Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Agle chand maah wo padhayi mein masroof raha, itna masroof ke Imama ko yaad rakhne aur uske barey mein maalumaat haasil karne ki koshish ko kal par taalta raha shayad ye silsila abhi chalta rehta agar us shaam achaanak uski mulaqaat Jalaal Ansar se na ho jaati.
Wo weekend par Boston gaya hua tha jahan uske chacha rehte the. Wo wahan ane ek cousin ke shadi attend karne aaya tha.
Us shaam Salar apne cousin ke hamraah tha jo ek restaurant chala raha tha. Wo wahan khana khane aaya hua tha. Uska cousin order dene ke baad ksi kaam se utha kar gaya tha. Salar khane ka intezaar kar raha tha jab kisi ne uska naam le kar pukara.
“Hello………..! Salar ne be ikhteyaar mud kar dekha.
“Aap Salar hain?” Us aadmin ne pucha.
Wo Jalaal Ansar tha. Use pehchaanne mein lehza bhar ke liye diqqat isliye hui thi kyun ke uske chehre se ab daadhi ghayab thi.
Salar ne khade ho kar usse hath milaya. Ek saal pehle ka adventure ek baar phir uski aankhon ke saamne ghoom gaya. Rasmi alaik salaik ke baad usne Jalaal ko rasman khaney ki dawat di.
“Nahin, mujhe zara jaldi hai. Bas aap par ittefaaqan nazar pad gayi to aa gaya.” Jalaal ne apni ghadi par nazar daalte hue kaha.
“Imama kaisi hai?” Jalaal ne baat karte karte achanak kaha. Salar ko laga wo uska sawaal theen se sun nahin saka.
“Sorry………..” Usne maazrat khwaahana andaaz mein istefsaar kiya. Jalaal ne apna sawaal dohraya.
“Main Imama ka puch raha tha, wo kaisi hai?”
Salar palkein jhapkaaye baghair use dekhta raha. Wo Imama ke barey mein usse kyun puch raha tha. “Mujhe nahin pata ye to aap ko pata hona chahiye.” Usne kuch ulajhtey hue andaz mein kandhe jhatakte hue kaha.
“Mujhe kis liye?” Is baar Jalaal hairaan hua.
“Kyun ke wo aap ki biwi hai.”
“Meri biwi?” Jalaal ko jaise current laga.
“Aap kya keh rahe hain? Meri biwi kaise ho sakti hai wo. Main ne usse shadi se inkaar kar diya tha. Aap achi tarah jaante hain. Ek saal pehle aap hi to aaye the is silsiley mein mujh se baat karne ke liye.” Jalaal ne jaise use kuch yaad dilaya. “ Main to to aap se ye bhi kaha tha ke aap khud usse shadi kar lein.”
Salar be yaqeeni se use dekhta raha.
“Main to ye soch kar aap ke paas aaya tha ke shayad aap ne usse shadi kar li hogi.” Wo ab wazahat kar raha tha.
“Aap ne usse shadi nahin ki?” Salar ne pucha.
“Nahin………. aap se to saari baat hui thi main ne inkaar kar diya phir usse meri shadi kaise ho sakti thi? Phir main ne suna wo ghar se chali gayi. Main ne socha aap ke sath kahin chali gayi hogi. Isi liye to aap ko dekh kar aap ki taraf aaya tha.”
“Main nahin jaanta ke wo kahan hai. Main to pichle 7-8 maah se yahin hoon.” Salar ne kaha.
“Aur mujhe yahan aaye 2 maah hue hain.” Jalaal ne bataya.
“Mujh se mulaqaat ke baad kya usne dobara aap se raabta ya mulaqaat karne ki koshish ki thi?”
Salar ne kuch ulajhtey hue andaaz mein pucha.
“Nahin………. wo mujh se nahin mili”
“Ye kaise ho sakta hai ke Lahore ja kar usne aap se raabta karne ki koshish na ki ho.” Salar ko uski baat par yaqeen nahin aaya.
“Mujh se raabta karne se kya hota.”
“Aap ke liye wo ghar se nikli thi. Use aap ka paas jaana chahiye tha.”
“Nahin……… wo mere liye ghar se nahin nikli thi. Aap to achi tarah jaante hain ke main ne use bata diya tha ke main usse shadi nahin kar sakta. Phir aap ye mat kahein ke wo mere liye ghar se nikli thi.” Jalaal ke lehje mein achaanak kuch tabdeeli aa gayi. “Saari baat aap hi se to hui thi.”
“Kya aap waqai sach keh rahe hain ke wo dobara aap ke paas nahin gayi?”
“Main aap se jhoot kyun bolunga aur agar wo mere sath hoti to main aap ke paas uske barey mein puchne kyun aata. Mujhe der ho rahi hai.” Jalaal ke lehje mein ab be neyaazi thi.
“Aap mujhe apna contact number de sakte hain?” Salar ne kaha.
“Nahin………. main nahin samajhta ke aap ko mujh se aur mujhe aap se dobara raabtey ki zaroorat pad sakti hai.” Jalaal ne badi saaf goi se kaha aur wapas mud gaya.
Salar kuch uljhe hue andaaz mein uski pusht par nazrein jamaye raha, ye baat naa qaabil-e-yaqeen baat thi ke wo Jalaal se nahin mili. Kyun……? Kya usne meri is baat par waqai yaqeen kar liya tha ke Jalaal ne shadi kar li hai? Salar ko apna jhoot yaad aaya. magar ye kaise mumkin hai, wo mazeed uljha……….. Meri baat par use yaqeen kaise aa sakta hai jab ke wo keh bhi rahi thi ke use meri baat par yaqeen nahin hai.
Wo kursi kheench kar dobara baith gaya.
Aur agar wo Jalaal ke paas nahin gayi to phir kahan gayi. Kya kisi aur shakhs ke paas? Jis se usne mujhe be khabar rakha, magar ye mumkin nahin hai agar koi aur hota to wo mujhe usse bhi raabta karne ke liye kehti. Agar wo fauri taur par Jalaal ke paas nahin bhi gayi thi to Sikandar se nikaah naama lene aur talaaq ke haq ke barey mein jaanne ke baad use usi ke paas jaana chahiye tha, wo ye nahin jaanta tha ke usne Jalaal ki us farzi shadi me barey mein use kyun bataya. Shayad wo use pareshaan karna chahta tha ya phir ye dekhna chahta tha ke wo ab kya karegi ya phir shayad wo baar baar is mutaalbey se tang aa gaya tha ke wo phir Jalaal ke paas jaye, phir Jalaal se raabta kare, wo aisa karne ki wajah nahin jaanta tha, jo bhi tha baher haal use yaqeen tha. Imama Jalaal ke paas jayegi.
Magar Salar ko ab ye pata chala tha ke uski tawaqqo ke bar-aks wo wahan gayi hi nahin.
Waiter ab khaana server kar raha tha, uska cousin aa chuka tha, wo dono batein karte hue khana khate rahe magar Salar khana khate aur batein karte hue bhi musalsal Imama aur Jalaal ke barey mein sochta raha. Kai maah baad ek dam wo use zahen mein phir taaza ho gayi thi.
“Kahin aisa to nahin ke wo dobara apne ghar wapas chali gayi ho?” khana khate hue use achanak khayaal aaya
“Haan, ye mumkin hai…….” Uska zahen mutawatir ek hi jagah atka hua tha. Mujhe papa se baat karni chahiye, unhein yaqeenan uske barey mein kuch na kuch pata hoga.” Sikandar Usman bhi un dino shadi mein shirkat ki gharaz se wahin the.
Wapas ghar aane ke baad raat ke qareeb jab usne Sikandar ko tanha dekha to usne un se Imama ke barey mein pucha.
“Papa! Kya Imama wapas apne ghar aa gayi hai?” Usne kisi tamheed ke baghair sawaal kiya.
Aur uske sawaal ne kuch der ke liye Sikandar ko khamoosh rakha.
“Tum kyun pooch rahe ho?” Chand lamhon ke baad unhon ne durushti se kaha.
“Bas aise hi.”
“Uske barey mein itna ghaur-o-fikr karne ki zaroorat nahin hai. Tum apni studies par dhyaan rakho to behtar hai.”
“Papa! Please aap mere sawaal ka jawaab dein.”
“Kyun jawaab doon…………Tumhara uske sath talluq kya hai?” Sikandar ki naraazi mein izaafa ho gaya.
“Papa! Uska ek boyfriend mujhe aaj mila hai yahan, wahi jis ke sath wo shadi karna chahti thi.”
“To phir……….?”
“To phir ye ke un dono ne shadi nahin ki. Wo bata raha tha ke Imama uske paas gayi hi nahin. Jab ke main samajh raha tha ke Lahore jaane ke baad wo usi ke paas gayi hogi.”
Sikandar ne uski baat kaat di. “Wo uske paas gayi ya nahin. Usne shadi ki ya nahin. Ye tumhara mas’ala nahin hai. Na hi tumhein is mein involve hone ki zaroorat hai.”
“Haan, ye mera mas’ala nahin hai magar main jaanna chahta hon kya Imama aap ke paas aayi thi? Aap ne use shadi ke papers kaise bhijwaye the. Mera matlab kis ke zariye.” Salar ne kaha.
“Tum se kis ne kaha ke usne mujh se raabta kiya tha?”
Wo unke sawaal par haraan hua. “Main ne khud andaaza lagaya.”
“Usne mujh se koi raabta nahin kiya, wo raabta karti to main Hashim Mubeen ko uske barey mein bata deta.”
Salar unka chehra dekhta raha. “Main ne tumhare kamrey ki talaashi li thi aur mere hath wo nikaah naama lag gaya.”
“Mujhe yahan bhijwate hue aap ne kaha tha keaap wo papers Imama tak bhijwa denge.”
“Haan…………. ye us surat mein hota agar wo mujh se raabta karti magar usne mujh se raabta nahin kiya. Tumhein ye yaqeen kyun hai ke usne mujh se zaroor raabta kiya hoga.” Is baar Sikandar ne sawaal kar dala.
Salar kuch der khamoosh raha phir usne pucha.
“Police ko uske barey mein kuch pata nahin chala?”
“Nahin, police ko pata chalta to ab tak wo Hashim Mubeen ke ghar wapas aa chuki hoti magar police abhi bhi uski talaash mein hai.” Sikandar ne kaha.
“Ek baat to tay hai Salar ke ab tum dobara Imama ke barey mein koi tamasha na karoge. Wo jahan hai jis haal mein hai tumhein apna dimaagh thikaaney ki zaroorat nahin, tumhara uske saath koi talluq nahin hai. Police jaise hi use dhoondegi main wo papers Hashim Mubeen tak pahoncha dunga, taa ke tumhari jaan hamesha ke liye usse choot jaye.”
“Papa! Kya usne waqai kabhi ghar phone nahin kiya mujh se baat karne ke liye.” Salar ne unki baat par ghaur kiye baghair kaha.
“Kya wo tumhein phone karti thi?”
Wo unka chehra dekhne laga. “Ghar se chale jaane ke baad usne sirf ek baar phone kiya tha phir main yahan aa gaya. Ho sakta hai usne dobara phone kiya ho jis ke barey mein aap mujhe nahin bata rahe”
“Usne mujhe phone nahin kiya. Agar karti to main tumhari aur uski shadi ke barey mein bahot se maamlaat ko khatm kar deta. Main tumhari taraf se use talaaq de deta.”
“Ye sab aap kaise kar sakte hain.”
Salar ne bahot pur sukoon andaaz mein kaha.
“Yahan tumhein bhijwane se pehle main ne ek paper par tumhare signatures liye the, main talaaq naama tayyar karwa chuka hoon.” Sikandar na jataatey hue kaha.
“Fake document.” Salar ne usi andaaz mein tabsara kiya. “Main to nahin jaanta tha ke aap talaaq naama tayyar karwane ke liye mujh se sign karwa rahe hain.”
“Tum phir is musibat ko mere sar par lana chahte ho?” Sikandar ko ek dam ghussa aa gaya.
“Main ne ye nahin kaha ke main uske sath rishtey ko qayem rakhna chahta hoon. Main aap ko sirf ye bata raha hoon ke aap meri taraf se ye rishta khatm nahin kar sakte. Ye mera maamla hai main khud hi ise khatm karunga.”
“Tum sirf ye shukr karo ke tum is waqt yahan itmenaan se baithe hue ho, warna tum ne jis khaandaan ko apne peechey laga liya tha wo khaandaan qabr tak bhi tumhara peecha na chodta aur ye bhi mumkin hai wo yahan bhi tumhari nigraani karwa rahe hon. Ya intezaar kar rahe hon ke tum mutmayin ho kar dobara Imama ke sath raabta karo aur wo tum dono ke liye ek kunwaan tayyar kar lein.”
“Aap khwaahmakhwaah mujhe khauf zada kar rahe hain. Pehli baat to ye hai ke main ye maanne par tayyar nahin hoon ke yahan America mein koi meri nigraani kar raha hoga aur wo bhi itna arsaa guzar jaane ke baad aur dusri baat ye ke main Imama ke saath to koi raabta nahin kar raha kyun ke main waqai nahin jaanta wo kahan hai, phir raabtey ka to sawaal hi paida nahin hota.”
“To phir tumhein uske barey mein conscious hone ki kya zaroorat hai. Wo jahan hai jaisi hai, rehne do use.” Sikandar ko kuch itmenaan hua.
“Aap mere mobile ke bills check karein. Wo mobile uske paas hai. Ho sakta hai pehle nahin to ab wo usse calls leti ho.”
“Wo usse calls nahin karti. Mobile mustaqil taur par band hai. Jo chand calls usne k thin wo sab medical college mein saath padhne wali ladkiyon ko hi ki thin aur police pehle hi unhein investigate kar chuki hai. Lahore mein wo ek ladki ke ghar gayi thi magar wo ladki Peshawar mein thi aur uske wapas aane se pehle hi wo uske ghar se chali gayi, kahan gayi, ye police ko pata nahin chal saka.”
Salar chubhti hui nazron se unhein dekhta raha phir usne kaha. “Kya aap ko Hasan ne mere aur uske barey mein bataya tha?”
Sikandar kuch bol nahin sakey. Mobile ke Imama ke paas hone ke barey mein sirf Hasan hi jaanta tha. Kam az kam ye aisi baat thi jo Sikandar Usman sirf uske kamrey ki talaashi le kar nahin jaan sakte the. Use un se baat karte hue pehli baar achanak Hasan par shubah hua tha kyun ke Sikandar Usman ko itni choti moti baaton ka pata tha jo sirf use pata thin ya phir Hasan ko……….. koi teesra unse waaqif nahin tha. Usne Sikandar Usman ko kuch nahin bataya tha to yaqeeni taur par ye Hasan hi ho saka tha jis ne unhein saari tafseelaat se aagah kiya tha.
“Usse kya farq padta hai ke mujhe Hasan ne bataya hai ya kisi aur ne………. Ye to ho nahin sakta tha ke is baat ke barey mein mujhe pata na chalta. Ye sirf meri himaaqat thi ke main ne Hashim Mubeen ke ilzaamaat ko sanjeedgi se nahin liya aur tumhare jhoot par yaqeen kar liya.”
Salar ne kuch nahin kaha, wo sirf maathey par teewriyaan liye unhein dekhta aur unk baat sunta raha.
“Ab jab main ne tumhein is saare maamley se bacha liya hai to tumhein dobara aisi koi harkat nahin karni chahiye jis se…….”
Sikandar Usman ne qadrey narm lehje mein kehna shuru kiya magar is se pehle ke unki baat mukammal hoti, Salar ek jhatke se uth kar kamrey se nahar nikal gaya.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-91/
Prev episode:
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar