Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Salar us roz kisi kaam se lunch break ke baad office se nikal aaya. Railway crossing par traffic ka azdahaam dekh kar usne dur se hi gaadi mod li. Wo is waqt kisi traffic jam mein phans kar waqt zaaye nahin karna chahta tha.
Gaadi ko peechey mod kar usne ek dusri sadak par turn le liya. Wo us sadak par thoda hi aage gaya tha jab usne sadak ke kinarey footpath par ek budhi khatun ko baithe dekha. Wo ek bi road thi aur is waqt bilkul sunsaan thi. Khatun apne libaas aur chehrey se kisi bahot achche gharaney ki nazar aa rahi thin. Uske haath mein soney ki chudiyaan bhi nazar aa rahi thin aur Salar ko khadsha hua ke is akeli sadak par wo kisi haadsey ka shikaar na ho jaayein. Usne gaadi unke qareeb ley jaa kar rok di. Khatun ki rangat surkh-o-safed thi aur saans phula hua tha aur shayad wo apna saans theek karne ke liye hi sadak kinarey baithi thin.
“Assalamu Alaikum amma! Kya mas’ala hai, aap yahan kyun baithi hain?”
Salar ne apne sunglasses utaartey hue khidki se sar nikaal kar pucha.
“Beta mujhe rikshaw nahin mil raha.”
Salar unki baat par hairaan hua. Wo main road nahin thi. ek rihaaishi ilaaqey ki bi road thi aur wahan rikshaw milne ka imkaan nahin tha.
“Amma ji! Yahan se to aap ko rikshaw mil bhi nahin sakta. Aap ko jaana kahan hai?”
Us khatun ne use androon-e-shaher ke ek ilaaqey ka naam bataya. Salar ke liye bilkul mumkin nahin tha ke wo unhein wahan chhod aata.
“Aap mere saath aa jayein. Main aap ko main road par chhod deta hoon. Whan se aap ko rikshaw mil jayega.”
Salar ne pichhley darwazey ka lock khola aur phir apni seat se utar gaya magar Amma ji khaasi muta’ammil nazar aayin. Wo unke andeshon ko bhaanp gaya.
“Amma ji! Darney ki zarurat nahin hai. Main shareef aadmi hoon. Aap ko nuqsaan nahin pahonchaunga. Main sirf aap ki madad karna chahta hoon, kyun ke is sadak se to aap ko rikshaw nahin milega. Aur is waqt sadak sunsaan hai, aap ne zewar pehna hua hai, koi aap ko nuqsaan pahoncha sakta hai.”
Salar ne narmi se unke andeshe door karne ki koshish ki. Khatun ne apni ainak durust karte hue apni chudiyon ko dekha aur phir Salar se kaha.
“Lo……… ye saara zewar to naqli hai.”
“Chalein, ye to bahot achchi baat hai magar koi bhi ghalat fehmi ka shikaar ho sakta hai. Koi aap se ye thodi puchega ke ye zewar asli hai ya naqli.”
Salar ne unke jhoot ka parda rakhte hue kaha.
Wo b soch mein pad gayin. Salar ko der ho rahi thi.
“Theek hai amma ji! Aap agar munaasib nahin……….”
Usne wapas apni gaadi ki taraf qadam badhaye to amma ji fauran bol uthin.
“Nahin, nahin. Main chalti hoon tumhare saath. Pehle hi taangein toot rahi hain chal chal ke.”
Wo taangon par zor dete hue uthe ki koshish karne lagin.
Salar ne unka baazu pakad kar unhein uthaya. Pichhli seat ka darwaza khol kar unhein andar bitha diya.
High road ko tezi se cross kar ke wo main road par aa gaya. Ab wo kisi khali rikshaw ki talaash mein tha magar use rikshaw nazar nahin aaya. Wo aahista aahista gaadi chalatey hue kisi khali rikshaw ki talaash mein traffic par nazrein daudaaney laga.
“Naam kya hai beta tumhara?”
“Salar.”
“Salaar?” unhon ne jaise tasdeeq chahi. Wo bey ikhteyaar muskuraya. Zindagi mein pehli baar usne apne naam ko bigadtey hue suna tha. Tasheeh ka koi fayda nahin tha. Wo punjabi khatun thin aur usse bamushkil Urdu mein baat kar rahi thin.
“Ji.” Salar ne tasdeeq ki.
“Ye kya naam hua, matlab kya hai iska?” unhon ne ek dam dilchaspi li.
Salar ne unhein apne naam ka matlab is baar Punjabi mein samjhaya. Amma ji ko uske Punjabi bolne par khaasi khushi hui aur ab wo Punjabi mein guftgu karne lagin.
Salar ke naam ka matlab puchney ke baad unhon ne kaha.
“Meri badi bahu ke haan beta hua hai.”
Wo hairaan hua. Use tawaqqo nahin thi ke naam ka matlab jaanne ke baad unka agla jumla ye hoga.
“Ji………mubarak ho.” Fauri taur par use yahi sujha.
“Khair mubarak.”
Unhon ne khaasi musarrat se uski mubarak baad wasool ki.
“Meri bahu ka phone aaya tha, puch rahi thi ki ammi! Aap naam batayein. Main tumhara naam de doon?”
Usne back view mirror se kuch hairaan ho kar unhein dekha.
“Dey dein.”
“Chalo ye mas’ala to hal hua.”
Amma ji ab itmenaan se ainak utaar kar apni badi si chaadar ke pallu se uske shishey saaf karne lagin. Salar ko abhi tak koi rikshaw nazar nahin aaya tha.
“Umr kitni hai tumhari?” unhon ne guftgu ka silsila wahin se joda jahaan toda tha.
“30 saal.”
“Shadi shuda ho?”
Salar soch mein pad gaya. Wo haan kehna chahta tha magar uska khayal tha ke haan ki surat mein sawaalaat ka silsila mazeed daraaz ho jayega isliye behtar yahi tha ke inkaar kar dey aur uska ye andaza us din ki sab se faash ghalti saabit hua.
“Nahin.”
“Shadi kyun nahin ki.”
“Bas aise hi. Khayal nahin aaya.” Usne jhoot bola.
“Achcha.”
Kuch der khamushi rahi. Salar duayein karta raha ke use rikshaw jaldi mil jaye. Use der ho rahi thi.
“Kya karte ho tum?”
“Bank mein kaam karta hoon.”
“Kya kaam karte ho?”
Salar ne apna ohda bataya. Use andaza tha ke amma ji ke upar se guzrey ga magar wo us waqt hakka bakka reh gaya jab unhon ne bade itmenaan se kaha.
“Ye afsar hota hai na?”
Wo bey ikhteyaar hansa. Isse zyada achchi wazahat koi uske kaam ki nahin de sakta tha.
“Ji amma ji! Afsar hota hai.” Wo mehzooz hua.
“Kitna padhe ho tum?”
“16 jama’atein”
Is baar Salar ne amma ji ka formula istemaal karte hue apni taalim ko aasan lafzon mein pesh kiya. Amma ji ka jawaab is baar bhi hairaan kun tha.
“Ye kya baat hui 16 jama’atein………..? MBA kiya hai ya MA economics?”
Salar ne bey ikhteyaar palat kar amma ji ko dekha. Wo apni ainak ke shishon se use ghoor rahi thin.
“Amma ji! Aap ko pata hai MBA kya hota hai ya MA economics kya hota hai?” wo waqai hairaan tha.
“Lo mujhe nahin pata hoga? Mere bade bete ne pehle MA economics kiya idhar Pakistan se phir England jaa kar usne MBA kiya. Wo bhi bank mein hi kaam karta hai magar udhar England mein. Usi ka to beta hua hai.”
Salar ne ek gehri saans lete hue gardan wapas mod li.
“To phir tum ne bataya nahin?”
“Kya?”
Salar ko fauri taur par ya nahin aaya ke unhon ne kya pucha tha.
“Apni taalim ke barey mein?”
“Main ne MBA kiya hai.”
“Kahan se?”
“America se.”
“Achcha………maa baap hain tumhare?”
“Ji.”
“Kitne bhai bahen hain?” sawaalaat ka silsila daraaz hota jaa raha tha.
“5.” Salar ko koi jaa-e-faraar nazar nahin aa rahi thi.
“Kitni behnein aur kitne bhai?”
“Ek bahen aur 4 bhai.”
“Shadiyan kitnon ki hui hain?”
“Mere alawa sab ki.”
“Tum sab se chhotey ho?”
“Nahin, chauthey number par hoon. Ek bhai chhota hai.”
Salar ko ab pehli baar apne “Social work” par pachhtawa hone laga.
“Uski bhi shadi ho gayi?”
“Ji.”
“To phir tum ne shadi kyun nahin ki? Koi mohabbat ka chakkar to nahin?”
Is baar Salar ke pairon ke niche se haqeeqat mein zameen khisak gayi. Wo unki qayafa shanaasi ka qaayel hone laga.
“Amma ji! Rikshaw nahin mil raha hai. Aap mujhe address bata dein main aap ko khud chhod aata hoon.” Salar ne unke sawaal ka jawaab gol kar diya.
Der to use pehle hi ho chuki thi aur rikshaw ka bhi kahin naam-o-nishaan nahin tha aur wo us budhi khatoon ko kahin sadak par bhi khada nahin kar sakta tha.
Amma ji ne use pata bata diya.
Salar ki samajh mein nahin aaya. Ek chauk mein khadey traffic constable ko us ne wo pata dohra kar madad karne ke liye kaha. Constable ne use ilaaqey ka rasta samjhaya.
Salar ne dobara gaadi chalaana shuru ki.
“To phir tum ne mujhe bataya nahin ke kahin mohabbat ka chakkar to nahin tha?”
Salar ka dil chaha kahin doob kar mar jaaye. Wo khatoon abhi tak apna sawaal nahin bhuli thin jab ke wo sirf us sawaal ke jawaab se bachne ke liye unhein ghar chhodney par tayyar hua tha.
“Nahin amma ji! aisi koi baat nahin.”
Us ne is baar sanjeedgi se kaha.
“Alhamdulillah.” Wo amma ji ki us “Alhamdulillah.” Ka siyaaq-o-sabaaq samajh nahin paaya tha aur usne uska taraddud bhi nahin kiya.
Amma ji ab uske maa baap ke barey mein kured kured kar maalumaat haasil karne ki koshish farma rahi thin. Salar waqai musibat mein phans gaya tha.
Sab se badi gadbad us waqt hui jab wo amma ji ke bataye hue ilaaqey mein pahoncha aur us ne amma ji se matluba gali ki taraf rehnumaai karne ki darkhwast farmaai aur amma ji ne kamaal-e-itmenaan se kaha.
“Ab ye to mujhe pata hai ke is ilaaqey mein ghar hai magar pata mujhe maalum nahin.”
Wo bhaunchakka reh gaya.
“Amma ji! To ghar kaise pahonchaun main aap ko. Patey ke baghair us ilaaqey mein aap ko kahan drop karun?”
Wo apne ghar par likha number aur naam batane lagin.
“Nahin amma ji! Aap mujhe gali ka naam batayein.”
Wo gali ke naam ki bajaye nishaniyaan bataney lagin.
“Halwaai ki ek dukaan hai gali ke koney mein………..bahot khuli gali hai………Parvez sahab ka ghar bhi wahin hai, jin ke bete ne Germany mein shadi ki hai pichhley haftey………..Pehli biwi uski idhar hi hai hamare mohalley mein………shadi ki ittelaa milne par bey chaari ne ro ro kar mohalla sar par utha liya tha.” Wo nishaaniyaan batate batate kahin aur nikal gayin.
Salar ne sadak ke kinarey aadi khadi kar di.
“Amma ji! Aap ke shauhar ka kya naam hai? Ghar ke barey mein aur gali ke barey mein kuch tafseel se batayein, is tarah to main kabhi bhi aap ko ghar nahin pahoncha sakunga.”
Us ne tahammul se kaam lete hue kaha.
“Main Sayeeda amma ke naam se jaani jaati hoon. Miyan bey chaarey to 10 saal pehle faut ho gaye. Un ko to log bhul bhaal gaye aur gali ka to main tumhein bata rahi hoon, bahot badi gali hai. 3 din pehle gutter ke do dhakkan laga kar gaye hain. Bilkul naye, cement se jod kar gaye hain. Har maah koi na k utaar kar ley jaata tha, ab bey fikri ho gayi hai.”
Salar ne bey ikhteyaar gehra saans liya.
“Amma ji! Kya mein ye keh kar logon se aap ki gali ka puchun ke gutter ke 2 naye dhakkanon wali gali kahan hai? Aap wahan ke kisi aise shakhs ka naam batayein jisey log jaantey hon jo qadrey maaruf ho.”
“Wo Murtaza sahab hain jin ke bete Muzaffar ki taang toot gayi thi kal subah.”
“Amma ji! Ye koi taaruf nahin hota.”
Wo uski baat par bura maan gayin.
“Lo bhala! Ab kya har ghar mein taang toot’ti hai kisi na kisi ki.”
Salar chup chaap gaadi se utar gaya. Aas paas ki dukaanon se usne Sayeeda amma ke bataye hue kawaif ke mutaabiq gali ki talaash karna shuru ki, magar jald hi use pata chal gaya ke un nishaaniyon ke sath wo kam az kam aaj ki taarikh mein ghar nahin dhundh sakta.
Wo maayus ho kar wapas lauta.
“Amma ji! Ghar mein phone hai aap ke?” Gaadi ke andar ghustey hi usne pucha.
“Haan hai.” Salar ne sukoon ka saans liya.
“Uska number batayein mujhe.” Salar ne apna mobile nikaaltey hue kaha.
“Number ka to mujhe nahin pata.”
Wo ek baar phir dhak se reh gaya.
“Phone number bhi nahin pata?” usne shadeed sadmey ke aalam mein kaha.
“Beta! Main ne kaunsa kabhi phonr kiya hai. Mere bete khud kar lete hain, rishtey daar bhi khud kar lete hain ya zarurat ho to beti phone mila deti hai.”
“Udhar model town mein kis ke paas gayi thin?”
Salar ko ek dam khayal aaya.
“Udhar kuch rishtey daar hai mere. Potey ki mithaai dene gayi thi.”
Unhon ne fakhriya bataya.
Salar ne sukoon ka saans lete hue gaadi start ki.
“Theek hai udhar hi chalte hain. Wahan ka pata batayein.”
“Pata to mujhe nahin pata.”
Salar is baar sadmey se kuch der ke liye bol nahin saka.
“To phir gayi kaise thin aap?”
“Beta! Asal mein jahaan jaana ho hamsaaye ke bachche chhod aate hain, un hi ko ghar pata hai. Pichhley 10 saal se mujhe wahi le kar jaa rahe hain. Wo chhod aate hain aur phir wahan se Bilal waghaira wapas chhod jaate hain. Asal mein ye Bilal waghaira bhi pehle mere mohalley mein hi rehte the. Yahi ko 10-12 saal pehle udhar gaye hain isliye mere purey mohalley ko unke ghar ka pata hai.”
Salar ne kuch nahin kaha. Use ab bhi ummid thi ke jahan se usne khatoon ko pick kiya hai Bilal waghaira ka ghar wahin hoga.
Sayeeda amma ki guftgu jaari thi.
“Aaj to aisa hua ke Bilal ke ghar par koi tha hi nahin, sirf mulaazma thi. main kuch der baithi rahi phir bhi wo log nahin aaye to main ne socha khud ghar chali jaaun aur phir Mashallah tum mil gaye.”
“Amma ji! Aap rikshey wale ko ya batatin?”
“Wahi jo tumhein bataya hai.”
Wo unki zahanat par baagh baagh ho gaya.
“Is se pehle aap kabhi is tarah pata bata kar ghar pahonchi hain?”
Usne qadrey afsos bharey lehjey mein gaadi reverse karte hue pucha.
“Na………kabhi nahin………..zarurat hi nahin padi.”
Sayeeda amma ka itmenaan qaabil-e-rashk tha. Salar mazeed kuch kahe baghair gaadi sadak par le aaya.
“Ab tum kahan jaa rahe ho?”
Sayeeda amma zyada der chup na reh sakin.
“Jahan se aap ko liya tha ghar usi sadak par hoga, aap ne koi turn to nahin liya tha?” Salar ne back mirror se unhein dekhte hue pucha.
“Nahin, main ne nahin liya.”
Sayeeda amma ne qadrey uljhey andaaz mein kaha.
Salar ne unke lehjey par ghaur nahin kiya. Usne itmenaan ki saans li. Iska matlab tha ghar us sadak par hi kahin tha aur galiyon ki nisbat colony mein ghar talaash karna aasaan tha. Wo bhi is surat mein jab use sirf ek sadak ke ghar dekhne the.
“Tum cigarette peetey ho?”
Khamushi ek dam tooti. Wo gaadi drive karte rate chaunk gaya.
“Main…………?”
Usne back mirror mein dekha. Sayeeda amma bhi back view mirror mein hi dekh rahi thin.
“Aaa…….. Nahin.”
Wo sawaal ko samajh nahin saka tha.
“Koi aur nasha waghaira?”
Wo is baar sawaal se zyada unki bey takallufi par hairaan hua tha.
“Aap kyun puch rahi hain?”
“Bas waise hi. Ab itna lamba raasta main khamush kaise rahungi?”
Unhon ne apni majboori batayi.
“Aap ko kya lagta hai, main karta hunga koi nasha?”
Salar ne jawaaban unse pucha.
“Nahin, kahaan………… isi liye to main puch rahi hoon………. To phir nahin karte?”
Unke andaz ne is baar Salar ko mehzooz kiya.
“Nahin.” Usne mukhtasaran kaha. Wo ab signal par rukey hue the.
“Koi girlfriend hai?” Salar ko laga usse sunne mein koi ghalti hui hai. Usne palat kar Sayeeda amma koi dekhte hue pucha.
“Aap ne kya pucha hai?”
“Main ne kaha, koi girlfriend hai?”Sayeeda amma ne ‘girlfriend’ par zor dete hue kaha.
Salar khilkhila kar hans pada.
“Aap ko pata hai girlfriend kya hoti hai?”
Sayeeda amma uske sawaal par bura maan gayin.
“Kyun bhai………… do bete hain mere, mujhe nahin pata hoga ke girlfriend kya hoti hai. Jab unhein bahar padhne ke liye bheja tha to keh kar bheja tha mere shauhar ne ke girlfriend nahin honi chahiye aur phir mahiney mein ek baar phone aata tha donon ka.”
Signal khul gaya. Salar muskuratey hue sidha ho gaya aur accelerator par paaon daba diya.
Sayeeda amma ne baat jaari rakhi.
“Main donon se kehti thi ke qasam kha kar batayein, unhon ne koi girlfriend banayi to nahin. Jab tak shadiyan nahin ho gayin har baar phone par sab se pehle donon qasam kha kar yahi bataya karte the mujhe. Salaam bhi baad mein kiya karte the.”
Wo fakhriya andaaz mein batati jaa rahi thin.
“Bade taabey daar hain mere bachche, donon ne girlfriend nahin banayi.”
“Aap ne apni pasand se donon ki kahin shadiyan ki hain?”
Salar ne pucha.
“Nahin, donon ne udhar hi apni pasand se shadiyan ki hain.”
Unhon ne saadgi se kaha. Salar ke halaq se bey ikhteyaar qehqaha nikla.
“Kya hua?”Sayeeda amma ne sanjeedgi se pucha.
“Kuch nahin, aap ki bahuwein angrez hain?”
“Nahin, Pakistani hain magar wahin rehti thin. Mere beton ke sath kaam karti thin magar tum hansey kyun?”
Sayeeda amma ne apna sawal dohraya.
“Koi khaas baat nahin.”
Sayeeda amma kuch der khamush rahin phir unhon ne pucha.
“To tum ne bataya nahin ke girlfriend………”
Salar ne unki baat kaat di.
“Nahin amma! Girlfriend bhi nahin hai.”
“Mashallah………Mashallah.” Wo ek baar phir is Mashallah ka siyaq—sabaaq samajhne mein nakaam raha.
“Ghar apna hai?”
“Nahin kiraye ka hai.”
“Koi mulaazim waghaira hai?”
“Mustaqil to nahin hai magar safai waghaira ke liye mulazim rakha hua hai.”
“Aur ye gaadi to apni hi hogi?”
“Ji.”
“Aur tankhwaah kitni hai?”
Salar rawaani se jawaab dete dete ek baar phir chaunka. Guftgu kis nauiyat par jaa rahi thi, fauri taur par uski samajh mein nahin aaya.
“Sayeeda amma! Aap yahan akeli kyun rehti hain. Apne beton ke paas kyun nahin chali jaatin?”
Salar ne mauzoo badla.
“Haan, mera yahi iraada hai. Pehle to mera dil nahin chahta tha magar ab ye socha hai ke beti ki shadi kar loon to phir bahar chali jaaungi. Akele rehte rehte tang aa gayi hoon.”
Salar ab us sadak par aa gaya tha jahan se Sayeeda amma ko pick kiya tha.
“Main ne aapko yahan se liya tha. Aap batayein, in mein se kaunsa ghar hai?” Salar ne gaadi ki raftaar aahista karte hue dayen taraf ke gharon par nazar daali.
“Number ka nahin pata, ghar ki to pehchaan hogi aapko?”
Sayeeda amma baghaur gharon ko dekh rahi thin.
“Haan…….. Haan ghar ki pehchaan hai.”
Wo ghar ki nishaaniyaan batane lagin jo utni hi mubham thin, jitna unke apne ghar ka pata. Wo sadak ke aakhri sirey par pahonch gaye. Sayeeda amma ghar nahin pehchaan sakin. Salar, Bilal ke waalid ka naam puch kar gaadi se niche utar aaya aur baari baari donon atraaf ke gharon se Sayeeda amma ke barey mein puchne laga.
Aadh ghanta ke baad wo us sadak par maujood har ghar mein jaa chuka tha. Matlooba naam ke kisi aadmi ka ghar wahan nahin tha.
“Aap ko naam to theek se yaad hai na?”
Wo thak haar kar Sayeeda amma ke paas aaya.
“Haan……… lo bhala ab mujhe naam bhi pata nahin hoga?”
Sayeeda amma ne bura maana.
“Laikin is naam ke kisi aadmi ka ghar yahan nahin hai, na hi koi aap ke barey mein jaanta hai.”
Salar ne gaadi ka darwaza khol kar andar baithtey hue kaha.
“Haan to……….ye saath wali sadak par dekh lo.”
Sayeeda amma ne kuch faasley par ek aur sadak ki taraf ishaara karte hue kaha.
“Laikin aap ne kaha tha ke ghar isi sadak par hai.” Salar ne kaha.
“Main ne kab kaha tha?” Wo motariz huin.
“Main ne aap se pucha tha ke aap ne turn to nahin liya, aap ne kaha tha nahin.” Salar ne unhein yaad karaya.
“Wo to main ne kaha tha, magar ye hota kya hai?”
Salar ka dil dooba.
“Turn?”
“Haan yahi.”
“Aap kisi aur sadak se mud kar to yahan nahin aayin?”
“Lo to is tarah kaho na.”
“Main kyun yahan baith gayi thi. thak gayi thi chal chal kar aur ye sadak to choti si hai. Yahan main chal kar kya thak sakti thi?”
Salar ne gaadi start kar li. Wo din bahot kharaab tha.
“Kis sadak se mud kar yahan aayi thin aap?”
Usne Sayeeda amma se kehte hue gaadi aage badhayi.
“Mera khayal hai………….” Wo pehli sadak ko dekhte hue uljhin.
“Ye hai.” Unhon ne kaha.
Salar ko yaqeen tha wo sadak nahin hogi magar usne gaadi us sadak par mod li. Ye to tay tha ke aaj us saara din isi tarah zaaye hona tha.
Agla ek ghanta wo aas paas ki mukhtalif sadkon par Sayeeda amma ko ley kar phirta raha magar use k kaamyaabi nahin hui. Sayeeda amma ko har ghar hi dur se shanaasa lagta, paas jaane par wo kehna shuru kar detin.
“Na…………na………..na……….ye nahin hai.”
Wo bil aakhir colony mein talaash chhod kar unhein wapas usi mohalley mein le aaya jahan wo pehle unka ghar dhundta raha tha.
Mazeed ek ghanta zaaye karne ke baad jab to thak kar wapas gaadi ke paas aaya to shaam ho chuki thi.
Sayeeda amma uske bar aks itmenaan se gaadi mein baithi hui thin.
“Mila?”
Unhon ne Salar ke andar baithtey hi pucha.
“Nahin, ab to raat ho rahi hai. Talaash bey kaar hai. Main police mein report kara deta hoon aap ki. Aap ki beti ya aap ke mohalley wale aap ke na milney pa police se raabta to karenge hi…….. phir wo ley jaayenge aap ko.”
Salar ne ek baar phir gaadi start karte hue tajweez pesh ki.
“Tch………tch……… Aamna bey chaari bahot pareshan hogi.”
Sayeeda amma ko apni beti ka khayal aaya. Salar ka dil chaha wo un se kahe ke wo unki beti se zyada pareshan hai magar wo khamushi se drive karte hue gaadi police station le aaya.
Report darj karane ke baad wo uth kar wahan se jaane laga. Sayeeda amma bhi uth khadi huin.
“Aap baithein………..aap yahin rahengi.”
Salar ne unse kaha.
“Nahin…………ham inhein yahan kahan rakhenge. Aap inhein saath ley jaayein, ham se kisi ne raabta kiya to ham unhein aap ka pata de denge.” Police inspector ne kaha.
“Laikin main to inhein aap ke hawaaley kar dena chahta hoon.” Salar motariz hua.
“Dekhen, budhi khatoon hain, agar koi raabta nahin karta ham se to raat kahan rahengi ye………… aur agar kuch din aur guzar gaye………”
Police inspector kehta gaya. Sayeeda amma ne use baat mukammal nahin karne di.
“Nahin, mujhe idhar nahin rehna. Beta! Main tumhare sath hi chalungi. Main idhar kahan baithungi aadmiyon mein.”
Salar ne unhein pehli baar ghabratey hue dekha.
“Laikin main to……..akela rehta hoon. Wo kehte kehte ruk gaya phir use Furqan ke ghar ka khayal aaya.
“Achcha theek hai chalein.” Usne ek gehra saans lete hue kaha.
Bahar gaadi mein aa kar usne mobile par Furqan se raabta qayem kiya. Wo unhein Furqan ke haan thehraana chahta ha. Furqan abhi hospital mein hi tha. Usne mobile par saari surat-e-haal use batayi.
“Nausheen to gaon gayi hui hai.” Furqan ne use bataya.
“Laikin koi mas’ala nahin, main thodi der mein aata hoon. Unhein apne flat par le jaunga. Wo kaun si koi naujawaan khatoon hain ke mas’ala ho jayega. Tum zarurat se kuch zyada hi mohtaat ho rahe ho.”
“Nahin main unke aaram ke hawaley se keh raha tha. Awkward lagega unhein.” Salar ne kaha.
“Nahin lagta yaar! Puch lena tum unse, warna phir kisi sath wale flat mein thehra denge. Aalam sahab ki family ke sath.”
“Achcha, tum aao phir dekhte hain.” Salar ne mobile band karte hue kaha.
“Koi baat nahin beta! Main tumhare paas hi reh lungi. Tum mere bete ke barabar ho mujhe aitmaad hai tum par.”
Sayeeda amma ne mutmayin lehjey mein kaha.
Salar ne sirf muskuraney par iktefaa kiya.
Us ne raastey mein ruk kar ek restaurant se khana liya. Bhuk se uska bura haal ho raha tha aur ek dam use ehsaas hua ke Sayeeda amma bhi do paher se uske sath kuch khaye piye baghair hi phir rahi hain. Use nidaamat ka ehsaas hua. Apne flat ki taraf jaate hue usne raaste mein ek jagah ruk kar Sayeeda amma ke sath seb ka taaza juice piya. Wo zindagi mein pehli baar kisi budhey shakhs ke sath itna waqt guzaar raha tha aur use ehsaas ho raha tha ke ye kaam aasaan nahin tha.
Flat mein pahonch kar wo abhi Sayeeda amma ke sath khana kha raha tha jab Furqan aa gaya.
Usne Sayeeda amma se khud hi apna taarif karaya aur phir khana khane laga. Chand minton mein hi wo Sayeeda amma ke sath itni bey takallufi ke sath thaith Punjabi mein guftgu kar raha tha ke Salar ko rashk aane laga. Usne Furqan se achchi guftgu karne wala kabhi nahin dekha tha. Uske guftgu ke andaz mein kuch na kuch aisa zarur tha ke dusra apna dil uske saamney khol kar kar dene par majboor ho jata tha. Itne saalon se dosti ke bawajood wo Furqan ki tarah guftgu karna nahin seekh saka tha.
10 minute baad wo wahan khamushi se khana khaney wale ek saamey ki haisiyat ikhteyaar kar chuka tha jab ke Furqan aur Sayeeda amma musalsal guftgu mein masroof the. Sayeeda amma ye jaan kar ke Furqan doctor hai, usse tibbi mashwarey lene mein masroof thin. Khane ke khaatmey tak wo Furqan ko majboor kar chuki thin ke wo apna medical box laa kar unka checkup kare.
Furqan ne unhein ye nahin bataya ke wo oncologist tha. Wo badi tahammul mizaaji se apna bag le aaya. Usne Sayeeda amma ka blood pressure check kiya phir stethoscope se unke dil ki raftaar ko maapa aur aakhir mein nabz check karne ke baad unhein ye yaqeen dilaya ke wo bey had tandrust haalat mein hain aur blood pressure ya dil ki koi bimari unhein nahin hai.
Sayeeda amma ek dam bey had hashshaash bashshaash nazar aane lagin. Salar unke darmiyaan hone wali guftgu sunte hue kitchen mein bartan dho raha tha. Wo donon lounge mein sofon par baithe hue the. Phir usi dauraan usne phone ki ghanti suni. Furqan ne phone uthaya. Dusri taraf Dr Sabt Ali he. Salaam dua ke baad unhon ne kaha.
“Salar ne police station par kisi Sayeeda amma naam ki khatoon ke barey mein ittelaa di thi.” Furqan hairaan hua.
“Ji wo yahin hain, hamare paas.”
“Allah ka shukr hai.” Dr Sabt Ali ne kaha.
“Haan wo meri azeeza hain, ham unhein talaash kar rahe the chand ghanton se. police se raabta kiya to Salar ka naam aur number de diya unhon ne.”
Furqan ne unhein Sayeeda amma ke barey mein bataya aur phir Sayeeda amma ki baat phone par unse karayi. Salar bhi bahar lounge mein aa gaya.
Sayeeda amma phone par guftgu mein masroof thin.
“Doctor sahab ki azeeza hain ye.”
Furqan ne dheemi aawaz mein uske qareeb aa kar kaha.
“Dr Sabt Ali sahab ki?” Salar hairaan hua.
“Haan, un hi ki.”
Salar ne itmenaan bhara saans liya.
“Bhai sahab keh rahe hain tum se baat karane ko.”
Sayeeda amma ne Furqan se kaha.
Furqan tezi se unki taraf badha aur receiver le kar kaghaz par kuch note karne laga. Dr Sabt Ali use address likhwa rahe the.
Sayeeda amma ne qadrey hairaani se lounge ke darwazey mein khade Salar ko dekha.
“Tum kya kar rahe ho?” unki nazrein Salar ke apron par jami thin.
Wo kuch sharminda hua.
“Main………. Bartan dho raha tha.”
Salar kitchen mein wapas aaya aur usne apron utaar diya. Waise bhi bartan wo taqreeban dho chuka tha.
“Salar! Aao phir inhein chhod aate hain.”
Use apne aqab mein Furqan ki aawaz aayi.
“Ye kaam baad mein kar lena.”
“Tum gaadi ki chaabi lo, main haath dho kar aata hoon.” Salar ne kaha.
Agley 10 minute mein wo niche Salar ki gaadi mein the. Furqan agli seat par tha aur uske bawajood pichhli seat par baithi Sayeeda amma se guftgu mein masroof tha. Sath sath wo Salar ko raastey ke barey mein hidaayat bhi deta jaa raha tha.
Bahot tez raftaari se driving karte hue wo 20 minute mein matlooba mohalley aur gali mein the.Badi gali mein gaadi khadi karne ke baad wo donon unhein andar gali mein unke ghar tak chhodney gaye. Sayeeda amma ko ab rehnumaai ki zarurat nahin thi. wo apni gali pehchaanti thin.
Wo fakhriya andaaz mein kuch jataatey hue Salar ko batati gayin.
“Halwaai ki dukaan…………Gutter ke cement wale dhakkan………..Parvez sahab ka ghar………..”
“Ji.” Salar muskurate hue sar hilaata raha.
Usne unhein ye nahin bataya ke unki batayi hui saari nishaaniyan saheeh thin, sirf wo use ek ghalat ilaaqey mein le gayi thin.
“Aamna bey chaari pareshan ho rahi hogi.” Unhon ne surkh eent ke bani hui ek haveli numa do manzla makaan ke saamne rukhte hue 275ween dafa kaha.
Furqan ne aage badh kar bell bajayi. Salar qadrey sataaishi andaaz mein haveli par nazrein daudaata raha. Wo yaqeenan kaafi puraani haveli thi magar musalsal dekh bhaal ki wajah se wo us gali mein sab se baa waqaar lag rahi thi.
“Tum logon ko ab main ne chai piye baghair nahin jaane dena.”Sayeeda amma ne kaha.
“meri wajah se tum logon ko bahot pareshani hui. Khaas taur par Salar ko. Bachcha mujhe saara din liye phirta raha.”Sayeeda amma ne Salar ke kandhey par haath phertey hue kaha.
“Koi baat nahin Sayeeda amma! Chai ham phir kabhi piyenge, aaj hamein der ho rahi hai.”
“Haan Sayeeda amma! Aaj chai nahin piyenge. Kabhi aa kar aap ke paas khana khayenge.” Furqan ne bhi jaldi se kaha.
“Dekh lena, aisa na ho ke yaad hi na rahe tumhein.”
“Lein, bhala khana kaise bhulenge ham. Wo jo aap paalak gosht ki tarkeeb bata rahi thin wahi bana kar khilaiyega.”
Furqan ne kaha. Andar se qadmon ki aawaz aa rahi thi. Sayeeda amma ki beti darwaza kholney aa rahi thi aur usne darwazey se kuch faasley par hi Sayeeda amma aur Furqan ki aawazein sun li thin, isliye usne kuch bhi puche baghair darwazey ka bolt andar se utaartey hue darwaza thoda sa khol diya.
“Achcha Sayeeda amma! Khuda hafiz.” Furqan ne Sayeeda amma ko darwazey ki seedhiyan chadhtey hue dekh kar kaha. Salar usse pehle hi palat chuka tha.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-146/
Prev episode:
https://theothermeunfolded.com/blog/peer-e-kaamil-roman-urdu-umera-ahmed-episode-144/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar