Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
MBA ka dusra saal bahot pur sukoon guzra tha. Padhai ke alawa uski zindagi mein aur koi sar garmi nahin rahi thi. Wo games par sirf discussions mein hi apne class fellows ke sath guftgu karta ya phir group projects ke silsiley mein un ke sath waqt guzaarta. Baaqi ka saara waqt wo library mein guzaar deta. Weekend par uski waahid sar garmi islamic center jaana tha jahan wo ek Arab se Quran paak tilawat karna seekha karta tha phir wo Quran paak ke un asbaaq ko dohraya karta phir usi Arab se usne Arabic zabaan seekhna shuru kar di.
Khalid Abdul Rehman naami wo Arab buniyaadi taur par ek medical tactician tha aur ek hospital se wabasta tha. Wo weekend par wahan aa kar Arabic zabaan aur Quran paak ke classes liya karta tha. Wo us kaam ka koi moawzaa nahin liya karta tha balke Islamic center ki library mein maujood kitaabon ki ek badi tadaad bhi usi ke doston aur rishtey daaron ki taraf se atiyaa ki gayi thin.
Quran paak ki un hi classes ke dauraan ek din usne Salar se kaha.
“Tum Quran paak hifz kyun nahin karte?” Salar uske is tajweez numa sawaal par kuch der hairaani se uska munh dekhna laga.
“Main………Main kaise kar sakta hoon?”
“Kyun………tum kyun nahin kar sakte? Khalid ne jawaban usse pucha.
“Ye bahot mushkil hai aur phir mere jaisa aadmi, nahin main nahin kar sakta.” Salar ne chand lamhon ke baad kaha.
“Tumhara zahen bahot acha hai balke main agar ye kahun ke main ne apni aaj tak ki zindagi mein tum se zaheen aadmi nahin dekha. Jitni tez raftaari se tum ne itne mukhtasar arsey mein itni choti badi suratein yaad ki hain koi aur nahin kar saka aur jitni tez raftaari se tum Arabic seekh rahe ho main us par bhi hairaan hoon. Jab zahen is qadr zarkhaiz ho aur duniya ki har cheez deekh lene aur yaad rakhne ki khwahish ho to Quran paak kyun nahin. Tumhare zahen par Allah ta’ala ka bhi haq hai.” Khalid ne kaha.
“Aap meri baat nahi samjhe. Mujhe seekhne par koi aitraaz nahin magar ye bahot mushkil hai. Main is umr mein ye nahin seekh sakta.” Salar ne wazahat ki.
“Jab ke mera khayal hai ke tumhein Quran paak hifz karne mein bahot aasani hogi. Tum ek baar ise hifz karna shuru karo, main ks aur ke barey mein to daawa na karta magar tumhare barey mein, main daawey se ye keh sakta hoon ke tum na sirf bahot aasani se use hifz kar loge balke bahot kam arsey mein……..”
Salar ne us din us mauzoo ke barey mein mazeed koi baat nahi ki.
Magar us raat apne apartment par wapas aane ke baad wo Khalid Abdul Rehman ki baaton ke barey mein hi sochta raha. Uska khayal tha ke Khalid Abdul Rehman dobara is ke barey mein usse baat nahin karega. Magar agle haftey Khalid ne ek baar phir usse yahi sawaal kiya.
Salar bahot der chup chaap use dekhta raha phir usne maddham aawaz mein Khalid se kaha.
“Mujhe khauf aata hai.”
“Kis cheez se?”
“Quran paak hifz karne se?” Khalid ne qadrey hairaani se pucha.
Salar ne asbaat mein sar hila diya.
“Kyun………?” wo bahot der khamoosh raha phir carpet par apni ungli se lakeerein kheenchtey aur unhein dekhte hue usne Khalid se kaha.
“Main bahot gunaah kar chuka hoon, itne gunaah ke mujhe unhein ginna ginna bhi mushkil ho jayega. Sagheera, kabeera har gunaah jo insaan soch sakta hai ya kar sakta hai. Main us kitaab ko apne seeney ya zahen mein mehfooz karne ka soch bhi nahin sakta. Mera seena aur zahen paak to nahin hai. Mere jaise log ise……..ise hifz karne ke layaq nahin hote. Main to aisa soch bhi nahin sakta.” Us ki aawaz bharra gayi.
Khalid kuch der khamoosh raha phir usne kaha. “Abhi bhi gunaah karte ho?” Salar ne nafi mein sar hilaa diya.
“To phir kis cheez ka khaud hai. Tum agar Quran paak tilaawat kar sakte ho, apne un saare gunaahon ke bawajood to phir ise hifz bhi kar sakte ho aur phir tum ne gunaah kiye magar tum ab gunaah nahin karte, ye kaafi hai. Agar Allah ta’ala ye nahin chahega ke tum use hifz karo to tum use hifz nahin kar sakoge chahe tum laakh koshish kar lo aur agar tum khush qismat hue to tum ise hifz kar loge.” Khalid ne chutki bajatey hue jaise ye mas’ala hal kar diya tha.
Salar us raat jaagta raha, aadhi raat ke baad usne pehla parah khol kar kaanptey hathon aur zabaan ke sah hifz karna shuru kiya. Use hifz karte hue use ehsaas hone laga ke Khalid Abdul Rehman theek kehta tha. Use Quran paak ka bahot sa hissa pehle hi yaad tha. Khauf ki wo kaifiyat jo us ne Quran paak hifz karna shuru karte hue mehsoos ki thi wo zyada der nahin rahi thi. Uske dil ko kahin se isteqaamat mil rahi thi. Kahan se? koi uski zabaan ki ladkhadahat door kar raha tha, kaun……….? Koi uske haathon ki kapkapahat khatm kar raha tha, kyun…………?”
Fajr ki namaaz se kuch der pehle wo wo us waqt bey tahaasha roya jab usne pichley 5 ghantey mein yaad kiye hue sabaq ko pehli baar mukammal taur par dohraya. Wo kahin nahin atka tha. Wo kuch nahin bhoola tha. Zair zabar ki koi ghalti nahin, aakhri chand aayaat par uski zabaan pehli baat kapkapaane lagi thi. Aakhri chand aayaat ada karte hue use badi diqqat hui thi kyun ke wo us waqt aansuon se ro raha tha.
“Agar Allah chahega aur tum khush qismat hoge to tum Quran paak hifz kar loge warna kuch bhi kar lo, nahin kar paoge.” Use Khalid ki baar yaad aa rahi thi.
Fajr ki namaaz ada karne ke baad usne casette par apni zindagi ke us pehle sabaq ko record kiya tha. Ek baar phir use kisi diqqat ka saamna nahin karna pada tha. Uski aawaz mein pehle se zyada rawaani aur lehje mein pehle se zyada fasaahat thi.
Uski zindagi mein ek nayi cheez shaamil ho gayi thi. Us par ek aur ehsaan kar diya gaya tha magar uska depression khatm nahin hua tha. Wo raat ko sleeping pills ke baghair zindagi ka tasawwur bhi nahin kar sakta tha aur sleeping pills lene ke bawajood wo kabhi apne kamrey ki lights off nahin kar saka tha. Wo tareeki se khauf khata ha.
Ye phir Khalid Abdul Rehman hi tha jis ne ek din usse kaha tha. Wo use Quran paak ka sabaq zabaani suna raha tha aur use ehsaas ho raha tha ke Khalid Abdul Rehman musalsal uske chehrey par nazrein jamaaye hue tha jab usne apna sabaq khatm kiya aur paani ka glass utha kar apne honton se lagaya to usne Khalid ko kehte suna.
“Main ne kal raat tumhein khwaab mein haj karte dekha hai.”
Salar munh mein le jaane wala paani halaq se utaar nahin saka. Glass niche rakhte hue Khalid ko dekhne laga.
“Is saal tumhara MBA ho jayega. Agley saal tum haj kar lo.”
Khalid ka lehja bahot rasmi tha. Salar ne munh mein maujood paani ghair mehsoos andaaz mein halaq se niche utaar liya. Wo us din usse koi sawaal jawaab nahin kar saka tha. Uske paas koi sawaal tha hi nahin.
MBA ke final semester se do haftey pehle usne Quran paak mukammal hifz kar liya tha. Final semester ke 4 haftey ke baade 23.5 ki umr mein usne apni zindagi ka pehla haj kiya tha. Wahan jaate hue wahan se aate hue uske dil-o-dimaagh mein kuch bhi nahin tha. Koi takabbur, koi tafakkhur, koi rishk kuch bhi nahin. Uske saath Pakistani camp mein saath jaane wale shayad wo log honge jo khush qismat honge. Unhein unki nekiyon ke ewaz wahan bulaya gaya tha. Wo Quran paak hifz na kar raha hota to haj karne ka sochta bhi nahin, jo shakhs Haram shareef se door Allah ka saamna karne ki himmat na rakhta ho usse ye tawaqqo rakhna ke wo Kaa’ba ke saamne pahonch kar Allah ka saamna kar lega wo har jagah jaane ko tayyar ho jaata, magar Khana-e-Kaaba jaane ki jurrat nahin kar sakta tha.
Magar Khalid Abdul Rehman ke ek baar kehne par usne jaise guthney tektey hue haj par jaane ke liye papers jama karwa diye the.
Logon ko haj par jaane ka mauqa tab milta tha jab unke paas gunaah nahin hote. Nekiyon ka hi ambaar hota hai. Salar Sikandar ko ye mauqa tab mila tha jab uske paas gunaahon ke alawa bhi kuch bhi nahin the.
Haan theek hai, agar main gunaah karne se khauf nahin khaata raha to phir ab mujhe Allah ke saamne jaane aur maazrat karne se bhi khauf nahin khana chahiye. Sirf yahi hai naa main wahan sar nahin utha sakunga, nazrein upar nahin kar sakunga. Mujh se maafi ke alawa aur koi lafz nahin utha sakunga. Nazrein upar nahin kar sakunga. Munh se maafi ke alawa aur koi lafz nahin nikaal sakunga, to theek hai mujhe ye saza bhi milni chahiye. Main to is se zyada sharmindagi aur be izzati ka mustahiq hoon. Har baar haj par koi na koi shakhs aisa aata hoga, jis ke paas gunaahon ke alawa aur kuch hoga hi nahin. Is baar wo shakhs main sahi, Salar Sikandar sahi.” Usne socha tha.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-113/
Prev episode:
https://theothermeunfolded.com/blog/peer-e-kaamil-roman-urdu-umera-ahmed-episode-111/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar