Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
“Magar aap kyun aa rahe hain?” wo donon phone par baat kar rahe the aur usne Salar ko chand dinon baad New Haven aane ki ittelaa di thi. Salar is waqt routine ki zindagi guzaar raha hota to wo is ittelaa par yaqeenan khush hota magar wo is waqt zehni abtari ke jis daur se guzar raha tha usmein Kamran ka aana use bey had naagawaar guzar raha tha aur wo ye naagawaari chupa na saka.
“Kya matlab hai tumhara, kyun aa rahe hain. Tum se milne ke liye aa raha hoon.” Kamran uske lehje par kuch hairaan hua. “Aur papa ne bhi kaha hai ke main tum se milne ke liye jaaun.” Wo hont bheenchey uski baat sunta raha.
“Tum mujhe airport se pick kar lena, main tumhein ek din pehle apni flight ki timing ke barey mein bata dunga.”
Kuch der idhar udhar ki baatein karne ke baad usne phone band kar diya.
4 din baad usne Kamran ko airport se receive kiya. Wo Salar ko dekha kar hairaan reh gaya.
“Tum bimar ho?” usne choot’tey hi Salar se kaha.
“Nahin, main bilkul theek hoon.” Salar ne muskuraney ki koshish ki.
“Lag to nahin rahe ho.” Kamran ki tashweesh mein kuch aur izaafa hone laga. Wo aankhon mein aankhein daal kar baat kiya karta tha, aaj khilaaf-e-maamul wo aankhein chura raha tha.
Gaadi drive karte hue bhi wo bahot ghaur se Salar ko dekhta raha. Wo bey had ehteyaat se drive kar raha tha. Kamran ko hairaani hui, wo is qadar rash driving karta tha ke uske saath baithe hue bade se bada jee daar aadmi darta tha. Kamran ko ye ek masbat tabdeeli lagi thi magar ye waahid masbat tabdeeli thi jo usne mehsoos ki thi, baaqi tabdeeliyaan usko pareshaan kar rahi thin.
“Studies kaisi jaa rahi hain tumhari?”
“Theek hain.”
Use safar ke dauraan bhi isi tarah ke jawaab milte rahe the. Ye uske apartment ki haalat thi jis ne Kamran ke izteraab ko itna badhaya tha ke wo kuch mushta’il ho gaya tha.
“Ye tumhara apartment hai Salar!…….. My god!” Salar ke peeche uske apartment mein daakhil hote hue wo chilla utha tha. Salar apni cheezon ko jis tarah munazzam rakhne ka aadi tha wo nazm-o-zabt wahan nazar nahin aa raha tha. Wahan har cheez abtar haalat mein nazar aa rahi thi. Jagah jagah uske kapde, juraabein aur jootey bikhrey pade the. Kitabon, akhbaaron, aur magazines ka bhi yahi haal tha. Kitchen ki haalat sab se buri thi aur bathroom ki usse bhi zyada. Kamran ne kuch shock ki haalat mein poore apartment ka jaayza liya.
“Kitne maah se tum ne safai nahin ki hai?”
“Main abhi kar deta hoon.” Salar ne sard mohri ke aalam mein cheezein uthaate hue kaha.
“Tum is tarah rehne ke aadi to nahin the ab kya hua hai?” Kamran bahot pareshan tha. Kamran ne achaanak ek mez par cigarette ke tukdon se hari ash tray ko paas jaa kar cigarette ke tukdon ko soonghna shuru kar diya. Salar ne chubhti hui tez nazron se apne bade bhai ko dekha par kuch kaha nahin. Kamran ne chand lamhon ke baad wo ash tray neeche patakh diya.
“Salar! What are you up to this time?”
“Mujhe saaf saaf batao, mas’ala kya hai. Drugs istemaal kar rahe ho tum?”
“Nahin, main kuch istemaal nahin kar raha.” Uske jawaab ne Kamran ko khaasa mushtail kar diya. Wo use kandhe se pakad kar taqreeban kheenchtey hue bathroom ke aayine ke saamne le aaya.
“Shakl dekho apni, drug addict wali shakl hai ya nahin aur harkatein to bilkul waisi hi hain. Dekho, nazrein uthao, chehra dekho apna.”
Wo ab use collar se kheenchte hue keh raha tha. Salar aayine mein apne aap ko dekhe baghair bhi jaanta tha ke wo is waqt kaisa nazar aa raha hoga. Gehrey halqon aur badhi hui shave ke saath wo kaisa nazar aa sakta tha. Rahi sahi kasar un muhaason aur honton par jami hui papdiyon ne poori kar di thi jo bey tahaasha cigarette peene ka nateeja the. Muhaason ki wajah se usne roz shave karni band kar di thi. Kuch naraazi ke aalam mein usne Kamran se apna collar chudaya aur aayine par nazrein daudaaye baghair bathroom se nikalne ki koshish ki.
“Laanat baras rahi hai tumhari shakl par.”
Laanat wo lafz tha jo Kamran aksar istemaal karta tha. Salar ne pehle kabhi is lafz ko mehsoos nahin kiya tha magar is waqt Kamran ke munh se ye jumla sun kar wo jaise bhadak utha tha.
“Haan, laanat baras rahi hai meri shakl par, to………?” wo qadrey biphrey hue andaaz mein Kamran ke saamne tan kar khada ho gaya. “Jab main keh raha hoon ke main drugs nahin le raha to nahin le raha. Aap ko mera yaqeen karna chahiye.”
“Tum par yaqeen…………” Kamran ne tanziya lehje mein uske peeche bathroom se bahar aate hua kaha. Usne hont bheench liye aur kamrey ki cheezein sametney ka kaam jaari Rakha.
“University jaa rahe ho tum?” Kamran ko achaanak ek aur andesha hua.
“Jaa raha hoon.” Wo cheezein uthata raha, Kamran ko tasalli nahin hui.
“Mere saath hospital chalo, main tumhara check up karwana chahta hoon.”
“Agar aap ye sab karne aaye hain to behtar hai wapas chale jaayein, main koi kindergarten ka bachcha nahin hoon. Main apna khayal rakh sakta hoon.” Kamran ne is baat kuch kehne ki bajaye uske saath mil kar cheezein uthaani shuru kar din. Salar ne itmenaan ka saans liya. Uska khayal tha ke ab wo is maamley par bahes nahin karega magar uska ye andaza ghalat tha. Kamran ne uske paas apne qayaam ko lamba kar diya. 2-3 din ki bajaye wo poora hafta wahan raha. Salar uske qayaam ke dauraan baqaidgi se university jaata raha magar Kamran is dauraan uske doston aur professors se milta raha. Semester mein fail hone ki khabat bhi use Salar ke doston se hi mili hi aur Kamran ke liye ye ek shock tha. Salar se kuch bhi tawaqqo ki jaa sakti thi, magar semester mein fail hona wo bhi is buri tarah se jab ke wo kuch arsa pehle tak university ke pichle records break karte hue top kar raha tha.
Is baar usne Salar se is maamle ko discuss nahin kiya balke Pakistan Sikandar Usman ko phone kar ke is saare maamley se aagah kar diya. Sikandar Usman ke pairon taley se ek baar phir zameen nikal gayi thi. Salar ne apna saabqa record bar qaraar Rakha tha. Wo ek dedh saal ke baad unke liye koi na koi naya mas’ala khada karta rehta tha aur Hashim Mubeen wale maamley ko bhi itna hi arsa hone wala tha.
“Aap abhi us se is maamley par baat na karein. University mein kuch chuttiyaan hone wali hain, aap use Pakistan bula lein, kuch arsey ke liye wahan rakhein phir mummy se kahein ke wo uske saath waapsi par yahan aa jayein aur jab tak uski taleem khatm nahin hoti uske saath rahein.” Kamran ne Sikandar Usman ko samjhaya.
Sikandar ne is baar aisa hi kiya tha. Wo baghair bataye chuttiyaan shuru hone se pehle New Haven pahonch gaye.
Uska huliya dekh kar Sikandar Usman ke pet mein girhein padne lagi thin magar unhon ne Kamran ki tarah usse bahes nahin ki. Unhon ne use apne sath Pakistan chalne ke liye kaha. Uske ehtejaaj aur talimi masroofiyaat ke bahaney ko nazar andaaz karte hue unhon ne zabardasti uski seat book kara di aur use Pakistan le aaye.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-102/
Prev episode:
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar