Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Wo us raat computer par baitha tha jab uske mobile par ek call aayi thi. Usne keyboard par haath chalate hue laparwahi se mobile utha kar dekha aur phir use ek jhatka laga tha. Screen par maujood number uske apne mobile ka tha. Imama use call kar rahi thi.
“To bil-aakhir aap ne hamein yaad kar hi liya.” Usne be-ikhteyaar seeti bajayi. Uska mood ek dam fresh ho gaya tha. Kuch der pehle wali boriyat yaksar ghaayab ho gayi thi.
“Main to samajh baitha tha ke ab tum mujhe kabhi call nahin karogi. Itna lamba arsa laga diya tum ne.” Rasmi alaik salaik ke baad usne pucha.
“Main bahot dino se tumhein phone karna chah rahi thi magar kar nahin paa rahi thi.” Dusri taraf se Imama ne kaha.
“Kyn, aisi kya majboori aa gayi thi. Phone to tumhare paas maujood tha.” Salar ne kaha.
“Bas koi majboori thi.” Usne mukhtasaran kaha.
“Tum is waqt kahan ho?” Salar ne kuch tajassus aamez andaaz mein pucha.
“Bachkaan sawaal mat karo Salar! Jab tum jaante ho ke main tumhein ye nahin bataungi to phir tum ye kyun puch rahe ho?”
“Mere ghar wale kaise hain?”
Salar kuch hairaan hua. Use Imama se is sawaal ki tawaqqo nahin thi.
“Bilkul theek hain, khush-o-khurram hain, aish kar rahe hain.” Usne mazaaq udaane wale andaaz mein kaha. “Tum waqai achi beti ho, ghar se jaa kar bhi tumhein ghar aur ghar walon ke kitna khayaal hai, how nice!”
Dusri taraf kuch der khamushi rahi phir Imama ne kaha. “Waseem kaise hai?”
“Ye to main nahin bata sakta magar mera khayal hai thik hoga. Wo kharaab kaise ho sakta hai.” Uske andaaz-o-lehje mein ab bhi koi tabdeeli nahin aayi thi.
“Unhein ye to pata nahin chala ke tum ne meri madad ki thi?” Salar ko Imama ka lehja kuch ajeeb sa laga.
“Pata laga………….? My dear Imama! Police usi din mere ghar pahonch gayi thi jis din main tumhein Lahore chod kar aaya tha.” Salar ne kuch istehzaaiya andaaz mein kaha. “Tumhare father ne mere khilaaf FIR katwa di thi tumhein aghwa karne ke silsiley mein.” Wo hansa. “Zara socho mere jaisa banda kisi ko aghwa kar sakta hai aur wo bhi tumhein……… Jo kisi waqt bhi kisi ko shoot kar sakti hai.” Uske lehje mein is baat tanz tha. “Tumhare father ne puri koshish ki hai ke main jail pahonch jaun aur baaqi ki zindagi wahan guzaarun magar bas main kuch khush qismat waqey hua hoon ke bach gaya. Ab tumhein kya kya bataun. Baher haal tumhari family hamein khaasa zich kar rahi hai.” Usne jataane wale andaz mein kaha.
“Main nahin jaanti thi ke wo tum tak pahonch jayenge.” Is baar Imama ka lehja maazrat khwaahana tha. “Mera khayaal tha ke unhein kisi bhi tarah tum par shak nahin hoga. Mujhe afsos hai ke meri wajah se tumhein itne problems ka saamna karna pad raha hai.”
“Waqai tumhari wajah se mujhe bahot problems ka saamna karna pad raha hai.”
“Meri koshish thi ke main pehle khud ko mehfooz kar loon phir hi tumhein phone karun aur ab main waqai mehfooz hoon.”
Salar ne kuch tajassus aamez dilchaspi ke sath uski baat suni. “Tumhara mobile ab main istemaal nahin karungi aur main ise wapas bhejna chahti hoon. Magar mere liye ye mumkin nahin hai.” Wo use bata rahi thi. “Main tumhein kuch paise bhi bhijwaungi. Un tamaam akhraajaat ke liye jo tum ne mere liye kiye………”
Salar ne uski baat kaati. “ Nahin, paise rehne do. Mujhe zaroorat nahin hai. Mobile ki bhi zaroorat nahin hai. Mera paas doosra hai. Tum chaho to use istemaal karti raho.”
“Nahin, main ab ise istemaal nahin karungi. Meri zaroorat khatm ho chuki hai.”
Usne kaha aur phir kuch der khamoosh rehne ke baad goyaa hui. “Main chahti hon ke tum ab mujhe talaaq ke papers bhijwa do aur talaaq ke papers ke sath nikaah naame ki ek copy bhi jo main pehle tum se nahin le saki.”
“Kahan bhijwaun?” Salar ne uske mutaalbey ke jawaab mein kaha. Uske zahen mein ek dam ek jhamaaka hua tha. Wo agar ab talaaq ka mutaalba kar rahi thi to iska matlab yahi tha ke usne abhi tak kisi se shadi nahin ki thi na hi talaaq ke us haq ko istemaal kiya tha, jo nikaah naamey mein wo uski khwahish par use tafweez kar chuka tha.
“Tum usi wakeel ke paas wo papers bhijwa do jis ko tum ne hire kiya tha aur mujhe uska naam aur pata likhwa do, main wo papers usse le lungi.” Salar muskuraya. Wo be had mohtaat thi. “Magar mera to us wakeel ke sath direct koi raabta nahin hai. Main to use jaanta bhi nahin hoon phir papers us tak kaise pahonchaun?”
“Jis dost ke zariye tum ne us wakeel se raabta kiya tha usi dost ke zariye wo papers us tak pahoncha do.” Ye to tay tha ke wo use kisi bhi tarah apna koi ataa pata na dene ka faisla kar chuki thi aur us par poori tarah qayem thi.
“Tum talaaq lena kyun chahti ho?” Wo us waqt mood mein tha.
Doosri taraf ek dam khamushi chaa gayi. Shayad wo usse is sawaal ki tawaqqo nahin kar rahi thi.
“Talaaq kyun lena chahti hoon? Tum kitni ajeeb baat kar rahe ho. Ye to pehle hi tay tha ke main tumse talaaq lungi phir is sawaal ki kya tum banti hai.”Imama ke lehje mein hairaani thi.
“Wo tab ki thi, ab to khaasa lamba waqt guzar gaya hai aur main tumhein talaaq dena nahin chahta.” Salar ne be had sanjeedgi se kaha. Wo andaaza kar sakta tha ke dusri taraf is waqt Imama ke pairon ke niche se haqeeqatan zameen nikal gayi hogi.
“Tum kya keh rahe ho?”
“Main ye keh raha hoon Imama dear! Main tumhein talaaq dena nahin chahta, naa hi dunga.” Usne ek aur dhamaaka kiya.
“Tum……….. Tum talaaq ka haq pehle hi mujhe de chuke ho.”Imama ne be ikhteyaar kaha.
“Kab, kahan………. Kis waqt……… Kis sadi mein.” Salar ne itmenaan se kaha.
“Tumhein yaad hai, main ne nikaah se pehle tumhein kaha tha ke nikaah naamey mein talaaq ka haq chahti hoon main. Agar tum talaaq nahin bhi dete to main khud hi wo haq istemaal kar sakit hoon. Tumhein ye yaad hona chahiye.” Wo jataa rahi thi.
“Agar main tumhein ye haq deta to tum ye haq istemaal kar sakti thin magar main ne to tumhein aisa koi haq diya hi nahin. Tum ne nikaah naama dekha, wahan aisa kuch bhi nahin tha. Khair tum ne dekha hi hoga warna aaj talaaq ki baat kyun kar rahi hotin.”
Dusri taraf ek baat phir khamushi chaa gayi. Salar ne hawa mein teer chalaya tha magar wo nishaaney par baitha tha. Imama ne yaqeenan papers sign karte hue unhein dekhne ki zehmat nahin ki thi. Salar be had mehzooz ho raha tha.
“Tum ne mujhe dhoka diya.” Bahot der baad usne Imama ko kehte suna.
“Haan bilkul usi tarah jis tarah tum ne pistol dikha kar mujhe dhoka diya.” Wo barjastagi se bola.
“Main samajhta hoon ke tum aur main bahot achi zindagi guzaar sakte hain. Ham dono mein itni buraaiyaan aur khaamiyaan hain ke ham dono ek dusre ko mukammal taur par complement karte hain.” Wo ab ek baar phir sanjeedgi se keh raha tha.
“Zindagi………Salar! zindagi aur tumhare saath………. Ye naa mumkin hai.”Imama ne tund lehje mein kaha.
“Mujhe Napoleon ki baat dohraani chahiye ke meri dictionary mein naa mumkin ka lafz nahin hai ya mujhe tum se ye request karni chahiye ke aao! Is naa mumkin ko mil kar mumkin banayen.” Wo ab mazaaq uda raha tha.
“Tum ne mujh par bahot ehsaan kiye hain, ek ehsaan aur karo. Mujhe talaaq de do.”
“Nahin main tum par ehsaan karte karte thak gaya hoon, ab aur nahin kar sakta aur ye wala ehsaan, ye to naa mumkin hai.” Salar ek baar phir sanjeeda ho gaya tha.
“Main tumhare type ki ladki nahin hoon Salar! Tumhara aur mera lifestyle bahot mukhtalif hai, warna shayad main tumhari peshkash par ghaur karti agar ab is surat mein ye mumkin nahin hai. Tum please mujhe talaaq de do.” Wo ab narm lehje mein keh rahi thi. Salar ka dil be ikhteyaar hansne ko chaha.
“Tum agar meri peshkash par ghaur karne ka waada karo to main apna lifestyle badal leta hoon.” Salar ne usi andaaz mein kaha.
“Tum samajhne ki koshish karo, tumhari aur meri har cheez mukhtalif hai. Zindagi ki philosophy hi mukhtalif hai. Ham dono ikatthe nahin reh sakte.” Is baar wo jhunjlaayi.
“Nahin…….. Nahin meri aur tumhari philosophy of life bahot milti hai. Tumhein is barey mein pareshaan hone ki zaroorat nahin hai. Agar ye milti na bhi hui to bhi zara se adjustment ke baad milne lagegi.” Wo is tarah bola jaise apne behtareen dost se guftgu kar raha ho.
“Waise bhi mujh mein kami kya hai. Main tumhare puraane mangetar Asjad se khoobsurat na sahi magar Jalaal Ansar jaisa maamuli shakl-o-surat ka bhi nahin hoon. Meri family to tum achi tarah jaanti ho. Career mera kitna bright hoga, iska tumhein andaaza hai. Main har lehaaz se Jalaal se behtar hoon.” Wo apne lafzon par zor dete hue bola. Uski aankhon mein chamak aur honton par muskurahat naach rahi thi. Wo Imama ko buri tarah zich kar raha tha aur wo ho rahi thi.
“Mere liye koi bhi shakhs Jalaal jaisa nahin ho sakta aur tum……… tum to kisi surat bhi nahin.” Uski aawaz mein pehli baar khufgi numaayaan thi.
“Kyun?” Salar ne be had maasumiyat se pucha.
“Tum mujhe ache nahin lagte ho. Aakhir tum ye baat kyun nahin samajhte. Dekho, tum ne agar mujhe talaaq na di to main court mein chali jaungi.” Wo ab use dhamka rahi thi. Salar is baat par be ikhteyaar hansa.
“You are most welcome. Jab chahein jaayein. Court se achi jagah mail mulaqaat ke liye aur kaun si hogi. Aapne saamne khade ho kar baat karne ka maza hi aur hoga.” Wo mehzooz ho raha tha.
“Waise tumhein ye baat zaroor yaad rakhni chahiye ke court mein sirf main nahin pahonchunga balke tumhare parents bhi pahonchenge.” Wo istehzaaiya andaaz mein bola.
“Salar! Mere liye pehle hi bahot se problems hain tum un mein izaafa na karo. Meri zindagi bahot mushkil hai aur har guzarte din ke saath mazeed mushkil hoti ja rahi hai. Kam az kam tum to meri mushkilaat ko na badhao.” Is baar Imama ke lehje mein ranjeedgi aur bechaargi thi. Wo kuch aur mehzooz hua.
“Main tumhare masaail mein izaafa kar raha hoon……… My dear! Main to tumhari hamdardi mein ghul raha hoon, tumhare masaail ko khatm karne ki koshish kar raha hoon. Tum khud socho, mere sath reh kar tum kitni achi aur mehfooz zindagi guzaar sakti ho.” Wo bazaahir badi sanjeedgi se bola.
“Tum jaante ho na, main ne ye mushkilaat kis liye sahi hain. Tum samajhte ho, main ek aise shakhs ke saath rehne par tayyar ho jaungi jo har wo kabeera gunaah karta hai jise mere paighambar ﷺ naa pasand karte hain. Nek aurtein nek mardon ke liye hoti hain aur buri aurtein bure mardon ke liye. Main ne zindagi mein bahot se ghaltiyaan ki hain magar main itni buri nahin hoon ke tumhare jaisa bura mard meri zindagi mein aaye. Jalaal mujhe nahin mlia magar main tumhare sath kabhi zindagi nahin guzaarungi.” Usne be had talkh andaaz mein tamaam lehaaz baala-e-taaq rakhte hue kaha.
“Shayad isi liye Jalaal ne bhi tum se shadi nahin ki, kyun ke nek mardon ke liye ned aurtein hoti hain, tumhare jaisi nahin.” Salar ne use tukda tod andaaz mein jawaab diya.
Dusri taraf khamushi rahi. Itni lambi khamushi ke Salar ko use mukhaatib karna pada. “Hello……… tum sun rahi ho?”
“Salar! Mujhe talaaq de do.” Use Imama ki bharrayi hui lagi. Salar ko ek ajeeb si khooshi ka ehsaas hua.
“Tum court mein ja kar le lo, jise tum mujh se keh chuki ho.” Salar ne turki-ba-turki kaha aur dusri araf se phone band kar diya gaya.
Hasan ne in chand maah mein Salar se Imama ke barey mein jaanne ki be had koshish ki thi (Hasan ke apne bayaan ke mutaabiq) magar wo nakaam raha tha. Wo is baat par yaqeen karne ko tayyar nahin the ke Salar ne Imama ke darmiyaan koi raabta nahin tha. Salar ki tarah khud unhon ne mobile par baar baar usse raabta karne ki koshish ki magar naakaami hui.
Sikandar ne Salar ko America mein mukhtalif universities mein apply karne ke liye keh diya tha. Wo jaante the ke uska academic record aisa tha ke koi bhi university use lene mein khushi mehsoos karegi.
Imama ne Salar ko dobara phone nahin kiya tha haalaan ke Salar ka khayaal tha ke wo use dobara phone karegi aur tab wo use bata dega ke wo use nikaah naamey mein pehle hi talaaq ka haq de chuka hai aur wo nikaah naamey ki copy bhi uske hawaaley kar dega. Wo usse ye bhi keh dega ke usne uske saath sirf ek mazaaq kiya tha magar Imamane usse dobara raabta qayem nahin kiya, na hi Salar ne apne papers mein us nikaah naamey ko dobara dekhne ki zehmat ki,warna wo bahot pehle wahan uski adam maujoodgi se waaqif ho jata.
Jis din wo aakhri paper de kar wapas ghar aaya. Sikandar Usman ko apna muntazir paya.
“Tum apna samaan pack kar lo, aaj raat ki flight se tum America ja rahe ho, Kamran ke paas.”
“Kyun papa! Is tarah achanak………. sab kuch theek to hai?”
“Tumhare alawa sab kuch theek hai.” Sikandar ne talkhi se kaha.
“Magar aap mujhe is tarah achanak kyun bhej rahe hain?”
“Ye main tumhein raat ko airport chodne ke liye jaate hue bataunga. Filhaal tum ja kar apna samaan pack karo.”
“Papa please! Aap mujhe batayein is tarah kyun bhijwa rahe hain?” Salar ne kamzor ehtejaaj kiya.
“Main ne kaha na main tumhein bata dunga. Tum ja kar apna samaan pack karo warna main tumhein samaam ke baghair hi airport chod aaunga.”
Sikandar ne use dhamkaya. Wo kuch der unhein dekhta raha phir apne kamrey mein chala aaya. Apna samaan pack karte hue uljhe hue zahen ke sath wo Sikandar Usman ke is achanak faisley ke barey mein sochta raha aur phir achanak uske zahen mein jhamaaka sa hua. Usne apni daraaz khol kar papers nikaalne shuru kar diye. wahan nikaah naama nahin tha. Use unke is faisley ki samajh aa gayi thi aur use pachtaawa hua ke usne nikaah naamey ko itni laparwahi se waha kyun rakha tha. Wo nikaah naama Sikandar Usman ke alawa kisi aur ke paas ho hi nahin sakta tha kyun ke uke alawa koi aur is kamrey mein aane aur uski daraaz kholne ki jur’at nahin kar sakta tha.
Uske zahen mein ab koi uljhan nahin thi. Usne badi khamushi ke sath apna samaan pack kiya. Wo ab sirf ye soch raha tha ke Sikandar Usman se airport jate hue kya baat karega.
Raat ko airport chodne ke liye sirf Sikandar uske sath aaye the, Tayyaba nahin. Unka lehja aur andaaz be had rookha aur khushk tha.Salar ne bhi is baar koi sawaal nahin kiya. Airport jate hue Sikandar Usman ne apna brief case khol kar ek saada kaaghaz aur qalam nikala aur brief case ke upar rakh kar uski taraf badha diya.
“Is par sign kar do.”
“Ye kya hai?” Salar ne hairaani se us saada kaaghaz ko dekha.
“Tum sirf sign karo, sawaal mat karo.” Unhon ne be had rookhe andaaz mein kaha. Salar ne mazeed kuch kahe baghair unke hath mein pakda hua qalam le kar us kaaghaz par sign kar diye. Sikandar ne us kaaghaz ko teh kar ke brief case mein rakha aur brief case band kar diya.
“Jo kuch tum kar chuke ho, uske baad tum se kuch kehna ya baat karna bekaar hai. Tum mujh se ek ke baad dusra, aur dusre ke baad teesra jhot bolte rahe. Ye samajhte hue ke mujhe to kabhi haqeeqat ka pata hi nahin chalega. Mera dil to ye chahta hai ke tumhein America bhejne ki bajaye Hashim Mubeen ke hawale kar dun taa ke tumhein andaza ho jayega apni himaqat ka, magar mera mas’ala ye hai ke main tumhara baap hoon, mujhe tumhein bachaana hi hai. Tum meri is majboori ka aaj tak faayda uthate rahe ho magar aayinda nahin utha sakoge. Main tumhara nikaah naama Imama ke hawale kar dunga aur agar mujhe dobara ye pata chala ke tum ne usse raabta kiya hai ya raabta karne ki koshish kar rahe ho to main is baar jo karunga tum uska andaaza bhi nahin kar sakte. Tum mere liye kaafi museebatein khadi kar chuke ho, ab inka silsila band ho jana chahiye samjhe tum.”
Unhon ne ukhde hue lehje mein kaha. Wo jawaab mein kuch kehne ki bajaye khidki se bahar dekhne laga. Uske andaaz mein ajeeb tarah ki laparwahi aur itmenaan tha. Sikandar Usman be ikhteyaar sulag gaye. Ye unka wo beta tha jo 150+ IQ rakhta tha. Kya koi keh sakta tha ke wo sirey se koi IQ rakhta bhi tha ya nahin.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-85/
Prev episode:
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar