Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
New Haven wapas aane ke baad usne zindagi ke ek naye safar ko shuru kiya tha.
Us raat jangal ke haulnaak andherey aur tanhayi mein us darakht ke sath bandhe bilaktey hue kiye gaye tamaam waadey use yaad the.
Wo sab se bilkul alag thalag rehne laga tha. Maamuli se raatey aur talluq ke baghair.
“Mujhe tum se nahin milna.”
Wo saaf-go to hamesha se hi tha magar is had tak ho jayega, ye uske saathiyon mein se kisi ko tawaqqo nahin thi. Chand haftey uske barey mein uska group cheh-may-goiyaan karta raha phir ye cheh-may-goiyaan aitraazaat aur tabsaron mein badal gayin aur uske baad tanziya jumlon aur naa pasandeedgi mein, phir sab apni apni zindagi mein masroof ho gaye.
Salar kisi ki zindagi ka markaz aur mehwar nahin ha na dusra koi uski zindagi ka.
Us ne New Haven pahonchne ke baad jo chand kaam kiye the us mein Jalaal Ansar se mulaqaat ki koshish bhi ki thi. Wo Pakistan se wapas aate hue uske ghar se America mein uska address le aaya tha. Ye ek ittefaaq hi tha ke uska ek cousin bhi usi hospital mein kaam kar raha tha. Baaqi ka kaam bahot aasan saabit hua. Zaroorat se zyada aasan.
Wo usse ek baar mil kar maazrat karna chahta tha. Use un tamaam jhooton ke barey mein bata dena chahta tha jo wo usse Imama ke barey mein aur Imama ko us barey mein bolta raha tha. Wo un dono ke talluq mein apne role ke liye sharminda tha. Wo uski talaafi karna chahta tha. Wo Jalaal Ansar tak pahonch chuka tha aur wo Imama Hashim tak pahonchna chahta tha.
Wo Jalaal Ansar ke sath hospital ke cafeteria mein baitha hua tha. Jalaal Ansar ke chehrey par bey had sanjeedgi thi aur uske maathey par pade hue bal uski naraazi ko zaahir kar rahe the.
Salar kuch der pehle hi wahan pahoncha tha aur Jalaal Ansar use wahan dekh kar hakka bakka reh gaya tha. Usne Jalaal se chand minute maangey the. Wo 2 ghantey intezaar karwane ke baad bil aakhir cafeteria mein aa gaya tha.
“Sab se pehle to main ye jaanna chahunga ke tum ne mujhe dhunda kaise?” usne aap janaab ke tamaam takallufaa ko bar taraf rakhte hue table par baithte hi Salar se kaha.
“Ye ahem nahin hai.”
“Ye bahot ahem hai. Agar tum waqai ye chahte ho ke mai kuch der tumhare sath yahan guzarun to mujhe pata hona chahiye ke tum ne mujhe kaise dhunda?”
“Main ne apne cousin se madad li hai. Wo ek doctor hai aur is shaher mein bahot arsey se kaam kar raha hai. Main ye nahin jaanta us ne aap ko kaise dhunda. Main ne use sirf aap ka naam aur kuch dusri maalumaat di thin.” Salar ne kaha.
“Lunch……..?” Jalaal ne bade rasmi andaaz mein kaha, wo table par aate hue apni lunch tray saath le kar aaya tha.
“Nahin, main nahin khaunga.” Salar ne shukriya ke sath maazrat kar li.
Jalaal ne kandhey uchkaye aur khana shuru kar diya.
“Kis maamley mein baat karna chahte the tum mujh se?”
“Main aap ko chand haqaaiq se aagah karna chahta tha.”
Jalaal ne apni bhanwein uchkaayin. “Haqaaiq?”
“Main aap ko ye batana chahta tha ke main ne aap se jhoot bola tha. Main Imama ka dost nahin tha. Wo mere dost ki bahen thi. Sirf meri next door neighbour……” Jalaal ne khan jaari rakha.
“Meri usse maamuli jaan pehchaan thi. Wo mujhe pasand nahin karti thi khud main bhi use pasand nahin karta tha aur yahi wajah thi ke main ne aap par yun zaahir kiya jaise wo meri bahot gehri dost thi. Main aap donon ke darmiyaan ghalat fehmiyaan paida karna chahta tha.”
Jalaal ne sanjeedgi se uski baat sunte hue khana khata raha.
“Uske baad jab Imama ghar se nikal kar aap ke paas aana chahti thi to main ne usse jhoot bola. Aap ki shadi ke barey mein.”
Is baar Jalaal khana khate khate ruk gaya. “main ne usse kaha ke aap shadi kar chuke hain. Wo aap ke paas isi liye nahin aayi thi. Mujhe baad mein ehsaas hua ke main ne bahot naa munaasib harkat ki hai magar us waqt tak der ho chuki thi. Imama se mera koi raabta nahin tha magar ye ek ittefaaq hai ke aap se mera raabta ho gaya. Main aap se excuse karna chahta hoon.”
“Main tumhari maazrat qubool karta hoon magar main nahin samajhta ke tumhari wajah se mere aur Imama ke darmiyaan koi ghalat fehmi paida hui, main pehle hi usse shadi na karne ka faisla kar chuka tha.” Jalaal ne badi saaf goi se kaha.
“Wo aap se bahot mohabbat karti thi.” Salar ne dheemi aawaz mein kaha.
“Haan main jaanta hoon magar shadi waghaira mein sirf mohabbat to nahin dekhi jaati aur bhi bahot kuch dekha jaata hai.” Jalaal ne bahot haqeeqat pasandaana andaaz mein keh raha tha.
“Jalaal! Kya ye mumkin nahin hai ke aap usse shadi kar lein?”
“Pehli baat ye ke mera uske saath koi raabta nahin hai aur dusri baat ye ke mera uske saath raabta hota bhi tab bhi main uske sath shadi nahin kar sakta.”
“Usko aap ke sahaarey ki zaroorat hai.” Salar ne kaha.
“Main nahin samajhta ke use mere sahaarey ki zaroorat hai. Ab to bahot arsa guzar chuka hai ab tak wo koi na koi sahaara talaash kar chuki hogi.” Jalaal ne itmenaan se kaha.
“Ho sakta hai usne aisa na kiya ho. Wo abhi bhi aap ka intezaar kar rahi ho.”
“Main is tarah ke imkaanaat par ghaur karne ka aadi nahin hoon. Main ne tumhein bataya hai ke mere liye apne career ke is stage par shadi mumkin hi nahin hai. Wo bhi us se.”
“Kyun?”
“Is kyun ka jawaab main tumhein kyun doon. Tumhara is saarey maamley se koi talluq nahin hai. Main usse kyun shadi nahin karna chahta, main tab hi use bata chuka hoon aur itne arsey baad tum dobara aa kar phir wahi pandora box kholne ki koshish kar rahe ho.” Jalaal ne qadrey naraazi se kaha.
“Main sirf us nuqsaan ki talaafi karne ki koshish kar raha hoon jo meri wajah se aap donon ka hua.” Salar ne narmi se kaha.
“Mera koi nuqsaan nahin hua aur Imama ka bhi nahin hua hoga. Tum zaroorat se zyada hassaas ho rahe ho.”
Jalaal ne salad k chand tukdey munh mein daalte hue itmenaan se kaha. Salar use dekhta raha. Wo nahin samajh paa raha tha ke use apni baat kaise samjhaaye.
“Main usko dhundney mein aap ki madad kar sakta hoon” Usne kuch der baad kaha.
“Magar main use dhundna nahin chahta. Shadi mujhe usse karni nahin phir dhundney ka kya fayda.”
Salar ne ek gehra saans liya. “Aap jaante hain usne kis liye ghar chhoda tha?”
“Mere liye baher nahin chhoda tha.” Jalaal ne baat kaati.
“Aap ke liye nahin chhoda tha, magar jin wajoohaat ki bina par chhoda tha kya ek musalmaan ke taur par aap ko uski madad nahin karni chahiye jab ke aap ye bhi jaante hain ke wo ladki aap se bahot mohabbat karti hai. Aap se bahot inspired hai.”
“Main duniya mein koi waahid musalmaan nahin hoon aur na hi mujh par ye farz kar diya gaya hai ke main uski madad zaroor karun. Meri ek hi zindagi hai aur main use kisi dusrey ki wajah se to kharaab nahin kar sakta aur phir tum bhi musalmaan ho, tum kyun shadki nahin karte usse? Main ne to tab bhi tum se kaha tha ke tum usse shadi kar lo. Tum waise bhi uske liye koi narm gosha rakhte ho.” Jalaal Ansar ne qadrey chubhtey hue andaaz mein kaha. Salar use khamushi se dekhta raha. Wo use bata nahin sakta tha ke wo usse shadi kar chuka hai.
“Shadi……..? Wo mujhe pasand nahin karti.” Usne kaha.
Main is silsiley mein use samjha sakta hoon. Tum mera usse raabta karwa do to main use tum se shadi par tayyar kar lunga. Ache aadmi ho tum……… aur khandaan waghaira bhi theek hi hoga tumhara. Car to dedh saal pehle bhi badi shaandaar rakhi hui thi tum ne. Iska matlab hai rupiya waghaira hoga tumhare paas. Waise yahan kis liye ho?”
“MBA kar raha hoon.”
“Phir to koi mas’ala hi nahin. Job tumhein mil jayegi. Rupiya waise bhi tumhare paas hai. Ladkiyon ko aur kya chahiye. Imama to waise bhi tumhein jaanti hai.” Jalaal ne chutki bajatey mas’ala hal kiya.
“Saara mas’ala to isi ‘jaanne’ ne hi paida kiya hai. Wo mujhe zaroorat se zyada jaanti hai.” Salar ne Jalaal ko dekhte hue socha.
“Wo aap se mohabbat karti hai.” Salar ne jaise use yaad dilaya.
“Ab is mein mera to koi qusoor nahin hai. Ladkiyan kuch zyada jazbaati hoti hain is maamley mein.” Jalaal ne qadrey bezaari se kaha.
“Ye one sided affair to nahin hoga. Aap kisi na kisi had tak us mein involve to zaroor honge.” Salar ne qadrey sanjeedgi se kaha.
“Haan thoda bahot involve tha, magar waqt aur haalaat ke sath sath tarjeehaat bhi badalti rehti hain insaan ki.”
“Agar aap ko waqt aur haalaat ke sath apni tarjeehaat badalni thin to aap ko is barey mein Imama ko involve hote hue bata dena chahiye tha. Kam az kam usse ye hota ke wo aap se madad ki tawaqqo rakhti na hi aap par is qadr inhesaar karti. Main ummid karta hoon aap ye to nahin kahenge ke aap ne usse shadi ke hawaaley se koi waada kiya hi nahin tha.” Jalaal kuch kehne ki bajaaye khasm-geen nigaahon se use dekhta raha.
“Tum mujhe kya jataane aur batane ki koshish kar rahe ho?” Us ne chand lamhon ke baad ukhdey hue andaaz mein kaha.
“Us ne jab mujh se pehli baar raabta kiya tha to aap ka phone number aur address de kar us ne mujh se kaha tha ke main aap se puchun aap ne apne parents se shadi ki baat kar li hai. Main ne use apna phone diya tha ke wo aap se ye baat khud puch le. Yaqeenan Islamabad aane se pehle aap ne usse ye kaha hoga ke aap usse shadi ke liye apne parents se baat karenge. Aap ne yaqeenan pehle mohabbat waghaira ke izhaar ke baad use propose kiya hoga.”
Jalaal ne kuch barhami se uski baat kaati.” Main ne use propose nahin kya tha. Usne mujhe propose kiya tha.”
“Maan leta hoon usne propose kiya tha. Aap ne kya kiya? Inkaar kar diya?” wo challenge karne wale andaaz mein puch raha tha.
“Inkaar nahin kiya hoga.” Salar ajeeb andaaz mein muskuraya.
“Us ne mujhe bataya tha ke aap naat badi achi padhte hain. Aur aap ko Hazrat Muhammad ﷺ se bhi bahot mohabbat hai. Aap ko bhi bataya hoga usne ke wo aap se bahot mohabbat karti thi maga raap se mil kar aur aap ko jaan kar mujhe bahot maayusi hui. Aap naat bahot achi padhte honge magar jahaan tak Hazrat Muhammad ﷺ se mohabbat ka talluq hai, main nahin samajhta wo aap ko hai. Main khud koi bahot acha aadmi nahin hoon aur mohabbat ke barey mein zyada baat nahin kar sakta. Khaas taur par Allah aur Hazrat Muhammad ﷺ se mohabbat ke barey mein, magar itna zaroor jaanta hoon ke jo shakhs Allah ya us ke paighambar ﷺ se mohabbat ka daawa karta hai ya logon ko ye impression deta phirta hai wo madad ke liye phaile hue haath ko nahin jhatak sakta na hi wo kisi ko dhoka aur faraib dega.” Salar uth kar khada ho gaya.
“Aur main to aap se request kar raha hoon uski madad ke liye. Ho sakta hai usne bhi dedh saal pehle ki ho phir bhi agar aap ninkaar par musir hai to………… main ya koi aap koi majboor to nahin kar sakta magar aap se mil kar aur aap se baat kar ke mujhe bahot maayusi hui.”
Usne alwidaayi musaafehe ke liye Jalaal ki taraf badhaya. Jalaal ne apna hath nahin badhaya, wo tanaffur bharey andaaz mein maathey par bal liye use dekhta raha.
“Khud Hafiz.” Salar ne apna hath peechey kar liya. Jalaal usi haalat mein use jaata dekhta raha aur phir usne khud kalaami ki.
“Its really an idiot’s world out there.”
Wo dobara luch tray ki taraf mutawajjah ho gaya. Uska mood bey had off tha.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-111/
Prev episode:
https://theothermeunfolded.com/blog/peer-e-kaamil-roman-urdu-umera-ahmed-episode-109/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar