Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
“Tumhare abbu mujhe se pehle hi is silsiley mein baat kar chuke hain aur jo wo keh rahe hain wo bilkul theek hai. Tum ko us tarah ke khatron mein koodne ki koi zaroorat nahin hai.” Jalaal ki ammi ne qatai lehje mein usse kaha. Wo Imama ke kehne par unse baat kar raha tha.
“Magar ammi! Is mein khatre wali kya baat hai…….. Kuch bhi nahin hoga, aap khwaamakhwaah khauf zada ho rahi hain.” Jalaal ne kuch ehtejaaji andaaz mein kaha.
“Tum hamaqat ki had tak bewaqoof ho.” Uski ammi ne uski baat par use jhidka. “Imama ke khaandaan aur uske walid ko tumhare abbu bahot achi tarah jaante hain. Tum kya samajhte ho ke tumhare saath shadi hone ki soorat mein wo tumhara picha chod denge ya hamein kuch nahin kahenge?”
“Ammi! Ham is shadi ko khufiya rakhenge, kisi ko bhi nahin batayenge. Main specialization ke liye bahar jane ke kuch arse baad use bhi wahan bulwa lunga. Sab kuch khufiya hi rahega kisi ko pata nahin chalega.”
“Ham aakhir Imama ke liye kyun itna bada khatra mol lein aur tumhein waise bhi ye pata hona chahiye ke hamare yahan apni family mein hi shadi hoti hai. Hamein Imama ya kisi aur ki zaroorat nahin hai.” Ammi ne mauzoo badalte hue kaha.
“Mujhe agar ye andaza hota ke tum is tarah us ladki mein dilchaspi lena shuru kar doge to main usse pehle hi tumhari kahi nisbat tay kar deti.” Uski ammi ne qadre naarazi se kaha.
“Ammi! Main Imama ko pasand karta hoon.”
“Isse koi farq nahin padta ke tum use pasand karte ho ya nahin. Ahem baat ye hai ke is barey mein, main aur tumhare abbu kya sochte hain……… Aur ham dono ko na to wo pasand hai aur na hi uska khaandaan.” Ammi ne do tok andaaz mein kaha.
“Ammi! Wo bahot achi ladki hai, aap use bahot achi tarah jaanti hain, wo yahan aati rahi hai aur tab to aap uski bahot zyada taareef karte thin.” Jalaal ne unhein yaad dilaya.
“ Taareef karne ka ye matlab to nahin hai ke main use apni bahu bana lungi.” Wo khufgi se bolin.
“Ammi! Kam az kam aap to abbu jaisi baatein na karein. Thoda sa hamdardi se sochein.” Is baar Jalaal ne lajaajat aamez lehje mein kaha.
“Jalaal! Tumhein ehsaas hona chahiye ke tumhari is zid aur faisle se hamare poore khaandaan par kis tarah ke asraat murattab honge. Hamara bhi khwaab hai ke ham tumhari shadi kisi ache aur oonche khaandan mein karein. Tumhare abbu agar tumhein is shadi ki ijaazat de bhi den to bhi main kabhi nahin dungi. Na hi main Imama ko apni bahu ke taur par qubool karungi.”
“Ammi! Aap uski surat-e-haal ko samjhein, wo kitna bada qadam utha rahi hai. Is waqt use madad ki zaroorat hai.”
“Agar wo itna bada qadam utha rahi hai to phir use kam az kam dusre ke liye koi pareshani khadi nahin karni chahiye. Main use bura nahin keh rahi. Wo bahot acha faisla kar rahi hai magar ham logon ki apni kuch majbooriyan hain. Tum kuch aql se kaam lo. Tumhein specialization ke liye bahar jana hai. Apna hospital banana hai.” Uski ammi ne qadrey narm lehje mein kaha. “Beta! Ache khaandaan mein shadi ho to insaan ko aage badhne ke liye bahot se mawaaqe milte hain aur tumhare liye to pehle hi bahot se khaandaanon ki taraf se paighaam aa rahe hain. Jab specialization kar loge to kitne oonche khaandaan mein tumhari shadi ho sakti hai. Tumhein iska andaza bhi nahin hai. Khud socho, sirf Imama se shadi kar ke tumhein kya milega…….. Khaandaan uska boycott kar chuka hoga………. Maashrey mein jo badnaami hogi wo alag……Aur tum se shadi ho bhi jaye to kal ko tumhare bache tumhare aur Imama ke barey mein kya sochenge…….. Ye koi 1-2 din ki baat nahin hai, saari umr ki baat hai. “ Ammi use sanjeeda lehje mein samjha rahi thin. Jalaal kisi aitraaz ya ehtejaaj ke baghair khamushi se unki batein sun raha tha.
Uske chehre se andaza nahin ho raha tha ke wo qayel hua hai ya nahin.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-61/
Prev episode:
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar