Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Waqt guzarne ke sath sath yahan uske halqa-e-ahbaab mein izaafa hone laga aur isi halqa-e-ahbaab mein ek naam Saad ha. Uska talluq Karachi se tha. Salar ki tarah wo bhi ameer kabeer gharaane se talluq rakhta tha magar Salar ke bar-aks uska gharaana khaasa mazhabi tha. Ye Salar ka andaaza tha. Saad ki his-e-mizaah bahot achi thi aur wo bahot handsome bhi tha. New Haven mein ek American dost ke tawassut se uski mulaqaat Saad se hui thi aur uski taraf dosti mein pahel karne wala bhi Saad hi tha. Salar ne is dosti ko qubool karne mein qadrey ta’ammul kiya kyun ke use yun lagta tha jaise Saad aur uske darmiyaan kuch bhi mushtarik nahin hai. Saad waha se M.Phil kar raha tha. Salar ke bar-akswo padhai ke sath job bhi karta tha. Uska huliya uski mazhab se jazbaati wabastagi batane ke liye kaafi tha. Usne daadhi rakhi hui thi aur mazhab ke barey mein uska ilm bahot zyada tha. Salar ne zindagi mein pehli baar kisi aise shakhs se dosti ki thi jo mazhabi tha.
Saad 5 waqt ki namaaz padhta tha aur dusron ko bhi uske liye kehta rehta. Wo mukhtalif organizations aur clubs mein bhi bahot active tha. Salar ke bar-aks America mein uska koi qareebi rishtedaar nahin tha, sirf ek door ke chacha the jo kisi dusri state mein rehte the. Shayad isi liye apni tanhaayi ko door karne ke liye wo bahot zyada social tha. Salar ke bar-aks wo apne bahen bhaiyon mein sab se chota tha aur shayad ye laad-o-pyaar hi tha jis ne uske waldain ko use itni door taleem ke liye bhej diya tha warna uske baaqi dono bhai Saad ke walid ke sah graduation ke baad business mein shareek ho gaye the.
Wo bhi ek apartment kiraye par le kar rehta tha magar uske sath us apartment mein 4 aur log bhi rehte the. Un 4 mein se 2 Arab, ek Bangladeshi ke alawa ek aur Pakistani tha. Wo tamaam students the.
Saad pehli hi mulaqaat mein Salar se bahot be takalluf ho gaya tha. Salar ke American dost Jeff ne jab Saad ko Salar ki academic kaamyaabiyon ke barey mein bataya to har ek ki tarah Saad bhi muta’assir hue bina nahin reh saka.
Salar ko Saad ka chehra dekh kar aur khaas taur par uski daadhi dekh kar hamesha Jalaal ka khayaal aata. Daadhi ki wajah se dono men ajeeb se mumaaslat aur mushabehat nazar aati. Kayi baar dusre doston ke alawa Saad bhi weekend par uske sath hota.
“Tum musalmaan ho laikin mazhab ki sirey se pabandi nahin karte.” Saad ne ek dafa Salar se kaha tha.
“Aur tum zaroorat se zyada mazhabi ho.” Salar ne jawaaban kaha.
“Kya matlab?”
“Matlab ye ke jis tarah tum 5 waqt ki namaazein padhte rehte ho aur har waqt Islam ki baat karte rehte ho ye kuch over acting type cheez ho jaati hai.” Salar ne badi saaf goi ke sath kaha. “Tum thaktey nahin ho har waqt namaazein padh kar?”
“Ye farz hai, Allah ki taraf se hamein hukm diya gaya hai ke ham uski ibaadat karein, use har waqt yaad rakhein.” Saad ne zor dete hue kaha. Salar ne ek jamaahi li.
“Tum bhi ibaadar kiya karo, aakhir tum bhi musalmaan ho.” Saad ne usse kaha.
“Main jaanta hoon aur ibaadat na karne se kya main musalmaan nahin rahunga?” Usne kuch teekhe lehje mein Saad se kaha.
“Sirf naam ka musalmaan ban kar zindagi guzaarna chahte ho tum?”
“Saad! Please is qism ke fizool topic par baat mat karo. Main jaanta hoon tumhein mazhab mein dilchaspi hai magar mujhe nahin hai. Behtar hai ham ek dusrey ki raaye aur jazbaat ka khayaal rakhein aur ek dusrey par kuch thoonsney ki koshish na karein. Jaise main tum se ye nahin keh raha hoon ke tum namaaz chod do, isi tarah tum bhi mujh se ye na kaho ke main namaaz padhun.” Salar ne saaf goi se kaha to Saad khamoosh ho gaya.
Magar kuch dino baad wo uske apartment par aaya. Salar uski tawaazo ke liye kuch lane ke liye kitchen mein gaya to Saad bhi uske piche hi aa gaya. Usne baaton ke dauraan fridge khol liya aur us mein maujood khaane ki cheezon par nazar daudaane laga. Salar pichli raat ek fast food outlet se apna pasandeeda burger le kar aaya tha. Wo fridge mein pada tha. Saad ne use nikaal liya.
“Ise rakh do, ye tum na khana.” Salar ne jaldi se kaha.
“kyun?” Saad ne microwave ki taraf jaate hua kaha.
“Us mein pork hai.” Salar ne laparwahi se kaha.
“Mazaaq mat karo.” Saad thitak gaya.
“Is mein mazaaq wali kaun si baat hai.” Salar ne hairaani se use dekha. Saad ne jaise phenkne wale andaaz mein plate shelf par rakh di.
“Tum pork khaate ho?”
“Main pork nahin khata. Main sirf ye burger khata hoon kyun ke ye mujhe pasand hai.” Salar ne burner jalaate hue kaha.
“Tum jaante ho, ye haraam hai Islam mein?”
“Haan!”
“Aur phir bhi?”
“Ab tum phir wahi tableeghi waaz shuru mat karna, main sirf pork hi nahin khata, har qism ka gosht kha leta hoon.” Salar ne laparwahi se kaha. Wo ab fridge ki taraf ja raha tha.
“Mujhe yaqeen nahin aa raha.”
“Khair is mein aisi be yaqeeni wali kya baat hai. Ye khaane ke liye hi hota hai.” Wo ab fridge mein pade doodh ke packet ko nikaal raha tha.
“Har cheez khaane ke liye nahin hoti.” Saad kuch tilmilaaya. “Theek hai tum zyada mazhabi na sahi magar musalmaan to ho aur itna to tum jaante hi hoge ke pork Islam mein haraam hai, kam az kam ek musalmaan ke liye.” Salar khamushi se apne kaam mein masroof raha.
“Mere liye kuch mat banana, main nahin khaunga.” Saad ek dam kitchen se nikal gaya.
“Kyun?” Salar ne mud kar use dekha. Saad wash basin ke saamne khada saabun se haath dho raha tha.
“Kya hua?” Salar ne usse qadrey hairaani se pucha.
Saad ne jawaab mein kuch nahin kaha wo usi tarah kalma padhte hue haath dhota raha. Salar chubhti nazron se hont bheenchey use dekhta raha. Hath done ke baad usne Salar se kaha.
“Main to us fridge mein rakhi koi cheez nahin kha sakta, balke tumhare bartanon mein bhi nahin kha sakta. Agar tum ye burger kha lete ho to aur bhi kya kuch nahin kha lete hoge. Chalo bahar chalte hain, wahin ja kar kuch khaate hain.”
“Ye bahot insulting hai.” Salar ne qadrey naraazgi se kaha.
“Nahin, insult wali to koi baat nahin hai. Bas main ye haraam gosht nahin khana chahta aur tum is maamley mein parhez ke aadi nahin ho.” Saad ne kaha.
“Main ne tumhein ye gosht khilane ki koshish nahin ki. tum nahin khate, isliye main ne wo burger pakadte hi tumhein mana kar diya.” Salar ne kaha. “Magar tum ko shayad koi phobia ho gaya hai. Tum is tarah react kar rahe ho jaise main ne apne pure flat mein us jaanwar ko paala hua hai aur raat din unhi ke saath rehta hoon.” Salar naraaz ho gaya.
“Chalo, bahar chalte hain.” Saad ne uski naraazi ko khatm karte hue kaha.
“Bahar chal kar khayenge to bill main nahin pay karunga, tum karoge.” Salar ne kaha.
“Theek hai main kar dunga, no problem. Tum chalo.” Saad ne itmenaan ka saans lete hue kaha.
“Aur agli dafa tum mere apartment aate hue ghar se kuch khane ke liye le kar aana.” Salar ne qadrey tanziya lehje mein kaha.
“Acha, le aaunga.” Saad ne kaha.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-87/
Prev episode:
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar