Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Wo jis waqt dobara uthi us waqt kamra mukammal taur par tareek ho chuka tha. Wo bed se uth kar diwar ki taraf ki taraf gayi aur usne light jala di. Wall clock par raat ke 11:30 baje the. Wo fauri taur par andaza nahin kar saki ke ye itni lambi neend tablet ka asar thi ya phir pichhley kai dinon se saheeh taur pa na so sakney ki.
“Jo kuch bhi tha wo subah se bahot behtar haalat mein thi. use bey had bhook lag rahi thi, magar wo ye nahin jaanti thi ke ghar ke afraad us waqt jaag rahe honge ya nahin. Bahot aahistagi se wo darwaza khol kar lounge mein nikal aayi. Dr Sabt Ali lounge ke ek sofe par baithe koi kitaab padh rahe the. Darwaza khulne ki aawaz sun kar unhon ne sar utha kar dekha aur use dekh kar muskuraye.
“Achchi neend aayi?” Wo badi bashashat se bole.
“Ji……..” Usne muskurane ki koshish ki.
“Ab aisa karein ke wo saamne kitchen hai, wahan chali jaayein. Khana rakha hua. Garam karein. Wahan table par hi khaa lein uske baad chai ke do cup banayein aur yahan aa jayein.”
Wo kuch kahe baghair kitchen mein chali gayi. Fridge mein rakha hua khana nikaal kar usne garam kiya aur khane ke baad chai le kar lounge mein aa gayi. Chai ka ek cup bana kar usne Dr Sabt Ali ko diya.
Wo kitaab mez par rakh chuke the. Dusra cup le kar wo unke bil muqaabil dusrey sofey par baith gayi. Wo andaza kar chuki thi ke wo usse kuch baatein karna chahte the.
“Chai bahot achchi hai.”
Unhon ne ek sip le kar muskuratey hue kaha wo itni nervous thi ke unki taarif par muskura saki na shukriya ada kar saki. Wo sirf unhein dekhti rahi.
“Imama! Aap ne jo faisla kiya hai uske saheeh hone mein koi do raai nahin ho sakti magar faisla bahot bada hai aur itne bade faisley karne ke liye bahot himmat ki zarurat hoti hai. Khaas taur par is kam umri mein, magar baaz dafa faisley karne ke liye itni jurrat ki zarurat nahin hoti jitni un par qayem rehne ke liye hoti hai. Aap ko kuch arsey baad is ka andaza hoga.”
Wo bade thehrey lehjey mein keh rahe the.
“Main aap se ye jaanna chahta hoon ke kya mazhab ki tabdeeli ka faisla sirf mazhab ke liye hai ya koi aur wajah bhi hai.”
Wo chaunk kar unhein dekhne lagi.
“Mera khayal hai mujhe zyada waazeh taur par ye sawaal puchna chahiye. Kahin aisa to nahin ke aap kisi ladkey mein dilchaspi rakhti hai aur uske kehne par ya uske liye aap ne ghar se nikalne ka faisla kiya ho ya mazhab badalne ka. Is sawaal ka jawaab dene se pehle ye mat sochna ke agar aisi koi wajah hogi to main aap ko bura samjhunga ya aap ki madad nahin karunga. Main ye sirf isliye puch raha hoon ke agar aisa hua to phir mujhe us ladke aur uske ghar walon se bhi milna hoga.”
Dr Sabt Ali ab sawaaliya nazron se use dekh rahe the. Is waqt Imama ko pehli baar Maryam se itni der se raabta karne par pachhtawa hua. Agar Salar ki bajaye Dr Sab, Jalaal se ys uske ghar walon se baat karte to shayad………” Usne bojhal dil se nafi mein sar hila diya.
“Aisa kuch nahin hai.”
“Kya aap ko yaqeen hai ke aisa kuch nahin hai?” unhon ne ek baar phir pur sukoon andaz mein usse kaha.
“Ji………… Main ne Islam kisi ladkey ke liye qubool nahin kiya.” Wo is baar jhoot nahin bol rahi thi, usne Islam waqai Jalaal Ansar ke liye qubool nahin kiya tha.
“Phir aap ko andaza hona chahiye ke aap ko kitni pareshaniyon ka saamna karna padega.”
“Mujhe andaza hai.”
“Aap ke waalid Hashim Mubeen sahab se main waaqif hoon. Jama’at ke bahot sar garm aur baa rusookh leader hain aur aap ka unke mazhab se taaib ho kar is tarah ghar se chale aana unke liye ek bahot bada dhachka hai. Aap ko dhundney aur wapas le jaane ke liye wo zameen aasmaan ek kar denge.”
“Magar main kisi qeemat par wapas nahin jaungi. Main ne bahot soch samajh kar faisla kiya hai.”
“Ghar aap ne chhod diya hai. Ab aap kya karengi?”Imama ko andesha hua ke wo use court jaane ka mashwara denge.
“Main court mein nahin jaungi. Main kisi ke bhi saamne aana nahin chahti. Aap andaza kar sakte hain ke saamne aa kar mere liye bahot zyada masaail paida ho jayenge.”
“Phir aap kya karna chahti hain?” Unhon ne baghaur use dekhte hue pucha.
“Saamne na aane ka matlab ye hai ke aap medical college mein apni studies jaari nahin rakh sakengi”
“Main jaanti hoon.” Usne chai ka cup rakhte hue afsurdagi se kaha.
“Main waise bhi khud to medical ki taalim afford kar bhi nahin sakti.”
“Aur agar kisi dusrey medical college mein kisi dusrey shaher ya soobey mein aap ki migration karwa di jaaye to?”
“Nahin, wo mujhe dhund lenge. Unke zahen mein bhi sab se pehle yahi aayega ke main migration karwane ki koshish karungi aur itne thodey se medical colleges mein mujhe dhundna bahot aasaan kaam hai.”
“phir?”
“Main BSc mein kisi college mein admissoin lena chahti hoon magar kisi dusrey shaher mein…….. Lahore mein ek ek college chhaan maarenge aur main apna naam bhi badalwana chahti hoon………. Agar aap in donon kaamon mein meri madad kar sakein to main bahot ehsaan mand rahungi.”
Dr Sabt Ali bahot der khamush rahe wo kisi gehri soch mein gum the. Phir unhon ne ek gehra saans liya.
“Imama! Abhi kuch arsa aap ko yahin rehna chahiye. Pehle to ye dekhna hai ke aap ke ghar wale aap ki alaash mein kya kya tariqey ikhteyaar karte hain. Chand haftey intezaar karte hain phir dekhte ain aagey kya karna hai. Aap is ghar mein bilkul mehfooz hain………. Aap ko is hawaley se koi pareshani ahin honi chahiye. Aap court mein nahin jaana chahtin? Main aap ko uske liye majboor bhi nahin karunga aur aap ko ye dar nahin hona chahiye ke koi yahan tak aa jaayega ya aap ko zabardasti yahan se le jaayega. Aap ke sath koi bhi kisi bhi tarah ki zabardasti nahin kar sakta.”
Unhon ne us raat use bahot si tasalliyaan di thin. Use Dr Sabt Ali ki shakl dekh kar bey ikhteyaar Hashim Mubeen yaad aate rahe. Wo bojhal dil ke sath apne kamrey mein chali gayi.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-171/
Prev episode:
https://theothermeunfolded.com/blog/peer-e-kaamil-roman-urdu-umera-ahmed-episode-169/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar