Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
“Main Dr Jalaal Ansar se milna chahti hoon.”Imama ne receptionist se kaha.
“Appointment hai aap ki?” Usne pucha.
“Nahin, appointment to nahin hai.”
“Phir to wo aap se nahin mil sakenge. Appointment ke baghair wo kisi patient ko nahin dekhte.” Usne bade professional andaz mein kaha.
“Main patient nahin hoon, unki dost hoon.”Imama ne counter par harh rakhte hue maddham aawaz mein kaha.
“Doctor sahab jaantey hain ke aap is waqt un se milne aayengi?” receptionist ne use ghaur se dekhte hue kaha.
“Nahin.”
“Ek minute, main un se puchti hoon.” Usne receiver uthaate hue kaha.
“Aap ka naam kya hai?” Wo receptionist ka chehra dekhne lagi.
“Aap ka naam kya hai?” Usne apna sawaal dohraya.
“Imama Hashim……..” Use yaad nahin usne kitne saalon baad apna naam liya tha.
“Sir! Koi khatoon aap se milna chahti hain. Wo keh rahi hain aap ki dost hain. Imama Hashim naam hai unka.”
Wo dusri taraf se Jalaal ki guftgu sunti rahi.
“Okay sir!” phir usne receiver rakh diya.
“Aap andar chali jaayein.” Receptionist ne muskuratey hue kaha.
Wo sar hilaatey hue darwaza khol kar andar chali gayi. Jalaal Ansar ka ek mareez bahar nikal raha tha aur wo khud apni mez ke peechey khada tha. Imamane uske chehrey par hairat dekhi thi. wo apne dhadaktey dil ki aawaz bahar bhi sun sakti thi. usne Jalaal Ansar ko 8 saal aur kitne maah ke baad dekha tha. Imama ne yaad karne ki koshish ki. Use yaad nahin aaya.
“What a pleasant surprise Imama!” Jalaal ne aage badh kar uski taraf aate hue kaha.
“Mujhe yaqeen nahin aa raha, tum kaisi ho?”
“Main theek hoon, aap kaise hain?”
Wo uske chehrey se nazar hataye baghair boli. Pichhley 8 saal se ye chehra har waqt uske sath raha tha aur ye aawaz bhi.
“Main bilkul theek hoon, aao baitho.”
Usne apni table ke saamne padi hui kursi ki taraf ishaara karte hue kaha. Wo khud table ke dusri jaanib apni kursi ki taraf badh gaya.
Wo hamesha se jaanti thi. wo Jalaal Ansar ko jab bhi dekhegi uska dil isi tarah bey qaabu hoga, magar itni khushi? Kaisi sarshaari thi jo wo apne rag-o-pay mein khoon ki tarah daudti mehsoos kar rahi thi.
“Kya piyogi? Chai, coffee,soft drink?” wo usse puch raha tha.
“Jo aap chahein.”
“Okay, coffee mangwa lete hain. Tumhein pasand thi.”
Wo intercom par kisi ko coffee bhijwaney ki hidayat de raha tha aur wo uska chehra dekh rahi thi. Uske chehrey par ab daadhi nahin thi. uska hairstyle mukammal taur par tabdeel ho chuka tha. Uska wazan pehle ki nisbat kuch badh gaya tha. Wo pehle ki nisbat bahot pur aitmaad aur bey takalluf nazar aa raha tha.
“Tum aaj kal kya kar rahi ho?” Receiver rakhte hi usne Imama se kaha.
“Ek pharmaceutical company mein kaam kar rahi hoon.”
“MBBS to chhod diya tha utm ne.”
“Haan, MSc kiya hai chemistry mein.”
“Kaun si company hai?”Imama ne naam bataya.
“Wo to bahot achchi company hai.”
Wo kuch der us company ke barey mein taarifi tabsara karta raha. Wo chup chaap use dekhti rahi.
“Main specialization kar ke aaya hoon.”
Wo apne barey mein batane laga. Wo palkein jhapkaaye baghair use dekhti rahi. Baaz logon ko sirf dekhna hi kitna kaafi hota hai. Usne use baat karte dekh kar socha tha.
“Ek saal hua hai is hospital ko shuru kiye aur bahot achchi practice chal rahi hai meri.”
Wo bolta raha. Coffee aa chuki thi.
“Tumhein mera kaise pata chala?” Wo coffee ka cup uthaatey hue bola.
“Main ne aapke hospital ke board par aap ka naam padha tha, phir Rabiya se mulaqaat hui. Aap jaante honge. Zainab bhi waaqif thi usse.”
“Rabiya Farooq ki baat kar rahi ho? Bahot achchi tarah jaanta hoon. Uska shauhar Dr Farooq mere sath kaam karta hai.” Usne coffee pitey hue kaha.
“Haan, wahi……. Phir main yahan aa gayi.”
Imama ne abhi coffee nahin pi thi. coffee bahot garm thi aur wo bahot garm cheezein nahin peeti thi. Usne kisi zamaaney mein mez ke dusri jaanib baithey hue shakhs ko idealise kiya tha. Uska khayaal tha ke usme har khoobi thi, har wo khoobi jo ek mukammal mard mein honi chahiye. Har wo khoobi jo wo apne shauhar mein dekhna chahti thi. Saadhe aath saal guzar gaye the aur Imama ko yaqeen tha ke wo abh bhi waisa hi hai. Chehrey se daadhi hat jaaney ka matlab ye nahin ho sakta ke usko ab Hazrat Muhammad ﷺ se mohabbat na rahi ho. Apne hospital ki kaamyabi ke qaseedey padhtey hue bhi Imama uski usi aawaz ko apne kaanon mein goonjta hua mehsoos kar rahi thi, jis aawaz ne ek baar uski zindagi ka sab se mushkil faisla aasaan kar diya tha.
Wo uske munh se kaamyaab practice aur shohrat ka sun kar masroor thi. Jalaal ne zindagi mein in hi kaamyaabiyon ko sametney ke liye saadhey aath saal pehle use chhod diya tha magar wo khush thi. aaj sab kuch Jalaal Ansar ki mutthi mein tha. Kam az kam aaj faisla karne mein use kisi dushwaari ka saamna nahin karna padta.
“Tum ne shadi kar li?” baat karte karte usne achanak puchha.
“Nahin.”Imama ne maddham aawaz mein jawaab diya.
To phir tum kahan rehti ho, kya apne parents ke paas ho?”
“Nahin,”
“Phir?”
“Akeli rehti hoon, parents ke paas kaise jaa sakti thi.” Usne maddham aawaz mein kaha.
“Aap ne shadi kar li?” Jalaal ne coffee ka ek ghont liya.
“Haan, shadi kar li aur alaahedgi bhi ho gayi. 3 saal ka ke beta hai mera. Mere paas hi hota hai.” Jalaal ne bey ta’assur lehjey mein kaha.
“I am sorry.”Imama ne izhaar-e-afsos kiya.
“Nahin, aisi koi baat nahin. Achcha hua ye shadi khatm ho gayi.”
“It was not a marriage, it was a mess.”
Jalaal ne coffe ka cup table par rakhtey hue kaha. Kuch der kamrey mein khamushi rahi phir us khamushi ko Imama ne toda.
“Bahot saal pehle ek baar main ne aap ko propose kiya tha Jalaal?”
Jalaal use dekhne laga.
“Phir main ne ap se shadi ke liye request ki thi. aap us waqt mujh se shadi nahin kar sake the.”
“Kya main ye request aap se dobara kar sakti hoon?”
Usne Jalaal Ansar ke chehrey ka rang badaltey dekha.
“Ab to haalaat badal chukey hain. Aap kisi par dependent nahin hain. Na hi mere parents ke kisi radd-e-amal ka andesha hoga na hi aap ke parents aitraaz karenge. Ab to aap mujh se shadi kar sakte hain?”
Wo Jalaal ka jawaab sunne ke liye ruki. Wo bilkul khamush tha. Uski khamushi ne Imama ke aasaab ko muzmahil kiya. Ye is liye khamush hai kyun ke ise apni pehli shadi ya bete ka khayal hoga. Imama ne socha. Mujhe ise batana chahiye ke mujhe uski pehli shadi ki koi parwah nahin hai na hi is baat par aitraaz ke iska ek beta bhi hai.
“Jalaal mujhe aap ki shadi par koi aitraaz nahin hai.”
Jalaal ne uski baat kaat di.”
“Imama! Ye mumkin nahin hai.”
“Kyun mumkin nahin hai. Kya aap ko mujh se mohabbat nahin hai?”
“Mohabbat ki baat nahin hai Imama! Ab bahot waqt guzar chuka hai. Waise bhi ek shadi nakaam hone ke baad main fauri aur par dusri shadi nahin karna chahta. Main apne career par dhyaan dena chahta hoon.”
“Jalaal! Aap ko mujh se to koi andesha nahin hona chahiye. Mere sath to aap ki shadi nakaam nahin ho sakti.”
“Phir bhi…….. main koi risk nahin lena chahta.” Jalaal ne uski baat kaat di.
“Main intezaar kar sakti hoon.”
Jalaal ne ek gehra saans liya.
“Uska koi fayda nahin hai Imama! Main is position mein nahin hoon ke tum se shadi kar sakun.”
Wo dam saadhey use dekhti rahi.
“Ye shadi main ne apni marzi se ki thi. dobara main apni marzi nahin karna chahta. Dusri shadi main apne parents ki marzi se karna chahta hoon.”
“Aap apne parents ko mere barey mein bata dein. Shayad wo aap ko ijaazat de dein.” Usne doobtey hue dil ke sath kaha.
“Nahin bata sakta. Imama dekho! Kuch haqaaiq hain jin ka saamna mujhe aur tumhein bahot haqeeqat pasandi se karna chahiye. Main apne liye tumhare jazbaat ki qadr karta hoon aur is mein koi shubah nahin ke kisi zamaaney mein, main bhi tumhare sath involve tha ya ye keh lo ke mohabbat karta tha. Main aaj bhi tumhare liye dil mein bahot khaas jazbaat rakhta hoon aur hamesha rakhunga. Magar zindagi jazbaat ke sahaarey nahin guzaari jaa sakti.”
Wo ruka. Imama coffee ke cup se uthtey dhuwein ke paar uska chehra dekhti rahi.
“Tum jab 7-8 saal pehle apna ghar chhod rahi thin to main ne tumhein samjhaaya tha ke is tarah na karo laikin tum ne us maamley ko apni marzi se handle kiya. Apne parents ko mujh se shadi ke liye convince karne ki bajaye tum mujhe majboor karti rahin ke main tum se chhup kar shadi kar loon. Main aisa nahin kar saka aur na hi ye munaasib samjha. Mazhab ki baat apni jagah, magar mazhab ke sath moaashra bhi to koi cheez hota hai jis mein ham rehte hain aur jis ki hamein parwah karni chahiye.”
Imama ko yaqeen nahin aaya. Wo ye sab us shakhs ke munh se sun rahi thi jo………
“tum to chali gayi thin magar tumhare jaane ke baad tumhara is tarah ghayab ho jaana kitna bada scandal saabit hua iska tumhein andaza nahin hai. Tumhare parents ne press mein ye khabar nahin aane di magar poorey medical college ko tumhara is tarah chale jaane ka pata tha. Police ne tumhari bahot saari friends aur class fellows se tumhare barey mein investigation ki.. Zainab bhi us mein shaamil thi. khush qismati se ham bach gaye.”
Wo uth khada hua.
“Main ne itne saal mehnat kar ke apna ye muqaam banaya hai. Main itna bahadur nahin hoon ke main tum se shadi kar ke logon ki cheh-may-goiyon ka nishaana banun. Mera uthna baithna doctors ki community mein hai aur Imama Hashim ki meri biwi ke taur par waapsi mujhe scandalize kar degi. Tum se shadi kar ke main logon se nazrein nahin churaana chahta. Tum itne saal kahan rahi ho, kaise rahi ho, ye bahot ahem sawalaat hain. Mere parents ko tumhari kisi baat par yaqeen nahin aayega aur mujhe logon ki nazron mein apna ye muqaam barqaraar rakhna hai. Tum bahot achchi ho magar log samajhtey hai ke tum achchi ladki nahin ho aur main kisi scandalized ladki se shadi nahin kar sakta. Main bardaasht nahin kar sakta ke koi ye kahe ke meri biwi ka kirdaar achcha nahin hai. I hope, tum meri position ko samajh sakti ho.”
Coffee ke cup se uththa dhuwaan khatm ho chuka tha magar Jalaal Ansar ka chehra ab bhi kisi dhuwein ke peechey chhupa nazar aa raha tha ya phir ye uski aankhon mein utarney wali dhund thi jis ne Jalaal Ansar ko ghayab kar diya tha.
Kursi ke donon hatthon ka sahara lete hue wo uth khadi ho gayi.
“Haan, main samajh sakti hoon.” Usne apne aap ko kehte suna. “Khuda hafiz.”
“I am sorry Imama!” Jalaal maazrat kar raha tha. Imama ne use nahin dekha. Wo jaise neend ki haalat mein chaltey hue kamrey se bahar aa gayi.
Shaam ke 7 baj chukey the, andhera chha chuka tha. Sadkon par street lights aur neon sign boards raushan the. Sadak par bahot zyada traffic thi. Us purey road par donon taraf doctors ke clinic the. Use yaad tha kisi zamaaney mein uski bhi khwaahish thi ke uska bhi aisa hi clinic ho. Use ye bhi yaad tha ke wo bhi apne naam ke aagey isi tarah qualifications ki ek lambi list dekhna chahti thi bilkul waise hi jis tarah Jalaal Ansar ke naam ke sath thin. Bilkul waise hi jis tarah us road par lage ue bahot se doctors ke naam ke aagey thin. Ye sab ho sakta tha, ye sab mumkin tha, uske haath ki mutthi mein tha agar wo ……… wo bahot saal pehle apne ghar se na nikli hoti.
Wo bahot der tak Jalaal ke hospital ke bahar sadak par khaali-uz-zehni ki kaifiyat mein sadak par daudti traffic ko dekhti rahi. Uski samajh mein nahin aa raha tha ke wo yahan se kahan jaaye. Usne ek baar phir mud kar hospital ke maathey par jagmagaatey electric board par Dr Jalaal Ansar ka naam dekha.
“Tum bahot achchi ladki ho, magar log tumhein achcha nahin samajhtey.”
Use chand minute pehle kahe hue uske alfaaz yaad aaye. Wahan khadey hue use pehli baar pata chala ke usne apni puri zindagi ek tarfa mohabbat mein guzaari thi. Jalaal Ansar ko usse kabhi mohabbat thi hi nahin. Naa saadhey aath saal pehle na hi ab ………. Usko sirf Imama ki zarurat nahin thi, uske sath munsalik baaqi cheezon ki bhi zarurat thi. uska lamba chauda family background ……….. Society mein uske khaandaan ka naam aur martaba……… uske khaandaan ke contacts ………. Uske khaandaan ki daulat ……….. jis ke sath natthi ho kar wo jump laga kar raaton raat upper class mein aa jaata ……… aur wo is khush fehmi mein mubtala rahi ke wo sirf uski mohabbat mein mubtala tha ……… uska khayal tha ke wo ek baar bhi uske kirdaar ke hawaley se koi baat nahin karega. Wo kam az kam ye yaqeen zaroor rakhega ke wo ghalat raastey par nahin chal sakti magar wo phir ghalat thi ………… uske nazdeek wo scandalized ladki thi jis ke difaa mein apni family ya dusrey logon se kuch kehne ke liye uske paas koi lafz nahin tha. Saadhe aath saal pehle ghar chhodtey hue wo jaanti thi ke log uske barey mein bahot kuch kahenge. Wo apne liye kaanton bhara raasta, zaher ugalti zabaanein aur tanz karti nazrein chun rahi thi magar ye usne kabhi nahin socha tha ke un logon mein Jalaal Ansar bhi shaamil hoga. Zaher ugalti baaton mein ek zabaan uski bhi hogi. Wo zindagi mein kam az kam Jalaal Ansar ko apne kirdaar ke achcha hone ke barey mein koi safaai ya wazaahat nahin dena chahti thi. wo usko koi safaai de hi nahin sakti thi. uske lafzon ne saadhe aath saal baad pehli baar use saheeh maanon mein haqeeqat ke taptey hue sehra mein phenk diya tha. Wo moashrey ke liye outcast ban chuki thi.
“To Imama Hashim…….. ye hai tumhari auqaat…….. ek scandalized aur daagh daar ladki aur tum apne aap ko kya samjhey baithi thin.”
Wo footpath par chalne lagi. Har board, har neon sign ko padhtey hue ……… Wahan lage hue bahot se doctors ke naamon se wo waaqif thi. Un mein se kuch uske class fellows the. Kuch usse junior, kuch usse seniour aur wo khud kahan khadi thi, kahin bhi nahin.
“Tum dekhna Imama! Tum kis tarah zaleel-o-khwaar hogi, tumhein kuch bhi nahin milega, kuch bhi nahin.”
Uske kaanon mein Hashim Mubeen ki aawaz goonjney lagi thi. usne apne gaalon par sayyal maaddey ko behtey mehsoos kiya. Aas paas maujood raushniyaan ab uski aankhon ko aur chundhiyaane lagi thin. Jalaal Andar bura aadmi nahin tha. Bas wo, wo nahin tha jo samajh kar wo uski taraf gayi thi. kaisa dhoka tha jo usne khaya tha. Jaan boojh kar khuli aankhon ke sath, wo bhi ek maadda parast tha, mukammal maadda parast. Sirf uska ye roop usne pehli baar dekha ha aur uske liye ye sab na qaabil-e-yaqeen tha. Wo bura aadmi nahin tha uski apni akhlaqiyaat thin aur wo unke sath ji raha tha. Imama Hashim ko aaj usne wo akhlaqiyaat bata di thin. Usne aisi tazheek aur tehqeer 8 saalon mein pehli baar dekhi thi aur wo bhi us shakhs ke hathon jise wo khoobiyon ka majmua samajhti rahi thi aur khoobiyon ke us majmue ki nazron mein wo kya thi? ghar se bhaagi hui ek scandalized ladki. Aansuon ka ek sailaab tha jo uski aankhon se umad raha tha aur us mein sab kuch beh raha tha, sab kuch……….. Usne bey rehmi ke sath aankhon ko ragda. Apni chaadar ke sath geeley chehrey ko khushk karte hue ek rikshey ko rok kar wo us mein baith gayi.
Darwaza Sayeeda amma ne khola tha. Wo sar jhukaaye is tarah andar daakhil hui ke uske chehrey par unki nazar na padi.
“Kahan thin tum Imama? Raat ho gayi, mera to dil ghabra raha tha. Sath walon ke ghar jaane hi ali thi main ke koi tumhare office jaa kar pata karey.”
Sayeeda amma darwaza band kar ke tashweesh ke aalam mein uske peechey aayi thin.
“Kahin nahin amma! Bas office mein kuch kaam tha isliye der ho gayi.”
Usne un se chand qadam aagey chalte hue peechey mudey baghair kaha.
“Pehle to kabhi tumhein office mein der nahin hui. Phir aaj kya ho gaya ke raat ho gayi. Aakhir aaj kyun itni der roka unhon ne tumhein?” Sayeeda amma ko ab bhi tasalli nahin ho rahi thi.
“Is ke barey mein main kya keh sakti hoon. Aayinda der nahin hogi.” Wo usi tarh apne kamrey ki taraf jaate hue boli.
“Khana garm kar doon ya thodi der baad khogi?” unhon ne uske peechey aate hue pucha.
“Nahin, main khana nahin khaungi. Mere sar mein dard ho raha hai. Main kuch der ke liye sona chahti hoon.”
Usne apne kamrey mein daakhil hote hue kaha.
“Dard kyun ho raha hai? Koi dawai de doon ya chai bana doon.” Sayeeda amma ko aur tashweesh lahaq hui.
“Amma! Please mujhe soney dein. Mujhe kisi cheez ki zarurat nahin hai. Agar hui to main aap se keh dungi.”
Usne sar mein waqai dard ho raha tha. Sayeeda amma ko shayad andaza ho gaya ke unki tashweesh is waqt use bey aaraam kar rahi hai.
“Theek hai tum so jao.” Wo jaane ke liye paltin.
Imama ne apne kamrey ki light on nahin ki, usne usi tarah andherey mein darwazey ko band kiya aur apne bistar par aa kar let gayi. Apna kambal kheench kar usne seedha let’tey hue apni aankhon par baazu rakh liya. Wo is waqt sirf sona chahti thi. wo kuch bhi yaad nahin karna chahti thi. na Jalaal Ansar se hoe wali kuch der pehle ki guftgu na hi kuch aur ……….. wo rona bhi nahin chahti thi. wo apne mustaqbil ke barey mein sochna bhi nahin chahti thi. uski khwahish puri ho gayi thi. use neend kaise aa gayi ye wo nahin jaanti thi magar wo bahot gehri neend soyi thi.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-186/
Prev episode:
https://theothermeunfolded.com/blog/peer-e-kaamil-roman-urdu-umera-ahmed-episode-184/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar