Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Dr Sabt Ali ke liye uska faisla shock ki tarah tha.
“Kyun Aamna! Mere ghar par kyun nahin reh saktin aap?” Unhon ne bahot naraazi se usse kaha.
“Sayeeda aapa ke sath kyun rehna chahti hain?”
“Wo bahot israar kar rahi hain.”
“Main unhein samjha dunga.”
“Nahin, main khud bhi unke sath rehna chahti hoon. Main unke sath rahungi to unki tanhaai dur ho jayegi.”
“Ye koi wajah nahin hai. Aap unke paas jab chahein jaa sakti hain magar sath rehne ke liye nahin.”
“Please! Aap mujhe wahan rehne ki ijaazat de dein, main wahan zyada khush rahungi. Main ab aahista aahista apne pairon par khada hona chahti hoon.”
Dr Sabt ne hairaani se use dekha.
“Pairon par khadey hone se kya muraad hai aap ki?’
Wo kuch der khamush rahi phir usne kaha.
“Main aap par bahot lambey arsey tak bojh nahin banna chahti. Pehle hi main bahot saal se aap par inhesaar kar rahi hoon, magar main saari zindagi to aap par bojh ban kar nahin guzaar sakti.”
Wo baat karte karte ruk gayi. Use laga ke uske aakhri jumley ne Dr Sabt Ali ko takleef di hai. Se pachhtawa hua.
“Main ne kabhi bhi aap ko bojh nahin samjha Aamna! Kabhi bhi nahin. Betiyan bojh nahin hotin aur mere liye aap ek beti ki tarah hai phir ye baat ………. Mujhe bahot dukh hua hai.”
“Main jaanti hoon abbu! Magar main sirf apni feelings ki baat kar rahi hoon. Dusrey par dependent hona bahot takleef dah baat hai. Main Sayeeda amma ke sath reh kar zyada pur sukoon rahungi. Main unhein pay karungi. Aap ko main kabhi pay karna chahun bhi to na kar sakungi. Shayad mujhe 10 zindagiyan milein to bhi main aap ke ehsaanaat ka badla nahin utaar sakti magar ab bas ………. Ab aur nahin ……… main ne zindagi ko guzaarney ke saarey tariqey seekhney hai, mujhe seekhney dein.”
Dr Sabt Ali ne iske baad use dobara apne ghar mein rehne par majboor nahin kiya tha. Wo uske liye bhi unki ehsaand mand thi.
Sayeeda amma ke sath rehne ka tajruba uske liye hostel mein ya Dr Sabt Ali ke haan rehne se bilkul mukhtalif tha. Use unke paas ek ajeeb si aazadi aur khushi ka ehsaas hua tha. Wo bilkul akeli rehti thin. Sirf ek mulaazma thi jo din ke waqt ghar ke kaam kar diya karti thi aur shaam ko wapas chali jaaya karti thi. wo bey had social life guzaarti thin. Mohalley mein unka bahot aana jaana tha. Aur na sirf mohalley mein balke apne rishtey daaron ke haan bhi aur unke ghar bhi aksar koi na koi aata rehta tha.
Unhon ne mohalley mein har ek se Imama ka taaruf apni bhaanji keh kar karwaya tha aur chand saalon ke baad ye taaruf bhaanji se beti mein tabdeel ho gaya tha. Agarche mohalley waae pichhley taaruf se waaqif the magar ab kisi naye milne wale se jab wo Imama ko beti ki haisiyat se muta’arif karwatin to kisi ko koi tajassus nahin hota tha. Log Saeeda amma ki aadat se waaqif the ke wo kitna mohabbat bhara dil rakhti thin. Unke bete bhi Imama se waaqif the bal ke wo baqaaidgi se phone par Sayeeda amma se baat karte hue uska haal ahwaal daryaaft karte rehte the. unki biwi aur bachhe bhi usse baat cheet karte the.
Unke bete har saal Pakistan aaya karte the aur unke qayaam ke dauraan bhi Imama ko kabhi aisa mehsoos nahin hota tha jaise wo unki family ka hissa nahin thi. baaz dafa yun hi lagta jaise wo waqai Sayeeda amma ki beti aur unke beton ki bahen thi. un donon ke bachche use phupho kaha karte the.
Punjab University se MSc karne ke baad usne Dr Sabt Ali ke tawassut se ek pharmaceutical company mein job shuru kar di. Uski job bahot achchi thi aur pehli baar usne maali taur par khud mukhtari haasil kar li thi. ye waise zindagi nahin thi jaisi wo apne waldain ke ghar guzaarti thi na hi waise thi jaisi zindagi ke wo khwaab dekha karti thi magar ye waisi bhi nahin thi jin khadshaat ka wo ghar se nikalte waqt shikaar thi. wo har ek ke barey mein nahin keh sakti thi magar uske liye zindagi mojezaat ka dusra naam thi. Salar Sikandar jaise ladke se is tarah ki madad, Dr Sabt Ali tak rasaai……… Sayeeda amma jaise khaandaan ka milna…….. taalim ka mukammal karna aur phir wo job……… Sirf Jalaal Ansar tha jis ka khayaal hamesha use takleef mein mubtala kar deta tha aur shayad use mil jaata to wo khud ko duniya ki khush qismat tareen ladki samajhti.
8 saalon ne us mein bahot si tabdeeliyan paida kar di thin. Ghar se nikalte waqt wo jaanti thi ke ab duniya mein uske nakhrey uthaney wala koi nahin tha. Use kisi se koi tawaqqo’aat wabasta karni thin na hi unke poora hone par takleef mehsoos karni thi. uska rona dhona bhi waqt guzarne ke sath sath kam hota jaa raha tha. 20 saal ki umr mein chhoti chhoti baaton par khauf zadah aur pareshan ho jaane wali Imama Hashim aahista aahista apna wajood khoti gayi thi. Nayi namudaar hone wali Imama zyada pur aitmaad aur mazboot aasaab rakhti thi magar uske sath sath wo bahot zyada mohtaat bhi ho gayi thi har cheez ke barey mein. Apni guftgu ke barey mein, apne taur atwaar ke barey mein.
Dr Sabt Ali aur Sayeeda amma donon ke khaandaanon ne use bahot mohabbat aur apnaaiyat di thi laikin iske bawajood wo hamesha koshish karti thi ke wo koi aisi baat ya harkat na karey jo unhein qaabil-e-aitraaz ya nagawaar lagey. Hashim Mubeen ke ghar mein use ye saari ehteyaat nahin karni padti thin magar wahan se nikal kar use ye sab seekhna pada tha.
Sayeeda amma ki gumshudgi ke dauraan wo office mein thi. 4 baje ke qareeb jab wo ghar aayi to ghar ko taala laga hua tha. Uske paas taaley ki dusri chaabi thi, kyun ke isse pehle bhi Sayeeda amma kai baat idhar udhar chali jaaya karti thin. Use tashweesh nahin hui.
Laikin jab Maghrib ki azaan hone lagi to wo pehli baar fikarmand hui. Kyun ke shaam ko bataye baghair wo kabhi yun ghayab nahin hui thin. Sath walon ke haan pata karne par use pata chala ke unka beta unhein Bilal ke ghar subah chhod aaya tha. Sayeeda amma pehle bhi aksar wahan aati jaati rehti thin isliye Imama un logon ko achchi tarah jaanti thi. usne wahan phone kiya to use pata chala ke wo do paher ko wahan se jaa chuki thin aur tab pehli baar use saheeh maanon mein tashweesh hone lagi.
Usne baari baari har us jagah pata kiya jahan wo jaa sakti thin magar wo kahin bhi nahin milin aur tab usne Dr Sabt Ali ko ittelaa di. Uski haalat tab tak bey had kharab ho chuki thi. Sayeeda amma ka mail-jol apne mohalley tak hi tha. Wo androon-e-shaher ke alawa kisi jagah ko achchi tarah nahin jaanti thin. Unhein kisi dusri jagah jaana hota to wo hamsaayon ke kisi ladkey ke sath jaatin ya phir Imama ke sath. Aur yahi baat Imama ko tashweesh mein mubtala kar rahi thi.
Dusri taraf Salar androon-e-shaher ke siwa shaher ke tamaam posh ilaaqon se waaqif tha. Agar use androon-e-shaher ke barey mein thodi bahot maalumaat hotin tab bhi wo Sayeeda amma ke adhurey patey ke bawajood kisi na kisi tarah uke ghar pahonch jaata.
Dr Sabt Ali ne raat gaye use Sayeeda amma ki khairiyat se apne kisi jaanne wale ke paas hone ki ittelaa di aur Imama ki jaise jaan mein jaan aayi.
Mazeed ek ghantey baad darwazey ki bell baji thi aur usne taqreeban bhaagtey hue jaa kar darwaza khola. Darwazey ki ot se usne Sayeeda amma ke peechey khade ek khush shakl aadmi ko dekha, jis ne darwaza khulne par use salaam kiya aur phir Sayeeda amma ko khuda hafiz kehte hue mud gaya aur us dusrey daraaz qaamat shakhs ke pichhey chalne laga jis ki Imama ki taraf pusht thi. Imama ne us par ghaur nahin kiya wo to bey ikhteyaar Sayeeda amma se lipat gayi thi.
Sayeeda amma agley kai din uske saamne un donon ka naam leti rahin, Salar aur Furqan………. Imama ko phir bhi shubah nahin hua ke wo Salar ………… Salar Sikandar bhi ho sakta tha ……….. Murda log zinda nahin ho sakte the aur use agar uski maut ka yaqeen na bhi hota tab bhi Salar Sikandar jaisa shakhs na to Dr Sabt Ali ka shanaasa ho sakta tha na hi us mein us tarah ki achchaiyaan ho sakti thin jin achchaiyon ka zikr Sayeeda amma waqtan fawaqtan karti rehti thin.
Iske kuch arsey baad usne jis shakhs ko Sayeeda amma ke sath seedhiyon par khadey dekha tha, us shakhs se uski pehli mulaqaat hui. Furqan apni biwi ke sath unke haan aaya tha. Use wo aur uski biwi donon achhey lage the. Phir wo chand ek baar aur unke ghar aaye the. Unke saath unki shanasaai mein izaafa ho gaya tha.
Use job karte tab 2 saal ho chuke the. Kuch waqt shayad aur isi tarah guzar jaata agar wo ittefaqan ek roz us sadak se na guzarti jahan Jalaal ke banaye hue hospital ke bahar uska naam aawezaan tha. Jalaal Ansar ka naam uske qadam rok dene ke liye kaafi tha magar kuch der tak hospital ke bahar uska naam dekhte rehne ke baad usne tay kiya tha ke wo dobara us sadak par kabhi nahin aayegi.
Jalaal shadi kar chuka tha. Ye wo ghar chhodtey waqt hi Salar se jaan chuki thi aur wo dobara uski zindagi mein nahin aana chahti thi magar uska ye faisla der paa saabit nahin hua.
Do haftey baad pharmaceutical company ke office mein hi uski mulaqaat Rabiya se hui. Rabiya wahan kisi kaam ke liye aayi thi. chand lamhon ke liye to use apne saamne dekh kar uski samajh hi mein nahin aaya ke wo kis tarah ke radd-e-amal ka izhaar karey. Ye mushkil Rabiya ne aasaan kar di. Wo usse badi garm joshi se mili.
“Tum ek dam kahan ghayab ho gayi thin. College aur hostel mein to ek lamba arsa toofan macha raha.”
Rabiya ne chhot’tey hi usse pucha. Imama ne muskuraney ki koshish ki.
“Bas main ghar se chali gayi thi. kyun gayi thi, tum to jaanti hogi.”Imama ne mukhtasaran kaha.
“Haan, mujhe kuch andaza to tha hi magar main ne kisi se zikr nahin kiya. Waise ham logon ki badi kambakhti aayi. Meri, Jaweriya, Zainab, sab ki ………. Police tak ne puch gach ki ham se. hamein to kuch pata hi nahin tha tumhare barey mein, magar hostel aur college mein bahot saari baatein phail gayi thin tumhare barey mein.”
Rabiya uske saamne wali kursi par baithi musalsal boley jaa rahi thi.
“Tum akeli hi gayi thin?” Usne baat karte karte achanak pucha.
“Haan.”Imama intercom par chai ka kehte hue boli.
“Magar gayi kaha thin?”
“Kahin nahin, yahin Lahore mein thi. tum batao, tum kya kar rahi ho aaj kal, aur Jaweriya…….. baaqi sab.”
Imama ne baat badalte hue kaha.
“Main practice kar rahi hoon Lahore mein. Jaweriya Islamabad mein hoti hai. Shadi ho gayi hai uski ek doctor se. meri bhi Farooq se hui hai. Tumhein to yaad hoga class fellow tha mera.”
Imama muskurayi. “Aur Zainab?” uska dil bey ikhteyaar dhadka tha.
“Haan, Zainab aaj kal England mein hoti hai. Residency kar rahi hai wahan apne shauhar ke sath. Uske bhai ke hospital mein hi Farooq practice karte hain.”
Imama ne bey ikhteyaar use dekha.
“Jalaal Ansar ke hospital mein?”
“Haan, usi ke hospital mein. Wo specialization kar ke aaya hai kuch arsey pehle laikin bey chaarey ke sath badi tragedy hui hai. Chand maah pehle talaaq ho gayi hai. Haalaan ke itna achcha banda hai magar……”
Imama uske chehrey se nazar nahin hata saki.
“Talaaq…….! Kyun?”
“Pata nahin, Farooq ne pucha tha usse. Keh raha tha understanding nahin hui. Biwi bhi badi achchi thi uski. Doctor hai wo bhi laikin pata nahin kyun talaaq ho gayi. Ham logon ke to khaasa aana jaan tha unke ghar mein. Hamein kabhi bhi ye andaza nahin hua ke aisa koi mas’ala hai donon ke darmiyaan. Ek beta hai 3 saal ka. Wo Jalaal ke paas hi hai. Uski biwi wapas America chali gayi hai.”
Rabiya laparwahi se tamaam tafseelaat bata rahi thi.
“Tum apne barey mein batao. Ye to main jaan gayi hoon ke yahan job kar rahi ho, magar studies to tum ne mukammal nahin ki.”
“MSc kiya hai chemistry main.”
“Aur shadi waghaira?”
“Wo abhi nahin.”
“Aur parents ke sath tumhara jhagda khatm hua ya nahin?”
“Nahin.” Usne maddham aawaz mein kaha.
Wo kuch der uske paas baithi rahi phir chali gayi. Imama baaqi ka saara waqt office mein disturb rahi. Usne Jalaal Ansar ko kabhi bhulaya nahin tha. Wo use bhula nahin sakti thi. usne sirf apni zindagi se usko alag kar diya tha magar wahan baithe hue us din use ehsaas hua ke ye bhi ek khush gumaani ya khud farebi ke siwa kuch bhi nahin tha. Wo Jalaal Ansar ko apni zindagi se alag bhi nahin kar sakti thi. wo sirf uski zindagi mein daakhil ho kar use kisi pareshani se do chaar karna chahti thi na hi uski azdawaaji zindagi kharaab karna chahti thi. Laikin ye jaanne ke baad ke uske azdawaaji zindagi pehle hi nakaam ho chuki hai aur wo ek baar phir akela tha. Wo use yaad aaya 8 saal pehle wo kis tarah us shakhs ke husool ke liye bachchon ki tarah machalti rahi thi. wo use haasil nahin kar saki thi. tab bahot si diwarein, bahot si rukawatein thin jinhein wo paar kar sakti thi na Jalaal Ansar kar sakta tha.
Magar ab bahot waqt guzar chuka tha. In rukawaton mein se ab kuch bhi un donon ke darmiyaan nahin tha. Use is baat ki koi parwah nahin thi ke wo ek shadi kar chuka tha ya uska ek beta bhi tha.
“Mujhe uske paas ek baar phir jaana chahiye. Shayad wo ab bhi mere barey mein sochta ho shayad use ab apni ghalti ka ehsaas ho.”Imama ne socha tha.
Usne aakhri baar phone par baat karte hue usse jo kuch kaha tha, Imama uske liye usko maaf kar chuki thi. Jalaal ki jagah jo bhi hota wo yahi kehta. Sirf ek ladki ke liye to koi bhi itne risk nahin le sakta aur phir uska career bhi tha jise wo banana chahta tha. Uske parents ki usse kuch ummidein thin jinhein wo khatm nahin kar sakta tha. Meri tarah wo bhi majboor tha. Bahot saal pehle kahe gaye uske jumlon ki baaz gasht ne bhi use dil bardaashta ya apne faisley par dobara ghaur karne par majboor nahin kiya tha.
“Mujhe uske paas jaana chahiye. Ho sakta hai ye mauqa mujhe Allah ne hi diya ho. Ho sakta hai Allah ne meri duaon ko qubool kar liya ho. Ho sakta hai Allah ko mujh par ab rahem aa gaya ho.”
Wo baar baar soch rahi thi.
“Warna is tarah achanak Rabiya mere saamne kyun aa jaati. Mujhe kyun ye pata chalta ke uski biwi se alaahedgi ho chuki hai. Ho sakta hai ab main uske saamne jaaun to…………” Wo faisla kar chuki thi. wo Jalaal Ansar ke paas dobara jaana chahti thi.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-185/
Prev episode:
https://theothermeunfolded.com/blog/peer-e-kaamil-roman-urdu-umera-ahmed-episode-183/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar