Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
“Abbu! Main aap se ek baat karna chahta hoon.” Jalaal raat ko apne walid ke kamre mein chala aaya. Uske walid us waqt apni ek file dekhne mein masroof the.
“Haan, aao kya baat hai?” Unhon ne Jalaal ko dekhte hue kaha. Wo unke paas ek kursi par baith gaya. Kuch der wo isi tarah khamoosh baitha raha, uske walid ne ghaur se uska chehra dekha, unhein ye andaza ho gaya tha ke wo kuch pareshan hai. Unhein ek dam tashweesh hone lagi.
“Abbu, main shadi karna chahta hun.” Jalaal ne kisi tamheed ke baghair kaha.
“Kya?” Ansar Jawed ko uske munh se is jumle ki tawaqqo nahin thi. “Tum kya karna chahte ho?”
“Main shadi karna chahta hoon.”
“Ye faisla tum ne ek dam kaise kar liya. Kal tak to tum bahar jane ki taiyyariyon mein masroof the aur ab aaj tum shadi ka zikr le baithe ho.” Ansar Jawed muskuraye.
“Bas………Maamla hai kuch aisa ho gaya ke mujhe aap se baat karni pad rahi hai.”
Ansar Jawed sanjeeda ho gaye.
“Aap ne Zainab ki dost Imama ko dekha hai?” Usne chand lamhon ke tawaqquf ke baad kaha.
“Haan! Tum usmein interested ho?” Unhon ne fauran andaza lagaya.
Jalaal ne asbaat mein sar hila diya.
“Magar wo log bahot ameer hain…… Uska baap bada san’at-kaar hai aur wo musalmaan bhi nahin hai.” Ansar Jawed ka lehja badal chuka tha.
“Abbu! Wo Islam qubool kar chuki hai, uski family qaadiyani hai.” Jalaal ne wazahat ki.
“uske ghar walon ko pata hai?”
“Nahin.”
“Tumhara khayaal hai wo ye proposal qubool kar lenge?” Ansar Jawed ne chubhte hue lehje mein kaha.
“Abbu! Uski family ki ijaazat ki zaroorat nahin hai. Un logon ki ijaazat ke baghair ham shadi karna chahte hain”
“Tumhara dimagh to theek hai?” Is baar Ansar Jawed buland aawaz mein bole. “Main tumhein kisi halat mein iski ijaazat nahin de sakta.
Jalaal ka chehra utar gaya. “Abbu! Meri uske sath commitment hai.” Usne maddham aawaz mein kaha.
“Mujh se puch kar commitment ki thi tum ne……. Aur is umr mein bahot sari commitments hoti rehti hain. Iska ye matlab nahin hota ke banda apni zindagi kharaab kar le……. Unhein apne piche laga kar ham sab barbaad ho jayenge.”
“Abbu! Main khufiya taur par shadi kar leta hoon………. Kisi ko batayenge nahin to kuch bhi nahin hoga.”
“Aur agar pata chal gaya to………. Main waise bhi tumhari taleem ke mukammal hone tak tumhari shadi karna nahin chahta. Abhi tumhein bahot kuch karna hai.”
“Abbu please!…… Main uske alawa kisi aur se shadi nahin kar sakta.” Jalaal ne maddham aawaz mein apni aawaz par zor dete hue kaha.
“Acha……….Aisa hai to tum usse kaho ke wo apne waldain se is silsiley mein baat kare. Agar uske waldain maan jate hain to main tum dono ki shadi kar dunga.” Unhon ne tez magar hatmi lehje mein kaha. “Magar main tumhari shadi kisi aisi ladki se qatai nahin karunga jo apne ghar walon ki marzi ke khilaaf tum se shadi karna chahe……..”
“Abbu! Aap uska mas’ala samjhein. Wo buri ladki nahin hai…….. bahot achi ladki hai. Bas wo kisi musalmaan se shadi karna chahti hai jis par uske ghar wale kabhi raazi nahin honge.” Jalaal ne daanista taur par Asjad aur uski mangni ka zikr gol kar diya.
“Mujhe kisi dusre ke masail se dilchaspi nahin hai aur tumhein bhi nahin hona chahiye. Ye Imama ka mas’ala hai, wo jaane. Tum apne kaam se kaam rakho. Apne mustaqbil ke barey mein socho.” Ansar Jawed ne do tok andaaz mein kaha.
“Abbu please!…….. Meri baat samjhein. Us ko madad ki zaroorat hai…….”
“Bahot se logon ko madad ki zaroorat hoti hai, tum kis kis ki madad karoge……… Aur waise bhi hamare aur unke status mein itna farq ai ke unse koi dushmani ya mukhalefat mol lena hamare bas ki baat nahin, samjhe tum aur phir main ek ghair muslim ladki se shadi kar ke apne khaandaan walon ka samna kaise karunga.”
“Abbu! Wo musalmaan ho chuki hai…….. Main ne aap ko bataya hai.” Jalaal ne kuch jhunjhla kar kaha.
“4 mulaqaaton mein wo tum se itni muta’assir ho gayi ke usne Islam qubool kar liya.”
“Abbu! Usne mujh se milne se pehle Islam qubool kar liya tha.”
“Tum ne Islam qubool karte dekha tha use?”
“Main usse mazhab ke barey mein tafseelan baat karta rehta hoon. Main jaanta hoon ke wo Islam qubool kar chuki hai.”
“Bil-farz wo aisa kar bhi chuki hai………. To phir apna masail se khud nimatna chahiye. Tumhein beech mein ghaseetna nahin chahiye. Apne waldain se do tok baat kare, unhein bataye ke wo tum se shadi karna chahti hai…….. Phir main aur tumhari ammi dekhenge ham kya kar sakte hain……… Dekho Jalaal! Agar uska khaandaan apni marzi aur khushi se uski shadi tumhare sath karne par tayyar ho jaye to main use bakhushi qubool kar lunga……… Magar kisi be-naam—nishaan lakdi se main tumhari shadi nahin karunga. Mujhe is maashrey mein rehna hai……..Logon ko munh dikhana hai………. Bahu ke khaandaan ke barey mein kya kahunga main kisi se………. Ye ke wo ghar chod kar aayi hai aur usne apni marzi se mere bete se shadi kar li hai?”
“Abbu! Ye hamara mazhabi fareeza hai ke ham uski madad karein aur……..” Ansar Jawed ne talkhi se uski baat kaat di.
“Mazhab ko beech mein mat le kar aao, har cheez mein mazhab ki shirkat zaroori nahin hoti. Sirf tum hi ye mazhabi fareeza ada karne wale reh gaye ho, baaqi saare musalmaan mar gaye hain?”
“Abbu! Unse mujh se madad maangi hai, main is liye keh raha hoon.”
“Beta! Yahan baat mazhab ya madad ki nahin hai, yahan sirf haqaaiq ko dekhne ki zaroorat hai. Bahot achi baat hai ke tum mein madad ka jazba hai aur tumhein apne mazhabi faraiz ka ehsaas hai magar insaan par kuch haq uske waldain ka bhi hota hai aur ye haq bhi mazhab ne hi farz kiya hai aur is haq ke tahet mein chahta hoon ke tum uske khaandaan ki marzi ke baghair usse shadi na karo…….. Farz karo tum usse shadi kar bhi lete ho…… To kya hoga………… Tum to chand maah America hoge…….. Aur wo yahan ghar baithi hogi……… Mere paas itna paisa naihn hai ke main tum chaaron ki taleem par bhi kharch karun aur uski taleem par bhi………. Tum achi tarah jaante ho ke tum par mera kitna paisa kharch ho raha hai…….. To wo doctor to nahin banegi……. Yahan ghar mein tum use kitne saal bitha sakte ho……… Aur agar uske khaandaan ne tum par ya ham par case karwa diya to us soorat mein tum bhi paaband ho kar reh jaoge aur main bhi………. Tum ko apni bahen ka ehsaas hona chahiye, tum ye chahte ho ke is umr mein, main jail chala jaun………. Aur shayad tum bhi………”
Jalaal kuch na bol saka.
“In chizon ke barey mein jazbaati ho kar nahin sochna chahiye. Main ne tumhein raasta bata diya hai……… Usse kaho apne waldain se baat kar ke unhein razamand kare……… Ho sakta hai wo razamand ho jayein. Phir mujhe kya aitraaz hoga tum dono ki shadi par, laikin agar wo ye nahin karti to phir usse kaho ke wo kisi aur se shadi kar le aur tum thande dil se socho, tumhein khud pata chal jayega ke tumhara faisla kitna nuqsaanda hai.”
Ansar Jawed ne aakhri keel thonki.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-58/
Prev episode:
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar