Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Wo ek sarsabz-o-wasee’ sabza zaar tha jahan wo donon maujood the. Wasee’ khuley sabza zaar mein darakht the magar zyada buland nahin. Khoobsurat phool daar jhaadiyaan thin, chaaron taraf khamushi thi. wo donon kisi darakht ke saaye mein baithne ki bajaye ek phooldaar jhaadi ke qareeb dhoop main baithe the. Imama apne ghutnon ke gird baazu lapetey hue thi aur wo ghaas par chit leta hua tha. Uski aankhein band thin. Un donon ke jutey kuch faasley par pade hue the. Imama ne is baar khoobsurat safed rang ki chaadar odhi hui thi. un donon ke darmiyaan guftgu ho rahi thi. Imama use kuch kehte hue dur kisi cheez ko dekh rahi thi. us ne lete lete uski chaadar ke ek pallu se apne chehrey ko dhaanp liya. Yun jaise dhoop ki shoaaon se aankhon ko bachana chahta ho. Uski chaadar ne use ajeeb sa sukoon aur sarshaadi di thi. Imama ne chaadar ke sirey ko uske chehrey se hataane ya kheenchney ki koshish nahin ki. Dhoop uske jism ko taraawat bakhsh rahi thi. aankhein band kiye wo apne chehrey par maujood chaadar ke lams ko mehsoos kar raha tha aur neend use apni giraft mein le rahi thi.
Salar ne ek dam aankhein khol din. Wo apne bed par chit leta hua tha. Kisi cheez ne uski neend ko tod diya tha. Wo aankhein kholey kuch der bey yaqeeni se apne ird gird ke maahol ko dekhta raha. Ye wo jagah nahin thi jahan use hona chahiye tha. Ek aur khwaab……. Ek aur illusion……… usne aankhein band kar lin aur tab usko mobile phone ki aawaz ne mutawajjah kiya jo musalsal uske sirhaaney baj raha tha. Ye phone hi tha jo use us khwaab se bahar le aaya tha. Qadrey jhunjhlaatey hue lete lete haath badha kar usnne mobile utha liya. Dusri taraf Furqan tha.
“Kahan the Salar! Kab se phone kar raha hoon. Attend kyun nahin kar rahe the?” Furqan ne uski aawaz sunte hi kaha.
“Main so raha tha.” Salar ne kaha aur uth kar baith gaya. Uski nazar ab pehli baar ghadi par padi jo ab 4 baja rahi thi.
“Tum fauran Sayeeda amma ke haan chaley aao.” Dusri taraf se Furqan ne kaha.
“Kyun? Main ne tumhein bataya tha, main to ……..”
Furqan ne uski baat kaat di.
“Main jaanta hoon, tum ne mujhe kya bataya tha magar yahan kuch emergency ho gayi hai.”
“Kaisi emergency?” Salar ko tashweesh hui.
“Tum yahan aaogey to pata chal jayega. Tum fauran yahan pahoncho, main phone band kar raha hoon.”
Furqan ne phone band kar diya.
Salar kuch pareshani ke aalam mein phone ko dekhta raha. Furqan ki aawaz se use andaaza ho gaya tha ke wo pareshan tha magar Sayeeda amma ke haan pareshani ki nauiyat kya ho sakti thi.
15 minute mein kapdey tabdeel karne ke baad gaadi mein tha. Furqan ki agli call usne car mein receive ki.
“Tum kuch batao to sahi, hua kya hai? Mujhe pareshan kar diya hai tum ne?” Salar ne usse kaha.
“Pareshan hone ki zarurat nahin hai, tum idhar hi aa rahe ho. Yahan aaogey to tumhein pata chal jaayega. Main phone par tafseeli baat nahin kar sakta.”
Furqan ne ek baar phir phone band kar diya.
Tez raftaari se drive karte hue usne aadhe ghantey ka safar taqreeban 20 minute mein tay kiya. Furqan use Sayeeda amma ke ghar ke bahar hi mil gaya. Salar ke khayaal tha ke Sayeeda amma ke haan is waqt bahot chahel pahel hogi magar aisa nahin tha. Wahan dur dur tak kisi baraat ke aasaar nazar nahin aa rahe the. Furqan ke sath wo bairooni darwazey ke bayen taraf bane hue ek purani tarz ke drawing room mein aa gaya.
“Aakhir hua kya hai jo tumhein mujhe is tarah bulana pad gaya?”
Salar ab ulajh raha tha.
“Sayeeda amma aur unki beti ke sath ek mas’ala ho gaya hai.” Furqan ne uske saamne wale sofe par baithtey hue kaha. Wo bey had sanjeeda tha.
“Kaisa mas’ala?”
“Jis ladke se unki beti ki shadi ho rahi thi us ladki ne kahin aur apni marzi se shadi kar li hai.”
“My goodness!” Salar ke munh se bey ikhteyaar nikla.
“Un logon ne abhi kuch der pehle Sayeeda amma ko ye sab phone par bata kar un se maazrat ki hai. Wo log ab baaraat nahin laa rahe. Main abhi kuch der pehle un logon ke haan gaya hua tha, magar wo log waqai majboor hain. Unhein apne bete ke barey mein kuch pata nahin hai ke wo kahan hai, us ladke ne bhi unhein sirf phone par hi iski ittelaa di hai.” Furqan tafseel batane laga.
“Agar wo ladka shadi nahin karna chahta tha to use bahot pehle hi maan baap ko saaf saaf bata dena chahiye tha. Bhaag kar shadi kar lene ki himmat thi to maan baap ko pehle se inkaar kar dene ki bhi himmat honi chahiye thi.” Salar ne naa pasandeedgi se kaha.
“Sayeeda amma ke beton ko is waqt yahan hona chahiye tha, wo is maamley ko handle kar sakte the.”
“Laikin ab wo nahin hai to kisi na kisi ko to sab kuch dekhna hai.”
“Sayeeda amma ke koi aur qareebi rishteydaar nahin hain?” Salar ne pucha.
“Nahin, main ne uabhi kuch der pehle Dr Sabt Ali sahab se baat ki hai phone par.” Furqan ne use bataya.
“laikin Dr sahab bhi fauri taur par to kuch nahin kar sakenge. Yahan hote to aur baat thi.” Salar ne kaha.
“Unhon ne mujh se kaha hai ke main tumhari phone par un se baat karaun.” Furqan ki aawaz kuch dheemi thi.
“Meri baat ………… laikin kis liye?” Salar hairaan hua.
“Unka khayal hai ke is waqt tum Sayeeda amma ki madad kar sakte ho.”
“Main?” Salar ne chaunk kar kaha. “Main kis tarah madad kar sakta hoon?”
“Aamna se shadi kar ke.”
Salar dam bakhud palkein jhapkaye baghair use dekhta raha.
“Tumhara dimagh to theek hai?” Us ne bamushkil Furqan se kaha.
“Haan, bilkul theek hai.” Salar ka chehra surkh ho gaya.
“Phir tumhein paa nahin hai ke tum kya keh rahe ho.”
Wo ek jhatkey se uth khada hua. Furqan barq raftaari se uth kar uske raastey mein haail ho gaya.
“Kya soch kar tum ne ye baat kahi hai?” Salar apni awaz par qaabu nahin rakh saka.
“Main ne ye sab tum se Dr sahab ke kehne par kiya hai.” Salar ke chehrey par ek rang aa kar guzar gaya.
“Tum ne unhein mera naam kyun diya?”
“Main ne nahin diya Salar! Unhon ne khud tumhara naam liya hai. Unhon ne mujh se kaha tha ke main tum se darkhwast karun ke main uis waqt Sayeeda amma ki beti se shadki kar ke uski madad karun.”
Kisi ne Salar ke pairon ke niche se zameen kheenchi thi ya sar se aasmaan, use andaza nahin hua. Wo palat kar sofe par baith gaya.
“Main shadi shuda hoon Furqan! Tum ne unhein bataya?”
“Haan main ne unhein bata diya tha ke tum ne kai saal pehle ek ladki se nikaah kiya tha magar phir wo ladki dobara tumhein nahin mili.”
“Phir?”
“Wo is ke bawajood chahte hain ke tum Aamna se shadi kar lo.”
“Furqan……….main…………” Wo baat karte karte ruk gaya.
“Aur Imama…………uska kya hoga?”
“Tumhari zindagi mein Imama kahin nahin hai. Itne saalon mein kaun jaanta hai wo kahan hai, hai bhi ke nahin.”
“Furqan………” Salar ne turshi se uski baat kaati. “Is baat ko rehne do ke wo hai ya nahin. Mujhe sirf ye atao ke agar kal Imama aa jaati ho to…….. to kya hoga?”
“Tum ye baat Dr sahab se kaho.” Furqan ne kaha.
“Nahin, tum ye sab kuch Sayeeda amma ko bata do, zaruri to nahin hai ke wo ek aise shakhs ko qubool kar leti jis ne kahin aur shadi ki hai.”
“Wo agar baaraat le kar aa jaata to shayad ye bhi ho jaata. mas’ala to yahi hai ke wo Aamna se dusri shadi par bhi tayyar nahin hai.”
“Use dhunda jaa sakta hai.”
“Haan, dhunda jaa sakta hai magar ye kaam is waqt nahin ho sakta.”
“Dr sahab ne Aamna ke liye ghalat intekhaab kiya hai. Main ………… main Aamna ko kya de sakta hoon. Main to us aadmi se bhi badtar hoon jo abhi use chhod gaya hai.”
Salar ne bey chaargi se kaha.
“Salar ! unhein is waqt kisi ki zarurat hai, zarurat ke waqt sirf wahi aadmi sab se pehle zahen mein aata hai jo sab se zyada qaabil-e-aitbaar ho. Tum zindagi mein itne bahot se logon ki madad karte aa rahe ho, kya Dr Sabt Ali ki madad nahin kar sakte?”
“Main ne logon ki paise se madad ki hai. Dr sahab mujh se paisa nahin maang rahe.”
Is se pehle ke Furqan kuch kehta, uske mobile par call aane lagi. Usne number dekh kar mobile Salar ki taraf badha diya.
“Dr sahab ki call aa rahi hai.”
Salar ne sutey hue chehrey ke sath mobile pakad liya.
Wahan baithey mobile kaan se lagaye Salar ko pehli aar ehsaas ho raha tha ke zindagi mein har baat ha shakhs se nahin kahi jaa sakti. Wo jo kuch Furqan se keh sakta tha wo unse unchi aawaz mein baat nahin kar sakta tha. Unhein dalaail de sakta tha na bahaney bana sakta tha. Unhon ne makhsoos narm lehje mein usse darkhwast ki thi.
“Agar aap apne waldain se ijaazat le sakein to Aamna se shadi kar lein. Wo meri beti jaisi hai. Aap samjhein main apni beti ke liye aap se darkhwast kar raha hoon. Aap ko takleef de raha hoon laikin main aisa karne par majboor hoon.”
“Aap jaisa chahenge main waisa hi karunga.”
Usne maddham aawaz mein unse kaha.
“Aap mujh se darkhwast na karein, mujhe hukm dein.” Usne khud ko kehte paaya.
Furqan taqreeban 10 minute ke baad andar aaya.Salar mobile phone hath mein padkey gum sum farsh par nazrein jamaye hue tha.
“Dr sahab se baat ho gayi tumhari?”
Furqan ne uske bil muqaabil ek kursi par baithtey hue maddham aawaz mein usse pucha.
Salar ne sar utha kar use dekha phir kuch kahe baghair center table par uska mobile rakh diya.
“Main rukhsati abhi nahin karwaunga, bas nikaah kaafi hai.”
Usne chand lamhon baad kaha. Wo apne hathon ki lakeeron ko dekh raha tha. Furqan ko bey ikhteyaar us par taras aaya. Wo ‘muqaddar’ ka shikaar hone wala pehla insaan nahin tha.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-160/
Prev episode:
https://theothermeunfolded.com/blog/peer-e-kaamil-roman-urdu-umera-ahmed-episode-158/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar