kaamil hoon baaqi sab naa mukammal hain. Har aalim ko dekh kar lagta us ne ilm kitaabon se nahin, baraah-e-raast wahi ke zariye haasil kiya hai jis mein ghalti ka koi imkaan hi nahin hai. Usne aaj tak aisa aalim nahin dkeha tha jo apne upar tanqeed sune aur bardaasht bhi kare.
Salar khud ahl-e-sunnat maslak se talluq rakhta tha magar jo aakhri cheez wo kisi se discuss karna chahta tha wo maslak aur firqa tha aur in mazhabi ulma ke paas discuss karne ke liye sab se pehli cheez maslak aur firqa hi tha. In ulma ke paas jaate jaate wo rafta rafta un se bargashta ho gaya tha. Unki potli mein sirf ilm bhara hua tha, amal nahin. Wo ‘gheebat ek gunaah’ par lamba chauda lecture dete, Qurani aayaat aur ahadees ke hawaley dete aur agli hi saans mein wo apne kisi ham asr aalim ka naam le kar uska mazaaq udaatey, uska ilmi jahaalat ko saabit karne ki koshish karte.
Wo apne paas aane wale har ek ka pura biodata jaante aur phir agar wo biodata unke kaam ka hota to mutaalbon aur sifaarishon ka ek lamba silsila shuru ho jaata aur us biodata ko wo apne paas aane walon ko muta’assir karne ke liye bhi istemaal karte ke unke paas kis waqt kaun aaya tha. Kis tarah kaun kaun un ke ilm se faizyaab hua tha. Kaun bada aadmi har waqt unki jootiyan seedhi karte rehne ko tayyar rehta hai. Kis ne unhein ghar bulaya aur kis tarah khidmat ki. Wo ab tak jin aalimon ke paas ek baar gaya tha dobara nahin gaya aur ab Furqan use phir ek aalim ke paas le kar jaa raha tha.
Wo shaher ke ache ilaaqon mein se ek main jaa pahonche the. Wo ilaaqa acha tha, magar posh nahin tha. Is sadak par pehle bhi bahot si gaadiyaan thin. Furqan ne bhi ek munaasib jagah par gaadi sadak ke kinarey park kar di, phir wo gaadi se neeche utar gaya. Salar ne bhi uski pairwi ki. 3-4 miute chalte rehne ke baad wo un banglon mein se ek nisbatan saada magar pur waqaar aur chhote bangle ke saamne pahonch gaye. Name plate par Sayyad Sabt Ali ka naam tehreer tha. Furqan bila jhikhak andar daakhil ho gaya. Salar ne uski pairwi ki.
Bangley ke andar maujood chhotey se lawan mein maali apne kaam mein masroof tha. Furqan ne porch mein ek mulaazim ke sath dua salaam ka tabaadla kiya phir wo mazeed kuch aage chalta hua ek darwazey ke saamne pahonch gaya aur wahan usne apna joota utaar diya. Wahab pehle bhi bahot se joote pade the. Andar se baaton ki aawaz sunaai de rahi thi. Salar ne bhi dekha dekhi apne jootey utaar diye. Salar ne ek qadam uske peechey andar rakhte hue ek hi nazar mein poore kamrey ka jaayza le liya. Wo ek kushaada kamrey mein tha jis ke farsh par carpet bichha hua tha aur bahot se floor cushions bhi pade hue the. Kamrey mein furniture ka naam par sirf chand maamuli se cheezein thin aur diwaron par kuch Qurani aayaat calligraphy ki surat mein lagi hui thin. Kamrey mein 20-25 ke qareeb mard the jo aapas mein guftgu mein masroof the. Furqan ne andar daakhil hote hi buland aawaz mein salaam kiya aur phir chand logon ke sath kuch khair maqdami kalmaat ka tabaadla kiya phir wo ek khaali koney mein baith gaya.
“Doctor Sabt Ali kahan hain?” Salar ne uske qareeb baithtey hue maddham aawaz mein pucha.
“8 bajte hi wo andar aa jayenge, abhi to sirf 7:25 hue hain.” Furqan ne usse kaha.
Salar gardan hila kar kamrey mein baithe he logon ka jaayza lene laga. Wahan har umr ke afraad he. Chand teenage ladke, uske ham umr afraad, Furqan ki umr ke log, adhed umr aur kuch umr raseedah bhi……… Furqan apni dayen taraf baithey kisi aadmi ke sath masroof-e-guftgu tha.
Theek 8 baje usne 60-65 saal ke ek aadmi ko ek androoni darwaza khol kr kamrey mein daakhil hote dekha. Us ki tawaqqo ke bar aks wahan baithey hue logon mein se koi bhi isteqbaal ke liye ehtraaman khada nahin hua. Aane wale ne hi salaam mein pahel ki thi jis ka jawaab wahan ke logon ne diya. Aane wale ke ehtraam mein khada na hone ke bawajood Salar ab achanak wahan baithe hue logon ki nashist ke andaaz mein ehtraam dekh raha tha. Wo sab ek dam bahot chaukanney aur mohtaat nazar aane lage the.
Aane wale yaqeenan Dr. Sabt Ali the. Wo kamrey ki ek diwar ke saamne makhsoos jagah par baith gaye jise shayad un hi ke liye chhoda gaya tha. Wo safed shalwaar qameez mein malboos the. Unki rangat surkh-o-safed thi aur yaqeenan jawaani mein bahot khoobsurat rahe honge. Unke chehrey par maujood daadhi bahot lambi nahin thi magar bahot ghani aur nifaasat se taraashi gayi thi. Daadhi mukammal taur par safed nahin hui thi aur kuch yahi haal unke sar ke baalon ka bhi tha. Safed aur siyaah ke imtezaaj ne un ke chehrey aur sar par mujood baalon ko bahot baa waqaar kar diya tha. Wo wahan baith kar dayen taraf maujood kisi aadmi ka haal dariyaaft kar rahe the. Shayad wo kisi bimari se uth kar aaya tha. Salar ne chand hi lamhon mein unke saraapey ka jaayza le liya tha. Wo aur Furqan baaqi logon ke aqab mein diwar ke sath tek lagaye baithe the.
Dr. Sabt Ali ne apne lecture ka aaghaaz kiya. Unka lab-o-lehja bey had shaista aur andaaz dheema tha. Kamrey mein mukammal sukoot tha, wahan baithe hue logon mein se koi bhi harkat nahin kar raha tha. Salr ko unke ibtedaayi chand jumlon se hi andaaza ho gaya tha, wo ek ghair maamuli aalim ke saamne tha.
Dr. Sabt Ali shukr ke barey mein baat kar rahe the.
“Insaan apni zindagi mein bahot se nashaib-o-faraaz se guzarta hai. Kabhi kamaal ki bulandiyon ko jaa chhuta hai, kabhi zawaal ki gehraaiyon tak jaa pahonchta hai. Saari zindagi wo in hi donon intehaaon ke darmiyaan safar karta rehta hai aur jis raastey par wo safar karta hai, wo shukr ka hota hai ya naa shukri ka. Kuch khush qismat log hote hain wo kamaal ki taraf jaayein ya zawaal ki taraf, wo sirf shukr ke raastey par hi safar karte hain. Kuch aise hote hain jo sirf naa shukri ke raastey par safar karte hain, chahe wo kamaal haasil kar lein ya zawaal……… aur kuch aise hote hain jo in donon par safar karte hain. Kamaal ki taraf jaate hue shukr ke aur zawaal ki taraf jaate hue naa shukri ke. Insaan Allah ki an ginat makhuqaat mein se ek makhluq hai. Ashraf-ul-makhluqaat hai magar makhluq hi hai. Wo ape khaaliq par koi haq nahin rakhta, sirf farz rakhta hai. Wo zameen par kisi aise track record ke sath nahin utara gaya ke wo Allah se kisi bhi chez ko apna haq samajh kar mutaalba kar sake magar is ke bawajood us par Allah ne apni rehmat ka aaghaaz jannat se kiya. Us par neymaton ki baarish kar di gayi aur is sab ke badley usse sirf ek cheez ka mutaalba kiya gaya………..shukr ka. Kya mehsoos karte hain aap! Agar zindagi mein kisi par koi ehsaan karein aur wo shakhs us ehsaan ko yaad rakhne aur aap ka ehsaan mand hone ki bajaye aap ko un mawaqey ki yaad dilaye jab aap ne us par ehsaan nahin kiya tha ya aap ko ye jataaye ke aap ka ehsaan uske liye kaafi nahin tha. Agar aap us ke liye “ye” kar dete ya “wo” kar dete to zyada khush hota. Kya karenge aap aise shakhs ke saath? Dobara ehsaan karna to ek taraf, aap to shayad usse talluq rakhna tak pasand na karein. Ham Allah ke sath yahi karte hain. Uski neymaton aur rehmaton par uska shukr ada karne ki bajaye ham un cheezon ke na milne par kudhtey rehte hain, jinhein ham haasil karna chahte the. Allah phir bhi Raheem hai, wo ham par apni neymatein naazil karta rehta hai. Unki taadaad mein hamare aamaal ke mutaabiq kami beshi karta rehta hai magar unka silsila kabhi bhi mukammal taur par munqatey nahin karta.”
Salar palkein jhapkaaye baghair unka chehra dekh raha tha.
“Shukr ada na karna bhi ek bimari hoti hai, aisi bimari jo hamrein dilon ko roz ba roz kushaadgi se tangi ki taraf le jaati hai, jo hamari zabaan par shikwa ke alawa aur kuch nahin aane deti. Agar hamein Allah ka shukr karne ki aadat na ho to hamein insaan ka shukriya ada karne ki bhi aadat nahin padti. Agar hamein khaaliq ke ehsaanon ko yaad rakhne ki aadat na ho to ham kisi makhluq ke ehsaanon ko bhi yaad rakhne ki aadat nahin seekh sakte.”
Salar ne apni aankhein band kar lin. Naa shukri kya hoti hai, koi usse zyada achi tarah nahin jaan sakta tha. Usne ek baar phir aankhein khol kar Dr. Sabt Ali ko dekha.
Pure 1 ghantey ke baad unhon ne lecture khatm kiya, kuch logon ne unse sawaal kiya phir log baari baari uth kar jaane lage.
Bahar sadak par log apni gaadiyon par baith rahe the, wo bhi apni gaadi mein aa kar baith gaye. Raat ab gehri ho rahi thi. Salar ke kaanon mein abhi bhi Dr. Sabt Ali ki baatein goonj rahi thin. Furqan gaadi start kar ke waapsi ka safar shuru kar chuka tha.
7 din pehle wo Furqan naami kisi shakhs se waaqif nahin tha aur 7 din mein usne uske sath talluqaat ki bahot si seedhiyaan tay kar li thin. Use hairat thi wo logon ka aadi nahin tha. Kuch talluqaat aur rawaabit upar kahin tay kiye jaate hain. Kis waqt……. Kaun kise……….. kahan……..kis liye milega aur zindagi mein kya tabdeeli le aayega ye sab.
Wo sirf ek din ke liye Lahore aaya tha, magar wo Pakistan mein apne qayaam ke baaqi din Islamabad ke bajaye Lahore mein hi raha aur baaqi ke din wo har roz Furqan ke sath Dr. Sabt Ali ke paas jaata raha. Wo ek din bhi un se baraahe raast nahin mila. Sirf unka lecture sunta aur uth kar aa jaata.
Dr. Sabt Ali ki zindagi ka bada hissa mukhtalif European mumaalik ki universities mein Islamic studies aur Islamic history ki taalim dete guzra tha. Pichely 10-12 saal se wo Pakistak mein yahan ki ek university se waabasta the aur Furqan taqreeban itne hi arsey se unhein jaanta tha.
Jis din use Lahore se Islamabad aur phir wahan se wapas Washington jaana tha us raat pheli baar wo lecture khatm hoe ke baad Furqan ke sath wahan thaher gaya. Baari baari tamaam log kamrey se nikal rahe the. Dr. Sabt Ali khade the aur kuch logon se alwidaai musaafha kar rahe the.
Furqan uske saath Dr. Sabt Ali ki taraf badh aaya. Furqan ko dekh kar unke chehrey par muskurahat namudaar hui thi. Wo kamrey mein maujod aakhri aadmi ko rukhsat kar rahe the.
“Kaise hain aap Furqan sahab!” unhon ne Furqan ko mukhaatib kiya. “ Bade dinon baad ruke aap yahan par.”
Furqan ne koi wazahat di phir Salar ka taaruf karwaya.
“Ye Salar Sikandar hain, mere dost.”
Salar ne apna naam sunne par unhein ek dam chaunktey dekha aur phir to kuch hairaan hue magar agley hi lamhey unke chehrey par ek baar phir pehli wali muskuraahat thi. Furqan ab us ka tafseeli taaruf karwa raha tha.
“Aaiye baithiye.” Dr. Sabt Ali ne farshi nashist ki taraf ishaara karte hue kaha. Furab aur wo un se kuch faasley par baith gaye. Wo Furqan ke sath uske project ke hawaley se baat kar rahe the. Salar khamushi se baari baari un donon ka chehra dekhta raha. Guftgu ke dauraan hi unka mulaazim andar aaya aur unhon ne use khana lane ke liye kaha.
Mulaazim ne un kamrey mein dastarkhwaan bichha kar khana laga diya. Furqan yaqeenan pehle bhi wahan kai baat khana khata raha tha.
Wo jab hath dho kar khana khane ke liye wapas kamrey mein pahoncha aur dastarkhwaan par baitha to Dr. Sabt Ali ne achanak use mukhaatib kiya.
“Aap muskurate nahin hain Salar?” Wo unke sawaal se zyada sawaal ki nauiyat par gadbada gaya. Kuch haunq sa wo unhein dekhta raha.
“Is umr mein itni sanjeedgi to koi munaasib baat nahin.” Salar kuch hairaani se muskuraya. 15-20 minute ki mulaqaat mein wo ye kaise jaan gaye the ke wo muskurane ka aadi nahin raha tha. Wo Furqan ki taraf dekh kar kuch jhenpa, phir usne muskurane ki koshish ki. Ye aasan kaam saabit nahin hua.
“Kya mera chehra mere har ehsaas ko zaahir karne laga hai ke pehle Furqan aur ab Dr. Sabt Ali mujh se meri sanjeedgi ki wajah jaanna chahte hain.” Usne socha.
“Aisi koi baat nahin hai. Main itna sanjeeda nahin hoon.” Usne Dr. Sabt Ali se zyada jaise khud ko bataya.
“Mumkin hai aisa hi ho.” Dr. Sabt Ali ne muskurate hue kaha.
Khane ke baad dono ko rukhsat karne se pehle wo andar gaye. Wapsi par unke haath mein ek kitaab thi. Wo kitaab unhon ne Salar ki taraf badha di.
“Aap ka talluq maashiyaat se hai, kuch arsey pehle main ne Islami iqtesadiyaat ke barey mein ye kitaab likhi hai. Mujhe khushi hogi agar aap ise padhein taa ke aap ko Islami iqtesaadi nizaam ke barey mein bhi kuch waaqfiyat haasil ho.”
Salar ne kitaab unki haath se pakad li, kitaab par ek nazar daaltey hue us ne maddham aawaz mein Dr. Sabt Ali se kaha.
“Main wapas jaa kar bhi aap se raabta rakhna chahta hoon. Main aap se sirf iqtesadiyaat ke barey mein nahin seekhna chahta aur bhi bahot kuch jaanna chahta hoon.” Dr. Sabt Ali ne narmi se uska kandha thapthapaya.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-120/
Prev episode:
https://theothermeunfolded.com/blog/peer-e-kaamil-roman-urdu-umera-ahmed-episode-118/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar