Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Dr Sabt Ali ki 3 betiyaan thin, Maryam unki teesri beti thi. unki badi donon betiyon ki shadi ho chuki thi. jab ke Maryam abhi medical ki taalim haasil kar rahi thi.
Dr Sabt ne Iama ko apni badi betiyon se bhi muta’arif karwaya tha. Wo donon bairoon shaher muqeem thin aur unka raabta zyada tar phone ke zariye hi hota tha magar ye ittefaaq hi tha ke Imama ke wahaaane ke chand hafton ke dauraan wo donon baari baari kuch dinon ke liye wahan aayin.
Imama se unka rawaiiya Maryam se mukhtalif nahin tha. Unke rawaiyye mein uske liye mohabbat aur maanusiyat ke alawa kuch nahin tha laikin Imama ko unhein dekh kar hamesha apni badi behnein yaad aa jaatin aur phir jaise sab kuch yaad aa jaata. apna ghar ……….. baba ……….. bade bhai …….. Waseem aur Saad ………… Saad se uska koi khuni rishta nahin tha. Unke jama’at ke baa asar khaandan apne gharon mein aulaad hone ke bawajood bey sahaara yateem bachchon mein se kisi ek ladkey ko god lene lage the. Ye apni jama’at ke afraad ki mustaqbil mein taadaad badhaney ke liye koshishon ka ek zaruri hissa thi. aisa bachcha hamesha aam musalmaanon ke bachchon mein se hi hota aur hamesha ladka hota. Saad bhi isi silsiley mein bahot chhoti umr main uske ghar aaya tha. Wo us waqt school ke aakhri saalon mein thi aur use ghar mein hone wale is ajeeb izaafey ne kuch hairaan kiya tha.
“Ham logon ne Allah taala ke ehsaanaat ka shukr ada karne ke liye Saad ko god liya hai taa ke ham bhi dusrey logon par ehsaanaat kar sakein aur neki ka ye silsila jaari rahe.”
Uski ammi ne uske istefsaar par bataya tha.
“Tum samjho wo tumhara chhota bhai hai.”
Tab use apne baba aur ammi par bahot fakhr hua tha. Wo kitn azeem log the ke ek bey sahaara bachchey ko achchi zindagi dene ke liye ghar le aaye the, use apna naam de rahe the, Allah ki ataa kardah neymaton ko uske sath baant rahe the. Usne tab ghaur nahin kiya tha ke aisa hi ek bachcha uske taaya Aazam ke ghar par bhi kyun tha. Aisa hi ek bachcha uske chhotey chacha ke ghar par kyun tha? Aise hi bahot se dusrey bachchey unke jaanney waaley kuch aur baa asar khaandaanon ke ghar par kyun the? Uske liye bas yahi kaafi tha ke wo ek achcha kaam kar rahe hain. Unki jama’at ek “achche” kaam ki tarweej kar rahi thi. ye usne bahot baad mein jaana tha ke is “Achche” kaam ki kya haqeeqat thi.
Saad usse bahto maanus tha. Uska zyada waqt Imama ke sath hi guzarta tha. Wo shuru ke kai saal Imama ke kamrey mein uske bed par hi sota raha. Islam qubool kar lene ke baad medical college se wo jab bhi Islamabad aati, wo Saad ko Hazrat Muhammad ﷺ ke barey mein batati rehti. Wo itna chhota tha ke kisi cheez ko mantiqi tariqey se nahin samjhaya jaa sakta tha magar wo usse sirf ek baat kehti rahi.
“Jaise Allah ek hota hai, usi tarah hamarey Paighambar ﷺ bhi ek hi hain. Un sa koi aur nahin ho sakta.”
Wo use sath ye taakid bhi karti rehti ke wo un donon ki aapas ki baaton ke barey mein kisi ko bhi nahin bataye aur Imama ye bhi jaanti thi ke uski ye koshish bey kaar thi. Saad ko bhi bachpan hi se mazhabi ijtema’aat mein le jaaya jaaney laga aur wo us asar ko qubool kar raha tha. Wo hamesha sochti ke wo medical ki taalim ke baad Saad ko le kar apne ghar waalon se alag ho jayegi aur wo ye bhi jaanti thi ke ye kis qadr mushkil kaam tha.
Usne ghar se bhaagtey hue bhi Saad ko apne sath le aane ka socha tha magar ye kaam naa mumkin tha. Wo nahin chahti thi ke wo use laatey hue khud bhi pakdi jaaye. Wo use wahan chhod aayi thi. Aur ab Dr Sabt ke haan pahonch jaane ke baad use uska baar baar khayal aata ke agar wo kisi tarah use wahan se le aati to wo bhi is daldal se nikal sakta tha magar in tamaam sochon, tamaam khayaalon ne apne ghar walon ke liye uski mohabbat ko kam nahin kiya na apne ghar walon ke liye, na Jalaal Ansar ke liye.
Wo unka khayal aane par rona shuru hoti to saari raat roti rehti. Shuru ke dinon mein wo ek alag kamrey mein thi aur Maryam ko uska andaza nahin tha magar ek raat wo achanak uske kamrey mein apni koi kitaab lene aayi. Raat ke pichhley paher use qata’an andaza nahin tha ke Imama jaag rahi hogi aur na sirf jaag rahi hogi balke ro rahi hogi.
Imama kamrey ki light off kiye apne bed par kambal odhey ro rahi thi jab achanak darwaza khula to usne kambal se chehrey ko dhaanp liya. Wo nahin jaanti thi Maryam ko kaise uske jaagney ka andaza hua tha.
“Imama! Jaag rahi ho?”
Usne Imama ko aawaz di. Imama ne harkat nahin ki magar phir Maryam uski taraf chali aayi aur usne kambal uske chehrey se hata diya.
“Mere Allah……… tum ro rahi ho………. Aur is waqt?”
Wo uske paas tashweesh ke aalam mein bed par baith gayi. Imama ki aankhein buri tarah sooji hui thin aur uska chehra aansuon se bheega hua tha magar use sab se zyada nidaamat pakdey jaane ki thi.
“Isliye tumhein raaton ko neend nahin aati kyun ke tum roti rehti aur aur subah keh deti ho ke raat ko soney mein diqqat hui isliye aankhein sooji hui hain. Bas tum aaj se yahan nahin sou gi. Utho mere kamrey mein chalo.”
Usne kuch barhami ke aalam mein use kheench kar uthaya. Imama ek lafz nahin bol saki. Wo is waqt bey had sharminda thi.
Maryam ne iske baad use apne kamrey mein hi sulaana shuru kar diya. Raaton ko der tak roney ka wo silsila khatm ho gaya agar neend par uska ab bhi koi ikhteyaar nahin tha. Use neend bahot der se aati thi.
Kai baar Maryam ki adam maujoodgi mein uski medical ki kitaabein dekhtin aur uska dil bhar aata. Wo jaanti thi sab kuch bahot peechey reh gaya tha.
Subah Maryam aur Dr Sabt ke ghar se chale jaane ke baad wo saara din aunty ke sath guzaar deti ya shayad wo saara din uske sath rehne ki koshish karti thin. Wo use akela na rehne dene ki koshish mein masroof rehti thin magar unke sath hote hue bhi wo pata nahin kin kin sochon mein doobi rehti thi.
Usne Salar ke sath dobara raabta karne ki koshish nahin ki thi. wo jaanti thi iska koi faayda nahin tha. Uski zehni pareshaani mein izaafey ke alawa us raabtey se use kuch haasil nahin hone wala tha.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-175/
Prev episode:
https://theothermeunfolded.com/blog/peer-e-kaamil-roman-urdu-umera-ahmed-episode-173/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar