Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Hasan kuch der pehle Islamabad ke ek hotel mein tha, jab achanak use apne walid ki call mili, wo jald az jald apne ghar pahonchne ke liye keh rahe the. Unka lehja be had ajeeb tha magar Hasan ne tawajjoh nahin di, laikin jab 15 minute baad ghar pahoncha to porch mein khadi Sikandar Usman ki gaadi dekh kar chaukanna ho gaya. Wo Salar ke ghar ki tamaam gaadiyon aur unke numbers ko achi tarah pehchaanta tha.
“Sikandar uncle ko mere is maamle mein involve hone ke hawale se koi suboot nahin mile hain isliye mujhe pareshaan hone ki zaroorat nahin hai. Wo zyada se zyada Salar ka dost samajh kar pooch-guch ke liye aaye honge. Main bade itmenaan se unki baaton ka jawaab dunga aur kisi bhi ilzaam ki tardeed kar dunga laikin mere pareshani papa ke saamne meri position mashkook kar degi, isliye uncle Sikandar ko dekh kar mujhe koi radd-e-amal zaahir nahin karna chahiye.”
Usne pehle apna laa’eha-e-amal tay kiya aur phir bade itmenaan ke sath study mein daakhil ho gaya. Uske walid Qasim Farooqi aur Sikandar Usman coffee pi rahe the, laikin unke chehre ki ghair maamuli sanjeedgi aur izteraab wo ek lamhe mein bhaanp gaya tha.
“Kaise hain uncle Sikandar aap! Is baar bahot dino ke baad hamari taraf aaye.” Bawajood iske Sikandar ye Qasim ne uski hello ka jawaab nahin diya. Hasan ne bahot be takallufi ka muzaahera kiya. Use phir bhi jawaab nahin mila. Sikandar Usman use ghaur se dekh rahe the.
“Baitho.” Qasim Farooqi ne qadrey durushti se kaha.
“Sikandar tum se kuch batein puchne aaya hai, tumhein har baat ka theek theek jawaab dena hai. Agar tum ne jhoot bola to main Sikandar Usman se keh chuka hoon ke wo tumhein police ke paas le jaye. Meri taraf se tum bhaad mein jao. Main tumhein kisi tarah bachane ki koshish nahin karunga.” Qasim Farooqi ne uske baithte hi bila tamheed kaha.
“Papa! Aap kya keh rahe hai, main aap ki baat nahin samjha.” Hasan ne hairat ka muzaahera kiya magar uska dil dhadakne laga tha. Maamla itna sidha nahin tha jitna usne samajh liya tha.
“Over smart banne ki koshish mat karo. Sikandar! Pucho isse, kya puchna chahte ho aur main dekhta hoon ye kaise jhoot bolta hai.”
“Imama ke sath Salar ki shadi mein shirkat ki hai tum ne?”
“Uncle……… aap………aap kya baat kar rahe hain………. kaun si shadi…………. kaisi shadi………..” Hasan ne mazeed hairat ka muzaahera kiya.
“Wahi shadi jo meri adam maujoodgi mein mere ghar par hui jis ke liye Imama ko papers bhijwaye gaye the.”
“Please uncle! Aap mujh par ilzaam laga rahe hain. Aap ke ghar main zaroor aata jata raha hoon magar muje Salar ki kisi shadi ke barey mein kuch pata nahin hai aur na hi meri maalumaat ke mutabiq usne shadi ki hai………. Mujhe to us ladki ka bhi pata nahin hai, jis ka aap naam le rahe hain………. ho sakta hai Salar ki kisi ladki ke sath involvement ho, magar main iske barey mein nahin jaanta, wo har baat mujhe nahin batata.”
Sikandar Usman aur Qasim Farooqi khamushi se uski baat sunte rahe. Wo khamoosh hua to Sikandar Usman ne apne saamne pada hua ek lifaafa uthaya aur usmein maujood chand kaaghaz nikaal kar uske saamne rakh diya. Hasan ka rang pehli baar utra. Wo Imama aur Salar ka nikaah naama tha.
“Is par dekho ………..tumhare hi signatures hain na?” Sikandar ne sard lehje mein pucha. Agar ye sawaal unhon ne Qasim Farooqi ke samne na kiya hota to wo un dastakhat ko apne dastakhat maanne se inkaar kar deta magar is waqt wo aisa nahin kar sakta tha.
“Ye mere signatures hain magar main ne nahin kiye hain.” Usne haklaate hue kaha.
“Phir kis ne kiye hain, tumhare farishton ne na Salar ne?” Qasim Farooqi ne tanziya lehje mein kaha.
Hasan kuch na bol saka. Wo hawaas baakhta sa baari baari unhein dekhne laga. Uske wahm-o-gumaan mein bhi nahin tha ke Sikandar Usman is tarah uske samne wo nikaah naama nikaal kar rakh denge. Wo ye bhi nahin jaanta tha ke unhon ne wo nikaah naama kaise haasil kiya tha, Salar se ya phir…….. Uski saari aqal mandi aur chaalaki dhari ki dhari reh gayi thi.
“Tum ye nahin maanoge ke Salar ka Imama ke sath Nikaah tumhari maujoodgi mein hua hai.” Qasim Farooqi ne ukhde hue lehje mein usse kaha.
“Papa! Is mein mera koi qusoor nahin hai. Ye sab Salar ki zid par hua tha, usne mujhe majboor kiya tha.” Hasan ne ek dam sab kuch batane ka faisla kar liya tha. Kuch bhi chupaane ka ab koi fayda nahin tha. Wo jhoot bolta to apni position aur kharaab karta.
“Main ne use bahot samjhaya tha magar……”
Qasim Farooqi ne uski baat kaat di. “Is waqt tumhein safaiyaan aur wazahatein pesh karne ke liye nahin bulaya. Tum mujhe sirf ye batao ke us ladki ko us ne kahan rakha hua hai?”
“Papa! Mujhe uske barey mein kuch pata nahin hai.” Hasan ne tezi se kaha.
“Tum phir jhoot bol rahe ho.”
“I swear papa! Mujhe waqai kuch pata nahin hai. Wo use Lahore chod aaya tha.”
“Ye jhoot tum kisi aur se bolna, mujhe sirf sach batao.” Qasim Farooqi ne ek baar phir usi tund-o-tez lehje mein kaha.
“Main jhoot nahin bol raha hoon papa!” Hasan ne ehtejaaj kiya.
“Lahore kaha chod aaya tha?”
“Kisi sadak par. usne kaha tha wo khud chali jayegi.”
“Tum mujhe ya Sikandar ko bewaqoof samajh rahe ho, us ne us ladki se shadi k iaur phir use ek sadak par chod diya. Bewaqoof mat banao hamein.” Qasim Farooqi bhadak uthe.
“Main sach keh raha hoon papa! Usne kam az kam mujh se yahi kaha tha ke wo us ladki ko sadak par chod aaya tha.”
“Tum ne usse pucha nahin ke phir us ladki ke sath shadi kyun ki, agar use yahi karna tha.”
“Papa! Usne ye shadi us ladki ki madad ke liye ki thi. Uske ghar wale zabardasti uski shadi kisi ladke se karna chahte the, wo nahin karna chahti thi. Usne Salar se raabta kiya aur madad maangi aur Salar uski madad par tayyar ho gaya. Wo sirf ye chahti thi ke Salar waqti taur par usse nikaah kar le taa ke agar uske waldain zabardasti uski shadi karna chahein to wo is nikaah ka bata kar unhein rok sake.”
Hasan ab sachai par parda nahin daal sakta tha. Usne puri baat batane ka faisla kiya.
“Aur agar zaroorat pad to bailiff k zariye usko rihaayi dilwai ja sake magar ye koi mohabbat waghaira ki shadi nahin thi. Wo ladki waise bhi kisi aur ladke ko pasand karti thi. Aap is nikaah naame ko dekhen to usmein bhi usne talaaq ka haq pehle hi le liya hai, taa ke zaroorat padne par wo Salar se raabta kiye baghair hi talaaq haasil kar le.”
“Bas ya kuch aur?” Qasim Farooqi ne usse kaha. Hasan kuch nahin bola. Khamushi se unhein dekhta raha.
“Main qata’an tuhari kisi baat par yaqeen karne ko tayyar nahin hoon. Tum ne bahot achi kahani banayi hai magar main koi baccha nahin hoon ke is kahani par yaqeen kar loon. Tumhein ab Imama tak pahonchne mein Sikandar ki madad karni hai.” Qasim Farooqi ne qatai lehje mein kaha.
“Papa! Ye main kaise kar sakta hoon. Mujhe uske barey mein kuch pata nahin hai.” Hasan ne ehtejaaj kiya.
“Tum ye kaise karoge, ye tum khud jaan sakte ho. Mujhe sirf ye batana tha ke tumhein kya karna hai.”
“Papa please! Aap mujh par yaqeen karein, main Imama ke barey mein kuch nahin jaanta. Nikaah karwane ke alawa main ne aur kuch nahin kiya.” Hasan ne kaha.
“Tum uske itne qareeb ho ke apni khufiya shadi mein wo tumhein gawaah ke taur par le ja raha hai magar tumhein ye nahin pata ke uski biwi ghar se bhaagne ke baad ab kahan hai. Main ye maanne par tayyar nahin hoon Hasan, kisi surat mein bhi nahin.” Qasim Farooqi ne do tok andaz mein kaha.
“Tumhein agar pata nahin hai to bhi tum uska pata karao……… ke wo kahan hai……….Salar tum se kuch nahin chupayega.”
“Papa! Wo bahot si batein mujhe nahin batata.”
“Wo sab batein tumhein batata hai ya nahin, main filhaal sirf ek cheez mein dilchaspi rakhta hoon aur wo Imama ke barey mein maalumaat hain. Tum har tareeqey se usse Imama ka pata haasil karo aur Salar ko kisi bhi tarah ye pata nahin chalna chahiye ke Sikandar ko is shadi ki ittelaa mil chuki hai ya usne is silsiley mein tum se koi mulaqaat ki hai. Agar mujhe ye pata chala ke Salar ye baat jaan gaya hai to main tumhara kya hashr karunga ye tumhein yaad rakhna chahiye. Main Sikandar ko pehle hi ijaazat de chuka hoon ke wo Hashim Mubeen ko tumhara naam de de, uske baad Hashim Mubeen tumhare sath police ke zariye nimtey ya kisi aur tariqey se, main bilkul parwah nahin karunga. Ab tum ye tay kar lo ke tum ne Salar ke sath dosti nibhani hai ya phir is ghar mein rehna hai.” Qasim Farooqi ne qataiyat se kaha.
“Papa! Main koshish karta hoon ke kisi tarah Imama ke barey mein kuch maalumaat mil jayein. Main Salar se iske barey mein baat karunga. Main use ye nahin bataunga ke Sikandar uncle ko is sarey maamley ke barey mein pata chal gaya hai.” Wo mekaaniki andaaz mein dohrata ja raha tha.
Wo is baar waqai buri tarah aur khilaaf-e-tawaqqo phansa tha.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-83/
Prev episode:
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar