Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
“Mujhe tum se kuch zaruri baatein karni hain is liye tumhein bulwaya hai.” Sikandar ne muskuratey hua Salar ko baithney ka ishaara kiya. Wo Tayyaba ke sath lounge mein baithey hue the aur Salar unke phone karne par us weekend Islamabad aaya hua tha.
Sikandar Usman ne qadrey sataaishi nazron se apne teesrey bete ko dekha. Wo kuch der pehle unke sath khana khane ke baad ab kapde tabdeel kar ke unke paas aaya tha. Safed shalwaar qameez aur ghar mein pehni jaane wali chappal mein wo apne aam se huliye ke bawajood bahot baa waqaar lag raha tha. Shayad ye uske chehrey ki sanjeedgi thi ya phir shayad wo aaj pehli baar kai salon ke baad use bade ghaur se dekh rahe the aur aitraaf kar rahe the ke uski shakhsiyat mein bahot waqaar aur thehrao aa gaya hai.
Unhon ne kabhi socha bhi nahin tha ke Salar ki wajah se unhein apne social circle mein ahmiyat aur izzat milegi. Wo jaante the bahot jaghon par ab unka taaruf Salar Sikandar ke hawaley se hota tha aur unhein is par khush gawaar hairat hoti thi. usne apni puri teenage mein unhein buri tarah khwaar aur pareshan kiya tha aur ek waqt tha, jab unhein apne is bete ka mustaqbil sab se taareek lagta tha. Apni tamaam ghair maamuli salaahiyaton aur qaabiliyat ke bawajood magar unke andazey aur khadshaat saheeh saabit nahin hue the.
Tayyaba ne khush mewey ki plate Salar ki taraf badhayi. Salar ne chand kaaju utha liye.
“Main tumhari shadi ke barey mein baat karna chahta hoon.”
Kaaju munh mein daaltey hue wo ek dam ruk gaya. Uske chehrey se muskurahat ghayab ho gayi. Sikandar Usman aur Tayyaba bahot khush gawaar mood mein the.
“Ab tumhein shadi kar leni chahiye Salar!”
Sikandar ne kaha. Salar ne ghair mehsoos andaaz mein hath mein pakdey hue kaaju dobara plate mein rakh diye.
“Main aur Tayyaba to hairaan ho rahe the ke itne rishtey to tumhare bhaiyon mein se kisi ke nahin aaye jitne tumhare liye aa rahe hain.”
Sikandar ne bade shagufta andaaz mein kaha.
“Main ne socha, kuch baat waat karein tum se.”
Wo chup chaap unhein dekhta raha.
“Zahid Hamdani sahab ko jaante ho?” Sikandar Usman ne ek badi multinational company ke head ka naam liya.
“Ji…….. unki beti meri colleague hai.”
“Ramsha naam hai shayad?”
“Ji.”
“Kaisi ladki hai?”
Wo Sikandar Usman ke chehrey ko ghaur se dekhne laga. Unka sawaal bahot wazeh tha.
“Achchi hai.” Usne chand lamhon ke baad kaha.
“Tumhein pasand hai?”
“Kis lehaaz se?”
“Main Ramsha ke proposal ki baat kar raha hoon.” Sikandar Usman ne sanjeeda hote hue kaha.
“Zahid pichhley kai hafte se mujh se is silsiley mein baat kar raha hai. Apni wife ke sath ek do baar hamari taraf aaya bhi hai. Ham log bhi unki taraf gaye hain. Pichhley weekend par Ramsha se bhi mile hain. Mujhe aur Tayyaba ko bahot achchi lagi hai. Bahot well behaved hai aur tumhare sath bhi uski achchi khaasi dosti hai. Un logon ki khwaahish hai balke israar hai ke tumhare zariye donon families mein koi rishtey daari ban jaaye.”
“Papa meri Ramsha ke sath koi dosti nahin hai.” Salar ne maddham aur thehrey hue lehjey mein kaha.
“Wo meri colleague hai, jaan pehchaan hai aur is mein koi shak nahin ke bahot achchi ladki hai magar main usse shadi nahi karna chahta.”
“Tum kahin aur interested ho?”
Sikandar ne pucha. Wo khamush raha. Sikandar aur Tayyaba ke darmiyaan nazron ka tabaadla hua.
“Agar tumhari kahin aur dilchaspi hai to hamein koi aitraaz nahin balke hamein khushi hogi wahan tumhari shadi ki baat karte hue aur yaqeenan ham tum par bhi koi dabao nahin dalenge is silsiley mein.”
Sikandar ne narmi se kaha.
“Main bahot arsey pehle shadi kar chuka hoon.”
Ek lambi khamushi ke baad us ne usi tarah sar jhukaye hue maddham lehjey mein kaha. Sikandar ko koi dushwaari nahin hui ye samajhne mein ke uska ishaara kis taraf tha. Unke chehrey par ek dam sanjeedgi aa gayi.
“Imama ki baat kar rahe ho?”
Wo khamush raha. Sikandar bahot der tak bey yaqeeni se use dekhte rahe.
“Itne arsey se isliye shadi nahin kar rahe ho?”
Sikandar ko jaise shock laga tha. Unka khayal tha wo use bhula chuka hoga. Aakhir ye 8 saal purani baat thi.
“Ab tak to wo shadi kar chuki hogi, apni zindagi aaram se guzaar rahi hogi. Tumhari aur uske shadi to kab ki khatm ho chuki.”
Sikandar ne usse kaha.
“Nahin papa! Uske sath meri shadi khatm nahin hui.” Usne pehle baar sar uthaya.
“Tum ne use nikaal naamey mein talaaq ka ikhteyaar diya tha aur………mujhe yaad hai tum use dhundna chahte the taa ke talaaq de sako.”
Sikandar ne jaise use yaad karaya.
“Main ne use dhunda tha magar wo mujhe nahin mili aur wo ye baat nahin jaanti ke uske paas talaaq ka ikhteyaar hai. Wo jahaan bhi hogi abhi tak meri hi biwi hogi.”
“Salar! 8 saal guzar chuke hain. 1-2 saal ki baat nahin hai. Ho sakta hai wo jaan gayi ho ke talaaq ka ikhteyaar uske paas hai. Ye mumkin nahin hai ke wo ab bhi tumhari biwi ho.”
Sikandar ne qadrey muztarib ho kar kaha.
“Mere alawa to koi dusra use ye nahin bata sakta tha aur main ne use is haq ke barey mein nahin bataya aur jab tak wo mere nikaah mein hai mujhe kahin aur shadi nahin karni.”
“Tumhara contact hai uske sath?”
“Nahin.”
“8 saal se usse tumhara usse raabta nahin hua. Agar saari umr na hua tab tum kya karoge?”
Wo khamush raha, uske paas is sawaal ka koi jawaab nahin tha.
Sikandar Usman kuch der uske jawaab ka intezaar karte rahe.
“Tum ne mujh se kabhi ye nahin kaha ke tum us ladki ke sath emotionally involved ho. Tum ne mujhe yahi bataya tha ke tum ne sirf waqti taur par uski madad ki thi. wo kisi aur ladke se shadi karna chahti thi. waghaira waghaira.”
Salar is baar bhi khamush raha.
Sikandar Usman chup chaap use dekhte rahe. Wo apne is teesrey bete ko kabhi nahin jaan sake the. Uske dil mein kya tha wo us tak kabhi nahin pahonch sakte the. Jis ladki ke liye wo 8 saal zaaye kar chuka tha aur baaqi ki zindagi zaaye karne ke liye tayyar tha, uske sath uske jazbaati talluq ki shiddat kaisi ho sakti thi ye ab shayad use lafzon mein bayaan karne ki zarurat nahin thi. kamrey mein khamushi ke ek lamba waqfa aaya phir Sikandar Usman uth kar apne dressing room mein chale gaye. Unki waapsi chand minton ke baad hui. Sofe par baithne ke baad unhon ne Salar ki taraf ek lifaafa badha diya. Usne sawaaliya nazron se unhein dekhte hue wo lifaafa pakad liya.
“Imama ne mujh se raabta kiya tha.”
Wo saans bhi nahin ley saka. Sikandar Usman sofe par baith chuke the.
“Ye 5-6 saal pehle ki baat hai wo tum se baat karna chahti thi. phone Naasera ne uthaya tha aur usne Imama ki aawaz pehchaan li thi. tab tum Pakistan mein the. Naasera ne tumhare bajaye mujh se baat karayi. Usne mujh se kaha ke main tum se baat karaun. Main ne usse kaha ke tum mar chukey ho. Main nahin chahta tha ke wo tum se raabta kare aur jis musibat se ham chhutkaara paa chukey hain us mein dobara padein. Mujhe yaqeen tha ke wo meri baat par yaqeen kar legi kyun ke tum kai baat khud kushi ki koshish kar chukey the. Wo Waseem ki bahen thi tumhare barey mein ye sab jaanti hogi. Kam az kam ek aisi koshish ki to wo khud gawaah thi. Main use nikaah naamey mein maujood talaaq ke ikhteyaar ke barey mein nahin bata saka na hi us talaaq naamey ke barey mein jo main ne tumhari taraf se tayyar karaya tha. Tumhein jab mein ne America bhijwaya tha to tum se ek saada kaghaz par sign liye the, main chahta tha ke mujhe zarurat pade to main khud hi talaaq naama tayyar kara loon. Ye qaanuni ya jaayez tha ke nahin uska pata nahin magar main ne use tayyar kara liya tha aur main Imama ko uske barey mein batana chahta tha aur use tamaam papers bhi dena chahta tha magar usne phone band kar diya. Main ne number trace out karaya to wo kisi PCO ka tha. Uske kuch dinon baad 20 hazar rupaye ke travels check mujhe us ne mail kiye uske sath ye ek khat bhi tha. Shayad tum ne use kuch raqm di thi usne wahi wapas ki thi. main ne tumhein isliye nahin bataya kyun ke main nahin chahta tha ke tum dobara is maamley mein involve ho. Main Imama ki family se khauf zada tha. Mujhe andesha tha ke wo tumhari taak mein honge aur main chahta tha ke tum apna career banate raho.”
Wo lifaafa hath mein pakdey rang badaltey chehrey ke sath Sikandar Usman ko dekhta raha, kisi ne bahot aahistagi ke sath uske wajood se jaan nikaal li thi. usne lifaafey ko table par rakh diya. Wo nahin chahta tha ke Tayyaba aur Sikandar uske hathon ki kapkapahat ko dekh sakein………. Wo dekh chuke the, magar uske hawaas chand lamhon ke liye bilkul kaam karna chhod gaye the. Apne saamne padi table par rakhey us lifaafey par hath rakhe wo kuch der use dekhta raha phir use table par rakhe rakhe usne uske andar se maujood kaghaz nikaal liya.
Dear Uncle Sikandar!
Mujhe aap ke bete ki maut ke barey mein jaan kar bahot afsos hua. Meri wajah se aap logon ko chand saal bahot pareshaani ka saamna karna pada, main uske liye maazrat khwaah hoon. Mujhe Salar ko kuch raqm ada karni thi. wo main aap ko bhijwa rahi hoon.
Khuda Hafiz
Imama Hashim
Salar ko laga wo waqai mar gaya hai. Safed chehrey ke saath usne kaghaz ke us tukdey ko dobara lifaafey mein daal diya. Kuch bhi kahe baghair usne lifaafa thaama aur uth khada hua. Sikandar aur Tayyaba dam bakhud use dekh rahe the. Jab wo Sikandar ke paas se guzarney laga to wo uth khadey hue.
“Salar!”
Wo ruk gaya. Sikandar ne uske kandhey par hath rakh diya.
“Jo kuch bhi hua…………Naa danistagi mein hua. Main nahin jaanta tha ke tum……… agar tum ne kabhi mujhe Imama ke barey mein apni feelings batayi hotin to main kabhi ye sab na karta. Main is saarey maamley ko kisi aur tarah handle karta ya phir uske sath tumhara raabta kara deta. Mere barey mein apne dil mein koi shikayat ya gila mat rakhna.”
Salar ne sar nahin uthaya. Un se nazar nahin milaai magar sar ko halki si jumbish di. Use un se koi shikwa nahin tha. Sikandar ne uske kandhe se hath hata liya.
Wo tezi se kamrey se nikal gaya, Sikandar chahte the wo wahan se chala jaaye. Unhon ne us ke honton ko kisi bachchey ki tarah kapkapatey hue dekha tha. Wo baar baar unhein bheench kar khud ko qaabu paaney ki ki koshish kar raha tha. Chand minute aur wahan rehta to shayad phoot phoot kar roney lagta. Sikandar apne pachhtaawey mein mazeed izaafa nahin karna chahte the.
Tayyaba ne is saari guftgu mein mudaakhlat nahin ki, magar Salar ke bahar jaane ke baad unhon ne Sikandar ki dil jui karne ki koshish ki.
“Pareshan hone ki zarurat nahin hai. Aap ne jo kuch kiya uski behtari ke liye kiya. Wo samajh jayega.”
Wo Sikandar ke chehrey se unki zehni kaifiyat ka andaaza laga sakti thin. Sikandar ek cigarette sulgaatey hue kamrey mein chakkar laga rahe the.
“Ye meri zindagi ki sab se badi ghalti thi. Mujhe Salar se puchey baghair ya uski bataye baghair ye sab kuch nahin karna chahiye tha. Mujhe Imama se is tarah ka jhoot bhi nahin bolna chahiye tha……. Mujhe……..”
Wo baat adhuri chhod kar ta’assuf aamez andaz mein ek hath ko mutthi ki surat mein bheenchey hue khidki mein jaa khadey hue.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-149/
Prev episode:
https://theothermeunfolded.com/blog/peer-e-kaamil-roman-urdu-umera-ahmed-episode-147/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar