Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Chand haftey ke baad jab Imama ko ye yaqeen ho gaya ke wo Dr Sabt Ali ke haan mehfooz hai aur koi bhi wahan tak nahin pahonch sakta to usne Salar Sikandar ko phone kiya. Wo usse nikaah ke papers lena chahti thi aur tab pehli baar ye jaan kar uske pairon ke niche se zameen nikal gayi ke Salar ne na to talaaq ka haq use tafweez kiya tha aur na hi wo use talaaq dene ka iraada rakhta tha.
Dr Sabt Ali ke ghar pahonchney ke baad usne pehli baar mobile ka istemaal kiya tha aur wo bhi kisi ko bataye baghair aur Salar se phone par baat karne ke baad use apni himaaqat ka shiddat se ehsaas hua…….Use Salar jaise shakhs par kabhi bhi us had tak aitmaad nahin karna chahiye tha aur use papers ko dekhne mein kitna waqt lag sakta tha jo usne unhein dekhne se ijtenaab kiya aur phir aakhir usne papers ki ek copy fauri taur par usse kyun nahin li. Kam az kam us waqt jab wo apne ghar se nikal aayi thi.
Use ab andaaza ho raha tha ke wo shakhs us ke liye kitni badi musibat ban gaya tha aur aayinda aane wale dinon mein……. Wo ab har baat par pachhta rahi thi. agar use andaza hota ke wo Dr Sabt Ali jaise aadmi ke paas pahonch jaayegi to wo kabhi bhi nikaah karne ki himaaqat na karti aur Salar jaise aadmi ke saath to kabhi bhi nahin.
Aur agar use yaqeen hota ke Dr Sabt Ali har haalat mein uski madad karenge to wo kam az kam Salar ke barey mein unse jhoot na bolti phir wo koi na koi raasta nikaal lete, magar ab jab wo unhein bade daawey aur yaqeen ke sath ye yaqeen dila chuki thi ke wo kisi ladke ke sath kisi bhi tarah involve nahin thi to is nikaah ka inkeshaaf aur wo bhi us ladke ke sath…….. jis ki buraiyon ke barey mein wo Dr Sabt Ali se baat kar chuki thi aur jis ke barey mein wo ye bhi jaante the ke Imama ke waldain ne uske khilaaf aghwa ka case file kiya tha. Wo nahin jaanti thi ke wo agar ab Dr Sabt Ali ko ye haqaaiq batane ki koshish karegi to unka radd-e-amal kya hoga aur kam az kam is waqt wo waahid thikaana khone ke liye tayyar nahin thi.
Agley kai din uski bhook pyaas bilkul khatm ho gayi. Mustaqbil ek dam bhoot ban gaya tha aur Salar Sikandar ……… use us shakhs se itni nafrat mehsoos ho rahi thi ke agar wo uske saamne aa jaata to wo use shoot kar deti. Use ajeeb ajeeb khadshey aur andeshey tang karte rehte. Pehle agar use sirf apne har walon ka khauf tha to ab is khauf ke sath Salar ka khauf bhi shaamil ho gaya tha agar usne meri talaash kar di aur uske sath hi uski haalat ghair hone lagi.
Uska wazan ek dam kam hone laga. Wo pehle khamush rehti thi magar ab uski khamushi mein aur izaafa ho gaya tha. Wo shadeed zehni dabao mein thi aur ye sab Dr Sabt Ali aur unke ghar walon se poshida nahin tha. Un sab ne usse baari baari un achanak aane ali tabdeeliyon ki wajah jaanne ki koshish ki laikin wo unhein taalti rahi.
“Tum pehle bhi udaas aur pareshan lagi thin magar ab ek do haftey se bahot zyada pareshan lagti ho. Kya preshani hai Imama?”
Sab se pehle Maryam ne usse is barey mein pucha.
“Nahin k pareshani nahin. Bas main ghar ko miss karti hoon.”
Imama ne use mutmayin karne ki koshish ki.
“Nahin, main ye nahin maan sakti. Aakhir ab achanak itna kyun miss karne lagi unhein ke khana peena bhul gayi ho. Chehra zard ho gaya hai. Aanhon ke gird halqey padne lage hain aur wazan kam hota jaa raha hai. Kya tum bimaar hona chahti ho?”
Wo Maryam ki kahi hui kisi baat ko rad nahin kar sakti thi. wo jaanti thi ke uski zaaheri haalat dekh kar koi bhi andaza baa aasaani laga sakta hai aur shayad ye andaza bhi ye ke pareshani kisi naye mas’aley ka nateeja thi magar wo is maamley mein bey bas thi. wo Salar ke sath hone wale nikaah aur usse mutalleqa khadshaat ko zahen se nikaal nahin paa rahi thi.
“Mujhe ab apne ghar wale zyada yaad aane lage hain. Joon joon din guzar rahe hain wo mujhe zyada yaad aa rahe hain.”
Imama ne maddham aawaz mein usse kaha aur ye jhoot nahin tha. Use waqai ab apne ghar wale pehle se zyada yaad aane lage the.
Wo kabhi bhi itna lamba arsa unse alag nahin rahi thi aur wo bhi mukammal taur par is tarah kat kar. Lahore aur hostel mein rehte hue bhi wo mahiney mein ek baar zaroor Islamabad jaati aur ek do baar Waseem ya Hashim Mubeen Lahore usse milne chale aateaur phone to wo aksar hi karti rehti thi magar ab ek dam use yun lagney laga tha jaise wo samandar mein maujood kisi weeraan jazeerey par aan baithi ho. Jahan dur dur tak koi tha hi nahin aur wo chehrey ……. Jin se use sab se zyada mohabbat thi wo khwaabon aur khayaalon ke alawa nazar aa hi nahin sakte the.
Pata nahin Maryam uske jawaab se mutmayin hui ya nahin magar usne mauzoo badal diya tha. Shayad usne socha hoga ke is tarah uska zahen bat jayega.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-174/
Prev episode:
https://theothermeunfolded.com/blog/peer-e-kaamil-roman-urdu-umera-ahmed-episode-172/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar