Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Wo raat ko khana khane mein masroof tha jab Sikandar Usman aur Tayyaba aa gaye the. Un dono ke chehre sute hue the. Salar itemenaan se khana khata raha. Wo dono use mukhaatib kiye baghair uske paas se guzar kar chale gaye the.
“Khana khatm kar ke mere kamre mein aao.” Sikandar Usman ne jaate jaate usse kaha tha. Salar ne jawab dene ke bajaye fruit trifle apni plate mein nikaal li.
15 minute baad wo jab unke kamrey mein gaya to usne Sikandar ko kamre mein tahelte hue paya jab ke Tayyaba fikar mandi ke aalam mein sofe par baithi hui thi.
“Papa! Aap ne ulwaya tha?” Salar ne andar daakhil hote hue kaha.
“Baitho phir tumhein batata hoon kyun bulaya hai.” Sikandar Usman ne use dekhte hi tahelna band kar diya. Wo bade itmenaan se Tayyaba ke barabar baith gaya.
“Imama kahan hai?” Sikandar ne lamha zaaya kiye baghair pucha.
“Kaun Imama?” uski jagah koi aur hota to uske chehre par thodi bahot ghabrahat zaroor hoti, magar wo apne naam ka ek hi tha.
Sikandar ka chehra surkh ho gaya. “Tumhari bahen……..” Wo ghurraaye.
“Meri bahen ka naam Anita hai papa.” Salar ke itmenaan mein koi kami nahin aayi.
“Tum mujhe sirf ek baat batao. Aakhir tum mujhe aur kitni baar aur kitne tareeqon se zaleel karaoge?” Is baar Sikandar Usman dusre sofe par baith gaye.
“Aap kya keh rahe hain papa! Meri samajh mein nahin aa raha hai.” Salar ne hairaani se kaha.
“Halaan ke tumhari samajh mein mein ab sab kuch aa raha hai.” Unhon ne tanziya andaaz mein kaha. “Dekho, mujhe aaram se bata do ke Imama kahan hai. Ye maamla itna seedha nahin hai jitna tum ne samajh liya hai.”
“Papa! Aap kis Imama ki baat kar rahe hain? Main kisi Imama ko nahin jaanta.”
“Main Waseem ki bahen ki baat kar raha hoon.” Sikandar Usman is baar ghurraaye.
“Waseem ki bahen?” wo kuch soch mein pad gaya. “ Acha……. Yaad aaya…….. wo jis ne mujhe treatment di thi last year.”
“Haan wahi……. Ab choon’ke tumhari yaad-daasht wapas aa gayi hai isliye mujhe ye bhi bata do ke wo kahan hai.”
“Papa! Wo apne ghar mein hogi ya medical college ke hostel mein. Mera usse kya talluq?” Usne hairaani se Sikandar se kaha.
“Uske baap ne tumhare khilaaf apni beti ke aghwa ka case karwa diya hai.”
“Mere khilaaf…….. I don’t believe it, mera Imama se kya talluq hai.” Usne pur sukoon lehje aur be ta’assur chehre ke sath kaha.
“Yahi to main jaanna chahta hoon ke tumhara uske saath kya talluq hai?”
“Papa! Main usko jaanta tak nahin hoon. 1-2 baar ke alawa main usse mila tak nahin. Phir uske aghwa se mera kya talluq aur mujhe to ye bhi nahin pata ke wo aghwa ho gayi hai.”
“Salar! Ab ye acting band karo. Mujhe bata do bacchi kahan hai. Main ne Hashim Mubeen se wada kiya hai ke main unki beti ko un tak pahonchaunga.”
“To aap apna wada pura karein agar unki beti ko un tak pahoncha sakte hain to zaroor pahonchaiye, magar mujhe kyu disturb kar rahe hain?” Is baar Salar ne naagawari se kaha.
“Dekho Salar! Tumhari aur Imama ke darmiyaan agar kisi hi qism ki understanding hai to ham is maamle ko hal kar lenge. Main khud uske sath tumhari shadi karwa dunga. Tum filhaal ye batao ke wo kahan hai..” Sikandar Usman ne is baar apne lab-o-lehje mein tabdeeli laate hue kaha.
“For god’s sake papa……. stop it……. kon si understanding, kaisi shaid…….. Meri kisi ke sath understanding hoti to main use aghwa karunga? Aur main understanding develop karunga Imama jaisi ladkiyon ke sath……. wo meri type hai?” Is baar Salar ne buland aawaz mein kaha.
“To phir wo tum par uske aghwa ka ilzaam kyun laga rahe hain?”
“Ye aap un se puchein, mujh se kyun puch rahe hain?” Us ne usi naagawari se jawaab diya.
“Aaj Hashim Mubeen keh rahe hain, kal koi aur aa kar kahega aur aap phir mujh par chillana shuru kar denge…….. Main ne aap ko bataya hai main so raha tha jab police aa kar bahar khadi ho gayi aur ab aap aa gaye hain aur aate hi mujh par…… Mujhe to ye tak nahin pata ke Waseem ki bahen aghwa hui hai ya nahin…….. Aakhir wo log mujh par ilzaam kyun laga rahe hain? Kya saboot hai unke paas ke main ne unki beti ko aghwa kiya hai? Aur bil-farz main ne aghwa kiya bhi hai to kya main yahan apne ghar baitha rahunga? Mujhe is waqt us ladki ke sath hona chahiye.” Salar talkhi se bolta raha.
“Mujhe S.P. se tumhare case ki tafseelaat ka pata chala hai, phir main ne Karachi se Hashim Mubeen ko phone kiya, wo mujh se baat karne par tayyar nahin tha. Mujhe usse baat karne ke liye mannatein karni padin. Usne mujhe tumhare barey mein bataya hai……. Uski beti raat ko ghayab hui hai……. Aur tum bhi raat ko gaye ho aur subah aaye ho.”
“To papa! Is mein aghwa kaha se aa gaya. Pehli baat to ye hai ke main raat ko kahin nahin gaya aur dusri baat ye hai ke aghwa karne ke liye kisi ke ghar ja kar ladki ko zabardasti le jaana zaroori hai aur main kisi ke ghar nahin gaya.”
“Hashim Mubeen ke chaukidaar ne raat ko tumhein jaate aur subah aate dekha hai.”
“Uska chaukidaar jhoota hai.” Salar ne buland aawaz mein kaha.
“Mere chaukidaar ne tumhein raat ko ek ladki ko car mein le jaate dekha hai.” Sikandar ne daant peestey hue kaha. Salar chand lamhe kuch bol na saka. Sikandar yaqeenan ghar aate hi chaukidaar se baat kar chuke the.
“Wo meri ek friend thi jise main ghar chodne gaya tha.” Usne Tayyaba ko dekhte hua kaha.
“Kaun hai wo friend? Uska naam aur pata batao.”
“Sorry papa main nahin bata sakta. It’s personal.”
“Yahan Islamabad chodne gaye the?”
“Haan………..”
“Tum use Lahore chhod kar aaye ho. S.P. ne mujhe khud bataya hai. Tum 4 naakon se guzrey ho. Chaaron par tumhara number note kiya gaya hai. Raaste mein tum ne ek service station par ruk kar gaadi check karwayi hai….. Us ladki ke saath waha khana khaya hai.” Sikandar ne us service station aur hotel ka naam batate hue kaha. Salar kuch der Sikandar ko dekhta raha magar usne kuch bhi nahin kaha.
“S.P. ne mujhe ye sab kuch khud bataya hai. Usne abhi Hashim Mubeen ko ye sab kuch nahin bataya. Usne mujh se kaha hai ke main tum se baat karun aur khamushi ke sath ladki ko wapas pahoncha doon ya uske ghar walon ko us ladki ka pata bata doon taa ke ye maamla khamushi se baghair kisi mas’aley ke baghair khatm ho jaye magar wo kab tak Hashim Mubeen ko nahin batayega. Wo dosti ka lehaaz kar ke sab kuch chupa bhi gaya tab bhi Hashim Mubeen ke aur bahot se zaraa’e hain. Ues waha se pata chal jayega aur phir tumhari puri zindagi jail mein guzregi.”
Sikandar ne use darane ki koshish ki. Wo muta’assir hue baghair unhein dekhta raha.
“Ab jhoot bolna chhod do aur mujhe bata do ke wo ladki kaha hai.”
“Wo ladki red light area mein hai.” Sikandar ko uski baat par current laga.
“What…………?”
“Main use waha se laya tha, wahi chhod aaya hoon.”
Wo safed chehre ke sath Salar ko dekhte rahe.
“Magar wo Imama nahin thi, main parson Lahore gaya hua tha wahan se main raat guzaarne ke liye us ladki ko laya tha, aaj main use waha chhod aaya hoon. Mere paas uska koi contact number to nahin hai, magar aap mere sath Lahore chalein to main aap ko us ladki ke paas le jaata hoon ya pata bata deta hoon aap khud ya police ko kahein ke wo us ladki se tasdeeq kar lein.”
Kamrey mein ek dam khamushi chaa gayi. Tayyaba aur Sikandar be yaqeeni se Salar ko dekh rahe the jab ke wo badey mutmayin andaaz mein khidkiyon se bahar dekh raha tha.
“Mujhe yaqeen nahin aata ke tum……… tum is tarah ki harkat kar sakte ho. Tum aisi jagah jaa sakte ho?” Ek lambi khamushi ke baad Sikandar ne kaha.
“I am sorry papa! Magar main jaata hoon……… Aur is baat ka Imama ke bhai Waseem ko bhi pata hai. Main kai baar weekend par apne doston ke saath wajah jata raha hoon aur Waseem ye baat jaanta hai, aap usse pooch lein.”
“Address do us ladki ka.” Wo kuch der baad ghurraaye.
“Main apne kamrey se le kar aata hoon.” Usne uthte hue kaha.
Apne kamrey mein aa kar usne mobile uthaya aur Lahore mein rehne wale apne ek dost ko phone karne laga. Use surat-e-haal batane ke baad usne kaha.
“Akmal! Main apne papa ko red light area ke us ghar ka pata de raha hoon jahan ham jaate rehte hain. Tum wahan kisi bhi aisi ladki ko jo mujhe jaanti hai usko is baarey mein bata do, main abhi kuch der tak tumhein dobara phone karta hoon.”
Wo kehte hue tezi se ek chit par ek address ikhe laga aur phir use le kar Sikandar ke kamrey mein aa gaya. Usne chit Sikandar ke saamne kar di, jise unhon ne taqreeban cheen liya. Ek nazar us chit par daal kar unhon ne khashmgeen nazron se use dekha.
“Dafa ho jao yahan se.” Wo itmenan se andaaz mein wahan se aa gaya.
Apne kamrey mein aa kar usne Akmal ko dobara phone kiya.
“Main tumhein wahan pahonch kar phone karta hoon.” Akmal ne usse kaha. Wo bed par let kar uska intezaar karne laga. 15 minute ke baad Akmal ne use phone kiya.
“Salar! Main ne Saniya ko tayyar kiya hai. Use main ne saara maamla samjha diya hai.” Akmal ne use bataya, wo Saniya ko jaanta tha.
“Akmal! Ab tum ek kaaghaz aur pencil lo aur main kuch cheezein likhwa raha hoon use likho.” Usne Akmal se kaha aur phir use apne ghar ke bairooni manzar aur location ki tafseelaat likhwane laga.
“Ye kya, main ne dekha hua hai tumhara ghar……….” Akmal ne kuch hairaani se usse pucha.
“Tum ne dekha hai, Saniya ne to nahin dekha. Ye saari tafseelaat main uske liye likhwa raha hoon agar police uske paas aayi to wo ye saari chizein puchegi sirf ye tasdeeq karne ke liye ke kya wo waqai mere saath yahan Islamabad mein thi. Wo gaadi mein chup kar aayi thi. Aur raat ke waqt aayi thi isliye use zyada tafseel ka nahin pata, magar ghar ke andar daakhil hote hue dayen aur bayen dono taraf lawn hai. Meri gaadi ka rang surkh tha. Sports car aur number………” Wo use likhwata raha.
“Ham police ke 4 naakon se guzre the. Usne safed shalwaar qameez, safed chaadar aur siyaah sweater pehna hua tha,raste mein ham is naam ke service station par bhi ruke the.” Salar ne naam bataya, service station aur hotel, wo dhund ki wajah se saheeh tarah nahin dekh saki.” Salar yake-baad-deegrey har cheez ki tafseel likhwata gaya. Service station par gaadi theek karne wale aadmi se le kar chai banane wale ladke ke huliye aur us kamrey ki tafseelaat……… Unhon ne kya khaya tha, Salar aur ladke ke darmiyaan kya guftgu hui thi. Usne choti choti tafseelaat use likhwayi thin. Usne apne ghar ke porch se le kar apne kamrey tak ke raaste aur apne kamrey ka tamaam huliya bhi use note karwa diya tha.
“Saniya se kaho ye sab kuch rat le.” Usne Akmal ko aakhri hidaayat di aur phone band kar diya. Phone band kar ke wo bed par baitha abhi kuch soch raha tha jab Sikandar Usman achanak darwaza khol kar uske kamrey mein aaye.
“Us ladki ka kya naam hai?”
“Saniya.” Salar ne be-ikhteyaar kaha. Sikandar Usman mazeed kuch kahe baghair kamrey se nikal gay.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-78/
Prev episode:
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar