Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
“Salar aao, ab aa bhi jao. Kitni mannatein karwaoge?” Anita ne uska baazu kheenchtey hue naarazi se kaha.
Wo Ammar ki shadi mein shirkat ke liye Islamabad aaya hua tha 3 din ki chhutti le kar, haalan ke uske ghar walon ka israar tha ke wo ek haftey ke liye aaye. Shadi ki taqreebaat kai din pehle shuru ho chuki thin. Wo in taqreebaat ki ahmiyat aur nauiyat se waaqif tha. Is liye ghar walon ke israar ke bawajood 3 din ki rukhsat le kar aaya tha aur ab wo Ammar ki mahendi ke function mein shirkat kar raha tha jo Ammar aur uski sasraal wale mil kar kar rahe the. Ammar aur Isra donon ke azeez-o-aqaarib aur dost mukhtalif filmy aur pop gaanon par raqs karne mein masroof the. Ek toofan-e-badtameezi tha jo wahan barpa tha. Sleeveless shirts, khule galey, jism ke sath chipkey hue kapde, baarik malboosaat, silk aur chiffon ki saadhiyan, net ke blouse, uski family ki aurtein bhi dusri aurton ki tarah isi tarah ke malboosaat pehne hue thin.
Mixed gathering thi aur wo taqreeb shuru hone par is hangaamey se kaafi dur kuch aise logon ke paas baitha hua tha ko corporate sector se talluq rakhte the aur Sikandar ya uske apne bhaiyon ke shanaasa the.
Magar phir mahendi ki rusumaat ka aaghaz hone laga aur Anita use stage ki taraf le gayi. Isra aur Ammar bey takallufi se stage par baithe baatein kar rahe the. Wo pehli baar Isra se mil raha tha. Ammar ne uska aur Isra ka taaruf karwaya. Mahendi ki rusumaat ke baad usne wahan se jaane ki koshish ki magar Kamran aur Tayyaba ne use zabardasti rok diya.
Bhai ki mahendi ho rahi hai aur tum is tarah wahan koney mein baithe rahoge?” Tayyab ne use daanta tha. “Tumhein yahan hona chahiye.”
Wo unke kehne par wahin Kamran aur uski biwi ke sath khada ho gaya. Uske ek cousin ne ek baar phir dopatta uske galey mein daalne ki koshish ki jo wo sab daale hue the. Us ne ek baar phir qadrey naa gawaari se uska hath jhataktey hue use tambeeh ki.
Agley chand minton ke baad wahan raqs shuru ho chuka tha. Ammar samet saare bahen bhai aur cousins raqs kar rahe the aur Anita ne use bhi kheenchna shuru kar diya.
“Nahin Anita! Main nahin kar sakta, mujhe nahin aata.”
Usne hath chhudane ki koshish karte hue maazrat ki magar uski maazrat qubool karne ki bajaye wo aur Ammar use kheench kar raqs karne walon ke hujoom mein le aaye the. Kamran aur Moiz ki shadi mein wo bhi aise hi raqs karta raha tha, magar Ammar ki mahendi par wo pichhley 7 saalon mein itna lamba zehni safar tay kar chuka tha ke wahan us hujoom ke darmiyaan sirf baazu khade karna bhi uske liye dushwaar tha. Qadrey bey bas muskurahat ke sath wo usi tarah hujoom ke darmiyaan khada raha phir usne Anita ke kaan mein kaha.
“Anita……….! Main dance bhul chuka hoon. Please let me go.”
“Tum karna shuru karo………. Aa jayega.” Anita ne jawaaban uske kandhey par hath rakhte hue kaha. Ab Isra bhi us hujoom mein shaamil ho chuki thi.
“Main nahin kar sakta. Tum log karo. Main enjoy kar raha hoon. Mujhe jaane do.”
Usne muskurate hue nikalne ki koshish ki. Isra ki aamad ne use uski koshish mein kaamyaab kar diya.
“Urooj har qaum, har nasl ka khwaab hota hai aur phir wo qaumein jin par ilhaami kitabein naazil hui hon, wo to urooj ko apna haq samajhti hain. Magar kabhi bhi kisi qaum par urooj sirf is bina par nahin aaya ke use kitaab aur nabi de diya gaya. Jab tak use qaum ne apne aamaal aur af’aal se urooj ke liye apni ahliyat saabit nahin kar di wo kisi martabey, kisi muqaam, kisi fazeelat ke qaabil nahin thehrin. Musalmaan qaum ya ummat ke sath bhi aisa hota raha hai aur ho raha hai. In ka mas’ala ye hai ke inke aala tabqaat ta’aiyyush aur nafs parasti ka shikaar hain. Ye donon cheezein waba ki tarah hoti hain. Ek se dusrey, dusrey se teesrey aur phir ye silsila kahin rukta nahin.”
Use wahan khade un naachti aurton aur mardon ke hujoom ko dekhte hue bey ikhteyaar Dr Sabt Ali ki baatein yaad aane lagin.
“Momin ayyaash nahin hota na tab jab wo re’aaya hota hai na tab jab wo hukmaraan hota hai. Uski zindagi kisi jaanwar ki zindagi jaisi nahin hoti. Khana peena, apni nasl ko aagey badhana aur fana ho jaana. Ye kisi jaanwar ki zindagi ka andaaz to ho sakta hai magar kisi musalmaan ki nahin.”
Salar bey ikhteyaar muskuraya. Wo aaj phir “Jaanwaron” aur “Hashratul arz” ke ek giroh dekh raha tha. Use khushi hui, wo bahot arsa pehle un mein se nikal chuka tha. Wahan har ek khush baash, pur sukoon aur mutmain nazar aa raha tha. buland qehqahey aur chamakdaar chehrey aur aakhein. Uske saamne Tayyaba Ammar ke sasur ke sath raqs kar rahi thin. Anita apne sab se bade bhai Kamran ke sath.
Salar ne apne hath ki ungliyon se dayin kanpati ko masla. Shayad ye tez music tha ya phir is waqt uska zehni izteraab, use apni kanpatiyon mein dard ki halki si laher guzarti mehsoos hui. Apne glasses utaar kar usne bayen hath se apni donon aankhein maslin. Dobara glasses aankhon par lagate hue usne mud kar raasta talaash karne ki koshish ki. Kuch jadd-o-jahed ke baad wo apni jagah chhodte hue us daayrey mein se nikalne mein kaamyaab ho gaya.
“Kidhar jaa rahe ho?” Bey hangam shor main Tayyaba ne buland aawaz mein jaane se pehle uska baazu pakad kar pucha tha. Wo abhi raqs karte karte thak kar uske paas khadi hui thin, unks saans phula hua tha.
“Mummy! Main abhi aata hun……..namaaz padh kar.”
“Aaj rehne do…………”
Salar muskuraya, magar usne jawaab mein kuch nahin kaha balke nafi mein sar hilaatey hue narmi se unka hath apne baazu se hata diya.
Wo ab bahar nikalne ki tag-o-dau kar raha tha.
“Ye kabhi normal nahin ho sakta. Zindagi ko enjoy karna bhi art hai aur ye art is bewaqoof ko kabhi nahin aayega.” Unhon ne apne teesrey bete ki pusht ko dekhte qadrey afsos se socha.
Salar ne hujoom se nikal kar bey ikhteyaar sukoon ki saans li thi.
Wo jis waqt namaaz padhne ke liye apne ghar ke gate se bahar nikal raha tha, singer us waqt gaana gaaney mein masroof tha. Us waqt masjid ki taraf jaane wala wo akela tha. Shayad gaadiyon ki lambi qataaron ke darmiyaan se sadak par chalte hue wo musalsal Dr Sabt Ali ke barey mein soch raha tha. Wo saikdon ke us majmey ke barey mein bhi soch raha tha jo uske ghar naach gaaney mein masroof the. Masjid mein kul 14 logon na baa jama’at namaaz ada ki thi.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-136/
Prev episode:
https://theothermeunfolded.com/blog/peer-e-kaamil-roman-urdu-umera-ahmed-episode-134/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar