Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
“Sikandar sahab! Main aap se ek baat kehna chahti hoon.” Wo lounge mein baithe the jab mulaazma kuch jhijaktey hue unke paas aayi.
“Haan kaho……… paison ki zaroorat hai?” Sikandar Usman ne akhbaar padhte hue kaha. Wo is maamle mein khaasey faraakh dil the.
“Nahin sahab ji! Aisi koi baat nahin hai. Main kuch aur kehna chahti hoon aap se.”
“Bolo…………” Wo hanooz akhbaar mein munhamik the. Mulaazma kuch pareshaan hone lagi. Naasera ne bahot soch samajh kar Salar aur Imama ke barey mein Sikandar Usman ko batane ka faisla kiya tha kyun ke use ye sab kuch ab bahot pareshaan kun lag raha tha wo nahin chahti thi ke jald ya bader ye pata chal jaye ke un dono ke darmiyaan raabtey ka zariya wo thi aur phir use aur uske pure khaandaan ko police ka saamna karna padey. Isi liye apne shauhar se mashwarey ke baad usne Sikandar Usman ko sab kuch batane ka faisla kar liya tha taa ke wo dono ghar walon me se kisi ek ki hamdardi apne sath rakhe.
“Chup kyun ho, bolo……….” Sikandar Usman ne use khamoosh paa kar ek baar phir usse kaha. Unki nazrein abhi bhi akhbaar par jami hui thin.
“Sikandar sahab! Main aap ko Salar sahab ke barey mein kuch batana chahti hoon.” Naasera ne bil aakhir ek taweel tawaqquf ke baad kaha.
Sikandar Usman ne be ikhteyaar akhbaar apne chehre ke saamne se hata kar use dekha.
“Salar ke barey mein……..? Kya kehne chahti ho?” Unhon ne akhbaar ko saamne center table par phenkte hue sanjeedgi se kaha.
“Salar sahab aur Imama bibi ke barey mein kuch batana chahti hoon.” Sikandar Usman ka dil be ikhteyaar uchal kar halaq mein aa gaya.
“Kya………..?”
“Bahot din pehle ek din Salar sahab ne mujh se kaha tha ke main unka mobile apni beti ke hath Imama bibi ko pahoncha doon.” Sikandar Usman ko laga wo dobara kabhi hil nahin sakenge. To Hashim Mubeen ka khayaal aur israar theek tha, unke bad tareen qayaas aur andaze durust the.
“Phir………?” Unhein apni aawaz kisi khayi se aati lagi.
“Main ne inkaar kar diya ke ye kaam main nahin kar sakti magar unhon ne mujhe bahot dhamkaaya. Unhon ne kaha ke wo mujhe ghar se nikaal denge Jis par majbooran mein wo mobile Imama bibi tak pahonchane ke liye tayyar ho gayi.”
Apni position ko mehfooz rakhne ke liye Naasera ne apne bayaan mein jhoot ki aamezish karte hue kaha. “Phir uske kuch din ba ek din Salar sahab ne kaha ke main kuch kaaghzaat Imama bibi tak pahonchaun aur phir usi waqt un kaaghzaat ko wapas le aaun. Main ne apni beti ke zariye wo kaaghzaat bhi Imama bibi ke paas pahoncha kar wapas mangwa liye aur Salar sahab ko de diye. Main ne Salar sahab se un kaaghzaat ke barey mein pucha magar unhon ne nahin bataya magar mujhe shak tha ke wo shayad nikaah naama tha kyun ke us waqt Salar sahab ke kamrey mein 5 log maujood the. Unme se ek koi maulvi bhi tha.”
Sikandar Usman ko wahan baithe baithe thande paseene aane lage the. “ Aur ye kab ki baat hai?”
“Imama bibi ke jaane se chand din pehle.” Naasera ne kaha.
“Tum ne mujhe is barey mein kyun nahin bataya?” Sikandar Usman ne durusht lehje mein kaha.
“Main bahot khauf zada thi sahab ji……… Salar sahab ne mujhe dhamkiyaan di thin ke agar main ne aap ko ya kisi aur ko is saare maaml ke barey mein bataya to wo mujhe yahan se bahar phinkwa denge.” Naasera ne kaha.
“Wo kaun log the, unhein jaanti ho?” Sikandar Usman ne be had izteraab ke aalam mein kaha.
“Bas ek ko…….. Hasan sahab the.” Us ne Salar ke ek dost ka naam liya. “Baaqi aur kisi ko main nahin pehchaanti.” Naasera ne kaha.
“Main bahot pareshaan thi. Aap ko batana chahti thi magar darti thi ke aap mere barey mein kya sochenge magar ab mujh se bardaasht nahin hua.”
“Aur kaun kaun iske barey mein jaanta hain?” Sikandar Usman ne pucha.
“Koi bhi nahin. Bas main, meri beti aur mera shauhar.” Naasera ne jaldi se kaha.
“Mulaazmon mein se kisi aur ko kuch pata hai?”
“Tauba karein ji! Main kyun kisi ko kuch batati…….. Main ne kisi ko kuch bhi nahin bataya.”
“Tum ne jo kuch kiya uske barey mein to main baad mein tay karunga filhaal tum ek baat achi tarah zahen nasheen kar lo tum kisi ko bhi is sarey maamle ke barey mein nahin bataogi. Apna munh hamesha ke liye band kar lo. Warna is baar mein na sirf tumhein waqai is ghar se nikaal dunga balke main Hashim Mubeen aur police se keh dunga ke ye sab kuch tum ne karwaya hai. Tum ne hi un dono ko gumraah kiya tha aur tum un dono ke paighamaat ek dusre tak pahonchati rahin, phir police tumhare sath aur tumhare khaandaan ke sath kya karegi tumhein yaad rakhna chahiye. Tumhari saari umr jail ke andar hi guzar jayegi.” Wo ghusse ke aalam mein unse dhamka rahi thi.
“Nahin sahab ji! Main kyun kisi ko kuch bataungi. Aap meri zabaan katwa dijiyega. Agar mere munh se dobara iske barey mein kuch sunein.”
Naasera ghabra gayi magar Sikandar Usman ne rukhayi ke sath uski baat kaat di.
“Bas kaafi hai. Ab tum jao yahan se………..main tum se baad mein baat karunga.” Unhon ne use jaane ka ishara karte hue kaha.
Sikandar Usman pareshaani ke aalam mein idhar udhar tahelne lage. Is waqt unke sar par waqai aasmaan toot pada tha aur is waqt unhein pehli baar Salar ke hathon be waqoof banne ka ehsaas ho raha tha. Wo kis dhitaayi, mahaarat aur behoodgi se unse jhoot par jhoot bolta aur unhein dhoka deta gaya tha aur unhein iska ehsaas tak nahin ho saka tha aur agar mulaazma unhein ye sab kuch nahin batati to wo abhi bhi taang par taang rakhe mutmayin baithe hote. Yahi soch kar ke Salar Imama ke sath involve nahin hai aur na hi uski gumshudgi mein uska koi hissa tha. Wo chand din ghar par reh kar ek baar phir college jana shuru kar chuka tha.
Wo jaante the ke Salar ki nigraani karwayi ja rahi thi aur Hashim Mubeen Ahmad ko ab kuch pata chalne ka matlab kiya tha. Wo achi tarah jaante the. Unka kuch der pehle ka itmenaan ek dam khatm ho gaya tha. Wo andaza kar sakte the ke wo kaaghzaat kaise the. Un 5 aadmiyon ki maujoodgi ka matlab kya tha, Salar aur Imama ke darmiyaan talluq ki nauiyat ya thi aur is waqt unka dil chah raha tha ke wo uska gala daba dein ya phir use shoot kar dein magar wo jaante the wo ye dono kaam nahin kar sakte the. Salar Sikandar unka wo beta tha jis se wo apni aulaad mein sab se zyada mohabbat karte the aur is tarah bewaqoofbanne ke baad pehli baar wo soch rahe the ke wo ab Salar Sikandar ki kisi baat par yaqeen nahin karenge. Wo use mukammal taur par har maamle ke barey mein rakhenge waise hi jaise wo kar raha tha.
“Uski Imama se jaan pehchaan kaise hui?” Sikandar Usman ne apne ghar mein bechaini se tahelte hue Tayyaba se pucha.
“Mujhe kya pata ke uski jaan pehchaan Imama se kaise hui. Koi bachha to hai nahin ke meri ungli pakad kar chalta ho.” Tayyaba ne qadrey khufgi se kaha.
“Main ne tum se bahot baar kaha tha ke us par nazar rakha karo magar tum………. tumhein apni activities se fursat mile to tum kisi aur ke barey mein socho.”
“Is par tawajjoh dena sirf mera hi farz kyun hai.” Tayyaba ek dam bhadak uthein. “Aap ko bhi to apni activities chod deni chahiyein. Salar ilzaam mere hi sar kyun.”
“Main tum ko koi ilzaam nahin de raha aur is bahes ko khatm karo. Imama ke sath shadi……… tum andaza kar sakti ho ke Hashim Mubeen ko jab is talluq ka pata chalega to wo kya tamasha khada karenge. Mujhe ye soch kar shock lag raha hai ke usne aisi harkat karne ka soch kaise liya. Use bilkul bhi ehsaas nahin hua ke hamari aur hamari family ki society mein kitni izzat hai.” Sikandar Usman Tayyaba ke qareeb sofe par baithe hue bole. “Ek problem khatm hoti hai to hamare liye dusri problem shuru kar deta hai. Ye saara chakkar usi waqt shuru hua hoga jab pichle saal usne khud kushi ki koshish ke baad uski jaan bachayi thi. Ham bewaqoof the ke ham e is maamle par nazar nahin rakhi, warna shayad ye sab bahot pehle saamne aa jata.” Sikandar Usman apni kanpati masaltey hue kehne lage.
“Aur yaqeenan ye ladki bhi uske sath apni marzi se involve hui hogi warna is tarah koi kisi ke sath apni marzi ke khilaaf nikaah to nahin kar saktaaur Hashim Mubeen ko dekhen, wo yun shor macha raha hai jaise uski beti ka is mein koi qusoor nahin hai, jo kiya hai Salar ne hi kiya hai. Unhon ne to FIR bhi aghwa ki darj karwayi hai.” Tayyaba naye sirey se sulagne lagin.
“Jo bhi hai qusoor tumhare bete ka hai. Na wo aise kaamon me padta na is tarah phansta. Ab to tum sirf ye socho ke tumhein is surat-e-haal se ki tarah bachna hai.”
“Abhi ham itni buri tarah nahin phanse, jis tarah aap soch rahe hain. Us par jurm saabit nahin hua. Police ya Hashim Mubeen ke paas koi suboot nahin hai aur suboot ke baghair wo kuch nahin kar sakte.”
“Aur jis din unhein suboot pahonch gaya us din kya hoga, tum ne ye socha hai?” Sikandar Usman ne kaha.
“Aap phir imkaanaat ki baat kar rahe hain. Aisa hua to nahin hai aur ho sakta hai…….ho bhi na.”
“Usne agar hamein itna bada dhoka de diya hai to ho sakta hai ek aur dhoka ye ho ke uska raabta us ladki ke sath nahin hai. Mumkin hai ye abhi bhi us ladki ke sath raabtey mein ho.” Sikandar Usman ko khayaal aaya.
“Haan ho sakta hai, phir kya kiya jaye?”
“Main usse baat karunga to samjho patthar ke sath apna sar phodunga, wo phir jhoot bol dega, jhoot bolne mein to maahir ho chuka hai.” Unhon ne tanaffur aamez lehje mein kaha.
“Bas chand maah mein uska B.A. mukammal ho jayega phir main use bahar bhijwa dunga. Kam az kam har waqt Hashim Mubeen ki taraf se jin andeshon ka main shikaar rehta hoon wo to khatm honge.” Unhon ne cigarette ke ek kash lagaya.
“Magar aap ek baat bhool rahe hain Sikandar!” Tayyaba ne badi sanjeedgi se chand lamhon ki khamushi ke baad kaha.
“Kya?” Sikandar ne unhein chaunk kar dekha.
“Salar ki Imama ke sath khufiya shaadi………. Is shadi me barey mein jo kuch karna hai wo aap ko khud hi karna hai. Aap kya karenge, is shadi ke barey mein?”
“Talaaq ke alawa is shadi ka aur kya kiya ja sakta hai.” Sikandar Usman ne qatai lehje mein kaha.
“Wo shadi maanne par tayyar nahin hai to talaaq dene par raza mand ho jayega.”
“Jab main use suboot pesh karunga to use apni shadi ka aitraaf karna hi padega.”
“Aur agar shadi ka aitraaf karne ke baad bhi usne Imama ko talaaq dene se inkaar kar diya to.”
“Koi na koi raasta nikaalna padega aur wo main nikaal lunga. Chahe wo apni marzi se use talaaq de ya phir mujhe zabardasti karni pade. Main ye maamla khatm kar dunga, is tarah ki shadi insaan ko saari umr khwaar karti hai. Isse to peecha chudaana hi padega, warna main use is baar mukammal taur par apni jaayedaad se aaq karn dene ka iraada rakhta hoon.” Sikandar Usman ne do tok andaaz mein kaha.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-82/
Prev episode:
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar