Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
“Batao na aakhir tumhari zindagi ki sab se badi khwahish kya hai?” Us din college mein Imama ne Jaweriya se israar kiya.
Jaweriya kuch der uska chehra dekhti rahi. “Meri khwahish hai ke tum musalman ho jao.”
Imama ko jaise current laga. Us ne shock aur be-yaqeeni ke aalam mein Jaweriya ko dekha. Wo dheeme lehje mein kehti ja rahi thi.
“Tum meri itni achi aur gehri dost ho ke mujhe soch kar takleef hoti hai ke tum gumrahi ke raaste par chal rahi ho aur tumhein is ka ehsaas tak nahin hai……. Na sirf tum balke tumhari puri family……. Meri khwahish hai ke nek a’amaal par agar Allah mujhe jannat mein bheje to tum mere sath ho laikin uske liye musalman hona to zaruri hai.”
Imama ke chehre par ek ke baad ek rang aaraha tha. Bahot der baad wo kuch bolne ke qabil ho saki.
“Main tawaqqo nahin kar sakti thi Jaweriya ke tum mujh se Tehreem jaisi batein karogi. Tumhein to main apna dost samajhti thi magar tum bhi……..” Jaweriya ne narmi se uski baat kaat di.
“Tehreem ne tum se tab jo kuch kaha tha, theek kaha tha.”Imama palkein jhapkaye baghair use dekhti rahi, use Jaweriya ki baton se bahot takleef ho rahi thi.
“Aur sirf aaj hi nahin, main us waqt bhi Tehreem ko sahi samajhti thi, magar meri tumhare sath dosti thi aur main chahne ke bawajood tum se ye na keh saki ke main Tehreem ko haq-bajanib samajhti hoon. Agar wo kehti thi ke tum musalman nahin ho to ye thik tha. Tum musalman nahin ho.”
Imama ki aankhon mein aansu aa gaye. Kuch bhi kahe baghair wo jhatke se uth khadi hui. Jaweriya bhi uske sath khadi ho gayi. Imama ne kuch bhi kahe baghair wahan se jane ki koshish ki magar Jaweriya ne uska baazu pakad liya.
“Tum mera baazu chod do….. Mujhe jane do, aur aayinda mujh se kabhi baat mar karna.”Imama ne bharraye hue lehje mein usse apna bazu chudane ki koshish karte hue kaha.
“Imama! Meri baat samajhne ki koshish karo…… Main……..”
Imama ne uski baat kaat di. “Tum ne kitna hurt kiya hai mujhe. Jaweriya, mujhe kam az kam tum se ye ummeed nahin thi.”
“Main tumhein hurt nahin kar rahi hoon, haqeeqat bata rahi hoon. Rone ya jazbaat mein aane ki bajaye tum thande dil-o-dimaagh se meri baat socho……… Main aakhir tum ko bekaar kisi baat par hurt kyun karungi?” Jaweriya ne uska baazu nahin chhoda.
“Ye to tumhein hi pata hoga ke tum mujhe hurt kyun kar rahi ho, magar mujhe ye andaza zaroor ho gaya hai ke tum mein aur Tehreem mein koi farq nahin hai, balke tum ne to mujhe usse bhi zyada takleef pahonchayi hai. Usse meri dosti utni purani nahin thi jitni tumhare sath hai.”Imama ke galon par aansu beh rahe the aur wo musalsal apna baazu Jaweriya ki giraft se aazad karwane ki koshish kar rahi thi.
“Ye tumhara israar tha ke main tumhein apni zindagi ki sab se badi khwahish bataun. Main isi liye tumhein nahin bata rahi thi aur main ne tumhein pehle hi mutanabbah kar diya tha ke tum meri baat par bahot naaraz hogi magar tum ne mujhe yaqeen dilaya tha ke aisa kabhi nahin hoga.” Jaweriya ne use yaad dilane ki koshish ki.
“Mujhe agar ye pata hota ke tum mere sath is tarah baat karogi to main kabhi tumse tumhari zindagi ki sab se badi khwahish janne par israar nahin karti.”Imama ne is baar qadre ghusse se kaha.
“Acha main dobara is ma’mle par tumse baat nahin karungi.”Jaweriya ne qadre mudafe’aana andaaz mein kaha.
“Usse kya hoga…… Mujhe ye to pata chal gaya hai ke dar haqeeqat tum mere bare mein kya sochti ho…….. Hamari dosti ab kabhi bhi pehle jaisi nahin ho sakti. Aaj tak main ne kabhi tum par is tarah tanqeed nahin ki magar tum mujhe islaam ka ek firqa samajhne ke bajaye ghair muslim bana rahi ho.”Imama ne kaha.
“Main agar aisa keh rahi hoon to ghalat nahin keh rahi. Islam ke tamaam firqe kam az kam ye imaan zaroor rakhte hain ke Huzur ﷺ Allah ke aakhri rasool hain aur unke baad nubuwwat ka silsila khatm ho chuka hai.” Is baar Jaweriya ko bhi ghussa aa gaya.
“Mind your language.”Imama bhadak uthi.
“Main tumhein haqeeqat bata rahi hoon Imama…….. Aur main hi nahin ye baat sab log jaante hain ke tumhari family ne rupaye ke husool ke liye mazhab badla hai.”
“Imama! Meri baton par itna naaraz hone ki zaroorat nahin hai. Thande dil-o-dimaagh se…….”
Imama ne Jaweriya ki baat kaat di. “Mujhe zaroorat nahin hai tumhari kisi baat par thande dil-o-dimaagh se ghaur karne ki. Main janti hoon haqeeqat kya hai aur kya nahin…..”
“Tum nahin jantin aur yahi afsos naak baat hai.” Jaweriya ne kaha. Imama ne jawab mein kuch kehne ki bajaye is baar bahot zor ke jhatke se apna baazu chuda liya aur tez qadmon ke saath wahan se chal padi.
Is baar Jaweriya ne uske piche jane ki koshish nahin ki. Wo kuch afsos aur pareshani se use door jate dekhti rahi. Imama is tarah naaraz nahin hoti thi jis tarah wo aaj ho gayi thi aur yahi baat Jaweriya to pareshaan kar rahi thi.
Prev episode: https://theothermeunfolded.com/blog/peer-e-kaamil-roman-urdu-umera-ahmed-episode-28/
Next episode: https://theothermeunfolded.com/blog/peer-e-kaamil-roman-urdu-umera-ahmed-episode-30/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar