Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Kuch dino se wo Jalaal aur Zainab ke rawaiyye mein ajeeb se tabdeeli dekh rahi thi. Wo dono usse bahot ukhde ukhde rehne lage the. Ek ajeeb se tanao tha, jo wo apne aur unke darmiyaan mehsoos kar rahi thi.
Usne ek do baar Jalaal ko hospital phone kiya, magar har baar use yahi jawaab milta ke wo masroof hai. Wo Zainab ko agar college se lene bhi aata to pehli ki tarah usse nahin milta tha aur agar milta bhi to sirf rasmi alaik-salaik ke baad wapas chala jata. Wo shuru mein is tabdeeli ko apna wahem samajhti rahi magar phir zyada pareshaan hone par wo ek din Jalaal ke hospital chali aayi.
Jalaal ka rawaiyya be had sard tha. Imama ko dekh kar us ke chehre par muskurahat tak nahin aayi.
“Kaafi din ho gaye the hamein mile hue, isliye main khud chali aayi.”Imama ne apne saare andeshon ko jhatakne ki koshish karte hue kaha.
“Meri to shift shuru ho rahi hai.”
Imama ne hairaani se use dekha. “Zainab bata rahi thi ke is waqt aap ki shift khatm hoti hai, main isi liye is waqt aayi hoon.”
Wo ek lamhe ke liye khamoosh raha phir usne kaha. “Haan, saheeh hai, magar aaj meri koi aur masroofiyat hai.”
Wo uska munh dekh kar reh gayi. “Jalaal! Aap kisi wajah se naaraz hain mujh se?” Ek lamhe ke tawaqquf ke baad usne kaha.
“Nahin, main kisi se naaraz nahin hoon.” Jalaal ne usi rukhayi se kaha.
“Kya aap 10 minutes bahar aa kar meri baat sun sakte hain?”
Jalaal kuch der use dekhta raha , phir usne apna overall apne baazu par daal liya aur kuch kahe baghair kamre se bahar nikal aaya. Bahar jaate hi Jalaal ne apni wrist watch par ek nazar daali. Ye shayad uske liye baat shuru karne ka ishara tha.
“Aap mere sath is tarah misbehave kyun kar rahe hain?”
“Kya misbehave kar raha hon?” Jalaal ne ukhde andaaz mein kaha.
“Aap bahot dino se mujhe ignore kar rahe hain.”
“Haan kar raha hoon.”
Imama ko tawaqqo nahin thi ke wo itni safai se is baat ka aitraaf kar lega.
“Kyun ke main tum se milna nahin chahta.”
Wo kuch lamhon ke liye kuch na bol saki. “Kyun?”
“Ye batana zaroori nahin.” Usne usi tarah ukhde andaaz mein kaha.
“Main jaanna chahti hoon ke aap ka rawaiyya ek dam kyun tabdeel ho gaya hai. Koi na koi wajah to hogi iski.”Imama ne kaha.
“Haan, wajah hai magar main tumhein batana zaroori nahin samajhta. Bilkul usi tarah jis tarah tum bahot si batein mujhe batana zaroori nahin samajhtin.”
“Main?” Wo uska munh dekhne lagi. “Main ne kaun si batein aap ko bahin batayin?”
“Ye ke tum musalmaan nahin ho.” Jalaal ne bade talkh andaaz mein kaha. Imama saans tak nahin le saki.
“Kya tum e ye baat mujh se chupayi nahin?”
“Jalaal…..Main batana chahti thi.”Imama ne shikast khoorda andaaz mein kaha.
“Chahti thi……Magar tum ne bataya to nahi………Dhoka dene ki koshish ki tum ne.”
“Jalaal! Main ne aap ko dhoka dene ki koshish nahin ki.”Imama ne ehtejaaj kiya. “Main aap ko dhoka kyun dungi?”
“Magar tum ne kya yahi hai.” Jalaal ne sar jhatakte hue kaha.
“Jalaal main……..”
Jalaal ne uski baat kaat di. “Tum ne jaan boojh kar mujhe trap kiya hai.”
Imama ki aankhon mein aansu aa gaye. “Trap kiya?” Usne zair-e-lab Jalaal ke lafzon ko dohraya.
“Tum jaanti thin ke main apne Paighambar ﷺ se ishq karta hoon.”
Wo shikast khoorda andaaz mein use dekhti rahi.
“Shadi to door ki baat hai. Ab jab main tumhare bare mein sab kuch jaan gaya hoon to main tum se koi talluq rakhna nahin chahta. Tum dobara mujh se milne ki koshish mat karna.” Jalaal ne do tok andaaz mein kaha.
“Jalaal! Main Islam qubool kar chuki hoon.”Imama ne maddham andaaz mein kaha.
“Oh come on!” Jalaal ne tehqeer aamez andaaz mein apna hath jhatka. “Yahan khade khade tum ne Islam qubool kar liya?” Is baar wo mazaaq udane wale andaaz mein hansa.
“Jalaal! Main aap ke liye muslim nahin hui. Aap mere liye ek zariya zaroor bane hain. Mujhe kayi maah ho gaye hain Islam qubool kiye aur agar aap ko meri baat par yaqeen nahin hai to main aap ko suboot de sakti hoon. Aap mere sath chalein.”
Is baar Jalaal kuch uljhe hue andaaz mein use dekhne laga.
“Main maanti hoon main ne aap ki taraf pesh-qadmi khud ki. Aap ke baqaul main ne aap ko trap kiya. Main ne trap nahin kiya. Main sirf bebas thi. Aap ke maamle mein mujhe khud par qaabu nahin rehta tha. Aap ki aawaz ki wajah se, aap jaate hain main ne aap ko bataya tha main ne pehli baar aap ko naat padhte suna to main ne kya mehsoos kiya tha. Aap ko agar mere barey mein pehle hi ye sab kuch pata chal jata to aap mere sath yahi sulook karte jo ab kar rahe hain……. Mujh sirf is baat ka andesha tha jis ki wajah se main ne aap se bahot kuch chupaye rakha. Baaz aaton mein insaan ko apne upar ikhteyaar nahin hota. Mujhe bhi aap ke maamle mein khud par koi ikhteyaar nahi hota.”
Usne ranjeedgi se kaha.
“Tumhare ghar walon ko is baat ka pata hai?”
“Nahin, main unhein nahin bata sakti. Meri mangni ho chuki hai. Main ne aap ko is barey mein bhi nahin bataya…” Wo ek lamhe ke liye ruki. “Magar main wahan shadi nahin karna chahti. Main aap se shadi karna chahti hoon. Main sirf apni taleem mukammal hone ka intezaar kar rahi hoon. Tab main apne pairon par khadi ho jaungi aur phir main aap se shadi karungi.”
“4-5 saal baad jab main doctor ban jaungi to shayad mere parents aap se meri shadi par us tarah aitraaz na karein jis tarah ab karenge. Agar mujhe ye khauf na ho ke wo meri taleem khatam karwa kar meri shadi Asjad se kar denge to shayad main unhein abhi is aat ke barey min bata deti ke main Islam qubool kar chuki hon magar main abhi puri tarah un par dependent hoon. Mere hath bandhe hue hain. Aap wo waahid raasta the jo mujhe nazar aaya. Mujhe waqai aap se mohabbat ai phir main aap ko shadi ki peshkash na karti to aur kya karti. Aap us soorat-e-haal ka andaza nahin kar sakte jis ka saamna main kar rahi hoon…….. Meri jagah par hote to aap ko andaza hota ke main jhoot bolne ke liye kitni majboor ho gayi thi.”
Jalaal kuch kahe baghair paas maujood lakdi ke bench lakdi ke bench par baith gaya, wo ab pareshaan nazar aa raha tha. Imama ne apni aankhein ponch lin.
“Kya aap ke dil mein mere liye kuch bhi nahin hai? Sirf isliye mere sath involve hain, kyun ke main aap se mohabbat karti hoon?”
Jalaal ne uske sawaal ka jawaab dene ke bajaye usse kaha.
“Imama! Baith jao. Pura Pandora box khul gaya hai mere saamne…. Agar main tumhari soorat-e-haal ka andaza nahin kar sakta to tum bhi meri position ko nahin samajh saktin.”
Imamausse kuch faasle par rakhi bench par baith gayi.
“Mere waldain kabhi ghair muslim ladki se meri shadi nahin karenge. Qat-e-nazar iske ke main usse mohabbat karta hoon ya nahin.”
“Jalaal! Main ghair muslim nahin hoon.”
“Tum ab nahin ho magar pehle to thin aur phir tumhara khaandaan……….”
“Main in dono chizon ke barey mein kuch nahin kar sakti.”Imama ne bebasi se kaha.
Jalaal ne jawaab mein kuch nahin kaha, kuch der wo dono khamoosh rahe
“Kya aap apne parents ki marzi ke baghair mujhe se shadi nahin kar sakte?” Kuch der baad Imama ne kaha.
“Ye bahot bada qadam hoga.” Jalaal ne nafi mein sar hilate hue kaha. “Aur bil-farz main ye kaam karne ka soch loon to bhi ye nahin ho sakta. Tumhari tarah main bhi apne parents par dependent hoon.” Jalaal ne apni majboori batayi.
“Magar aap house job kar rahe hain aur chand saalon mein stablish ho jayenge.”Imama ne kaha.
“Main house job ke baad specialization ke liye bahar jaana chahta hoon aur ye mere parents ki maali madad ke baghair nahin ho sakta. Specialization ke baad hi main wapas aa kar apni practice stablish kar sakta hoon. 3-4 saal apni studies khatm karne mein bhi lag jayenge.” Jalaal ne use yaad dilaya.
“Phir?”Imama ne maayusi se use dekha
“Phir ye ke mujhe sochne ka waqt do. Shayad main koi raasta nikaal sakun, main tumhein chodna nahin chahta magar main apna career bhi kharaab nahin kar sakta. Meri problem sirf ye hai ke mere paas kuch bhi nahin hai. Jo kuch hain maan baap ka hai aur wo apni saari jama poonji mujhe par kharch kar rahe hain ye soch kar ke main kal ko unke liye kuch karunga.”
Wo baat karte karte ruka. “Kya aisa nahin ho sakta ke tumhare waldain apni marzi se tumhari shadi mujh se kar den. Is soorat mein kam az kam mere waldain ko ye aitraaz to nahin hoga ke tum ne apne waldain ki marzi ke khilaaf, unhein bataye baghair mujh se shadi ki?”
Wo Jalaal ka chehra dekhne lagi. “Main nahin jaanti…..Aisa ho sakta hai ya nahin. Main kuch bhi nahin keh sakti. Wo meri baat maanenge ya nahin. Main……..”Imama ne kuch maayusi ke aalam mein apni baat adhoori chod di. Jalaal baat mukammal hone ka intezaar karta raha.
“Meri family mein aaj tak kisi ladki ne apni marzi se bahar ke ladke se shadi nahin ki. Isliye main ye nahin bata sakti ke unka radd-e-amal kya hoga, magar ye zaroor bata sakti hoon ke unka radd-e-amal bahot bura hoga. Bahot bura. Wo mujh se bahot mohabbat karte hain laikin mujhe ye ijaazat nahin de sakte ke main itna bada qadam uthaun. Aap ko andaaza hona chahiye ke mere baba ko kitni sharmindagi aur be-izzati ka saamna karna padega. Sirf mere liye wo sab kuch badal nahin denge.”
“Agar mujhe apni family se madad ki tawaqqo hoti to main ghar se bahar sahaaron ki talaash mein hoti na hi aap se is tarah madad maang rahi hoti.”
Dhime lehje mein apni aawaz ki larzish par qaabu paate hue usne Jalaal se kaha.
“Imama! Main tumhari madad karunga………Mere parents meri baat nahin taalenge. Samjhane mein kuch waqt lagega magar main tumhari madad karunga. Main unhein mana lunga. Tum theek kehti ho, mujhe tumhari madad karni chahiye.”
Wo pur soch magar uljhe hue andaaz mein usse keh raha tha. Imama ko ajeeb si dhaaras hui. Use Jalaal se yahi tawaqqo thi.
Imama ne socha. “Mera intekhaab ghalat nahin hai.”
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-53/
Prev episode:
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar