Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Salar ne us shakhs ko upar se niche tak dekha aur wo khaasa maayus hua. Samne khada ladka badi aam si shakl-o-surat ka tha. Salar ke lambe qad aur khoobsurat jism ne use sinf-e-mukhaalif ke liye kisi had tak pur kashish bana diya tha magar saamne khada hua wo shakhs un dono cheezon se mehroom tha wo normal qad-o-qaamat ka maalik tha Uske chehre par daadhi na hoti to wo phir bhi qadrey behtar nazar aata. Salar Sikandar ko Jalaal Ansar se mil kar maayusi hui thi. Imama ab use pehle se zyada bewaqoof lagi.
“Main Jalaal Ansar hoon, aap milna chahte hain mujh se?”
“Mera naam Salar Sikandar hai.” Salar ne apna hath uski taraf badhaya.
“Maaf kijiyega magar main ne aap ko pehchaana nahin.”
“Zaahir hai aap pehchaan bhi kaise sakte hain. Main pehli baar aap se mil raha hoon.”
Salar us waqt Jalaal ke hospital mein use dhundhte hue aaya. Chand logon se uske baare mein daryaaft karne par wo uske paas pahonch gaya tha. Is waqt wo duty room ke bahar khade the.
“Kahin baith kar baat kar sakte hain?” Jalaal ab kuch hairaan nazar aaya.
“Baith kar baat……Magar kis silsiley mein.”
“Imama ke silsiley mein.”
Jalaal ke chehre ka rang badal gaya. “Aap kaun hain?”
“Main uske dost hoon.” Jalaal ke chehre ka rang ek baar phir badal gaya. Wo chup chaap ek taraf chalne laga. Salar uske sath tha.
“Parking mein gaadi hadi hai, wahan chalte hain.” Salar ne kaha.
Gaadi tak pahonchne aur uske andar baithne tak dono ke darmiyaan koi baat nahin hui.
“Main Islamabad se aaya hoon.” Salar ne kehne shuru kiya.
“Imama chahti thi ke main aap se baat karun.”
“Imama ne kabhi mujh se aap ka zikr nahin kiya.” Jalaal ne kuch ajeeb se andaaz mein kaha.
“Aap Imama ko kab se jaante hain?”
“Taqreeban bachpan se………. Ham dono ghar sath sath hain…….. Badi gehri dosti hai hamari.”
Salar nahin jaanta usne aakhri jumla kyun kaha. Shayad ye Jalaal ke chehre ke badalte hue rang the jin se wo kuch aur mehzooz hona chahta tha. Wo Jalaal ke chehre par namudaar hone wali naa-pasandeedgi dekh chuka tha.
“Imama se meri bahot tafseeli baat ho chuki hai, itni tafseeli baat ke baad aur kya baat ho sakti hai.” Jalaal se sapaat lehje mein kaha.
“Imama chahti hai ke aap usse shadi kar lein.” Salar ne jaise news bulettin padhte hue kaha.
“Main apna jawaab use bata chuka hoon.”
“Wo chahti hai aap apne faisle par nazr-e-saani karein.”
“Ye mumkin nahin.”
“Wo us ghar mein apne waldain aur ghar walon ki qaid mein hai. Wo chahti hai aap agar hamesha ke liye nahin to waqti taur par usse nikaah karein aur phir bailiff ki madad se use chuda lein.”
“Ye mumkin hi nahin, Wo unki qaid mein hai to nikaah ho hi kaise sakta hai?”
“Phone par.”
“Nahin, main itne bada risk nahin le sakta. Main aise maamlaat mein involve hona hi nahin chahta.” Jalaal ne kaha. “waldain mujhe is shadi ki ijaazat nahin denge aur Imama ko qubool karne par tayyar bhi nahin hain.”
Jalaal ki nazrein ab Salar ke baalon ki pony par jami hui thin, yaqeenan Salar ki tarah usne bhi use naa-pasandeeda qaraar diya hoga.
“Usne kaha ke aap waqti taur par usse sirf nikaah kar lein taa ke wo apne ghar se nikal sake, baad mein aap chahein to use talaaq de dein.”
“Main ne kaha na main uski madad nahin kar sakta aur phir is tarah ke maamlaat…….. Aap khud usse shadi kyun nahin kar lete…… Agar waqti shadi ki baat hai to aap kar lein. Aakhir aap uske dost hain.”
Jalaal ne kuch chubhte hue andaaz mein Salar se kaha. “Aap Islamabad se Lahore uski madad ke liye aa sakte hain to phir ye kaam bhi kar sakte hain.”
“Usne mujh se shadi ka nahin kaha, isliye main ne is barey mein nahin socha.” Sala rne kandhe jhatakte hue be-ta’assur lehje mein kaha. “Waise bhi wo aap se mohabbat karti hai, mujh se nahin.”
“Magar aarzi shadi ya nikaah mein to mohabbat ka hona zaroori nahin. Baad mein aap bhi use talaaq de den.” Jalaal ne mas’aley ka hal nikaal kiya tha.
“Aap ka mashwara main use pahoncha dunga.” Salar ne sanjeedgi se kaha.
“Aur agar ye mumkin nahin hai to phir Imama se kahein ke wo koi aur tariqa apnaye….. Balke aap kisi news paper ke office chale jayen aur unhein Imama ke barey mein batayen ke kis tarah uske khaandaan ne use zabardasti qaid kar rakha hai. Jab media is maamle ko highlight karega to khud hi wo Imama ko chodne par majboor ho jayenge ya phir aap police ko is maamle ki ittelaa dein.”
Salar ko hairaani hui. Jalaal ki tajweez buri nahin thi. Waqai Imama is barey mein kyun nahin soch rahi thi. Ye raasta zyada mehfooz tha.
“Main aap ka ye mashwara bhi use pahoncha dunga.”
“Aap dobara mere paas na aayein balke Imama se bhi ye keh dein ke wo mujh se kisi bhi tareeqe ya zariye se dobara raabta na kare. Mere waldain waise bhi meri mangni marne wale hain.” Jalaal ne jaise inkeshaaf kiya.
“Theek hai, main ye saari baatein us tak pahoncha dunga.” Salar ne laparwaahi se kaha. Jalaal mazeed kuch kahe baghair gaadi se utar gaya
Agar Imama ko ye tawaqqo thi ke Salar Jalaal ko usse shadi karne ke liye qayel karega to ye uski sab se badi bhool thi. Wo Imama se koi hamdardi rakhta tha na hi kisi khauf-e-khuda ke tahet is saare maamle mein kooda tha……. Uske liye ye sab kuch ek adventure tha aur adventure mein yaqeenan Jalaal se Imama ki shadi shaamil nahin thi. Agar Jalaal se uski shadi ke liye dalaail dene bhi padte to wo kya deta. Uske paas sirf ek daleel ke alaawa aur koi daleel nahin the ke Jalaal aur Imama ek dusre se mohabbat karte hain aur ye wo daleel thi jise Jalaal pehle hi rad kar chuka tha. Wo mazhabi ya akhlaaqi hawaalon se qayel nahin kar sakta tha kyun ke wo khud un donon cheezon se naa-bald tha. Mazhab aur akhlaaqiyaat se uska door door se bhi koi waasta nahin tha aur sab se badi baat ye thi ke aakhir wo Imama ke liye ek dusre aadmin se itni lambi bahes karta kyun. Wo bhi aisa aadmi jise dekhte hi usne napasand kar diya ha.
Aur ye tamaam wo batein thin jo wo Islamabad se Lahore aate hue soch raha tha. Wo aaya isliye tha kyun ke wo Jalaal se milna chahta tha aur dekhna chahta tha ke Imama ke paighaam par uska radd-e-amal kya rehta tha. Usne Imama ka paighaam usi ke lafzon mein kisi azaafe ya tarmeem ke baghair pahoncha diya tha aur ab wo Jalaal ka jawaab le kar wapas ja raha tha aur khaasa mehzooz ho raha tha. Aakhir is paighaam ke jawaab mein wo kya karegi, kya kahegi. Asjad se shadi to wo nahin karegi, Jalaal usse shadi karne par tayyar nahin, ghar se wo nikal nahin sakti, koi aur aisa aadmi nahin jo uski madad ke liye aa sake phir aakhir wo aage kya karegi. Aam taur par ladkiyaan in haalaat mein khud kushi karti hain. Oh yes……. Wo yaqeenan ab mujh se zaher ya revolver pahonchane ki khwaahish karegi.
Salar mutawaqqa surat-e-haal ke barey mein soch kar pur josh ho raha tha.
“Khud kushi……. Very exciting.”
“Aakhir iske alawa wo aur kar bhi kya sakti hai.”
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-65/
Prev episode:
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar