Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Waseem ne Hashim Mubeen ko Imama ke sath hone wali bahes ke barey mein bata diya tha magar usne bahot si aisi baton ko sensor kar diya tha jis par Hashim Mubeen ke bhadak uthne ka imkaan tha. Is ke bawajood Hashim Mubeen dam-bakhud reh gaye the. Yun jaise unhein saanp soongh gaya ho.
“Ye sab tum se Imama ne kaha hai?” Ek lambi khamushi ke baad unhon ne Waseem se pucha. Usne asbaat mein sar hila diya.
“Use bula kar lao.” Waseem kuch jhijakte hue unke kamre se nikal gaya. Imama ko khud bula kar lane ki bajaye usne mulazim ke hath paigham bhijwaya aur khud apne kamre mein chala gaya. Wo Imama aur Hashim Mubeen ki guftgu ke dauraan maujood rehna nahin chahta tha.
Hashim Mubeen ke kamre ke darwaze par dastak de kar wo andar daakhil hui to us waqt Hashim aur unki begum bilkul khamoosh baithe the. Hashim Mubeen ne use jin nazron se dekha tha us ne uske jism ki larzish mein kuch aur izaafa kar diya.
“Baba…..Aap ne……Mujhe…….Bulwaya tha?” Koshish ke bawajood wo rawani se baat na keh saki.
“Haan main ne bulwaya tha, Waseem se kya bakwaas ki hai tumne?” Hashim Mubeen ne bila tamheed buland aawaz mein usse pucha. Wo apne honton par zabaan pher kar reh gayi.
“Kya puch raha hoon tum se?” Wo ek baar phir se dahadey. “Sharm se doob marna chahiye tumhein, khud gunaah karti ho aur apne sath hamein bhi gunahgaar banati ho.”Imama ki aankhon mein aansu aa gaye. “Tumhein apni aulaad kehte hue mujhe sharm aa rahi hai. Kaun si kitabein layi ho tum?” Wo mushtail ho gaye the. “ Jahan se ye kitabein le kar aayi ho, kal tak wahin de aao. Warna main utha kar phenk dunga bahar.”
“Ji baba.” Usne apne aansu ponchte hue sirf itna hi kaha.
“Aur aaj ke baad tum ne Jaweriya ke sath mail-jol rakha to main tumhara college jana band kar dunga.”
“Baba……Jaweriya ne mujh se kuch nahin kaha hai, usko to kuch pata hi nahin hai.” Is baar Imama ne qadre mazboot aawaz mein ehtejaaj kiya.
“To phir aur kaun hai jo tumhare dimagh mein ye khannaas bhar raha hai?” Wo buri tarah chillaye.
“Main ………khud ……….hi.” Usne kuch kehne ki koshish ki.
“Ho kya tum, apni umr dekho aur chali o tum aqeede janchne, apne nabi ki nubuwwat parakhne.” Hashim Mubeen ka para phir high ho gaya.” Apne baap ki shakl deko jis ne sari umr tableegh mein guzaar di. Kya main aql ka andha hoon ya phir tum mujh se zyada aql rakhti ho? Juma Juma 4 din hue hain tumhein paida hue aur tum chal padi ho apne nabi ki nubuwwat ko saabit karne.”
Hashim Mubeen ab uth kar khade ho gaye. “Tum munh mein sone ka chammach le kar us nabi ki wajah se paida hui ho, jis ki nubuwwat ko janchne tum aaj baith gayi ho. Wo na hota to sadak par dhakke kha raha hota hamara saara khaandaan aur tum is qadr ehsaan faraamosh aur be zameer ho chuki ho ke jis thaali mein khati ho usi mein chhed kar rahi ho.”
Hashim Mubeen ki aawaz phat rahi thi. Imama ki aankhon se behne wale aansuon ki raftaar mein aur izaafa ho gaya.
“Band karo ye likhna padhna aur ghar baitho tum. Ye taleem hasil kar rahi ho jo tumhein gumraahi ki taraf le ja rahi hai.”
Unke agle jumle par Imama ki sitti gum ho gayi. Uske wahm-o-gumaan mein bhi nahin tha ke wo use ghar bithane ki baat karenge.
“Baba……… I am sorry.” Unke ek jumle ne use ghutne tekne par majboor kar diya.
“Mujhe tumhare kis excuse ki zaroorat nahin. Bas keh diya ke ghar baitho, to ghar baitho.”
“Baba……..main……..mera………mera ye matlab to nahin tha. Pata nahin Waseem……. usne aap se kis tarah baat ki hai.” Uske aansu aur tezi se behne lage. “Phir bhi main aap se keh rahi hoon ke aayinda main aisa kuch nahin padhungi na hi aisi koi baat karungi. Please baba!” Usne minnat ki.
In ma’azraton ka silsila wahin khatm nahin hua, agle kayi din tak wo Hashim Mubeen se maafi maangti rahi aur phir taqreeban ek hafte ke baad wo narm pad gaye aur unhon ne use college jaane ki ijazat de di thi magar us ek hafte mein wo apne pure ghar ki laanat malaamat ka shikaar rahi thi. Hashim Mubeen ne sakht qism ki tambeeh ke baad college jane ki ijazat di thi magar us ek hafte ke daraan in logon ke rawaiyye ne use apne aqeede se mazeed mutanaffir kiya tha. Usne un kitabon ko padhne ka silsila roka nahin tha. Bas farq ye tha ke pehle wo unhein ghar le kar aati thi aur ab unhein college ki library mein padh liya karti thi.
FSC mein merit ist aane ke baad usne medical college mein admission le liya tha. Jaweriya ko bhi usi medical college mein admission mil gaya tha, unki dosti mein ab pehle se zyada mazbooti aa gayi thi aur uski buniyaadi wajah Imama ke zahen mein aane wali tabdeeli thi.
Prev episode:
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-35/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar