Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
“Ye aihmaqaana tajweez Asjad ke alawa kisi doosre ki nahin ho sakti. Use ehsaas nahi hai ke abhi main padh rahi hoon.”Imama ne apni bhabhi se kaha.
“Nahin, Asjad ne ya uske ghar walon ne aisa koi mutaalba nahin kiya. Baba khud tumhari shadi karna chah rahe hain.”Imama ki bhabhi ne rasaaniyat se jawab diya.
“Baba ne kaha hai? Mujhe yaqeen nahin aa raha. Jab main ne medical mein admission liya tha tab unka door door tak aisa koi khayaal nahin tha. Wo to uncle Aazam se bhi yahi kehte the ke wo meri house job ke baad hi shadi karenge. Phir ab achaanak kya hua?”Imama ne be yaqeeni se kaha.
“Koi dabao hoga magar mujhe to ammi ne yahi bataya hai ke khud baba ki khwaahish hai.” Bhabhi ne kaha.
“Aap unhein bata dein ke mujhe house job se pehle shaadi nahin karni.”
“Theek hai main tumhari baat un tak pahoncha dungi magar behtar hai tum is silsile mein khud baba se baat karo.” Bhabhi ne use mashwara diya.
Bhabhi ke kamre se jane ke baad bhi wo kuch pareshaani se wahin baithi rahi. Ye ittelaa itni achanak aur ghair mutawaqqa thi ke uske pairon ke niche se muhawratan nahin haqeeqatan zameem nikal gayi thi. Wo mutmayin thi ke uski house job tak shadi ka mas’ala zair-e-bahes nahin aayega aur house job karne ke baad wo is qaabil ho jayegi ke khud ko support kar sake ya apni Jalaal se shadi ke barey mein faisla kar sake. Tab tak Jalaal bhi apni house job mukammal kar ke set ho jata aur un dono ke liye kisi qism ka koi mas’ala khada nahin hota magar ab achanak uske ghar wale uski shadi ki baat kar rahe the. Aakhir kyun?
“Nahin, Asjad aur uske ghar walon ne is tarah ka koi mutaalba nahin kiya. Main ne khud unse baat ki hai.”
Us raat wo Hashim Mubeen ke kamre mein maujood thi. Uske istefsaar par Hashim Mubeen ne bade itmenaan ke saath kaha.
“Baat hi kar li hai? Aap mujhe se puche baghair kis tarah meri shadi arrange kar sakte hain?”Imama ne be yaqeeni se kaha.
Hashim Mubeen ne kuch sanjeedgi se use dekha. “Ye nisbat tumhari marzi se hi tay hui thi. Tum se pucha gaya tha.” Unhon ne jaise yaad-dahaani karayi.
“Mangni ki baat aur thi……..Shadi ki baat aur hai…….Aap ne mujh se kaha tha house job se pehle aap meri shadi nahin karenge.”Imama ne unhein unka waada yaad dilaya.
“Tumhein is shadi par aitraaz kyun hai. Kya tum Asjad ko pasand nahin kartin?”
“Baat pasand na-pasand ki nahin hai Apni taleem ke dauraan main shadi nahin karna chahti. Aap achi tarah jaante hain ke main eye specialist banna chahti hoon. Is tarah aap meri shadi kar denge to mere saare khwaab adhure reh jayenge.”
“Bahot si ladkiyaan shadi ke baad taleem mukammal karti hain. Tum apni famliy mein dekho……kitni…….” Hashim Mubeen ne use samjhane ki koshish ki.
Imama ne unki baat kaat li. “Wo ladkiyaan bahot zaheen aur qaabil hoti hongi, main nahin hoon. Main ek waqt mein ek hi kaam kar sakti hoon.”
“Main Aazam bhai se baat kar chuka hoon, wo to tareekh tay karne ke liye aane wale hain.” Hashim ne usse kaha.
“Aap meri saari mehnat zaya kar rahe hain. Agar aap ko mere sath yahi karna tha to aap ko chahiye tha ke is tarah ka koi waada hi na karte.”Imama ne unki baat par naarazi se kaha.
“Jab main ne tum se waada kiya tha tab ki baat aur thi……..Tab haalaat aur the aur ab……”
Imama ne unki baat kaati. “Ab kya badal gaya hai………Haalaat mein kaun si tabdeeli aa gayi hai jo aap mere sath ye sulook kar rahe hain?”
“Main tumhein yaqeen dilata hoon ke Asjad tumhari taleem mein tumhare sath pura ta’awun karega wo tumhein kisi cheez se mana nahin karega.” Hashim Mubeen ne uski baat ka jawaab dete hue kaha.
“Baba mujhe Asjad ke ta’awun ki zarurat nahin hai, mujhe aap ke ta’awun ki zarurat hai. Aap mujhe meri taleem mukammal karne dein.”Imama ne is baar qadre multajiyaana andaaz mein kaha.
“Imama! Fizool zid mat karo………main wahi karunga jo main tay kar chuka hoon.” Hashim Mubeen ne do tok andaaz mein kaha.
“Main zid nahin kar rahi, darkhwaast kar rahi hoon. Baba please main abhi Asjad se shadi karna nahin chahti.” Usne ek baat phir usi multajiyaana andaaz mein kaha.
“Tumhari nisbat ko 4 saal hone wale hain aur ye ek bahot lamba arsaa hota hai. Agar unhon ne khud kuch arsey ke baad kisi na kisi wajah se mangni tod di to?”
“To koi baat nahi, koi qayaamat nahin aayegi. Wo mangni todna chahein to tod dein balke abhi tod dein.”
“Tumahein us sharmindagi aur be-izzati ka ehsaas nahin hai, jska saamna hamein karna padega.”
“Kaisi sharmindagi baba! Ye un logon ka apna faisla hoga. Us mein hamari to koi ghalti nahin hogi.”Imama ne unhein qayal karne ki koshish ki.
“Tumhara dimaagh kharaab ho gaya hai ya phir tum aql se paidal ho?” Hashim Mubeen ne use jhidakte hue kaha.
“Baba! Kuch nahin hoga, log 2-4 din batein karenge phir sab bhool jayenge. Aap is barey mein khwaahmakhwaah pareshaan ho rahe hain.”Imama ne qadrey be fikri aur laparwahi se kaha.
“Tum is waqt bahot fizool batein kar rahi ho. Filhaal tum yahan se jao.” Hashim Mubeen ne naagawari se use dekhte hue kaha.
Imama baa-dil-e-nakhwaasta wahan se chali aayi magar us raat wo khaasi pareshaan rahi.
Agle din wo wapas Lahore chali aayi. Hashim Mubeen ne usse is silsile mein dobara baat nahin ki. Lahore aa kar wo qadrey mutmayin ho gayi aur har khayaal ko zahen se jhatakte hue apne imtehaan ki tayyari mein masroof ho gayi.
Hashim Mubeen ne us waqye ko zahen se nahin nikala tha, wo ek mohtaat tabiyat insaan the.
Wo Imama ke barey mein pehli baar us waqt tashweesh mein mubtala hue the, jab school mein Tehreem ke sath jhagde wala waqeya pesh aaya tha. Agarche wo koi aisa ghair maamuli waqeya nahin tha magar us waqeye ke baad unhon ne ehteyaati tadaabeer ke taur par Imama ki nisbat Asjad ke sath tay kar di thi. Unka khayaal tha is tarah uska zahen ek naye rishtey ki jaanib mabzool ho jayega aur agar uske zahen mein koi shubah ya sawaal paida hua bhi to us naye talluq ke baad wo us barey mein zyada taraddud nahin karegi. Unka ye khayaal aur andaaza saheeh saabit hua tha.
Imama ka zahen waqai Tehreem ki taraf se hat gaya tha. Asjad mein wo pehle bhi kuch dilchaspi leti thi magar is talluq ke qayem hone ke baad us dilchaspi mein izaafa ho gaya tha. Hashim ne use bahot mutmayin aur magan dekha tha. Wo pehle ki tarah mazhabi sargarmiyon mein dilchaspi leti thi.
Magar us baar jo kuch Waseem ne unehin bataya tha usne unke pairon ke niche se zameen nikaal di thi. Wo fauri taur par ye nahin jaan sake magar unhein ye zaroor ilm ho gaya ke Imama ke aqaaid aur nazariyaat mein khaasi tabdeeli aa chuki thi aur ye na sirf unke liye balke unke pure khaandaan ke liye tashweesh ka ba’as tha.
Wo apni badi betiyon ki tarah use bhi aala taleem dilwana chahte the aur ye is liye bhi ahem tha ke use shadi ke baad khaandaan hi mein jana tha. Wo khaandaan bahot taleem yaafta tha. Khud unka damaad Asjad bhi Imama ko aala taleem yaafta dekhna chahta tha. Hashim Mubeen ke liye uski taleem ka silsila munqatey kar ke use ghar bitha lena aasaan nahin tha, kyun ke is surat mein use Aazam Mubeen ko uski wajah batani padti aur Imama se sakht naaraz hone ke bawajood wo nahin chahte the ke Aazam Mubeen aur unka khaandaan Imama ke in badle hue aqaaid ke barey mein jaan kar bargashta aur badzan hon aur phir shadi ke baad wo Asjad ke sath buri zindagi guzarey. Unhon ne ek taraf apne ghar walon ko is baat ko raaz rakhne ki taakeed ki to dusri taraf Imama ki mannat samaajat par use apni taleem jaari rakhne ki ijazat de di.
Imama Sabeeha ke lecture attend karne aur uske wahan jaane ya Jalaa lse milne ke maamle mein is qadr mohtaat thi ke uska ye mail-jol un logon ki nazron mein nahin aa saka. Shayad uski ek wajah ye bhi thi ke wo Jaweriya aur Rabiya ko bhi har cheez ke barey mein andhere mein rakhe hue thi. Warna uske barey mein zaroor koi na koi khabar idhar udhar gardish karti aur Hashim Mubeen tak bhi pahonch jati magar aisa nahin hua. Hashim Mubeen uski taraf se mutmayin ho gaye the, magar Imama ke andar aane wali un tabdeeliyon ne unhein tashweesh mein mubtala kar diya tha.
Unke dimaagh mein jo wahid hal aaya tha wo uski shadi thi. Unka khayaal tha ke uski shadi kar dene se wo khud Imama ki zimmedari se mukammal taur par aazaad ho jayenge. Yahi wajah thi ke unhon ne is tarah achanak uski shadi ka faisla kar liya tha.
“Jalaal! Mere parents Asjad se meri shadi kar dena chahte hain.” Lahore aane ke baad Imama ne sab se pehle Jalaal se mulaqaat ki thi.
“Magar tum to keh rahi thin ke wo tumhari house job tak shadi nahin karenge.” Jalaal ne kaha.
“Wo aisa hi kehte the, magar ab wo kehte hain ke main apni taleem shadi ke baad bhi jaari rakh sakti hoon. Asjad Lahore mein ghar le lega to main zyada aasani se apni taleem mukammal kar sakungi.” Wo badbadayi.
“Phir tum apne parents ko saaf saaf bata do.” Jalaal ne ek dam kisi faisle par pahonchte hue kaha.
“Kya bata dun?”
“Yahi ke tum mujh se shadi karna chahti ho.”
“Aap ko andaza nahin hai ke wo kis tarah react karenge……… Mujhe unhein phir sab kuch hi batana padega.” Wo baat karte karte kuch sochne lagi.
“Jalaal! Aap apne parents se mere silsile mein baat karein. Aap unhein mere barey mein batayein. Agar mere parents ne mujh par aur dabao dala to phir mujhe apna ghar chodna padega, phir mujhe aap ki madad ki zaroorat hogi.”
“Imama! Main apne parents se baat kar lunga. Wo raza mand ho jayenge. Main jaanta hoon main unhein mana sakta hoon.” Jalaal ne use yaqeen dilaya puri guftgu ke dauraan pehli baar Imama ke chahre par muskurahat ubhri.
Agle chand hafte wo apne papers ke silsile mein masroof rahi, Jalaal se baat na ho saki. Aakhri paper wale din Waseem use lene ke liye Lahore aa gaya tha. Wo use wahan yun dekh kar hairaan reh gayi.
“Waseem! Main abhi to nahin ja sakti. Aaj to main papers se farigh hui hoon mujhe abhi yahan kuch kaam hain.”
“Main kal tak yahin hoon. Apne dost ke haan thaher jata hoon jab tak tum apne kaam nimta lo phir ikatthe chalenge.” Waseem ne uske liye mudafe’at ka aakhri darwaza bhi band kar diya.
“Main chalti hoon tumhare sath.”Imama ne kuch be dili se faisla karte hue kaha. Use andaza tha ke Waseem use saath le kar hi jayega.
“Tum apni chizein pack kar lo. Ab tum sari chuttiyan wahan guzaar kar hi aana.” Use wapas mudte dekh kar Waseem ne kaha.
Usne sar hila diya magar uska apni tamaam chizein pack karne ya Islamabad mein saari chuttiyan guzaarne ka koi irada nahin tha. Usne tay kiya tha ke wo chand din wahan guzaar kar kisi na kisi bahanese wapas Lahore aa jayegi aur ye hi uski ghalat fehmi thi.
Raat ke khane par wo sab ghar walon ke sath khana kha rahi thi aur sab khush gappiyon mein masroof the.
“Papers kaise hue tumhare?” Hashim Mubeen ne khana khate hue usse pucha.
“Bahot ache hue, hamesha ki tarah.” Usne chawal ka chammach munh mein dalte hue kaha.
“Very good. Chalo papers ki tension khatm hui. Ab tum kal se apni shopping shuru kar do.”
Imama ne hairaani se unhein dekha. “Shopping? Kaisi shopping?”
“Furniture ki aur jeweler ke paas pehle chale jana tum log. Baaqi chizen to aahista aahista hoti rahengi.”
Hashim Mubeen ne use sawaal ka jawaab dene ki bajaye is baar apni biwi se kaha.
“Baba!magar kis liye?”Imama ne ek baar phir pucha.
“Tumhari ammi ne bataya nahin tumhein ke ham ne tumhari shadi ki tareekh tay kar di hai?”
Imama ke hath se chammach chhoot kar plate mein ja gira. Ek lamhe mein uska rang faq ho gaya tha.
“Meri shadi ki tareekh?” Usne be yaqeeni se baari baari Salma aur Hashim to dekha jo uske ta’assuraat par hairaan nazar aa rahe the.
“Haan, tumhari shadi ki tareekh……….” Hashim Mubeen ne kaha.
“Ye aap kaise kar sakte hain? Mujh se puche baghair, mujhe bataye baghair?” Haunq chehre ke sath wo unhein dekh rahi thi.
“Tum se pichli dafa baat hui thi, is silsile mein.” Hashim ek dam sanjeeda ho gaye.
“Aur main ne inkaar kar diya tha. Main……….”
Hashim ne use baat mukammal nahin karne di. “Main ne tumhein bata diya tha ke mujhe tumhare inkaar ki koi parwaah nahin hai. Main Asjad ke ghar walon se baat kar chuka hoon.” Hashim Mubeen ne tez aawaz mein kaha.
Dining table par ek dam gehri khamushi chaa gayi. Koi bhi khana nahin kha raha tha.
Imama ek dam apni kursi se khadi ho gayi. “I am sorry baba, magar main Asjad se shadi nahin kar sakti. Aap ne ye hadi tay ki hai. Aap unse baat kar ke multawi kar dein warna main khud unse baat kar lungi.” Hashim Mubeen ka chehra surkh ho gaya.
“Tum Asjad se shadi karogi aur usi tareekh ko jo main ne tay ki hai. Tum ne suna?” Wo be-ikhteyaar chillaye.
“Its not fair.”Imama ne bharrayi hui aawaz mein kaha.
“Ab tum mujhe ye bataogi kya fair hai aur kya nahin. Tum bataogi mujhe?” Hashim Mubeen ko uski baar par aur ghussa aaya.
“Baba! Jab main ne aap se kaha tha ke mujhe abhi shadi nahin karni to aap zabardasti kyun kar rahe hain mere sath?”Imama be-ikhteyaar roney lagi.
“Kar raa hoon zabardati phir……..Main haq rakhta hoon.” Wo chillaye.
Imama is baar kuch kehne ki bajaye apne hont bheenchte hue surkh chehre ke sath tezi se dining room se nikal aayi.
“Main usse baat karti hoon. Aap please kahan khayein. Itna ghussa na karein. Wo jazbaati hai aur kuch nahin.” Salma ne Hashim Mubeen se kaha aur khud apni kursi se uth khadi huin.
Unke kamre se nikalte hi Waseem ko dekh kar Imama be-ikhteyaar uth khadi hui.
“Tum dafa ho jao yahan se. Nikal jao.” Usne tezi se Waseem ke paas ja kar use dhakka derne ki koshish ki, wo piche hat gaya.
“Kyun, main ne kya kiya hai?”
“Jhoot bol kar aur dhoka de kar tum mujhe yaha le aaye ho, mujhe agar Lahore mein pata chal jata ke tum isliye mujhe Islamabad laa rahe ho to main kabhi yahan na aati.” Wo dahaadi.
“Main ne wahi kya jo mujh se baba ne kaha. Baba ne kaha tha main tumhein na bataun.” Waseem ne wazahat pesh karne ki koshish ki.
“Phir tum yahan mere paas kyun aaye ho. Baba ke paas jao. Unke paas baitho. Bas yahan se dafa ho jao.” Waseem hont bheenche hue use dekhta raha phir kuch kahe bina kamre se nikal gaya.
Imama apne kamre mein ja kar baith gayi. Us waqt uske pairon se saheeh maanon mein zameen nikal gayi thi. Ye uske wahm-o-gumaan mein bhi nahin tha ke uske ghar wale uske sath is tarah kar sakte hain. Wo itne qadaamt parast ya kattar nahin the jitne wo is waqt ho gaye the. Use abhi bhi yaqeen nahin aa rha tha ke ye sab uske saath ho raha tha. Uska dil doobne laga. Mujhe is soorat-e-haal ka saamna karna hai. Mujhe himmat nahin haarni. Mujhe kisi na kisi tarah fauri taur par Jalaal se contact karna hai. Wo yaqeenan ab tak apne parents se baat kar chuka hoga. Usse baat kar ke koi na koi rasta nikal aayega.
Wo be chaini se kamre mein tahelte hue soch rahi thi. Uske kamre mein dobara koi nahin aaya.
Raat 12 baje ke baad wo apne kamre se nikli. Wo jaanti thi is waqt tak sab sone ke liye ja chuke honge. Usne Jalaal ke ghar ka number dial karna shuru kiya. Phone kisi ne nahin uthaya. Usne yakey-baad-deegrey kayi baar number milaya. Aadh ghante tak isis tarah calls karte rehne ke baad usne maayusi ke sath phone rakh diya. Wo Jaweriya ya Rabiya ko phone nahin kar sakti thi. Wo dono is waqt hostel mein thin. Kuch der sochte rehne ke baad usne Sabeeha ka number dial karna shuru kiya. Uske walid ne phone uthaya.
“Beta! Sabeeha to Peshawar gayi hai apni ammi ke sath.” Sabeeha ke walid ne Imama ko bataya.
“Peshawar.”Imama ke dil ki dhadkan ruk gayi.
“Uske cousin ki shadi hai. Wo log zara pehle chale gaye hain. Main bhi kal chala jaunga.” Uske walid ne bataya. “Koi paighaam ho to bata do main Sabeeha ko pahoncha dunga.”
“Nahin, shukriya uncle.” Wo unke sath is sarey maamle mein kya baat kar sakti thi.
Usne phone rakh diya. Uske depression mein izaafa hone laga. “Agar mera Jalaal se contact na hua to………..” Uska dil ek baar phir doobne laga.
Ek baar phir usne Jalaal ka number dial karna shuru kar diya aur tab hi kisi ne use hath se receiver le liya. Wo sun ho gayi. Hashim Mubeen uske piche khade the.
“Kis ko phone kar rahi ho?” Unke lehje mein thehrao tha.
“Dost ko kar rahi thi.”Imama ne unki taraf dekhe baghair kaha. Wo unse nazrein mil kar jhoot nahin bol sakti thi.
“Main mila deta hoon.” Unhon ne sard aawaz mein kehte hue re-dial ka button daba diya aur receiver kaan se laga liya. Imama zard chehre ke sath unhein dekhne lagi. Wo kuch der tak usi tarah receiver kaan se lagaye khade rahe phir unhon ne receiver cradle par rakh diya. Yaqeenan dusri taraf se call receive nahin ki gayi thi.
“Kaun si dost hai ye tumhari jis ko tum is waqt phone kar rahi ho.” Unhon ne durusht lehje mein Imama se pucha
“Zainab.” Phone ki screen par Zainab ke number tha aur wo nahin chahti thi ke Hashim Mubeen ko Zainab par kisi qism ke shak ho aur wo Jalaal tak ja pahonchien. Isliye usne uske istefsaar par jaldi se uska naam bata diya.
“Kis liye kar rahi ho?”
“Main uske zariye Jaweriya ak ek paighaam pahonchana chahti hoon.” Usne tahammul se kaha.
“Tum mujhe wo paighaam de do, main Jaweriya tak pahoncha dunga. Balke khud zaati taur par Lahore de aaunga.”
“Imama! Mujhe saaf saaf batao kisi aur ladke mein interested ho tum?”
Unhon ne kisi tamheed ke baghair achanak usse pucha. Wo unhein dekhti rahi phir usne kaha.
“Haan!”
Hashim Mubeen dam bakhud reh gaye. “Kisi aur ladke mein intersted ho tum?” Unhon ne be yaqeeni se apna jumla dohraya. Imama ne phir asbaat mein sar hila diya. Hashim Mubeen ne be-ikhteyaar uske chehre par thappad kheench maara.
“Mujhe isi baat ka andesha tha tum se, isi baat ka andesha tha.” Wo ghusse mein tantana se gaye.
Imama gum sum apne gaal par hath rakhe unhein dekh rahi thi. Ye pehla thappad tha jo Hashim Mubeen ne uski zindagi mein use maara tha aur Imama ko yaqeen nahin aa raha tha ke use thappad maara gaya tha. Wo Hashim Mubeen ki sab se laadli beti thi phir bhi unhon ne……….Uske gaalon par aansu beh nikle the.
“Asjad ke alawa main tumhari shadi kahin aur nahin hone dunga. Tum agar kisi aur ladke mein interested ho bhi to use abhi isi waqt bhul jao. Main kabhi………….kabhi……….kabhi tumhari kahin aur shadi nahin hone dunga……….apne kamre mein chali jao. Aur dobara agar main ne tumein phone ke paas dekha to main tumhari taangein tod dunga.”
Wo use tarah gaal par hath rakhe mekaaniki andaaz mein chalte hue apne kamre mein aa gayi. Apne kamre mein aa kar wo bachon ki tarah phoot phoot kar raney lagi. “kya baba mujhe………mujhe is tarah maar sakte hain?” use yaqeen nahin aa raha tha. Bahot de tak rote rehne ke baad uske aansu khud bakhud khushk hone lage. Wo uth kar izteraab ke aalam mein apne kamre ki khidki ki taraf aa gayi aur khaali-uz-zehni ke aalam mein band khidkiyon ke sheeshon se bahar dekhne lagi.
Niche uske ghar ka lawn nazar aa raha tha aur phir la-sha’oori taur par uski nazar dusre ghar par padi. Wo Salar ka ghar tha. Uska kamra nichli manzil par tha. Door se kuch bhi wazeh nahin ho raha tha. Uske bawajood us ghar mein ek dafa jane ke baad uski location aur kamre mein phirne wale ke huliye aur jasaamat se andaaza laga sakti thi ke wo Salar ke alawa koi aur nahin ho sakta tha.
Uske zahen mein ek jhamaaka sa hua.
“Haan! Ye shakhs meri madad kar sakta hai. Agar main use saari surat-e-haal bata doon aur usse kahun ke Lahore ja kar Jalaal se raabta karey to…….. to mera mas’ala hal ho sakta hai magar isse raabta kaise………..?
Uske zahen mein uski gaadi ke pichle sheeshe par likha hua uska mobile number aur naam yaad aaya. Usne zahen mein mobile number ko dohraya, use koi diqqat nahin hui. Kaghaz ka ek tukda le kar usne ehteyaat ke taur par us number ko likh liya. 3 baje ke qareeb wo aahista aahista ek baar phir lounge mein aa gayi aur usne wo number dial karna shuru kar diya.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-54/
Prev episode:
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar