Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Imama apne kamre mein aa kar bhi usi tarah baithi rahi, use apne pet mein girhein padti hui mehsoos ho rahi thin. Sirf chand ghanton mein sab kuch badal gaya tha. Wo puri raat so nahin sak. Subah wo naashtey ke liye bahar aayi. Uski bhook ek dam jaise ghayab ho gayi thi.
10-10:30 baje ke qareeb usne porch mein kuch gaadiyon ke start hone aur jane ki aawazein sunin. Wo jaanti thi is waqt Hashim Mubeen aur uske bade bhai office chale jate the aur use unke office jane ka intezaar tha. Unke jane ke aadh ghante baad wo apne kamre se bahar aayi. Lounge mein uski ammi aur bhabhi baithi hui thin. Wo khamushi se phone ke paas chali gayi. Usne phone ka receiver uthane ke liye hath badhaya hi tha ke use apni ammi ki aawaz sunayi di.
“Tumhare baba keh kar gaye hain ke tum kahin phone nahin karogi.” Usne gardan mod kar apni ammi ko dekha.
“Main Asjad ko phone kar rahi hoon.”
“Kis liye?”
“main usse baat karna chahti hoon.”
“wahi fizool batein jo tum raat ko kar rahi thin.” Salma ne tez lehje mein kaha.
“Main aap ke samne baat kar rahi hoon, aap mujhe baat karne den………..Agar main ne koi ghalat baat ki to aap phone band kar sakti hain.” Usne pur sukoon andaaz mein kaha aur shayad ye uska andaaz hi tha jis ne Salma ko kuch mutmayin kar diya.
Imama ne number dial kiya magar wo Asjad ko phone nahin kar rahi thi. Chand baar bell bajne ke baad dusri taraf phone utha liya gaya. Phone uthane wala Jalaal hi tha. Khushi ki ek laher Imama ke andar se guzar gayi.
“Hello! Main Imama bol rahi hoon.” Usne Jalaal ka naam liye baghair aitmaad se kaha.
“Tum bataye baghair Islamabad kyun chali gayin, main kal tumse milne hostel gaya tha.” Jalaal ne kaha.
“Main Islamabad aayi hoon Asjad!”Imama ne kaha.
“Asjad!” Dusri taraf se Jalaal ki aawaz aayi. “Tum kis se keh rahi ho?”
“Mujhe baba ne raat hi bataya ke meri shadi ki tareekh tay ho gayi hai.”
“Imama?” Jalaal ko jaise ek current laga. “Shadi ki tareekh.”Imama uski baat sune baghair usi pur sukoon andaaz mein bolti rahi. “Main jaanna chahti hoon ke tum ne apne parents se baat ki hai?”
“Imama! Main abhi baat nahi kar saka.”
“To phir tum baat karo, main tumhare alawa kisi dusre se shadi nahin kar sakti, ye tum jante ho……… Magar main is tarah shadi nahin karungi. Tum apne parents se baat karo aur phir mujhe batao ke wo kya kehte hain.”
“Imama! Kya tumhare paas koi hai?” Jalaal ke zahen mein achanak ek jhamaaka hua.
“Haan!”
“Isliye tum mujhe Asjad keh rahi ho?”
“Haan.”
“Main apne parents se baat karta hoon, tum mujhe dobara ring kab karogi?”
“Tum mujhe bata do ke main tumhein kab ring karun?”
“Kal phone kar lo, tumhari shadi ki tareekh kab tay ki gayi hai.” Jalaal ki aawaz mein pareshani thi.
“Ye mujhe nahin pata.”Imama ne kaha
“Theek hai Imama! Main aaj hai apne parents se baat karta hoon………. Aur tum pareshan mat hona…… Sab theek ho jayega.” Usne Imama ko tasalli dete hue phone band kar diya.
Imama ne shukr ada kiya ke uski bhabhi ya ammi ko ye shak nahin ho saka ke wo Asjad se nahin kisi aur se baat kar rahi thi.
“Ye shadi tumhare baba aur Aazam bhai ne mil kar tay ki hai. Tumhare ya Asjad ke kehne par wo ise multawi nahin karenge.” Salma ne is baar qadrey narm lehje mein kaha.
“Ammi! Main market tak ja rahi hoon, mujhe kuch zaroori chizein leni hain.”Imama ne unki baat ka jawaab dene ki bajaye kaha.
“Phone ki baat dusri hai magar main tumhein ghar se nikalne ki ijazat nahin de sakti. Tumhare baba na sirf mujhe balke chaukidaar ko bhi hidayat kar gaye hain ke tumhein bahar na jane dein.”
“Ammi! aap log mere sath aakhir is tarah kyun kar rahe hain?”Imama ne kuch be basi ke aalam mein sofe par baithte hue kaha. “Main ne aap ko apni shadi se to mana nahin kiya. Meri house job tak intezaar kar lein, uske baad shadi kar dein.”
“Meri samajh mein ye baat nahin aati ke tum shadi se inkaar kyun kar rahi ho, tumhari shadi jald ho rahi hai magar tumhari marzi ke khilaaf nahin ho rahi.” Is baar uski bhabhi ne use samjhane ki koshish ki.
“Khwahmakhwaah kal raat se pura ghar tension ka shikaar hai aur main to tumhein dek hkar hairaan hoon tum to kabhi bhi is tarah zid nahin karti thin phir ab kya ho gaya hai tumhein……….. Jab se tum Lahore gayi ho bahot ajeeb ho gayi ho.”
“Aur hamare chahne na chahne se waise bhi kuch nahin hoga. Main ne tumhein bata diya hai, tumhare baba ne tay kiya hai ye sab kuch.”
“Aap unhein samjha to sakti thin.”Imama ne Salma ki baat par ehtejaaj kiya.
“Kis baat par? Samjhati to tab agar mujhe koi baat qabil-e-aitraaz lagti aur mujhe koi baat qabil-e-aitraaz nahin lagi.” Salma ne bade aaraam se kaha. Imama ghusse ke aalam mein wahan se uth kar apne kamre mein aa gayi.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-56/
Prev episode:
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar