Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
“Main Asja se shadi karna hi nahin chahti to shopping ka sawaal hi paida nahin hota.”Imama ne mustehkam lehje mein ammi se kaha. Salma use agle roz apne sath market jane ka kehne ke liye aayi thin.
“Pehle tumhein shadi par aitraaz tha, ab tumhein Asjad se shadi par aitraaz hain, aakhir tum chahti kya ho?” Salma uski baat par mushtail ho gayin.
“Sirf ye ke aap Asjad se meri shadi na karein.”
“To phir kis se karna chahti ho tum.” Hashim Mubeen achanak khule darwaze se andar aa gaye the. Yaqeenan unhon ne bahar corridor mein Imama aur Salma ke darmiyaan hone wali guftgu suni thi aur wo apne ghusse par qaboo nahin rakh paaye the. Imama ek dam chup ho gayi.
“Bolo, kis se karna chahti ho………. Ab munh band kyun ho gaya hai, aakhir tum Asjad se shadi kyun nahin karni chahtin…….. Kya takleef hain tumhein.” Unhon ne buland aawaz mein kaha.
“Baba! Shadi ek baar hoti hai aur wo main apni pasand se karungi.” Wo himmat kar ke boli.
“Kal tak Asjad tumhari pasand tha.” Hashim Mubeen ne daant peestey hua kaha.
“Kal tha, ab nahin hai.”
“Kyun, ab kyun nahin hai?”Imama kuch kahe baghair unka chehra dekhne lagi.
“Bolo, ab kyun pasand nahin hai wo tumhein?” Hashim Mubeen ne buland aawaz mein pucha.
“Baba! Main kisi musalmaan se shadi karungi.” Hashim Mubeen ko laga aasmaan unke sar par gir pada tha.
“Kya………. Kaha tumne………?” Unhon ne be yaqeeni se kaha.
“Main kisi ghair muslim se shadi nahin karungi kyun ke main Islam qubool kar chuki hoon.”
Kamre mein agle kai minutes tak mukammal khamushi rahi. Salma ko jaise sakta ho gaya tha aur Hashim Mubeen…….. Wo ek patthar ke mujassamey ki tarah use dekh rahe the. Unka munh khula hua tha, wo jaise saans lena bhool gaye the. Unke wehm-o-gumaanein bhi nahin tha ke kabhi unhein zindagi mein apni aulaad aur wo bhi apni sab se laadli beti ke saamne us tarah ki surat-e-haal ka samna karna padega. Unke 40 saal mukammal taur par bhanwar ki zad mein aa gaye the.
“Tum kya bakwaas kar rahi ho?” Hashim Mubeen ke andar ek ishte’aal ki laher uthi.
“Baba! Aap jaante hain main kya keh rahi hoon. Aap bahot achi tarah jaante hain.”
“Tum pagal ho gayi ho.” Unhon ne aapey se bahar hote hue kaha. Imama ne kuch kehne ki bajaye nafi mein gardan hilayi. Wo Hashim Mubeen ki zehni kaifiyat ko samajh sakti thi.
“Isliye tumhein paida kiya…….. tumhari parwarish ki ke tum…….. tum………..” Hashim Mubeen ki samajh mein nahin aa raha tha ke wo usse kya kahein. “Sirf Asjad se shadi na karne ke liye tum ye sab kar rahi ho, sirf isliye ke tumhari shadi us aadmi se kar dein jis se tum chahti ho.”
“Nahin, aisa nahin hai.”
“Aisa hi hai………. tum bewaqoof samajhti ho mujhe.” Unke mujh se jhaag nikal raha tha.
“Aap meri shadi kisi bhi aadmi se karein, mujhe koi aitraaz nahin. Bas wo aapki community se na ho…….. Phir aap kam az kam ye nahin keh sakenge ke main kisi khaas aadmi ke liye ye sab kar rahi hoon.
Hashim Mubeen uski baat par daant peesne lage.
“Tum juma juma aath din ki paidawaar….. tumhein pata kya hai………”
“Main sab jaanti hoon baba! Meri umr 20 saal hai, main aap ki ungli pakad kar chalne wali bachi nahi hoon………….. Main jaanti hoon aap ke is mazhab ki wajah se hamare khaandaan par badi barkaat naazil ki gayi hain.”
Wo bade mustehkam aur hamwaar andaaz mein kehti gayi.
“Tum……… Tum……… Bakhshish nahin hogi tumhari…….. tum………..”
Hashim Mubeen ghusse ke aalam mein ungli utha kar bolne lage. Imama ko un par taras aane laga. Use dauzakh mein khade ho kar dauzakh se daraney wale us shakhs par taras aaya, use aankhon par patti baand kar phirne wale us shakhs par taras aaya, use mohr-shuda dil wale us aadmi par taras aaya,Use nafs-zada aadmi par taras aaya, Use gumraahi ki sab se upar wali seedhi par khade aadmi par taras aaya.
“Tum gumraahi ke rastey par chal padi ho…….. Chand kitabein padh kar tum……..”Imama ne unki baat kaat di.
“Aap is barey mein mujh se bahes na kar sakenge, main sab kuch jaanti hoon, tehqeeq kar chuki hoon, tasdeeq kar chuki hoon. Aap mujhe kya batayenge, kya samjhayenge. Aap ne apni marzi ka raasta chun liya hai, main ne apni marzi ka raasta chun liya. Aap wo kar rahe hain jo aap saheeh samajhte hain, main wo kar rahi hoon jo main saheeh samajhti hoon. Aap ka aqeeda aap ka zaati mas’ala hai, mera aqeeda mera zaati mas’ala hai. Kya ab ye behtar nahin hai ke aap mere is faisle ko qubool kar lein, jazbaati himaqat ki bajaye bahot soch samajh kar uthaya jaane wala qadam samajh kar.”
Usne badi rasaaniyat aur sanjeedgi ke sath kaha. Hashim Mubeen ki naarazi mein aur izaafa ho gaya.
“Main……… Main apni beti ko mazhab badalne doon take puri community mera boycott kar de…….. Main footpath par aa jaun…. Nahin Imama! Ye nahin ho sakta. Tumhara agar dimagh kharaab bhi ho gaya hai to iska matlab nahin ke mera dimagh bhi kharaab ho jaye. Koi bhi mazhab ikhteyaar karo magar tumhari shadi main asjad se hi karunga, tumhein usi ke ghar jana hoga………… Uske har chali jao aur phir wahan ja kar tay karna ke tumhein kya karna hai kya nahin. Ho sakta hain tumhein aql aa jaye.”
Wo ghusse ke aalam mein kamre se nikal gaye.
“Mujhe pata hota ke tumhari wajah se hamein itni zillat ka saamna karna padega to main paida hote hi tumhara gala daba deti.” Hashim Mubeen ke jaate hi Salma ne khade hote hue daant pees kar kaha. “Tum ne hamari izzat khaak mein milane ka tahiyya kar liya.
Imama kuch kehne ki bajaye khamushi se unhein dekhti rahi. Wo kuch der isi tarah bolti rahin phir kamre se chali gayin.
Unhein uske kamre se gaye ek ghanta hi hua tha jab darwaze par dastak de kar Asjad andar daakhil hua. Imama ko uske is waqt wahan aane ki tawaqqo nahin thi. Asjad ke chehre par pareshani bahot numaayan thi. Yaqeenan use Hashim Mubeen ne bulwaya tha aur wo use sab kuch bata chuke the.
“Ye sab kya ho raha hai Imama?” Usne andar daakhil hote hi kaha. Wo apne bed par baithi use dekhti rahi.
“Tum kyun kar rahi ho ye sab kuch?”
“Asjad! Tumhein agar ye bata diya gaya hai ke main kya kar rahi hoon to phir ye bhi bata diya gaya hoga ke kyun kar rahi hoon.”
“Tumhein andaza nahin hai ke tum kya kar rahi ho.” Wo kursi kheench kar baith gaya.
“Mujhe andaza hai.”
“Is umr mein insaan jazbaat mein aa kar bahot se ghalat faisley kar leta hai………..”
Imama ne turshi se uski baat kaat di. “Jazbaat mein aa kar…….? koi jazbaat mein aa kar mazhab tabdeel karta hai? Kabhi nahin………….. Main 4 saal se Islam ke barey mein padh rahi hoon, 4 saal kam nahin hote.”
“Tum logon ki baaton mein aa gayi ho……tum……”
“Nahin main kisi ki baaton mein nahin aayi. Main ne jis cheez ko ghalat samjha use chod diya aur bas.”
Wo kuch der bechaargi ke aalam mein use dekhta raha phir sar jhatakte hue usne kaha.
“Theek hai un sab baaton ko chodo, shadi par kyun aitraaz hai tumhein…… Tumhare aqaaid mein jo tabdeeli aayi hai wo ek taraf. Kam az kam shadi to hone do.”
“Meri aur tumhari shadi jayez nahin.”
Wo uski baat par hakka bakka reh gaya. “Kya main ghair muslim hoon?”
“Haan, tum ho………”
“Uncle theek keh rahe the kisi ne waqai tumhara brain wash kar diya hai.” Usne ukhde hue lehje mein kaha.
“Phir tum ek aisi ladki se shadi kyun karna chahte ho. Behtar hai tum kisi aur se shadi karo.” Usne turki-ba-turki kaha.
“Main nahin chahta ke tum apni zindagi barbaad kar lo.” Wo uski baat par ajeeb andaaz mein hansi.
“Zindagi barbaad………Kaun si zindagi…….. Ye zindagi jo main tum jaise logon ke saath guzaar rahi hoon. Jinhon ne paise ke liye apne mazhab ko chod diya…….”
“Behave yourself…….. Tum baat karne ke tamaam manners bhool gayi ho. Kis ke barey mein kya kehna chahiye aur kya nahin, tum ne sirey se faraamosh hi kar diya hai.” Asjad use daantne laga.
“Main aise kisi shakhs ka aihtraam nahin kar sakti jo logon ko gumraah kar raha ho.”Imama ne do tok andaaz mein kaha.
“Jis umr mein tum ho……..Us umr mein har koi isi tarah confuse ho jata hai jis tarah tum confuse ho rahi ho. Jab tum is umr se niklogi to tumhein ehsaas hoga ke ham log saheeh the ya ghalat.” Asjad ne ek baar use samjhaane ki koshish ki.
“Agar tum logon ko ye lagta hai ke main ghalat hoon, tab phir tum log mujhe chod kyun nahin dete. Is tarah mujhe ghar mein qaid kar ke kyun rakha hua hai. Agar tum logon ko apne mazhab ki sadaaqat par itna yaqeen hai to mujhe is ghar se chala jane do…… Haqeeqat ko jaanchne do.”
“Agar koi apna, apne aap ko nuqsaan pahonchane par tul jaye to use akela nahin chhoda ja sakta aur wo bhi ek ladki ko…….. Imama! Tum is mas’aley ki nazaakat aur aihmiyat ko samjho, apni family ka khayaal karo, tumhari wajah se sab kuch daao par lag raha hai.”
“Meri wajah se kuch bhi daao par nahin laga……..Kuch bhi nahin………Aur agar kuch daao par laga bhi hai to main uski parwaah kyun karun. Main tum logon ke liye dauzakh mein kyun jaaun? Sirf khaandaan ke naam ki khaatir apna imaan kyun ganwaaun? Nahin Asjad! Main tum logon ke sath gumraahi me us raastey par nahin chal sakti. Mujhe wo karne do jo main karna chahti hoon.” Us ne qatai lehje mein kaha.
“Mujh se agar tum ne zabardasti shadi kar bhi li to bhi tumhein usse koi fayda nahin hoga. Main tumhari biwi nahin banungi, main tum se wafa nahin karungi. Mujhe jab bhi mauqa milega, main bhaag jaungi. Tum aakhir kitne saal mujhe is tarah qaid kar ke rakh sakoge, kitne saal mujh par pehrey bithaoge…….. Mujhe sirf chand lamhey chahiye honge tumhare ghar, tumhari qaid se bhaag jane ke liye…….Aur main……Main tumhare bachon ko bhi saath le jaungi. Tum sari umr unhein dobara nahin dekh sakoge.”
Wo use mutaqbil ka naqsha dikha kar khauf-zada karne ki koshish kar rahi thi.
“Agar main tumhari jagah hoti to main kabhi Imama Hashim jaisi ladki se shadi na karun……… Ye saraasar khasaarey ka sauda hoga…… Himaqat aur bewaqoofi ki inteha hogi……. Tum ab bhi soch lo…… Ab bhi piche hat jao…… Tumhare samne tumhari sari zindagi padi hai……… Tum kisi bhi ladki ke sath shadi kar ke pur sukoon zindagi guzaar sakte ho…….Kisi pareshani…….. Kisi be sukooni ke baghair magar mere sath nahin. Main tumhare liye bad-tareen biwi saabit hongi, tum is saare maamle se alag ho jao, shadi se inkaar kar do, Uncle Aazam se keh do ke tum mujh se shadi karna nahin chahte ya kuch arsey ke liye ghar se ghayab ho jao. Jab tamaam maamla khatm ho jaye to phir aa jana.”
“Mujhe is tarah ke aihmaqaana mashwarey mat do, main kisi bhi qeemat par tum se dastbardaar nahin ho sakta……. Kis bhi qeemat par. Na main inkaar karunga, na is maamle se alag hunga, na hi ghar se kahin jaunga………….. Main tum se hi shadi karunga Imama! Ab ye hamare khaandaan ki izzat aur saakh ka maamla hai, ye shadi na hone aur tumhare ghar se chale jane es hamare pure khaandaan ko jitna nuqsaan uthana padega uska tumhein bilkul andaza nahin warna tum mujhe kabhi ye mashwara na detin. Jahan tak buri biwi saabit hone ya ghar se bhaag jane ka talluq hai…. to ye sab baad ka mas’ala hai main tumhein bahot achi tarah jaanta hoon, tum is tarah ke temperament ki maalik nahin ho ke dusron ko bey-jaa pareshaan karti raho…….Aur wo bhi mujhe, jis se tumhein mohabbat hai.” Asjad bade itmenaan se keh raha tha.
“Tumhein ghalat fehmi hai, mujhe kabhi bhi tum se mohabbat nahin rahi…….. Kabhi bhi…….. Main zehni taur par tumhare sath apne talluq aur rishtey ko us waqt se zahen se nikaal chuki hoon jab main ne apna mazhab chhoda tha. Tum meri zindagi mein ab kahin nahin ho, kahin bhi nahin……… Agar main apne ghar walon ke liye masail khade kar sakti hoon to kal tumhare liye kitne masail khade karungi tumhein iska ehsaas hona chahiye aur is ghalat fehmi se bahar nikal aana chahiye……. Ham dono kabhi ikatthe nahin ho sakte. Main tum logon ke khaandaan ka hissa kabhi nahin banungi.”
“Tumhare aur mere darmiyaan bahot faasla hai, itna faasla ke main tumhein dekh tak nahin sakti aur main is faasley ko kabhi khatm nahin hone dungi. Main kabhi bhi tum se shadi ke liye tayyar nahin hungi.”
Asjad badalti hui rangat ke saath uska chehra dekhta raha.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-63/
Prev episode:
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar