Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
“Aap Lahore ja rahe hain to wapsi mein Imama ke hostel chale jayein, ye kuch kapde hain uske, darzi se le kar aayi hun, aap use de aayein.” Salma ne Hashim se kaha.
“Bhai, main bahot masroof rahunga hostel mein, kahan aata jata phirunga us ke hostel.” Hashim ko qadre tammul hua.
“Aap driver ko sath le ja rahe hain. Khud nahin ja sakte to use bhej dijiye ga, wo de aayega ye packet. Season khatm ho raha hai phir ye kapde isi tarah pade rahenge. Uska to pata nahin kab aaye.” Salma ne lambi chaudi wazahat ki.
“Acha thik hai, main le jata hoon. Fursat mili to khud de aaunga warna driver ke hath bhijwa dunga.” Hashim razamand ho gaye.
Lahore mein unhone ne acha khasa masroof din guzara. Shaam 5 baje ke qareeb unhein kuch fursat mili aur tab unhein us packet ka khayal aa gaya. Driver ko packet le jane ka kehne ki bajaye wo khud Imama ke hostel chale aaye. Us ke admission ke baad aaj pehli baat wo wahan aaye the. Gate keeper ke hath unhone ne Imama ke liye paigham bhijwa diya aur khud intezar karne lage. Unka khayal tha ke wo jald hi aa jayegi magar aisa nahin hua. 10 minutes, 15 minutes, 20 minutes…… Wo ab kuch bezaar hone lage. Isse pehle ke wo dobara paigham bhijwate unhein gate keeper ek ladki ke sath aata dikhayi diya. Kuch qareeb aane par unhone ne us ladki ko pehchaan liya wo Jaweriya thi, Imama ki bachpan ki dost aur uska talluq bhi Islamabad se hi tha.
“Assalamualaikum Uncle!” Jaweriya ne paas aakar kaha.
“Walaikumussalam beta! Kaisi ho tum?”
“Main thik hun.”
“Main ye Imama ke kuch kapde dene aaya tha, Lahore aa raha tha to uski ammi ne ye packet de diya. Ab yahan baithe mujhe ghanta ho gaya hai magar inhon ne use bulaya nahin.” Hashim ke lehje mein shikwa tha.
“Uncle! Imama market gayi hai kuch doston ke sath. Aap ye packet mujhe de dein, main khud use de dungi.”
“Thik hai tum rakh lo.” Hashim ne wo packet Jaweriya ki taraf badha diya.
Rasmi Alaik Salaik ke baad wo wapas mud gaye. Jaweriya bhi packet pakad kar hostel ki taraf chali gayi magar ab uske chehre par maujood muskurahat ghayab ho chuki thi. Koi bhi us waqt uske chehre par pareshani ko wazeh taur par bhaanp sakta tha.
Hostel ke andar aate hi warden se uska samna ho gaya jo samne khadi thi. Jaweriya ke chehre par ek baar phir muskurahat aa gayi.
“Baat hui tumhari uske walid se?” warden ne use dekhte hi uski taraf badhte hue kaha.
“Ji baat hui, pareshani wala koi mas’alanahin hai. Wo Islamabad mein apne ghar par hi hai. Uske walid ye packet le kar aaye the, mere ghar wale ne mere kuch kapde bhijwaye hain. Uncle Lahore aa rahe the to Imama ne kaha wo le jayein. Uncle ne ghalti se yahan aa kar mera naam lene ke bajaye Imama ka naam le diya.” Jaweriya ne ek hi saan mein kayi jhoot rawani se bole.
Warden ne sukoon ka saans liya. “Khuda ka shukr hai warna main to pareshan ho gayi thi ke mujhe to wo weekend par ghar jane ka keh kar gayi hai………. To phir wo kahan hai……..”
Warden ne mudte hue kaha. Jaweriya packet pakde apne kamre ki taraf chali aayi. Rabiya use dekhte hi teer ki tarah uski taraf aayi.
“Kya hua…… Islamabad mein hi hai wo?”
“Nahin.” Usne mayusi se sar hilaya.
“My God.” Rabiya ne be yaqeeni se apne dono hath cross kar ke sine par rakhe. “ To phir kahan gayi hai wo?”
“Mujhe kahan pata mujh se to usne yahi kaha tha ke ghar ja rahi hai, magar wo ghar nahin gayi, aakhir gayi kahan hai? Imama aisi to nahin hai.” Jaweriya ne packet bistar par phenkte hue kaha.
“Warden se kya kaha tum ne?” Rabiya ne tashweesh bhare andaaz mein pucha.
“Kya kaha? Jhoot bola hai aur kya keh sakti hoon. Ye bata deti ke wo Islamabad mein nahin hai to hostel mein bhi hangama shuru ho jata, wo to police bulwa letin.” Jaweriya ne nakhun kat’te hue kaha.
“Aur uncle…… Unko kya bataya?” Rabiya ne pucha.
“Unse bhi jhut bola hai, yahi kaha ke wo market gayi hai.”
“magar ab kya hoga?” Rabiya ne pareshani ke aalam mein kaha.
“Mujhe to ye fikr ho rahi hai ke agar wo wapas na aayi to main buri tarah pakdi jaungi. Sab yahi samjhenge ke mujhe uske program ka pata tha, isliye main ne warden aur uske ghar walon se sab kuch chupaya.” Jaweriya ki pareshani badhti ja rahi thi.
“Kahin Imama ko koi hadsa hi pesh na aa gaya ho? Warna wo aisi ladki to nahin hai ke is tarah……” Rabiya ko achanak ek khadshe ne sataya.
“Magar ab ham kya karein, ham to kisi se is mamle ko discuss bhi nahin kar sakte.” Jaweriya ne nakhun kutarte hue kaha.
“Zainab se baat karein?” Rabiya ne kaha.
“For god’s sake Rabiya! Kabhi to aql se kaam liya karo’ usse kya baat karenge ham.” Jaweriya ne jhunjhla kar kaha.
“To phir interzar karte hain. Ho sakta hai wo aaj raa tak ya kal tak aa jaye agar aa gayi to phir koi mas’ala nahin rahega aur agar na aayi to phir ham warden ko sab kuch sach sach bata denge.” Rabiya ne sanjeedgi se sare maamle par ghaur karte hue tay kiya. Jaweriya ne use dekha magar us ke mashware par kuch kaha nahin. Pareshani uske chehre se chalak rahi thi.
Prev episode: https://theothermeunfolded.com/blog/peer-e-kaamil-roman-urdu-umera-ahmed-episode-26/
Next episode: https://theothermeunfolded.com/blog/peer-e-kaamil-roman-urdu-umera-ahmed-episode-28/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar