Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Wo donon ek restaurant mein baithe hue the. Ramsha aaj khaas taur par tayyar ho kar aayi thi. wo khush thi aur koi bhi uske chehrey se uski khushi ka andaza laga sakta tha. Salar bhi.
Waiter se menu card ley kar Salar ne band kar ke table par rakh diya. Ramsha ne hairaani se use dekha. Wo apna card khole hue thi.
“Lunch meri taraf se hai magar menu aap tay karein.” Salar ne maddham muskurahat ke saath kaha.
“Okay.” Ramsha bey ikhteyaar muskurayi aur phir wo menu card par nazar daudaney lagi. Salar qareeb-o-jawaar ke logon ko dekhne laga.
Ramsha ne waiter ko kuch dishes note karwaayin. Jab waiter chala gaya to us ne Salar se kaha.
“Tumhari taraf se lunch ki ye dawat bada achcha surprise hai mere liye. Pehle to tum ne kabhi aisi dawat nahin di? Balke meri dawat bhi rad karte rahe.”
“Haan, laikin ab ham donon ke liye kuch baatein karna zaruri ho gaya tha. Mujhe isi liye tumhein yahan bulana pada.” Salar ne kaha.
Ramsha ne badi gehri nazron se use dekha.
“Kuch baatein……….? Kaun si baatein?”
“Pehle lunch kar lein, uske baad karenge.” Salar ne taaltey hue kaha.
“Magar lunch aane mein aur khane mein kaafi waqt lagega. Kya ye behtar nahin hai ke ham wo baatein abhi kar lein?” Ramsha ne qadrey bey taabi se kaha.
“Nahin, ye behtar nahin hai. Lunch ke baad.” Salar ne muskuratey hue magar hatmi andaz mein kaha.
Ramsha ne is baar israar nahin kiya. Wo donon halki phulki guftgu karne lage phir lunch aa gaya aur wo donon lunch mein masroof ho gay.
Lunch se faarigh hone mein taqreeban paun ghanta laga, phir Salar ne waiter se coffee mangwaai.
“Mera khayal hai ab baat shuru karni chahiye.”
Ramsha ne coffee ka pehla ghont lete hue kaha. Salar ab bahot sanjeeda nazar aa raha tha. Wo sar jhukaaye apni coffee mein chammach hila raha tha. Ramsha ki baat par usne sar utha kar dekha.
“Main tum se us card ke barey mein baat karna chahta hoon jo tum ne 2 din pehle mujhe bheja hai.” Ramsha ka chehra qadrey surkh ho gaya.
2 din pehle jab wo shaam ko apne flat par pahoncha to wahan ek card aur bouquet uska muntazir tha. Wo ek hafta Hong Kong mein bank ke kisi kaam ke liye raha tha aur usi shaam wapas aaya tha. Card Ramsha ka bheja hua tha.
“Tumhein dobara dekh kar mujhe kitni khushi hogi iska izhaar naa mumkin hai.”
Salar card par likhe paighaam ko padh kar chand lamhon ke liye saakit reh gaya. Uske badtareen khadshaat durust saabit hue the. Ramsha uske liye apne ehsasaat ka izhar kar rahi thi.
Salar ne agley 2 din us card ke barey mein Ramsha se koi tazkira nahin kiya laikin usne weekend par use lunch ki dawat de daali. Ramsha ke sath ab in tamaam baaton ko clear karna zaruri ho gaya tha.
“Tumhein card bura laga?” Ramsha ne kaha.
“Nahin, paighaam.”
Ramsha kuch sharminda ho gayi.
“I am sorry, magar main sirf………..Salar! main tumhein batana chah rahi thi ke main ne tumhein kitna miss kiya.”
Salar ne coffee ka ek ghont liya.
“Tum mujhe achche lagte ho, main tum se shadi karna chahti hoon.”
Ramsha ne chand lamhon ke tawaqquf ke baad kaha.
“Ho sakta hai ye proposal tumhein ajeeb lage laikin main bahot arsey se is silsiley mein tum se baat karna chah rahi thi. Main tum se flirt nahin kar rahi hoon jo kuch card mein main ne likha hai, main waqai tumhare liye wahi jazbaat rakhti hoon.”
Salar ne use baat mukammal karne di. Ab wo coffee ka cup niche rakh raha tha.
“Laikin main tum se shadi nahin karna chahta.” Jab wo khamush hui to usne do tok andaz mein kaha.
“Kyun?”
“Kya is sawaal ka jawaab zaruri hai?” Salar ne kaha.
“Nahin, zaruri nahin hai magar batane mein kya harj hai.”
“Tum mujh se kyun shadi karna chahti ho?” Salar ne jawaaban pucha.
“Kyun ke tum mukhtalif ho.”
Salar ek gehri saans le kar reh gaya.
“Aam mardon jaise nahin ho. Waqaar hai tum mein, cultured aur groomed ho.”
“Main aisa nahin hoon.”
“Saabit karo.” Ramsha ne challenge kiya.
“Kar sakta hoon magar nahin karunga.” Usne dobara coffee ka cup uthatey hue kaha.
“Har mard Salar Sikandar se behtar hai.”
“Kis lehaaz se?”
“Har lehaaz se.”
“Main nahin maanti.”
“Tumhare na maanne se haqeeqat nahin badlegi.”
“Main tumhein jaanti hoon. Dedh saal se tumhare sath kaam kar rahi hoon.”
“Mardon ke barey mein itni jaldi kisi raaye par pahonchna munaasib nahin hota.”
“Tumhari koi baat tumhare barey mein meri raaye tabdeel nahin kar sakti.”
“Tum jis family se talluq rakhti ho, jis society mein move karti ho, wahan tumhein mujh se zyada achche mard mil sakte hain.”
“Tum mujh se sirf apni baat karo.”
“Ramsha! Main kisi aur se mohabbat karta hoon.”
Usne bil aakhir keh diya. Is saari guftgu mein pehli baar Ramsha ki rangat zard padi.
“Tum ne………tum ne kabhi………kabhi nahin bataya.”
Salar aahista se muskuraya. “Hamare darmiyaan itni bey takallufi to kabhi bhi nahin rahi.”
“Tum usse shadi kar rahe ho?”
Donon ke darmiyaan is baar khamushi ke ek taweel waqfa aaya.
“Ho sakta hai kuch mushkilaat ki wajah se meri wahan shadi na ho sakey.” Salar ne kaha.
“Main tumhari baat samajh nahin saki. Tum kisi se mohabbat kar rahe ho, ye jaante hue ke wahan tumhari shadi nahin ho sakti?”
“Kuch aisa hi hai.”
“Salar! Tum………tum itne jazbaati to nahin ho. Ek practical aadmi ho kar tum kis tarah ki ajeeb baat kar rahe ho.”
Ramsha istehzaaiya andaaz mein hans di.
“Farz kiya ke wahan tumhari shadi nahin hui to phir………phir kya tum shadi nahin karogey?”
“Nahin.”
Ramsha ne nafi mein sar hilaya. “I can’t believe it.”
“Magar aisa hi hai, main ne agar shadi ka socha bhi to 10-15 saal baad hi sochunga aur 10-15 saal tak zaruri nahin ke zinda bhi rahun.”
Usne bey had khushk lehjey mein kehte hue waiter ko haath ke ishaarey se apni taraf bulaya.
“Main chahta hoon Ramsha! Ke aaj ki guftgu ke baad ham donon ke darmiyaan koi aisa mas’ala paida na ho. Ham achche colleague hain. Main chahta hoon ye talluq aise hi rahe. Mere liye apna waqt zaaye mat karo. Main wo nahin hoon jo tum mujhe samajh rahi ho.”
Waiter qareeb aa gaya tha. Salar uska laya hua bill ada karne laga.
Ramsha Salar ka chehra dekhti rahi. Wo ab kisi gehri soch mein doobi hui thi.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-145/
Prev episode:
https://theothermeunfolded.com/blog/peer-e-kaamil-roman-urdu-umera-ahmed-episode-143/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar