Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Jaweriya aur Rabiya raat bhar na so sakein. Wo mukammal taur par khauf ki giraft mein thin. Agar wo na aayi to kya hoga? Ye sawal baar baar bhayanak shaklein badal badal kar aa raha tha. Unhein apna career doobta hua nazar aa raha tha. Unhein andaza nahin tha ke unke ghar wale aise maamle par kaisa radd-e-amal zahir karenge. Wo unhein buri tarah malamat karte, unhein Imama ke walid ko sab kuch saaf na batane par tanqeed ka nishana banate aur phir warden se sare maamle ko chupane par aur bhi naraz hote.
Unhein andaza nahin tha ke haqeeqat samne aane par Hashim Mubeen aur unki family ka kya radd-e-amal hoga, wo sare maamle mein in dono ke role ko kis tarah dekhenge. Hostel me ladkiyan unke bare mein kis tarah baatein karengi aur phir agar ye sara maamla police case ban gaya to Police unki parda-poshi ko kya samjhegi, wo andaza kar sakti thin aur isi liye baar baar unke raungte khade ho rahe the.
Magar sawal ye paida hota tha ke wo gayi kahan….. Aur kyun…… Wo dono uske pichle rawaiyyon ka tajziya karne ki koshish kar rahi thin. Kis tarah pichle ek saal se wo bilkul badal gayi thi, Usne inke sath ghoomna phirna band kar diya tha, wo uljhi uljhi rehne lagi thi, padhai mein uska inhemaak kam ho gaya tha aur uski kam-goyi.
“Aur wo jo ek baar hamare shopping ke liye jane par piche se ghayab ho gayi thi, tab bhi wo yaqeenan wahin gayi hogi jahan ab gayi hai aur ham ne kis tarah be waqoofon ki tarah us par aitbaar kar liya.” Rabiya ko pichli batein yaad aa rahi thin.
“Magar Imama aisi nahin thi, main to use bachpan se janti hoon. Wo aisi bilkul bhi nahin thi.” Jaweriya ko ab bhi us par shak nahin ho raha tha.
“Aisa hone mein koi der thodi lagti hai, bas insaan ka kirdaar kamzor hona chahiye.” Rabiya badgumani ki inteha par pahonchi hui thi.
“Rabiya! Uski marzi se uski mangni hui thi, wo aur Asjad ek dusre ko pasand karte the, phir wo is tarah ki harkat kaise kar sakti hai?” Jaweriya ne uska difa karne ki koshish ki.
“Phir tum batao wo kahan hai? Main ne to makkhi bana kar use kisi deewar ke sath nahin chipkaya hai. Uske baba usse milne yahan aaye hain aur wo apne ghar se aaye hain, to zahir hai wo ghar par nahin gayi aur ham se wo yahi keh kar gayi thi ke ghar ja rahi hai.” Rabiya ne bechargi se kaha.
“Aisa bhi to ho sakta hai ke use koi haadsa pesh aa gaya ho. Ho sakta hai wo isi liye ghar na pahonch saki ho.”
“Wo har baar yahan se phone kar ke Islamabad apne ghar walon ko apne aane ki ittela de deti thi taki uska bhai use coaster ke stand se pick karle. Agar is baar bhi usne ittela di thi to phir uske wahan na pahonchne par wo log itmenaan se waha na baithe hote. Wo yahan hostel mein phone karte aur uske walid ke andaaz se to aisa mehsoos hua hai jaise uska weekend par Islamabad ka koi program nahin tha.” Rabiya ne uske qayaas ko mukammal taur par rad karte hue kaha.
“Haan. Wo kabhi bhi ek maah mein 2 baar Islamabad nahin jati thi magar is baar to wo dusre hi hafte Islamabad ja rahi thi aur usne warden se khaas taur par ye keh kar ijazat li thi. Koi na koi baat zaroor hai, kahin na kahin kuch na kuch ghalat zaroor hai.” Jaweriya ko phir khadshaat satane lage.
“Uske sath sath ham bhi buri tarah doobein ge. Ham se bahot badi ghalti hui hai jo ham ne sab kuch is tarah cover up kiya, hamein saaf saaf baat karni chahiye thi uske walid se ke wo yahan nahin hai, phir wo jo chahe karte, ye unka mas’ala hota, kam az kam ham to is tarah na phanste jis tarah ab phans gaye hain.” Rabiya musalsal badbada rahi thi.
“Khair ab kya ho sakta hai, subah tak intezaar karte hain agar wo kal bhi nahin aayi to phir warden ko sab kuch bata denge.” Jaweriya ne kamre ke chakkar lagate hue kaha.
Wo raat un dono ne isi tarah batein karte jaagte hue guzaar li. Agle din wo dono college nahin gayin. Is haalat mein college jane ka faida bhi nahin hota.
Imama weekend par hafte ko wapsi par 9 baje ke qareeb aa jaya karti thi magar wo us din nahin aayi. Un ke aasaab jawab dene lage. 2:30 baje ke qareeb wo faq rangat aur kaanpte hue hathon ke sath apne kamre se warden ke kamre mein jane ke liye nikal aayin, unke zahen mein wo jumle gardish kar rahe the, jo unhein warden se kehne the.
Wo warden ke kamre se abhi kuch door hi thin jab unhon ne Imama ko bade itmenaan ke sath andar aate dekha. Uska bag uske kaandhe par tha aur folder hathon mein, wo yaqeenan sidhi college se aa rahi thi.
Jaweriya aur Rabiya ko yun laga jaise unke pairon ke niche nikalti hui zameen yak dam tham gayi thi. Unki ruki hui saans aik baar phir chalne lagi thi. Kal ke akhbaraat me mutawaqqo wo headlines jo bhoot ban kar unke gird naach rahi thin yak dam ghayab ho gayin aur unki jagah us ghusse aur ishte’aal ne le li thi jo unhein Imama ki shakl dekh kar aaya tha.
Wo unhein dekh chuki thi aur ab unki taraf badh rahi thi, uske chehre par badi khush gawar si muskurahat thi.
“Tum dono aaj college kyun nahin aayin?” Salam dua ke baad usne un se pucha.
“Tumhari musibaton se chutkara milega to ham kahin aane jane ka soch sakein ge.” Rabiya ne tund-o-tez lehje mein kaha.
Imama ke chehre ki muskurahat ghayab ho gayi.
“Kya hua Rabiya! Is tarah ghusse mein kyun ho?”Imama ne qadre tashweesh se pucha.
“Tum zara andar kamre mein aao phir tumhein batati hun ke main ghusse mein kyun hoon.” Rabiya ne use bazu se pakad liya aur taqreeban kheenchti hui kamre mein le aayi. Jaweriya kuch kahe baghair un dono ke piche aa gayi. Imama hakka bakka thi aur Rabiya aur Jaweriya ke is rawaiyye ko samajh nahin pa rahi thi.
Kamre mein dakhil hote hi Rabiya ne darwaza band kar liya.
“Kahan se aa rahi ho tum?” Rabiya ne mud kar intehai talkh aur durusht lehje mein usse pucha.
“Islamabad se aur kahan se.”Imama ne apna bag niche zameen par rakh diya, uske jawab ne Rabiya ko kuch aur mushta’il kar diya.
“Sharm karo Imama….! Is tarah hamein dhoka de kar, hamari aankhon mein dhool jhonk kar aakhir tum saabit kya karna chahti ho. Ye ke ham duffer hain, idiot hain, pagal hain? Bhai ham hain, ham maante hain……. Na hote to tum par yun andha aitbaar na kiya hota, tum se itna bada dhoka na khaya hota.” Rabiya ne kaha.
“Mujhe tumhari koi baat samajh mein nahin aa rahi hai, kaun sa dhoka? Kaisa dhoka? Kya ye behtar nahin hai ke tum aaram se mujhe apni baat samjhao.”Imama ne bechargi se kaha.
“Tum weekend kahan guzaar kar aayi ho?” Jaweriya ne pehli baar guftgu mein mudakhlat ki.
“Tumhein bata chuki hoon Islamabad mein, wahan se idha aaj college aayi hoon aur ab college se……” Rabiya ne uski baat mukammal nahin hone di.
“Bakwas band karo…….. Ye jhoot ab nahin chal sakta, tum Islamabad nahin gayi thin.”
“ Ye tum kaise keh sakti ho?”Imama ne is baar qadre buland aawaz mein kaha.
“Kyun ke tumhare father yahan aaye the kal.”Imama ka rang ud gaya. Wo kuch na bol saki.
“Ab kyun munh band ho gaya hai…… Ab bhi kaho Islamabad se aa rahi ho.” Rabiya ne tanziya lehje mein kaha.
“Baba yahan…. aaye the?”Imama ne atakte hue kaha.
“Haan aaye the, tumhare kapde dene ke liye.” Jaweriya ne kaha.
“Unhein ye pata chal gaya ke main hostel mein nahin hoon?”
“Main ne jhoot bol diya ke hostel se kisi kaam se bahar gayi ho, wo kapde de kar chale gaye.” Jaweriya ne kaha. Imama ne be-ikhteyaar itemenaan ke saans liya.
“Yani unhein kuch pata nahin chala?” Usne bistar par baith kar joote ke straps kholte hue kaha.
“Nahin, unhein kuch pata nahin chala…….. Tum munh utha kar agle hafte phir kahin rawana ho jana. Mind you Imama! Main ab warden se is silsile mein baat karne wali hoon. Ham tumhari wajah se khaasi pareshani utha chuke hain. Mazeed uthane ke liye tayyar nahin hain. Behtar hai tumhare parents ko tumhari in harkaton ke bare mein pata chal jaye.” Rabiya ne do tok andaz mein kaha.
Imama ne sar utha kar use dekha.
“Kaun si harkaton ke bare mein…… Main ne kya kiya hai?”
“Kya kiya hai? Hostel se is tarah do din ke liye ghar ka keh kar ghayab ho jana tumhare liye koi badi baat nahin hai?”
Imama jawab dene ke bajaye dusre joote ke bhi straps kholne lagi.
“Mujhe warden ke paas chale hi jana chahiye.”
Rabiya ne ghusse ke aalam mein darwaze ki taraf badhte hue kaha.
Jaweriya ne aage badh kar use roka. “Warden se baa kar lenge, pehle isse to baat kar lein. Tum jald baazi mat karo.”
“Magar is dheet ka itmenaan dekho…… Majaal hai zarra barabar sharmindagi bhi is ke chehre par jhalak rahi ho.” Rabiya ne ghusse se Imama ki taraf ishara karte hue kaha.
“Main tum dono ko sab kuch bata dungi. Itna ghusse mein aane ki zarurat nahin hai. Main ne koi ghalat kaam nahin kiya na hi kisi ghalat jagah par gayi hoon, aur haan bhaagi bhi nahin hun.”Imama ne jooton ki qaid se apne pairon ko aazad karte hue qadre dhime lehje mein kaha.
“Phir tum kahan gayi thin?” Is baar Jaweriya ne pucha.
“Apni ek dost ke yahan.”
“Kaun si dost?”
“Hai ek.”
“Is tarah jhoot bol kar kyun?”
“Main tum logon ke sawalon se bachna chahti thi aur ghar walon ko batati ya un se ijazat leni ki koshish karti to wo kabhi ijazat na dete.”
“Kis ke haan gayi thin? Aur kis liye?” Jaweriya ne is baar qadre tajassus aamez andaaz mein pucha.
“Main ne kaha na, main bata dungi. Kuch waqt do mujhe.”Imama ne uski baat ke jawaab mein kaha.
“Koi waqt nahin de sakte tumhein…… Tumhein waqt dein ta ke tum ek baar phir ghayab ho jao aur is baar wapas hi na aao?” Rabiya ne is baar bhi narazgi se kaha magar pehle ki nisbat is baar uska lehja dheema tha.
“Tumhein to is baat ka bhi ehsaas nahin hua ke tum ne hamari position kitni awkward bana di thi, agar tumhare is tarah ghayab ho jane ka pata chal jata to hamari kitni be-izzati hoti. Iska ehsaas tha tumhein?” Rabiya ne usi andaz mein kaha
“Mujhe ye tawaqqo nahin thi ke baba is tarah achanak yahan aa jayenge. Is liye main ye bhi nahin soch sakti thi ke tum logon ko kisi nazuk surat-e-haal ka saamna karna pad sakta hai. Warna main is tarah kabhi na karti.”Imama ne ma’zrat khwahana lehje mein kaha.
“Tum kam az kam ham pe aitbaar kar ke, hamein bata kar ja sakti thin.” Jaweriya ne kaha
“Main aayinda aisa kabhi nahin karungi.”Imama ne kaha
“Kam az kam main tumhare kisi waade, kisi baat par aitbaar nahin kar sakti.” Rabiya ne do tok andaaz mein kaha.
“Mujhe apni position clear karne do Rabiya! Tum mujhe ghalat samajh rahi ho.”Imama ne is baar qadre kamzor andaaz mein kaha
“ Tum ko ehsaas hai ke tumhari wajah se hamara career aur hamari zindagi kis tarah daaon par lag gayi thi. Ye dosti hoti hai? Ise dosti kehte hain?”
“Theek hai, mujh se ghalti ho gayi. Mujhe maaf kar do.”Imama ne jaise hathiyaar dalte hue kaha.
“Jab tak tum ye nahin bataogi ke tum kahan ghayab hui thin, main tumhari koi ma’zrat qubool nahin karungi.” Rabiya ne do tok kaha.
Imama kuch der use dekhti rahi phir usne kaha.
“Main Sabeeha ke ghar chali gayi thi.” Jaweriya aur Rabiya ne hairani se ek dusre ko dekha.
“Kaun?” Un dono ne taqreeban baik waqt pucha.
“Tum log jaanti ho use.”Imama ne kaha.
“Wo forth year ke Sabeeha?” Jaweriya ne be ikhteyaar pucha.
Imama ne sar hila diya “Magar us ke ghar kis liye gayi thin tum?”
“Dosti hai usse meri.”Imama ne kaha.
“Dosti…..? Kaisi dosti………? chaar din ki salaam dua hai tumhare sath uski aur mera khayal hai tum to use achi tarah janti bhi nahin ho, phir us ke ghar rehne kyun chal padin?” Jaweriya ne aetraaz karte hue kaha.
“Wo bhi is tarah jhoot bol kar…….. Kam az kam uske ghar ja kar rehne ke liye tumhein ham se ya apne ghar walon se jhoot bolne ki zaroorat nahin thi.” Rabiya ne usi lehje mein kaha.
“Tum use call kar ke puch lo main us ke ghar thi ya nahin…”Imama ne kaha.
“ Chalo ye maan liya ke tum uske ghar par thin, magar kyun thin?” Jaweriya ne pucha
Imama khamoosh rahi phir kuch der baad usne kaha. “Mujhe uski madad ki zaroorat thi.”
Un dono ne hairaan ho kar dekha “ Kis silsile mein?”
Imama ne sar uthaya aur palkein jhapkaye baghair dekhti rahi. Jaweriya ne kuch be-chaini mehsoos ki.
“Kis silsile mein?”
“Tum achi tarah janti ho.”Imama ne qadre maddham andaaz mein kaha
“Main…..?” Jaweriya ne gadbada kar Rabiya ko dekha jo badi sanjeedgi se use dekh rahi thi.
“Haan, tum to achi tarah janti ho.”
“Tum paheliyaan mat bujha. Sidhi aur saaf baat karo.” Jaweriya ne qadre sakht lehje mein kaha. Imama sar utha kar khamushi se use dekhne lagi phir kuch der baad shikast khoorda andaaz mein usne sar jhuka diya.
Prev episode: https://theothermeunfolded.com/blog/peer-e-kaamil-roman-urdu-umera-ahmed-episode-27/
Next episode: https://theothermeunfolded.com/blog/peer-e-kaamil-roman-urdu-umera-ahmed-episode-29/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar