Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
“Tum usse Imama ke barey mein baat karna chahte ho?” Furqan ne gaadi driver karte hue Salar se pucha.
“Nahin, sirf Imama ke barey mein nahin aur bhi bahot si baatein hai jo main karna chahta hoon.”
“For god’s sake Salar! Gadey murdey ukhaaney ki koshish mat karo.” Furqan ne naraazi se kaha.
“Usko meri tarjeehaat aur maqaasid ka pata hona chahiye. Ab use saari zindagi guzaarni hai mere sath.”
Salar ne uski naraazi ki parwaah kiye baghair kaha.
“Pata chal jayega use, samajhdaar ladki hai aur agar kuch batana hi hai to ghar laa kar batana. Wahan pandora box khol kar mat baithna.”
“Ghar laa kar batane ka kya fayda, jab uske paas waapsi ka koi raasta hi na ho. Main chahta hoon wo meri baaton ko sune, samjhe, soche aur phir koi faisla kare.”
“Ab koi faisla nahin kar sakti wo. Tumhara aur uska nikaah ho chuka hai.”
“Rukhsati to nahin hui.”
“Usse kya farq padta hai.”
“Kyun nahin padta. Agar usko meri baat par aitraaz hua to wo is rishtey ke barey mein nazar-e-saani kar sakti hai.” Salar ne sanjeedgi se kaha.
Furqan ne chubhti hui nazron se use dekha.
“Aur is nazar-e-saani ke liye tum kis tarah ke haqaaiq aur dalaail pesh karne wale ho uske saamne?”
“Main use sirf chand baatein batana chahta hoon jis ka jaanna uske liye zaruri hai.” Salar ne do tok andaz mein kaha.
“Wo Dr Sabt Ali ki rishtey daar hai, main is hawaley se uski bahot izzat karta hoon. Dr sahab ne mujh se nahin kaha hoa to ye rishta qayem bhi na hota laikin main……….”
Furqan ne uski baat kaat di.
“Theek hai, tum ko usse jo kehna hai keh lena laikin Imama ke zikr ko zara kam hi rakhna kyun ke wo agar kisi baat se hurt hui to wo yahi baat hogi, baaqi cheezon ki parwaah wo shayad na karey. Afterall, dusri biwi hona ya kehlana aasan nahin hota.”
Furqan ne use samjhane ki koshish ki.
“Aur main chaha hoon wo ye baat mehsoos karey, soche iske barey mein……… abhi to kuch bhi nahin bigda. Tum kehte ho wo khoobsurat hai, padhi likdhi hai, achchi family se talluq hai uska ………”
Furqan ne ek baar phir uski baat kaati.
“Khatm karo is mauzoo ko Salar! Tum ko usse jo kuch kehna hai, use jo samjhana hai jaa kar keh lena……..”
“Main usse akele mein baat karna chahta hoon.” Salar ne kaha,.
“Main Sayeeda amma se keh dunga. Wo tumhein akele mein usse baat kara dengi.”
Furqan ne uski baat par sar hilaatey hue kaha.
Wo Aadh ghantey mein Sayeeda amma ke ghar pahonch gaye. Darwaza Sayeeda ama ne hi khola tha aur Salar aur Furqan ko dekh kar wo jaise khushi se bey haal ho gayi thin. Wo un donon ko usi baithak numa kamrey mein le gayin.
“Sayeeda amma! Salar, Aamna se tanhaai mein kuch baatein karna chahta hai.”
Furqan ne kamrey mein daakhil hote hue kaha. Sayeeda amma kuch uljhin.
“Kaisi baatein?” wo ab Salar ki taraf dekh rahi thin jo khud bhi baithne ke bajaye Furqan ke sath hi khada tha.
“Hain chand baatein, jo wo usse karna chahta hai magar pareshani wali koi baat nahin.” Furqan ne unhein tasalli di.
Sayeeda amma ek baar phir Salar ko dekhne lagin. Usne nazrein chura lin.
“Achcha…….. phir tum mere sath aa jao beta! Aamna andar hai. Idhar aa kar usse mil lo.”
Sayeeda amma kehte hue darwazey se bahar nikal gayin. Salar ne ek nazar Furqan ko dekha phir wo khud bhi Sayeeda amma ke peechey chala gaya.
Baithak bairooni darwazey ke bayen jaanib thi. dayen jaanib upar jaane wali seedhiyaan thin. Bairooni darwazey se kuch aage bilkul saamne kuch seedhiyan chadhney ke baad lakdi ka ek aur purani tarz ka bahot bada darwaza tha jo is waqt khula hua tha aur wahan surkh eenton ka bada wasee’ sehan nazar aa raha tha.
Sayeeda amma ka rukh unhi seedhiyon ki taraf tha. Salar unse kuch faasley par tha. Sayeeda amma ab seedhiyan chadh rahi thin. Wo jab seedhiyan chadh kar sehan mein daakhil ho gayin to Salar bhi kuch jhijhakta hua seedhiyan chadhne laga.
Wasee’ surkh eenton ke sehan ke donon atraaf diwaron ke sath kyariyaan banayi gayi thin jin mein lage hue sabz paudey aur belein surkh eenton se bani hui diwaron ke background mein bahot khoobsurat lag rahi thin. Sehan ke ek hissey mein dhoop thi aur din ke is hissey mein bhi wo dhoop bey had tez thi. dhoop ne surkh eenton ko kuch aur numayaan kar diya tha.
Aahista aahista seedhiyan chadh kar Salar ne sehan mein qadam rakh diya aur wo thitak kar ruk gaya. Sehan ke dhoop wale hisse mein rakhi chaar paai ke saamne ek ladki khadi thi. Wo shayad abhi chaar paai se utri thi. uski pusht Salar ki taraf thi. wo safed kurtey aur siyaah Shalwaar mein malboos thi aur naha kar nikli thi. uski kamar se kuch upar uske siyaah geeley baal laton ki surat mein uski pusht par bikhrey hue the. uska safed dupatta chaar paai par pada hua tha. Wo apne kurtey ki aastinon ko kohniyon tak fold karte hue Salar ki taraf mudi.
Salar saans nahin le saka tha. Usne zindagi mein usse zyada khoobsurat ladki nahin dekhi thi ya phir use us ladki se zyada khoobsurat koi nahin laga tha. Wo yaqeenan Aamna thi. uske ghar mein Aamna ke alawa aur kaun ho sakta tha. Wo aage nahin badh saka. Wo usse nazrein nahin hata saka. Kisi ne uske dil ko mutthi mein le liya tha. Dhadkan ruki thi ya waqt, wo nahin jaan saka tha. Uske aur Aamna ke darmiyaan bahot faasla tha. Aastin modtey hue Aamna ki pehli nazar Sayeeda amma par padi.
“Salar beta aaya hai.”
Sayeeda amma bahot aage badh aayi thin. Aamna ne gardam ko tirchha karte hue sehan ke darwazey ki taraf dekha. Salar ne use bhi thitaktey dekha, phir wo mudi. Uski pusht ek baar phir Salar ki taraf thi. Salar ne use jhuktey aur chaar paai se dupatta uthatey dekha. Dupattey ko seeney par pahilaatey hue usne uske ek pallu ke sath apne sar aur pusht ko bhi dhaanp liya tha.
Salar ab uski pusht par bikhrey baal nahin dekh sakta tha magar use Aamna ke itmenaan ne hairaan kiya tha, wahan koi ghabrahat, koi jaldi, koi hairaani nahin thi.
Sayeeda amma ne mud kar Salar ko dekha phir use darwazey mein hi khade dekh kar unhon ne kaha.
“Are beta! Wahan kyun khade ho, andar aao. Tumhara apna hi ghar hai.”
Aamna ne dupatta odhney ke baad mud kar use ek baar phir dekha tha. Wo ab bhi use hi dekha raha tha. Palkein jhapaaye baghair, dam bakhud, bey his-o-harkat.
Aamna ke chehrey par ek rang aa kar guzar gaya. Wo ab aage aa gaya tha.
“Ye Aamna hai, meri beti.” Sayeeda amma ne uske qareeb aane par taaruf karaya.
“Assalamu Alaikum.”
Salar ne Aamna ko kehte suna. Wo kuch na bol saka. Wo usse chand qadmon ke faasley par khadi thi. use dekha mushkil ho gaya tha.
Wo nervous ho raha tha. Aamna ne uski ghabrahat ko mehsoos kar liya tha.
“Salar! Tum se kuch baatein karna chahta hai.”
Sayeeda amma ne Aamna ko bataya.
Aamna ne ek baar phir Salar ko dekha. Donon ki nazrein milin, donon ne baik waqt nazrein churaain.
Aamna ne Sayeeda amma ko dekha aur Salar ne Aamna ki kalaaiyon tak mahendi ke naqsh-o-nigaar se bharey haathon ko.
Ek dam use laga ke wo is ladki se kuch nahin keh sakta.
“Salar beta! Andar kamrey mein chalte hain. Wahan tum itmenaan se Aamna se baat kar lena.”
Sayeeda amma ne is baar Salar ko mukhaatib kiya.
Sayeeda amma kehte hue andar bar aamdey ki taraf badhin. Salar ne Aamna ko sar jhukaye unki pairvi karte dekha. Wo wahin khada use andar jaata dekhta raha. Sayeeda amma kamrey ka darwaza khol kar andar daakhil ho gayin. Aamna ne darwazey ke paas pahonch kar mudte mudte use dekha. Salar ne barq raftaari se nazrein chura lin. Aamna ne mud kar use dekha phir shayad wo hairaan hui. Salar andar kyun nahin aa raha tha. Salar ne uski taraf dekhe baghair sar jhukaaye qadam aage badha diye. Aamna kuch mutmayin ho karr mud kar kamrey mein daakhil ho gayi.
Salar jab kamrey mein daakhil hua to Sayeeda amma pehle hi ek kursi par baith chuki thin. Aamna light on kar rahi thi. Salar ko dhoop se andar aa kar khunki ka ehsaas hua.
“Baitho beta!” Sayeeda amma ne ek kursi ki taraf ishaara karte hue usse kaha. Salar kursi par baith gaya. Aamna light on karne ke baad usse kuch faasley par unke bil muqaabil ek couch par baith gayi.
Salar muntazir tha ke Sayeeda amma chand lamhon mein wahan se uth kar chali jaayengi. Furqan ne waazeh taur par unhein bataya tha ke wo usse tanhaai mein baat karna chahta tha magar chand lamhon ke baad Salar ko andaza ho gaya ke uska ye intezaar bey kaar hai. Wo shayad ye bhul gayi thin ke Salar tanhaai mein Aamna se milna chahta tha ya phir unka ye khayal tha ke wo tanhaai sirf Furqan ki adam maujoodgi ke liye thi. Salar ne unhein us mein shaamil nahin kiya hoga ya phir wo abhi Salar ko itna qaabil-e-aitbaar nahin samajhtin ke apni beti ke sath use akela chhod detin.
Salar ko aakhri andaza saheeh laga wo usse jo kuch aur jitna kuch kehna chahta tha, Sayeeda amma ke saamne nahin kehna chahta tha aur na hi keh sakta tha. Usne apne zahen ko khangaalney ki koshish ki. Use kuch to kehna hi tha, wo kuch nahin dhund saka. Uska zahen khaali tha.
Neem taareek khunk kamrey mein bilkul khamushi thi. wo ab donon haathon ki ungliyan ek dusrey mein phansaaye farsh par nazrein jamaaye baitha tha.
Aamna ne kamrey mein koi fancy light raushan ki thi. oonchi diwaaron wala furniture se bhara hua wo wasee’-o-areez kamra shayad sitting room ke taur par istemaal hota tha. Usemein bahot zyada darwazey the aur tamaam darwazey band the. Kamrey mein maujood waahid khidki bar aamdey mein khulti thi aur uske aagey pardey the. Farsh ko bhaari bharkam maroon naqsh-o-nigaar ke qaaleen se dhaka gaya tha aur fancy light kamrey ko puri tarah raushan karne mein nakaam ho rahi thi.
Kam az kam kamrey mein Salar ko taareeki hi mehsoos ho rahi thi. Shayad ye uske ehsaasaat the ya phir……….
“Mujhe apne optician se aaj zaroor milna chahiye. Qareeb ke sath sath shayad meri dur ki nazar bhi kamzor ho gayi hai.”
Usne maayusi se socha. Center table ke dusri taraf baithi Aamna ko wo dekh nahin paa raha tha. Usne ek baar phir nazar qaaleen par jamaa di phir usne ek dam Aamna ko uthte dekha. Wo diwar ke paas jaa kar kuch aur lights on kar rahi thi. kamra tubelight ki raushni mein jagmaga utha. Fancy light band ho gayi. Salar hairaan hua. Aamna ne pehle tubelight on kyun nahin ki thi, phir achanak use ehsaas hua wo bhi nervous thi.
Aamna dobara phir uske saame couch par aa kar nahin baithi. Wo usse kuch faasley par Sayeeda amma ke paas ek kursi par baith gayi. Salar ne is baar use dekhne ki koshish nahin ki. Wo usi tarah qaaleen ko ghurta raha. Sayeeda amma ka sabr bil aakhir jawaab de gaya. Kuch der baad unhon ne khankaar kar Salar ko mutawajjah kiya.
“Karo beta! Wo baatein jo tum ne Aamna se tanhaai mein karni thin.”
Unhon ne Salar ko bade pyaar se yaad dilaya.
“Itni der se chup baithe ho, mera to dil haul raha hai.”
Salar ne ek gehra saans liya, phir Sayeeda amma aur Aamna ko baari baari dekha.
“Kuch nahin, main bas inhein dekhna chahta tha.”
Usne apne lehjey ko hattal-imkaan hamwaar rakhtey hue kaha. Sayeeda amma ke chehrey par bashashat aa gayi.
“To itni si baat thi aur Furqan ne mujhe dara hi diya. Haan haan zaroor dekho, kyun nahin. Biwi hai tumhari.” Wo uth khada hua.
“Aap in se keh dein ke samaan pack kar lein, main bahar intezaar karta hoon.”
Wo darwazey ki taraf badht hua Sayeeda amma se bola. Aamna ne chaunk kar use dekha. Sayeeda amma bhi hairaani se use dekh rahi thin.
“Magar beta! Tum to sirf kuch baatein karna chahte the isse, phir rukhsati…….. mera matlab hai main chahti thi baqaaida rukhsat karun aur ……….”
Salar ne narmi se Sayeeda amma ki baat kaati.
“Aap ye samajh lein ke main baqaaida rukhsat karwane hi aaya hoon.”
Sayeeda amma kuch der uska chehra dekhti rahin phir bolin.
“Theek hai beta! Tum agar aisa chahte ho to aisa hi sahi magar iftaar ke liye ruko. Chand ghantey hi baaqi hain, khana to kha kar jao.”
“Nahin, mujhe aur Furqan ko kuch kaam hai. Main use sirf ek ghantey ke liye le kar aaya tha. Zyada der rukna mumkin nahin hai mere liye.” Wo khade khade keh raha tha.
“Laikin amma! Mujhe to samaan pack karne mein bahot der lagegi.”
Aamna ne wahin kursi par baithe hue pehli baar saari guftgu mein hissa liya. Salar ne mud kar use dekhe baghair kaha.
“Sayeeda amma! Aap in se kahein ye aaraam se packing kar lein, main bahar intezaar karunga. Jitni der ye chahein.”
Wo ab kamrey se nikal gaya tha.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-164/
Prev episode:
https://theothermeunfolded.com/blog/peer-e-kaamil-roman-urdu-umera-ahmed-episode-162/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar