Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Fahad ke ghar walon ke israar tha ke shadi saadgi se ho aur is par kisi ko bhi aitraaz nahin hua tha. Imama khud bhi shadi saadgi se karna chahti thi magar wo ye nahin jaanti thi ke Fahad ke ghar walon ka saadgi par israar kuch aur wajuhaat ki bina par tha.
Uska nikaah mahendi wali shaam ko hona tha, magar us shaam ko seh paher ke qareeb Fahad ke ghar walon ki taraf se ye ittelaa aa di gayi ke nikaah agley din yaani shadi wale din hi hoga. Tab tak use ya Sayeeda amma ko koi andaza nahin hua tha ke Fahad ke ghar mein koi mas’ala tha. Mahendi ki waise bhi koi kambi chaudi taqreeb nahin thi. Sirf Sayeeda amma ke bahot qareebi log the ya phir nazdeeki hamsaaye. Nikaah ki taqreeb ke liye jis khane ka ehtemaam kiya gaya tha wo un logon ko server kar diya gaya.
Shadi ki taqreeb bhi saadgi se ghar par hi honi thi. 4 baje baraat ko aana tha aur 6 baje rukhsati honi thi. laikin baraat aane se ek ghanta pehle Fahad ke ghar walon ne Sayeeda amma ko Fahad ki ruposhi ke barey mein ittelaa dete hue is rishtey se maazrat kar li.
Imama ko 4 baje tak is saare maamley ke barey mein kuch pata nahin tha. Fahad ke ghar se aroosi libaas pehle bhijwa diya gaya tha aur wo us waqt libaas pehne taqreeban tayyar thi jab Maryam uske kamrey mein chali aayi. Uska chehra suta hua tha. Us ne Imama ko kapdey tabdeel karne ke liye kaha. Usne Imama ko fauri taur par ye nahin bataya tha ke Fahad ke ghar wale inkaar kar ke jaa chukey the. Usne Imama se sirf yahi kaha tha ke Fahad ke ghar walon ne shadi cancel kar di hai uske ghar mein kisi qareebi azeez ka inteqaal ho gaya hai. Wo ye bata kar bahot afra tafri mein kamrey se bahar nikal gayi. Imama ne kapdey tabdeel kar liye laikin us waqt uski chhati his ne use us pareshani se aagaah karna shuru kar diya tha. Use Maryam ki baat par yaqeen nahin aaya tha.
Kapdey tabdeel kar ke wo apne kamrey se bahar nikal aayi aur bahar maujood logon ke ta’assurat ne uske tamaam shubhaat ki tasdeeq kar di thi. wo Sayeeda amma ke kamrey mein chali gayi. Wahan bahot se log jama the. Kulsoom aunty, Maimuna, Noor-ul-Ain aapa……… Hamsaye mein rehne wali chand aurtein, Maryam aur Sayeeda amma……… maryam, Sayeeda amma ko paani pila rahi thin. Wo bahot nidhaal nazar aa rahi thin. Ek lamhein ke liye uske dil ki dhadkan ruki. Unhein kya hua tha. Uske andar daakhil hote hi sab ki nazrein us par padin. Maimuna aapa uski taraf tezi se badhin.
“Aamna tum bahar jao.” Unhon ne use sath le jaane ki koshish ki.
“Amma ko kya hua hai?” wo unki taraf badh gayi. Kulsoom aunty ne kamrey mein maujood logon ko bahar nikaalna shuru kar diya. Wo Sayeeda amma ke paas aa kar baith gayi.
“Inhein kya hua hai?” Usne bey taabi se Maryam se puchha.
Usne jawaab nahin diya. Sayeeda amma ka chehra aansuon se bheega hua tha. Wo Imama ko dekh rahi thin magar use yun laga jaise wo us waqt use dekh nahin paa rahin. Glass hathon se hatatey hue unhon ne use sath laga kar rona shuru kar diya.
Kamra khali ho chuka tha. Sirf Dr Sabt Ali ki family wahan thi.
“Kya hua hai amma? Mujhe batayein.”Imama ne unhein narmi se khud ko alag karte hue kaha.
“Fahad ne apne ghar walon ko bataye baghair ghar se jaa kar kisi aur se shadi kar li hai.” Maryam ne maddham aawaz mein kaha. “Wo log kuch der pehle maazrat karne aaye the. Wo log ye rishta khatm kar ke gaye hain.”
Chand minute ke tak wo bilkul saakit rahi thi. Khoon ki gardish, dil ki dhadkan, chalti hui saans……….. chand seconds ke liye sab kuch jaise ruk gaya tha.
“Kya mere sath ye bhi hona tha?” usne bey ikhteyaar socha.
“Koi baat nahin amma! Aap kyun ro rahi hain?” Usne badi sahulat se Sayeeda amma ke aansu saaf kiye. Sab kuch ek baar phir bahaal ho gaya tha siwaaye uski rangat ke, wo faq thi.
“Aap pareshan na hon.” Sayeeda amma ko uski baaton par aur rona aaya.
“Ye sab meri wajah se hua hai……. Main ……..”Imama ne unhein baat mukammal nahin karne di.
“Amma! Chodein na. koi baat nahin, aap preshan na hon. Aap let jaayein, kuch der aaram kar lein.” Wo unhein pur sukoon karne ki koshish kar rahi thi.
“Main tumhare dil ki halat samajhti hoon. Main tumhare gham ko jaanti hoon. Aamna! Meri bachchi mujhe maaf kar do. Ye sab meri wajah se hua hai.” Unhein tasalli nahin ho paa rahi thi.
“Mujhe koi gham nahin hai amma! Koi takleef nahin hai. Main bilkul theek hoon.” Usne muskuratey hue Sayeeda amma se kaha
Sayeeda amma ek dam rotey hue uth kar bahar nikal gayin.
Imama kisi se koi baat kahe baghair ek baar phir apne kamrey mein chali aayi. Uske bed par tamaam cheezein usi tarah padi hui thin. Usne unhein sametna shuru kar diya uski jagah koi aur ladki hoti to is waqt wahan baithi ro rahi hoti magar wo ghair maamuli taur par pur sukoon thi.
“Agar main Jalaal ke na milne par sabr kar sakti hoon to ye to phir ek aisa shakhs tha jis ke sath meri koi jazbaati wabastagi nahin thi.” Us ne apni aroosi libaas ko teh karte hue socha.
“Zyada se zyada kya hoga, yahan bhi logon ke saamne nazrein chura kar aur sar jhuka kar chalna padega. Kuch baatein aur bey izzati bardasht karni padegi. To phir kya hua, is mein mere liye naya kya hai.”
Maryam kamrey mein daakhil hui aur uske sath cheezein sametney lagi.
“Abbu ko phone kar diya hai.” Usne Imama ko bataya.
Wo pehli baar kuch jhunjhlayi.
“Kyun khwahmakhwah tum log unhein tang kar rahe ho. Unhein wahan sukoon se rehne do.”
“Itna bada haadsa ho gaya hai aur tum…….”
Us ne Maryam ki baat kaat di.
“Maryam, meri zindagi mein is se badey haadsey ho chuke hain. Ye kya maani rakhta hai. Mujhe takleef sehney ki aadat ho chuki hai. Tum Sayeeda amma ko tasalli do. Mujhe kuch nahin hua main bilkul theek hoon aur abbu ko bhi khwahmakhwah tang na karo. Wo wahan pareshan honge.”
Maryam ko cheezein samet’ti hui wo abnormal lagi.
Is se pehle ke wo kuch kehti, Kulsoom aunty, Sayeeda amma ke sath ek dam andar aa gayin. Imama ko un donon ke chehrey bahot ajeeb lagey. Kuch der pehle ke bar aks wo donon bey had khush nazar aa rahi thin. Uske kisi sawaal se pehle Kulsoom aunty ne use Salar ke barey mein batana shuru kar diya. Wo dam bakhud unki baatein sun rahi thi.
“Agar tumhein aitraaz na ho to tumhara nikaah usse kar diya jaye?” Aunty ne usse puchha.
“Sabt Ali use bahot achchi tarah jaantey hain, wo bahot achcha ladka hai.” Wo use tasalli dene ki koshish kar rahi thin.
“Agar abbu use jaante hain to theek hai. Mujhe koi aitraaz nahin, aap jaisa behtar samjhein karein.”
“Uska dost tum se kuch baatein karna chahta hai.” Wo is mutaalbey par kuch hairan hui thi magar usne Furqan se milne se inkaar nahin kiya.
“Mere dost e 8-9 saal pehle ek ladki se nikaah kiya tha, apni pasand se.”
Wo chup chaap Furqan ko dekhti rahi.
“Wo aap se shadi par tayyar hai, magar wo us ladki ko talaaq dena nahin chahta. Kuch wajuhaat ki bina par wo ladki uske sath nahin rahi laikin wo ab bhi use apne ghar mein rakhna chahta hai. Usne mujh se kaha hai ke main aap ko ye sab bata doon taa ke agar aap ko is par koi aitraaz ho to is baat ko yahin khatm kar denge. Laikin main aap se ye baat kehna chahta hoon ke shayad wo ladki use kabhi bhi na miley. 8-9 saal se uska mere dost se koi raabta nahin hai. Ye ek mauhoom si ummid hai jis par wo uska intezaar kar raha hai. Dr Sabt Ali sahab aap ko apni beti samajhte hain aur is hawaley se aap meri bahen ki tarah hain. Is waqt is surat-e-haal se nikalne ke liye yahin behtar hai ke aap usse shadi kar lein. Wo ladki use kabhi bhi nahin milegi kyun ke na to wo use pasand karti thi na hi aaj tak usne usse koi raabta karne ki koshish ki hai aur phir itna lamba arsa guzar chuka hai.”
Wo uska chehra dekhti rahi.
“Dusri biwi…….. to Imama Hashim ye hai tumhari taqdeer, jo ab tak tum se poshida thi.” Us ne socha.
“Agar Dr Sabt Ali is shakhs ke barey mein ye sab kuch jaante hue bhi usko mere liye muntakhab kar rahe hain to ho sakta hai mere liye yahi behtar ho. Main Jalaal ki bhi to dusri biwi banne ke liye tayyar thi. Usse mohabbat karne ke bawajood………. Aur is shakhs ki biwi banne par mujhe kya aitraaz hoga jis se mujhe mohabbat bhi nahin hai.”
Use ek baar phir Jalaal yaad aaya.
“Mujhe koi aitraaz nahin hai. Unki biwi jab bhi aaye wo use rakh sakte hain. Main badi khushi se unko ye ijaazat deti hoon.” Maddham aawaz mein kisi malaal ke baghair usne Furqan se kaha.
15 minute baad use pehla shock us waqt laga tha jab nikaah khwaan ne uske saamne Salar Sikandar ka naam liya tha.
“Salar Sikandar …….. wald Sikandar Usman.” Use nikaah khwaan ke munh se nikalne wale lafzon se jaise current laga tha. Wo naam aise nahin the jo har shakhs ke hote.
“Salar Sikandar……….Sikandar Usman? Aur phir is tarteeb main……..kya………ye……..shakhs zinda……hai?”
Uske sar par jaise aasmaan aa gira tha. Uske chehrey par chaadar ka ghunghat na hota to is waqt uske chehrey ke ta’assuraat ne sab ko pareshan kar diya hota. Nikaah khwaan apne kalmaat dohra raha tha.
Imama ka zahen maauf aur dil doob raha tha. Agar ye shakhs zinda tha to ……….. Main to ab tak uske nikaah mein hoon. Mere khuda……… ye sab kya ho raha hai. Dr Sabt Ali use kaise jaante hain. Uske zahen mein ek fishaar barpaa tha.
“Aamna……… beta! Haan kaho.” Sayeeda amma ne uske kandhey par apna hath rakha.
“Salar Sikandar jaise shakhs ke liye haan……..?”
Uska dil kisi ne apni mutthi mein le kar bheencha…… wo haan ke alawa us waqt kuch aur keh hi nahi sakti thi. khauf aur shock ke aalam mein usne kaaghzaat par dastakhat kiya the.
“Kaash koi mojeza ho. Ye so Salar Sikandar na ho. Ye sab ek ittefaaq ho.” Usne Allah se dua ki thi.
Un sab logon ke marey se chale jaane ke baad Maryam ne uske chehrey se chaadar hata di. Uske chehrey ka rang bilkul safed ho chuka tha.
“Kya hua? Maryam ki tashweesh mein izaafa ho gaya. Wo samajh nahin saki. Wo usse kya keh rahi thi. uska zahen kahin aur tha.
“Maryam! Just do me a favour.” Usne Maryam ka hath pakad liya.
“Main ne nikaah kar liya hai, magar main aaj rukhsati nahin chahti. Tum Sayeeda amma se kaho main abhi rukhsati nahin chahti.”
Uske lehjey mein kuch na kuch aisa zaroor tha ke Maryam uth kar bahar nikal gayi. Wo bahot jald hi wapas aa gayi.
“Imama! Rukhsati nahin ho rahi hai. Salar bhi rukhsati nahin chahta.”
Imama ke hathon ki kapkapahat kuch kam ho gayi.
“Abbu ka phone aane wala hai tumhare liye. Wo tum se kuch baat karna chahte hain.”
Usne Imama ko mazeed ittelaa di. Wo phone sunne ke liye dusrey kamrey mein aa gayi. Unhon ne kuch der baad use phone kiya tha. Wo use mubarak baad de rahe the. Imama ka dil roney ka chaha.
“Salar bahot achcha insaan hai.” Wo keh rahe the. “Meri khwahish thi ke aap ki shadi usi se ho magar chun ke aap Sayeeda aapa ke paas reh rahi thin isliye main ne unki khwahish aur intekhaab ko muqaddam samjha.”
Wo saans lene ke qaabil nahin rahi thi.
“Mujhe ilm nahin tha ke Salar ne isse pehle kabhi shadi ki thi magar thodi der pehle Furqan ne mujhe iske barey mein bataya hai. Wo sirf zaruratan kiya jaane wala koi nikaah tha. Furqan ne mujhe tafseel nahin batayi aur main samajhta hoon ke iski zarurat bhi nahin hai. Mere jaanne walon me Salar se achcha koi shakhs hota to uske nikaah ke barey mein jaan lene ke baad main aap ki shadi Salar se karne ke bajaye kahin aur kar deta laikin mere zahen mein Salar ke alawa aur koi aaya hi nahin. Aap khamush kyun hain Aamna?”
Unhein baat karte karte uska khayal aaya.
“Abbu! Aap wapas kab aayenge?”
“Main ek haftey tak aa raha hoon.” Dr Sabt Ali ne kaha.
“Mujhe aap se bahot saari baatein karni hain. Mujhe aap ko bahot kuch batana hai.”
“Aap khush nahin hain?” Dr Sabt Ali ko uske lehjey ne pareshan kiya.
“Aap Pakistan aa jayein, phir main aap se baat karungi.” Usne hatmi lehjey mein kaha.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-189/
Prev episode:
https://theothermeunfolded.com/blog/peer-e-kaamil-roman-urdu-umera-ahmed-episode-187/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar