Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Jalaaluddin Ansar Zainab ka bada bhai tha aur Imama ghaibaana taur par usse waqif thi. Zainab uski class fellow thi aur usse Imama ka taaruf wahin medical college mein hua tha. Chand maah mein hi ye taaruf achi khaasi dosti mein badal gaya. Is taaruf mein use ye pata chala ke wo log 4 bhai-bahen the. Jalaal sab se bada tha aur house job kar raha tha. Zainab ke walid WAPDA (Water and Power Development Authority cricket team) mein engineer the aur unka gharaana kaafi mazhabi tha.
Islamabad se wapsi par usne Zainab se naat padhne wale us shakhs ke barey mein pucha.
“Zainab! Us raat main ne tumhein phone kiya to koi naat padh raha tha, wo kaun tha?” Unse apne lehje ko hattal-imkaan normal rakhte hue kaha.
“Wo……Wo……..Jalaal bhai the………Ek muqable mein hissa lene ke liye wo naat yaad kar rahe the. Phone corridor mein hai aur unke kamre ka darwaza khula hua tha isliye aawaz tum tak pahonch gayi.” Zainab ne tafseel se bataya.
“Bahot achi aawaz hai unki.”
“Haan, aawaz to bahot achi hai unki. Qirat to naat se bhi zyada khoobsurat karte hain. Bahot se muqaablon mein inaam bhi le chuke hain. Abhi bhi college mein ek muqaabla hone wala hai tum us mein unhein sunna.”
Zainab tab nahin jaanti thi ke Imama kis mazhab ki thi, wo jis tarah parde ka khayaal rakhti thi Zainab ka khayaal tha ke wo kisi mazhabi gharaane se talluq rakhti hai. Khud Zainab bhi khaase mazhabi gharaane se talluq rakhti thi aur chaadar odha karti thi.
2-3 din baad Imama Jalaal Ansar ki naar sunne ke liye apni friends ko bataye baghair classes bunk kar ke naaotn ke us muqaable mein chali gayi thi.
Jalaal Ansar ko us din pehli baar dekha tha. Compere ne Jalaal Ansar ka naam pukara aur Imama ne tez hoti hui dhadkanon ke saath Zainab se mushabehat rakhne wale aam si shakl-o-soorat aur daadhi wale ek 24-25 saala ladke ko stage par chadhte dekha. Stage ki seedhiyaan chadhne se le kar rostrum ke piche aa kar khade hone tak Imama ne ek baar bhi apni nazar Jalaal Ansar ke chehre se nahin hatayi. Us ne use seene par haath baandhte aur aankhein band karte dekha.
Kuch nahin maangta shaahon se ye shaidaa tera
Is ki daulat hai faqat naqsh-e-kaf-e-paa tera
Imama ko apne wajood mein ek laher si daudti hui mehsoos hui. Hall mein mukammal khamushi thi aur sirf ek khoobsurat aawaz goonj rahi thi. Wo kisi saher-zada maamul ki tarah baithi use sunti rahi. Usne kab naat kharm ki, kab wo stage se utar kar wapas hua, Muqaable ka natija kya nika, uske baad kis kis ne naat padhi, kis waqt sare students wahan se gaye aur kis waqt hall khali ho gaya, Imama ko pata nahin chala.
Bahot der ke baad use ek dam se hosh aaya tha. Us waqt apne ird gird dekhne par ehsaas hua ke wo hall mein akeli baithi hui hai.
“Main ne kal tumhare bhai ko naat padhte hue suna.”Imama ne agle din Zainab ko bataya.
“Acha……..Unhein pehla inaam mila hai.” Zainab ne uski baat par muskurate hue bataya.
“Bahot khoobsurat naat padhi thi unhon ne.” Kuch der ki khamushi ke baad Imama ne phir us mauzoo par baat ki.
“Haan wo bachpan se naatein padhte aa rahe hain. Itne Qirat aur naat ke muqaable jeet chuke hain ke ab to khud unhein bhi tadaad yaad nahin hogi.”
“Unki aawaz bahot khoobsurat hai.”Imama ne phir kaha.
“Haan khoobsurat to hai magar sari baat us mohabbat aur aqeedat ki hai jis ke sath wo naat padhte hain. Unhein Huzoor ﷺ se ishq hai. Itni mohabbat ke jis ki had nahin. Qirat aur naat ke alawa unhon ne kabhi koi aur chiz nahin padhi, halaanke school aur college mein unhein bahot majboor kiya jata rah magar unka ek hi jawaab hota ke main jis zabaan se Hazrat Muhammad ﷺ ke qaseeda padhta hoon us zabaan se kisi aur shakhs ka qaseeda nahin padh sakta. Mohabbat to ham bhi Huzoor ﷺ se karte hain magar jaisi bhai karte hain waisi mohabbat to ham mein se koi bhi nahin kar sakta. Pichle 10 saalon men se ek baar bhi unhon ne namaaz qaza nahin ki hai. Har maah ek Quran paak padhte hain. Tum to naat ki tareef kar rahi ho, agar Quran sun lo to…….”
Wo bade fakhr se bata rahi thi. Imama chup chaap use dekhti rahi. Usne Zainab se uske baad kuch nahin pucha.
Agle din subah college jane ke liye tayyar hone ki bajaye wo bistar mein ghusi rahi. Jaweriya ne khaasi der ke baad bhi use bistar se bar-aamad na hote dekh kar jhinjhoda.
“Uth jao Imama! College nahin jana kya. Der ho rahi hai.”
“Nahin, aaj mujhe college nahin jana.”Imama ne dobara aankhein band kar lein.
“Kyun?” Jaweriya kuch hairaan hui.
“Meri tabiyat theek nahin hai.”Imama ne kaha.
“Aankhein to bahot surkh ho rahi hain tumhari, raat ko soyin nahin tum?”
“Nahin, neend nahin aayi aur please ab mujhe sone do.”Imama ne uske kisi aur sawaal se bachne ke liye kaha. Jaweriya kuch der use dekhte rehne ke baad apna bag aur folder utha kar bahar nikal gayi.
Uske jane ke baad Imama ne aankein khol din. Ye baat theek thi ke wo saari raat so nahin saki thi aur uski wajah Jalaal Ansar ki aawaz thi. Wo apne zahen ko us aawaz ke alawa aur kahin bhi focus nahin kar pa rahi thi.
“Jalaal Ansar!” Usne zair-e-lab uska naam dohraya.
“Aakhir uski aawaz kyun mujhe is qadr achi lag rahi hai ke main……..main use apne zahen se nahin nikaal pa rahi?” Usne uljhe hue zahen ke sath bistar se nikalte hue socha. Wo apne kamre ki khuli hui khidki mein aa kar khadi ho gayi.
“Mere bhai ki aawaz mein saari taaseer Hazrat Muhammad ﷺ ke ishq ki wajah se hai.” Uske kaanon mein Zainab ki aawaz goonji.
“Aawaz mein taaseer………aur ishq?” Usne bechaini se pehlu badla.” Soz, gudaaz, loch, mithaas……..Aakhir kya tha us aawaz mein?” Wo uth kar khidki se bahar dekhne lagi.
“Duniya Ishqullah se shuru hoti hai aur ishq-e-rasool ﷺ par khatm ho jati hai.” Use ek aur jumla yaad aaya.
“ishq-e-rasool ﷺ?” Usne hairaani se socha.
“ishq-e-rasool ﷺ ye ishq-e-Muhammad ﷺ? Ek dam use apne andar ajeeb sa sannaata utarta hua mehsoos hua. Usne us sannaate aur tareeki ko khojna shuru kiya. Apne andar seedhi dar seedhi utarna shuru kiya. Use kahin koi raushni nazar nahin aayi.
“Aakhir wo kya cheez hoti hai jo Hazrat Muhammad ﷺ ka naam sunne par logon ki aankhon mein aansu aur labon par darood le aati hai. Aqeedat, ishq, mohabbat…….. In mein se kya hai? Mujhe kyun mehsoos nahin hota? Meri aankhon mein aansu kyun nahin aate? Mere honton par darood kyun nahin hota? Meri aawaz mein taaseer…….” Wo lamha bhar ke liye ruki, usne zair-e-lab padha.
Kuch nahin maangta shaahon se ye shaidaa tera
Is ki daulat hai faqat naqsh-e-kaf-e-paa tera
Use apni aawaz bharrayi hui mehsoos hui. “Shayad abhi jaagi hoon, isliye aawaz aisi hai.” Usne apna gala saaf karte hue socha. Usne ek baar phir padhna shuru kiya.
“Kuch nahin maangta……” Wo ek baar phir ruk gayi. Is baar uski aawaz mein larzish thi. Usne dobara padhna shuru kiya. “Kuch nahin maangta shaahon se ye shaidaa tera” Khidki se bahar nazrein markooz rakhte hue usne larazti, bharrayi aawaz aur kaanpte honton ke saath pehla misra padha phir doosra misra padhna shuru kiya aur ruk gayi. Khidki se bahar khalaa mein ghoorte hue wo ek baar phir Jalaal Ansar ki aawaz apne kaanon mein utarti mehsoos kar rahi thi.
Buland, saaf, wazeh aur azaan k tarah dil mein utar jane wali muqaddas aawaz……. Use apne gaalon par nami mehsoos hui.
Ek dam wo apne hosh-o-hawaas mein aayi to pata chal ke wo ro rahi thi. Kuch der jaise be-yaqeeni ke aalam mein wo apne dono hathon ki ungliyaan dono aankhon par rakhe dam bakhud khadi rahi. Usne apne aap ko be-basi ki intehaa par paaya. Aankhon par hath rakhe wo aahista aahista ghutnon ke bal wahin zameen par baith gayi aur phoot phoot kar rona shuru kar diya.
Insaan ke liye sab se mushkil marhala wo hota hai jab uska dil kisi cheez ki gawaahi de raha ho magar uski zabaan khamoosh ho. Jab uska dimaagh chilla chilla kar kisi cheez ki sadaaqat ka iqraar kar raha ho magar uske hont saakit hon. Imama Hashim ki bhi apni zindagi us marhale par aan pahonchi thi. Jo faisla wo pichle 2-3 saalon se nahin kar pa rahi thi wo faisla ek aawaz ne chand dinon mein karwa diya tha. Ye jane, ye khoje, ye parkhe baghair ke aakhir log kyun Hazrat Muhammad ﷺ se itni aqeedat rakhte hain. Aakhir kyun ishq-e-rasool ﷺ ki baat ki jaati hai. Usne itne saal apne nabi ke qaseede sune the, us par kabhi riqqat taari nahin hui thi, kabhi uska wajood mom ban kar nahin pighla tha, kabhi use kisi par rashk nahin aaya tha magar har baar Hazrat Muhammad ﷺ ka naam padhte, dekhte aur sunte hue ajeeb si kaifiyaat ka shikaar hoti thi. Har baar, har dafa uska dil us naam ki taraf khincha chala jata tha aur Sabeeha ke paas na jane ke uske saare iraade bhaap ban kar ud gaye the. Jalaal Ansar ki aawaz tareeki mein nazar aane wale jugnu ki tarah thi jis ke ta’aqub mein wo bina soche samjhe chal padi thi.
Main tujhe aalam-e-ashiyaa mein bhi paa leta hoon
Log kehte hain ke hai aalam-e-baala tera
Prev episode:
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-41/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar