Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
User Dr Sabt Ali ke haan aaye 3 maah ho gaye the jab ek din unhon ne raat ko use bulaya.
“Aap ko apna ghar chhodey kuch waqt beet gaya hai. Aap ke ghar walon ne aap ki talaash abhi tak khatm to nahin ki hogi magar chand maah pehle wali tundi-o-tezi nahin rahi hogi ab ……….. main janna chahta hoon ke aap ab aage kya karna chahti hain.”
Unhon ne mukhtasar tamheed ke baad kaha.
“Main ne aap ko bataya tha main studies jaari rakhna chahti hoon.”
Wo uski baat par kuch der khamush rahe phir unhon ne kaha.
“Imama! aap ne apni shai ke barey mein kya socha hai?” Wo un se is sawaal ki tawaqqo nahin kar rahi thi.
“Shadi……..? Kya matlab……..? Wo bey ikhteyaar hiklaayi.
“Aap jin haalaat se guzar rahi hain un mein aap ke liye sab se behtreen raasta shadi hi hai kisi achchi family mein shadi ho jaane se aap is adam tahaffuz ka shikar nahin rahengi jis ka shikaar aap abhi hain. Main chand achchey ladkon aur families ko jaanta hoon. Main chahta hoon un mein se kisi ke sath aap ki kar di jaaye.”
Wo bilkul safed chehrey ke sath unhein chup chaap dekhti rahi. Wo unke paas aane se bahot pehle apne liye isi hal ko muntakhib kar chuki thi aur isi ek hal ko dhundtey dhundtey wo Salar Sikandar se nikaah ki himaaqat kar chuki thi.
Is waqt agar wo Salar Sikandar se nikaah na kar chuki hoti to wo bila heel-o-hujjat Dr Sabt Ali ki baat maanne par tayyar ho jaati. Wo jaanti thi in haalaat mein kisi achchi family mein shadi kitni aur kin musibaton se bacha sakti thi. Us ne aaj tak kabhi khud mukhtar zindagi nahin guzaari thi. wo har chez ke liye apni family ki mohtaaj rahi thi aur wo ye tasawwur karte hue bhi khaufzada rehti thi ke aakhir wo kab aur kis tarah sirf apne bal bootey par zindagi guzaar sakegi.
Magar Salar se wo nikaah uske galey ki aisi haddi ban gaya tha jise wo na nigal sakti thi aur na ugal sakti thi.
“Nahin main shadi nahin karna chahti.”
“Kyun?” Uske paas is sawaal ka jawaab maujoodtha, magar haqeeqat batane ke liye hausla nahin tha.
Dr Sabt Ali uske barey mein kya sochte ye ke wo ek jhuti ladki hai jo ab tak unhein dhoka dete hue unke paas reh rahi thi. yaa ye ke shayad……. Wo Salar se shadi ke liye hi apne ghar se nikli thi aur baaqi sab kuch ke barey mein jhoot bol rahi thi.
Aur agar unhon ne haqeeqat jaan lene par uski madad se maazrat kar li ya use ghar se chaley jaane ka kaha to……..? aur agar unhon ne us ke waldain se raabta karne ki koshish ki to ………? Wo 3 maah se Dr Sabt Ali ke paas thi. wo kitne achche wo bakhubi jaanti thi laikin wo is qadar khaufzada aur mohtaat thi ke wo kisi qism ka risk lene par tayyar nahin thi.
“Main pehle apni taalim mukammal karna chahti hoon taa ke kisi par bojh na banun. Kisi par bhi ……… Shadi kar lene ki surat mein agar mujhe baad mein kabhi kisi pareshani ka saamna karna pada to main kya karungi. Us waqt to mere liye shayad taalim haasil karna bhi mumkin nahin rahega.”
Usne ek lambi khamushi ke baad jaise kisi faisley par pahonchtey hue Dr Sabt Ali se kaha.
“Imama! Ham hamesha aap ki madad karne ke liye maujood rahenge. Aap ki shadi kar dene ka matlab ye nahin hoga ke mere ghar se aap ka talluq khatm ho jayega ya main aap se jaan chhudana chahta hoon …….. Aap mere liye meri chauthi beti hain.”
Imama ki aankhon mein aansu aa gaye.
“Main aap par koi dabao nahin daalunga. Jo aap chahengi wahi hoga. Ye sirf meri ek tajweez thi.”
Dr Sabt Ali ne kaha.
“Kuch saal guzar jaaney dein uske baad main shadi kar lungi. Jahaan bhi aap kahenge.” Usne Dr Sabt Ali se kaha. “Magr abhi fauri taur par nahin.”
Abhi mujhe Salar Sikandar se jaan chhudaani hai. Usse talaaq lene ka koi raasta talaash karna hai.”
Wo unse baat karte hue soch rahi thi.
“Kis shaher mein padhna chahti hain aap?”
Dr Sabt Ali ne mazeed koi dabao nahin daala.
“Kisi bhi shaher mein, meri koi tarjeeh nahin hai.” Usne un se kaha.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-176/
Prev episode:
https://theothermeunfolded.com/blog/peer-e-kaamil-roman-urdu-umera-ahmed-episode-174/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar