Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Agli baar jab use hosh aaya to wo ek private clinic mein maujood tha. Aankhen khol kar usne ek baar phir apne ird gird dekhne ki koshish ki. Kamre mein us waqt ek nurse maujood thi jo uske paas khadi drip ko saheeh karne mein masroof thi. Salar ne use muskurate hue dekha tha wo usse kuch kehna chah raha tha magar uska zahen baar phir taareeki mein doob gaya.
Dusri baar use kab hosh aaya use andaza nahin hua magar dusri baar aankhein kholne par usne kamre mein kuch shanaasa chehre dekhe the. Use aankhen kholte dekh kar mummy uski taraf badh aayi thin.
“Kaisa mehsoos kar rahe ho tum?” Unhon ne uspar jhukte hue be-taabi se pucha.
“Just fine.” Salar ne door khade Sikandar Usman ko dekhte hue dheeme lehje mein kaha. Isse pehle ke uski mummy kuch aur kehtin, kamre mein maujood ek doctor aage aa gaya tha. Wo uski nabz check karne laga.
Doctor ne injection lagane ke baad phir use drip lagayi. Salar ne kuch bezari ke sath ye karwaiyaan dekhin. Drip lagane ke baad wo Sikandar Usman aur unki biwi se baten karne lage. Salar us guftgu ke dauraan chhat ko ghoorta raha. Phir kuch der baad doctor kamre se nikal gaya.
Kamre mein ab bilkul khamushi thi. Sikandar Usman aur unki begum apna sar pakde baithe the. Unki tamaam koshishon aur ehteyaat ke bawajood ye Salar ki khud kushi ki chauthi koshish thi aur is baat wo waqai marte marte bacha tha. Doctors ke mutabiq agar chand minton ki taakheer ho jati to wo use nahin bacha sakte the.
Sikandar aur unki biwi ko mulaazim ne raat ke 2 baje Salar ki khud kushi ki is koshish ke barey mein bataya tha aur wo dono puri raat so nahin sake the. Sikandar Usman ne subah flight milne tak taqreeban 150 cigarette phoonk dale the, magar uske bawajood unki bechaini aur izteraab mein kami nahin ho pa rahi thi.
“Meri samajh mein nahin aata aakhir ye aisi harkatein kyun karta hai. Aakhir is par hamari naseehaton aur samjhane ka asar kyun nahin hota?” Sikandar Usman ne dauraan-e-safar kaha. “Mera to dimagh phatne lagta hai jab main uske bare mein sochta hoon. Kya nahin kiya main ne uske liye. Har sahoolat, behtreen taleem, hattaa ke bade se bade psychiatrist ko dikha chuka hoon magar nateeja wahi dhaak ke teen paat…….. Meri to samajh mein nahin aata ke mujh se kya ghalti ho gayi hai jo mujhe ye saza mil rahi hai. Jaanne walon ke bich mazaq ban kar reh gaya hoon uski wajah se.” Sikandar Usman bahot pareshan the.
“Har waqt mera dam halaq mein atka rehta hai ke pata nahin wo kis waqt kya kar guzre. Itni ehteyaat baratne ka nateeja ye nikla hai ke ham ek baar ghaafil hue aur wo phir wahi harkat kar guzra hai.”
Tayyaba ne apni aankhon mein umadte hue aansuon ko tissue ke sath saaf kiya. Wo dono usi tarah k ibatein karte hue Karachi se Islamabad aaye the magar Salar ke samne aa kar dono ko chup lag gayi thi. Un dono ko samajh hi nahin aa raha tha ke is haalat mein usse kya kahen.
Salar ko unki dili aur zehni kaifiyaat ka achi tarah se andaza tha aur unki khamushi ko ghanimat jaan raha tha. Unhon ne us din usse kuch nahin kaha. Agle din bhi wo dono khamoosh hi rahe.
Magar teesre din un dono ne apni khamushi tod di.
“Mujhe sirf ye batao ke aakhir tum ye sab kyun kar rahe ho?” Sikandar ne us raat badi tahammul mizaaji se uske sath guftgu ka aaghaaz kiya tha. “Aakhir tumhare sath mas’ala kya hai? Tum ne wada kiya tha ke tum aisi harkat nahin karoge. Main ne usi waade par tumhein sports car bhi le kar di thi. Har baat maan rahe hain ham log tumhari, phir bhi tumhein qat’an ehsaas nahin hai na ham logon ka na khaandaan ki izzat ka.” Salar usi tarah chup baitha raha.
“Kisi aur ka nahin to ham dono ka hi khayal kar lo. Tumhari wajah se hamari raaton ki neendein udi hui hai.” Tayyab ne kaha. “Tumhein koi pareshani, koi problem hai, to ham se discuss karo, ham se kaho…… Magar is tarah marne ki koshish karna…….. Tum ne kabhi socha hai agar tum in koshishon mein kamyaab ho jate to hamara kya hota?”
Salar khamushi se unki batein sunta raha. Unki baton mein naya kuch bhi nahin tha. Khud kushi ki har koshish ke baad wo unse isi tarah ki batein sunta tha.
“Kuch bolo, chup kyun ho? Kuch samajh mein aa raha hai tumhein?” Tayyaba ne jhunjhla kar kaha. Wo unhein dekhne laga. “Maan baap ko is tarah zaleel kar ke badi khushi milti hai tumhein.”
“Is qadar shaandaar mustaqbil hai tumhara aur tum apni aihmaqana harkaton se apni zindagi khatm karne ki koshish kar rahe ho. Log taraste hain is tarah ke academic record ke liye.” Sikandar Usman ne use uska academic record yaad dilane ki koshish ki. Salar ne be-ikhteyaar ek jamaahi li. Wo janta tha ab wo uske bachpan se le kar ab tak ki kaamyaabiyon ko dohrana shuru karenge. Aisa hi hua tha. Agle 15 minutes is mauzoo par bolne ke baad unhon ne thak kar pucha.
“Aakhir tum kuch bol kyun nahin rahe, bolo?”
“Main kya bolun, sab kuch to aap dono ne keh diya.” Salar ne kuch uktaaye hue andaz mein kaha. “Meri zindagi mera personal maamla hai, phir bhi main ne aap ko bataya hai ke dar-asl main marne ki koshish nahin kar raha tha……” Sikandar ne uski baat kaati.
“Tum jo kuch bhi kar rahe ho, mat karo, ham par rahem khao.” Salar ne naraazgi se baap ko dekha.
“Tum aakhir ye kyun nahin keh dete ke tum aayinda aisi koi harkat nahin karoge. Fizool mein bahes kyun karte ja rahe ho?” Is baar Tayyaba ne kaha.
“Acha theek hai, nahin karunga aisi koi bhi harkat.” Salar ne bezaari se jaise un dono se jaan chudane ke liye kaha. Sikandar ne ek gehri saans li. Wo uske waade par mutmayin nahin hue the. Na wo……Na unki biwi…….Magar aise waade lene ke alawa unke paas aur koi chaara nahin tha. Wo bachpan se apne is bete par fakhr karte aa rahe the, magar puchel kuch saalon se unka wo fakhr khatm ho gaya tha. Jitna pareshan unhein Salar ne kiya tha utna unke baaqi bachon ne mil kar bhi nahin kiya tha.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-45/
Prev episode:
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar