Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Salar hamesha ki tarah us din doctor sahab ke paas aaya hua tha. Doctor sahab ne abhi apna lecture shuru nahin kiya tha. Jab unke paas baithey ek adhed umr aadmi ne kaha.
“Doctor sahab! Aadmi ko peer-e-kaamil mil jaaye to uski taqdeer badal jaati hai.”
Salar ne gardan mod kar us shakhs ko dekha, wo wahan pichhley chand din se aa raha tha.
“Uski naslein sanwar jaati hain. Main jab se aap ke paas aane laga hoon, mujhe lagta hai main hidayat paa gaya hoon. Mere ultey kaam sidhey hone lage hain. Mera dil kehta hai mujhe peer-e-kaamli mil gaya hai. Main………..Main aap ke hathon par bai’at karna chahta hoon.”
Wo badi aqeedat mandi se doctor sahab ka haath pakdey hua kehne laga. Kamrey mein mukammal khamushi chha gayi thi. Doctor sahab ne narmi se us shakhs ke hath par thapki dete hue apna chhuda liya.
“Taqi sahab! Main ne zindagi mein aaj tak kisi se bai’at nahin li. Aap ke munh se peer-e-kaamil ka zikr suna……….peer-e-kaamil kaun hota hai……… peer-e-kaamil kis ko kehte hain……….. wo kya karta hai………..? Uski zarurat kyun hoti hai?”
Wo badi sanjeedgi se us shakhs se puch rahe the.
“Aap peer-e-kaamil hain.” Us shakhs ne kaha.
“Nahin, main peer-e-kaamil hoon.” Dr Sabt Ali ne kaha.
“Aap se mujhe hidayat milti hai.” Us shakhs ne israar kiya.
“Hidayat to ustaad bhi deta hai, maan baap bhi dete hain, leaders bhi dete hain, dost ahbaab bhi dete hain, kya wo peer-e-kaamil ho jaate hain?”
“Aap………… Aap gunaah nahin karte.” Wo aadmi gadbadaya.
“Haan, daanista taur par nahin karta, isliye nahin karta kyun ke gunaah se mujhe khauf aata hai. Yahan par baithe bahot se log daanista taur par gunaah nahin karte honge, kyun ke meri tarah inhein bhi gunaah se khauf aata hoga magar naa daanistagi mein mujh se kya sarzad ho jata hai, use main nahin jaanta. Ho sakta hai naa daanistagi mein mujh se bhi gunaah sarzad ho jaate hon.” Unhon ne muskuratey hue kaha.
“Aap ki dua qubool hoti hai.” Wo aadmi apne mauqif se hatney ke liye tayyar nahin tha.
“Dua to maan baap ki bhi qubool hoti hai, majboor aur mazloom ki bhi qubool hoti hai aur bhi bahot se logon ki qubool hoti hai.”
“Laikin aap ki to har dua qubool hoti hai.”
Dr Sabt Ali ne inkaar mein sar hila diya.
“Nahin, har dua to qubool nahin hoti. Main kai saalon se har roz musalmaanon ki nash’atus saaniya (renaissance) ki dua karta hoon, abhi ak to qubool nahin hui. Har roz meri ki jaane wali kai duayein qubool nahin bhi hotin.”
“Laikin aap ka paas jo shaks dua karwane ke liye aata hai uske liye aap ki dua zaroor qubool ho jaati hai.”
Dr Sahab ki muskurahat aur gehri ho gayi.
“Aap ke liye ki jaane wali dua qubool ho gayi hogi. Yahan bahot se aise hain jin ke liye meri dua qubool nahin hoti ya nahin huin.”
Wo ab kuch na bol saka.
“Aap mein se agar koi bata sakey ke peer-e-kaamil kaun hota hai?”
Wahan maujood log ek dusrey ko dekhne lage phir ek ne kaha.
“Peer-e-kaamil nek shakhs hota hai. Ibaadat guzaar shakhs, paarsaa aadmi.”
Dr Sabt Ali ne sar hila diya.
“Bahot se log nek hote hain, ibaadat guzaar hote hain, paarsaa hote hain. Aap ke ird gird aise bahot saarey log hote hain to kya wo sab peer-e-kaamil hote hain?”
“Nahin, peer-e-kaamil wo aadmi hota hai jo dikhawey ke liye ibaadat nahin karta. Dil se ibaadat karta hai, sirf Allah ke liye. Uski neki aur paarsaai dhong nahin hoti.” Ek aur shakhs ne apni raaye di.
“Apne halqa-e-ahbaab mein aap mein se har ek kisi na kisi aise shakhs ko zarur jaanta hoga jis ki ibaadat ke barey mein use shubah nahin hota ke wo dhong hai. Jis ki neki aur paarsaai ka bhi ap ko yaqeen hota hai to kya wo shakhs peer-e-kaamil hai?”
Kuch der khamushi ke baad ek aur shakhs ne kaha.
“Peer-e-kaamil aisa shakhs hota hai, jis ke alfaaz mein taasir hoti hai ke wo insaan ka dil badal dete hain.”
“Taasir bhi bahot se logon ke alfaaz mein hoti hai. Kuch ke munh se nikalne wale alfaaz mein, kuch ke qalam se nikalne wale alfaaz mein, taasir to stage par khade compere aur akhbaar ke column likhne wale journalist ke alfaaz mein bhi hoti hai to kya wo peer-e-kaamil hote hain?”
Ek aur shakhs bola. “Peer-e-kaamil wo hota hai jise ilhaam aur wajdaan ho, jo mustaqbil ko boojh sakey.”
“Ham mein se bahot saare log aise khwaab dekhte hain jin mein mustaqbil mein dar pesh aane waale haalat se hamein aagahi ho jaati hai. Kuch log istekhaara bhi karte hain aur cheezeon ke baarey mein kisi had tak jaan jaate hain. Kuch logon ki chhati his bahot tez hoti hai, wo khatron ko bhaap jaate hain.”
“Peer-e-kaamil kaun hota hai?” Dr Sahab kuch der khamush rahe, unhon ne phir apna sawaal dohraaya.
“Peer-e-kaamil kaun ho sakta hai?” Salar uljhan aamez andaaz mein Dr Sabt Ali ke chehre ko dekhne laga.
“Kya Dr Sabt Ali ke alaawa koi aur peer-e-kaamil ho sakta tha aur agar wo nahin the to phir kaun tha aur kaun ho sakta hai?”
Wahan baithe hue logon ke dil-o-dimaagh mein ek hi goonj thi. Dr Sabt Ali ek ke ka chehra dekh rahe the, phir unke chehrey ki muskurahat aahista aahista maa’doom ho gayi.
“Peer-e-kaamil mein kaamiliyat hoti hai. Kaamiliyat un tamaam cheezon ka majmua hoti hai jo aap keh rahe the. Peer-e-kaamil wo shakhs hota hai jo dil se Allah ki ibaadat karta hai, nek aur paarsaa hota hai, uski har dua qubool hoti hai. Us had tk jis had tak Allah chahey. Uske alfaaz mein taasir hoti hai. Wo logon ko hidaayat bhi deta hai magar use ilhaam nahin hota, use wajdaan hota hai, wahi utarti hai us par aur wahi kisi aam isaan par nahin utarti, sirf paighambar par utarti hai. 1 lakh 24 hazaar paighambaron mein se har paighambar kaamil tha magar peer-e-kaamil wo hai jis par nubuwwat ka silsila khatm kar diya jaata hai.”
“Har insaan ko zindagi mein kabhi na kabhi kis peer-e-kaamil ki zarurat zaroor padti hai. Kabhi na kabhi insaani zindagi us mod par aa kar zaroor khadi ho jaati hai jab ye lagt hai ke hamare labon aur dilon ne nikalne wali duayein bey asar ho gayi hain. Hamare sajdey aur hamare phaile hue haath rehmaton aur neymaton ko apni taraf mod nahin paa rahe. Yun lagta hai jaise koi talluq tha jo toot gaya hai phir aadmi ka dil chahta hai ab uske liye koi aur haath uthaaye, kisi aur ke ab uski du Allah tak pahonchayein, koi aur Allah ke saamne uske liye gidgidaaye, koi aisa shakhs jis ki duayein qubool hoti hon, jis ke labon ne nikalne waali iltejaayein uske apne lafzon ki tarah wapas na mod di jaati hon. Phir insaan peer-e-kaamil ki talaash shuru karta hai, bhaagta phirta hai, duniya mein kisi aise shakhs ke liye jo kaamiliyat ki kisi na kisi seedhi par khada ho.”
“Peer-e-kaamil ke ye talaash insaani zindagi ke irteqaa se ab tak jaari hai. Ye talaash wo khwahish hai jo Allah khud insaan ke dil mein paida karta hai. Insaan ke dil mein ye khwahish, ye talaash na utaari jaati to wo paighambaron par kabhi yaqeen na laata. Kabhi unki pairwee aur itaa’at karne ki koshish na karta. Peer-e-kaamil ki ye talaash hi insaan ko har zamaney mein utaarey jaane wale paighambaron ki taraf ley jaati rahi. Phir paighambaron ki mab’oosiyat ka ye silsila Hazrat Muhammad ﷺ ke saath khatm kar diya gaya. Aap ﷺ ki ummat ke liye Aap ﷺ ke baad kisi aur peer-e-kaamil ki gunjaaish nahin rakhi gayi.”
“Kaun hai jise aayinda aane waale zamaney mein Hazrat Muhammad ﷺ se badh kar koi muqaam diya jaaye?”
“Kaun hai jise aaj ya aayinda aane wale zamaaney mein kisi shakhs ke liye Hazrat Muhammad ﷺ se badh kar kaamiliyat dey di jaaye?”
“Kaun hai jo aaj ya aayinda aane waale zamaaney mein kisi shakhs ke liye Hazrat Muhammad ﷺ se badh kar shafa’at ka daawa kar sakey?
“Jaamid aur mustaqil khamushi ki surat mein aane wala nafi mein ye jawaab ham se sirf ek sawaal karta hai.”
“Peer-e-Kaamil ﷺ ko chhod kar ham duniya mein aur kis wajood ko khojney nikal khade hue hain?
“Peer-e-Kaamil ﷺ ke bai’at shudah hote hue hamin dusrey kisi shakhs ki bai’at ki zarurat kyun reh gayi hai?”
“Peer-e-Kaamil ﷺ ke raastey par chalne ki bajaye hamein dusra kaun sa raasta apni taraf kheench raha hai?”
“Kya musalmaanon ke liye ek Allah, ek Quran, ek Rasool ﷺ aur unki sunnat kaafi nahin?
“Allah aur uske Rasool ﷺ aur uski kitaab ke alawa aur kaun sa shakhs, kaun sa kalaam hai jo hamein duniya aur aakhirat ki takleefon se bacha sakega?”
“Jo hamari duaaon ko qubooliyat bakhshey, jo ham par neymatein aur rehmatein naazil kar sakey?”
“Koi Peer-e-Kaamil ﷺ ka firqa bata sakta hai? Nahin bata sakta.”
Dr Sabt Ali keh rahe the.
“Wo sirf musalmaan the, wo musalmaan jo ye yaqeen rakhte the ke agar wo siraat-e-mustaqeem par chalein gey to wo Jannat mein jaayenge, us raastey se hatenge to Allah ke azaab ka nishaana banengey.”
“Aur siraat-e-mustaqeem wo raasta hai jo Allah apne Paighambar ﷺ ke zariye Quran paak mein bataata hai. Saaf, do tok aur waazeh alfaaz mein. Wo kaam karein jis ka hukm Allah apne Rasool Muhammad ﷺ ke zariye bhejta hai aur us kaam se ruk jaayein jis se manaa kiya jaata hai.”
“Allah, Hazrat Muhammad ﷺ aur Quran kisi baat mein koi ibhaam nahin rakhtey. Quran ko kholiye, agar us mein kahin do tok aur ghair mubham alfaaz mein kisi dusrey peer-e-kaamil ya paighambar ka zikr miley to uski talaash karte rahiye aur agar aisa kuch nazar nahin aata to phir sirf khauf khaaiye ke aap apne pairon ko kis daldal mein liye jaa rahe hain. Apni 50-60 saalah zindagi ko kis tarah apni abdi zindagi ki tabaahi ke liye istemaal kar rahe hain, kis tarah khasaarey ka sauda kar rahe hain. Hidaayat ki talaash hai, Quran kholiye. Kya hai jo wo aap ko nahin bata deta? Wo aap ko maasum, anjaan aur bey khabar nahin rehne deta. Aap ka asl aap ke munh par dey maarta hai. Kya Allah insaan ko nahin jaanta hoga? Us makhlooq ko, jo uski arbon kharbon takhleeqaat mein se ek hai.”
“Dua qubool nahin hoti to aasrey aur waseeley talaash karne ki bajaye sirf haath utha lijiye, Allah se khud maangein. Dey dey to shukr karein, naa de to sabr………… magar haath aap khud hi uthaayein.”
“Zindagi ka qareena aur saleeqa nahin aa raha to uswa-e-hasana ﷺ ki taraf chaley jaayein, sab kuch mil jaayega aap ko.”
“Aihtraam har ek ka karein. Har wali ka, har momin ka, har buzurg ka, har shaheed ka, har saaleh ka, har paarsaa ka………. Magar apni zindagiyon mein hidaayat aur rehnumaai sirf Hazrat Muhammad ﷺ se lein kyun ke unhon ne aap tak apne zaati aihkaamaat nahin pahonchaaye jo kuch bataya wo Allah ka naazil-kardah hai.”
“Dr Sabt Ali kaun hai, kya hai, kaun jaanta hai ise? Aap………..? Aap ke alawa chand sau log……….. chand hazaar log……… magar jis Peer-e-Kaamil ﷺ ki baat kar raha hoon unhein to ek arab ke qareeb log apna roohani peshwa maante hain. Main to wahi kuch kehta, dohraata phir raha hoon, jo 1400 saal pehle Hazrat Muhammad ﷺ farma chukey hain. Kya nayi baat kahi main ne?”
Dr Sabt Ali khamush ho gaye. Kamrey mein maujood har shakhs pehle hi khamush tah. Unhon ne wahan baithe hue har shakhs ko aayina dikha diya tha aur aayine mein nazr aane wala aks har kisi ko haula raha tha, larza raha tha.
Wahan se bahar aa kar Salar bahot der tak gaadi ki seat par chup chaap baitha raha. Uski aankhon par bandhi aakhri patti bhi aaj khol di gayi thi.
Kai saal pehle jab Imama Hashim sochey samjhey baghair ghar se nikal padi thi to wo us lagan ko samajh nahin paaya tha. Uske nazdeek wo himaqat thi. Baad mein usne apne khayalaat mein tarmeem kar li thi. Use yaqeen aa gaya tha ke koi bhi waqai Hazrat Muhammad ﷺ ki mohabbat mein is had tak giraftaar ho sakta hai ke sab kuch chhod dey.
Usne Islam ke barey mein jaanna shuru kiya to use pata chala ke sahaaba karaam raziallahu taala anhumaa bhi isi tarah ki qurbaniyan diya karte the. Hazrat Bilal se Hazrat Owais Qarni raziallahu taala anhumaa tak an ginat log the aur har zamaaney mein the aur Salar Sikandar ne iqraar kar liya tha ke Paighambar ﷺ ki mohabbat mein itni taaqat thi ke wo kisi ko bhi chhodney par majboor kar deti. Usne kabhi is mohabbat ka tajziya karne ki koshish nahin ki thi. Wo aaj wahan baitha pehli baar ye kaam kar raha tha.
Ye sirf Paighambar ﷺ ki mohabbat nahin thi jis ne Imama Hashim ko ghar chhodney par majboor kar diya tha. Wo siraat-e-mustaqeem ko dekh kar uski taraf chali gayi thi. Us siraat-e-mustaqeem ki taraf jise wo kisi zamaanye mein andhon ki tarah dhundta phirta tha. Sahaaba karaam raziallahu taala anh bhi isi siraat-e-mustaqeem ki taraf jaate the.
Imama Hashim ne kai saal pehle Peer-e-Kaamil ﷺ ko paa liya tha. Wo bey khaufi isi hidaayat aur rehnumaai ki ataa kardah thi jo use Hazrat Muhammad ﷺ ki mohabbat se mili thi. wo aaj tak Peer-e-Kaamil ﷺ ko khud shanaakht nahin kar paaya tha aur Imama Hashim ne har kaam khud kiya tha. Shanaakht se itaa’at tak………. Usko Salar Sikandar ki tarah dusron ke kandhon ki zarurat nahin padi.
Salar Sikandar ne pichhley 8 saalon mein Imama Hashim ke liye har jazba mehsoos kiya tha. Haqaarat, Tazheek, pachhtawa, nafrat, mohabbat, sab kuch………… magar aaj wahan baithey pehli baar use Imama Hashim se hasad ho raha tha. Thi kya wo……..? Ek aurat……..zara si aurat……..aasmaan ki hoor nahin thi……….. Salar Sikandar jaise aadmi ke saamne kya auqaat thi us ki.
Kya mere jaisa IQ tha uska?
Kya mere jaisi kaamyabiyaan thin uske paas?
Kya mere jaisa kaam kar sakti thi wo?
Kya mere jaisa naam kama sakti thi wo?
Kuch bhi nahin thi wo aur usko sab kuch plate mein rakh kar diya aur main……… Main jis ka IQ level 150+ hai mujhe saamney ki cheezein dekhne ke qaabil nahin rakha?
Wo ab aankhon mein nami liye andherey mein wind screen se bahar dekhte hue badbada raha tha.
“Mujhe bas is qaabil kar diya ke main bahar niklun aur duniya fateh kar loon. Wo duniya jis ki koi wuq’at hi nahin hai aur wo……….wo………”
Wo ruk gaya. Use Imama par ghussa aa raha tha. 8 saal pehle ka waqt hota to wo use “BITCH” kehta, tab Imama par ghussa aane par yahi kaha karta tha magar 8 saal ke baad aaj wo zabaan par uske liye gaali nahin laa sakta tha. Wo Imama Hashim ke liye koi bura lafz nikaalney ki jur’at nahin kar sakta tha. Siraat-e-mustaqeem par khud se bahot aagey khadi us aurat ke liye kaun zabaan se bura lafz nikaal sakta tha?
Apne glasses utaar kar usne apni aankhein maslin. Uske andaaz mein shikast khoordagi thi.
“Peer-e-Kaamil ﷺ………… Siraat-e-mustaqeem.” 8 saal lage the, magar talaash khatm ho gayi thi. jawaab mil chuka tha.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-144/
Prev episode:
https://theothermeunfolded.com/blog/peer-e-kaamil-roman-urdu-umera-ahmed-episode-142/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar