Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Lahore ki hudood mein daakhil hote hi Imama ne usse kaha. “Ab tum mujhe kisi bhi stop par utaar do…… Main chali jaungi.”
“Tum jahan jaana chahti ho, main tumhein wahan chod deta hoon. Itni dhund mein kisi transport ka intezaar karte tumhein bahot waqt legega.” Sadkein is waqt taqreeban weeraan thin, halaan ke subah ho chuki thi magar dhund ne har cheez ko apni lapet mein le rakha tha.
“Mujhe nahin pata, mujhe kahan jaana hai phir tumhein kis jagah ka pata bataun. Abhi to shayad main hostel jaun aur phir waha………” Salar ne uski baat kaat di.
“To phir main tumhein hostel chod deta hoon.” Kuch faasla isi tarah khamushi se tay hua phir hostel se kuch faasley par Imama ne usse kaha.
“Bas tum gaadi yahin rok do, main yahan se khud chali jaungi……… Main tumhare sath hostel nahin jaana chahti.” Salar ne sadak ke kinarey gaadi rok di.
“Pichle kuch hafton mein tum ne meri bahot madad ki hai, main uske liye tumhara shukriya adaa karna chahti hoon. Tum meri madad na karte to aaj main yahan na hoti.” Wo ek lamhe ke liye ruki. “Tumhara mobile abhi mere paas hai, magar mujhe iski zaroorat hai, main kuch arsey baad ise wapas bhijwa dungi.”
“Uski zaroorat nahin, tum ise rakh sakti ho.”
“Main kuch dino baad tum se dobara raabta karungi phir tum mujhe talaaq ke papers bhijwa dena” Wo ruki. “Main ummeed karti hun ke tum mere parents ko kuch nahin bataoge.”
“Ye kehne ki zaroorat thi?” Salar ne bhanwein uchkaate hue kaha. “Mujhe kuch batana hota to bahot pehle bata chuka hota.” Salar ne qadrey sard mohri se kaha. “Tum mujhe bahot bura ladka samajhti thin, kya abhi bhi tumhari mere barey mein wahi raaye hai ya tumne apni raaye mein kuch tabdeeli ki hai.” Salar ne achanak teekhi muskuraahat ke sath usse pucha.
“Tumhein nahin lagta ke main dar-asal bahot acha ladka hoon?”
“Ho sakta hai.”Imama ne maddham aawaz mein kaha. Salar ko uski baat par jaise shock laga.
“Ho sakta hai?” Wo be yaqeeni se muskuraya. “Abhi bhi ho sakta hai, tum bahot naa-shukri ho Imama, main ne tumhare liye itna kuch kiya hai jo is zamaane mein koi ladka nahin karega aur tum phir bhi mujhe acha maanne ko tayyar nahin?”
“Main naa-shukri nahin hoon. Mujhe aitraaf hai ke tum ne mujh par bahot ehsaan kiye hain aur shayad tumhari koi dusra kabhi na karta……….”
Salar ne uski baat kaat di. “To main acha hua na?”
Wo kuch nahin boli sirf use dekhti rahi.
“Nahin, mujhe pata hai tum yahi kehna chahti ho, halaan ke mashriqi ladki ki khamushi uska iqraar hoti hai magar tumhari khamushi tumhara inkaar hoti hai. Theek keh raha hoon na?”
“Ham ek fizool bahes kar rahe hain.”
“Ho sakta hai.” Salar ne kaandhe uchkaaye. “Magar mujhe hairaani hai ke tum……….”
Is baar Imama ne uski baat kaat di. “ Tum ne mere liye yaqeenan bahot kuch kiya hai………. aur agar main tumhein jaanti na hoti to yaqeenan main tumhein ek bahot acha insaan samajhti aur keh bhi deti………. Magar main tumhein itni achi tarah jaanti hoon ke mere liye ye kehna mushkil hai ke tum ek ache insaan ho………”
Wo ruki. Salar palkein jhapkaaye baghair use dekhta raha.
“Jo aadmi khud kushi ki koshish karta ho, sharaab peeta ho, jis ne apna kamra aurton ki barhana tasweeron se bhar rakha ho……… wo acha aadmin nahin ho sakta.”Imama ne do tok andaaz mein kaha.
“Tum kisi aise aadmi ke paas jaatin jo ye tino kaam na karta magar tumhari madad bhi na karta to kya tumhare liye wo acha aadmi hota?” Salar ne tez aawaz mein kaha. “Jaise Jalaal Ansar?”
Imama ke chehre ka rang badal gaya. “Haan, usne meri madad nahin ki, mujh se shadi nahin ki magar iska matlab ye nahin hai ke wo bura aadmi ho gaya. Wo acha aadmi hai……… abhi bhi mere nazdeek acha aadmi hai.”
“Aur main ne tumhari madad ki……….. tum se shadi ki magar yaqeenan iska ye matlab nahin hai ke main acha aadmi ho gaya, main bura aadmi hoon.” Wo ajeeb andaaz mein kehte hue muskuraya. “Tumhara khud apne barey mein kya khayaal hai Imama……….. Kya tum achi ladki ho?”
Usne achanak chubhtey hue andaaz mein pucha phir jawaab ka intezaar kiye baghair kehne laga.
“mere nazdeek tum bhi achi ladki nahin ho, tum bhi ek ladke ke liye apne ghar se bhaagi ho……… Apne mangetar ko dhoka diya hai tum ne……… Apni family ki izzat ko kharaab kiya hai tum ne…………” Salar ne har lehaaz ko baalaye taaq rakhte hue saaf goi se kaha.
Imama ki aankhon mein halki se nami aa gayi. “Tum theek kehte ho. Main waqai achi ladki nahin hoon. Abhi mujhe ye jumla bahot logon se sunna hai.”
“Main tumhein bahot lambi chaudi wazaahat de sakti hoon magar uska koi faayda nahin, tum un cheezon ko nahin samajh sakte.”
“Farz karo, main tumhein Lahore na le kar aata kahin aur le jaata phir……… Magar main tumhein ba-hifaazat yahan le aaya……… ye mera tum par kitna bada ehsaan hai, tumhein andaza hain iska?”
Imama gardan mod kar use dekhne lagi.
“Mujhe yaqeen tha tum mujhe kahin aur nahin le jaoge.”
Wo uski baat par hansa. “Mujhe par yaqeen tha……… Kyun? Main to ek bura ladka hoon.”
“Mujhe tum par yaqeen nahin tha………. Allah par yaqeen tha.” Salar ke maathey par kuch bal pad gaye.
“Main ne Allah aur apne paighambar ﷺ ke liye sab kuch chod diya hai, ye kabhi nahin ho sakta tha ke wo mujhe tumhare jaise aadmin ke haathon ruswa karte, ye mumkin nahin tha.”
“farz karo aisa ho jaata.” Salar musir hua.
“Main aisi batein farz kyun karun jo nahin hui.” Wo apni baat par qayem thi.
“Yaani tum mujhe kisi qism ka koi credit nahin dogi?” Wo mazaaq udaane wale andaaz mein muskuraya.
“Acha farz karo main ab tumhein jaane nahin deta to tum kya karogi. Gaadi ka darwaza jab tak main nahin kholunga, nahin khulega…… Ye tum jaanti ho…….. Ab tum kya karogi?” Wo yak tuk use dekhti rahi. “Ya main ye karta hoon.” Salar ne dashboard par pada hua apna mobile uthaya aur us par ek number dial karne laga. “Ke tumhare ghar phone kar deta hoon.” Usne mobile ki screen ko uski aankhon ke saamne lehraya. Us par Imama ke ghar ka number tha.
“Main unhein tumhare barey mein batata hoon ke tum kahan ho, kis ke saath ho….. phir yahan se tumhein sidha police station le ja kar unki tehweel mein de deta hoon…….. to phir tumhare aiteqaad aur aitbaar ka kya hoga?” wo mazaaq udaane wale andaaz mein keh raha tha.
Imama chup chaap use dekhti rahi. Salar ko be had khushi mehsoos hui. Salar ne mobile off karte hue ek baar phir uski aankhon ke saamne lehraya
“kitna bada ehsaan kar raha hoon tum par ke main aisa nahin kar raha.” Usne mobile ko dobara dashboard par rakhte hue kaha. “Halaan ke tum be bas ho, kuch bhi nahin kar saktin, usi tarah raat ko main tumhein kahin aur le jaata to tum kya kar letin?”
“Main tumhein shoot kar deti.” Salar ne hairaani se use dekha phir qehqaha maar kar hansa.
“Kya kar detin. Main……..tumhein…….. shoot………kar deti.” Usne usi ke andaaz mein ruk ruk kar kaha. Wo steering par dono haath rakh kar khilkhila kar hansa.
“Kabhi zindagi mein pistol dekha bhi hai tum ne?” Usne Imama ka mazaaq udaate hue kaha.
Salar ne use jhukte aur apne paaon ki taraf haath badhate dekha. Jab wo seedhi hui to usne Salar se kaha.
“Shayad ise kehte hain.”
Salar hansna bhool gaya. Uske dayen haath mein chote size ka ek bahot khoobsurat aur qeemti ladies pistol tha. Salar pistol par uske hath ki giraft dekh kar jaan gaya tha ke wo kisi anaadi ke hath mein nahin tha. Usne be yaqeeni se Imama ko dekha.
“Tum mujhe shoot kar sakti thin?”
“Haan, main tumhein shoot kar sakti thi magar main ne aisa nahin kiya kyun ke tum ne mujhe dhoka nahin diya.”
Usne mustehkam aawaz mein kaha. Usne pistol Salar ki taraf nahin kiya tha, sirf apne hath mein rakha tha.
“Gaadi ka lock………” usne baat adhoori chodte hue Salar se kaha. Salar ne ghair iraadi taur par apni taraf maujood button daba kar lock khol diya. Imama ne darwaza khol diya. Wo ab pistol apni god mein maujood bag mein rakh rahi thi. Dono ke darmiyaan mazeed koi baat nahin hui. Imama ne gaadi se bahar nikal ka uska darwaza band kar diya. Salar ne use tez qadmon ke saath ek qareeb aati hui vagon ki taraf jaate aur phir usmein sawaar hote dekha.
Uski quwwat-e-mushaaheda bahot tez thi…… Wo kisi bhi shakhs ke chehre ko padh sakta tha…….. Aur use is cheez par bada zom tha…….. Magar waha us dhund aalood sadak par gaadi mein baithe hue usne aitraaf kiya. Wo Imama Hashim ko nahin jaan saka tha………. Wo agle kai minute steering par dono haath rakhe be yaqeeni ke aalam mein waha baitha raha tha. Imama Hashim ke liye uski naa pasandeedgi mein kuch aur izaafa ho gaya.
Wo waapsi par dhund ki parwaah kiye baghair pori raftaar se gaadi chala kar aaya tha. Poora rasta uska zahen isi udhed-bun mein laga hua tha ke usne pistol aakhir kahan se nikala tha. Wo poore wasooq se keh sakta tha ke jis waqt wo wazoo ke liye paaon dho rahi thi us waqt wo pistol uski pindli ke saath nahin tha warna wo zaroor use dekh leta. Baad mein namaaz padhne ke dauraan bhi wo baghaur use sar se paaon tak dekhta raha tha, pistol tab bhi uski pindli ke saath bandha hua nahin tha. Wo burger khane aur chai pine ke baad gaadi mein aa kar baith gayi thi aur wo kuch der baad gaai mein aaya tha. Wo yaqeenan gaadi mein maujood uske bag mein hi hoga. Wo andaaze lagata raha.
Wo jis waqt apne ghar pahoncha uska mood off tha. Gate se gaadi andar le jaate hue usne chaukidaar ko apni taraf bulaya. “Raat ko main jis ladki ke sath yahan se gaya tha tum uske barey min kisi ko nahin bataoge balke main raat ko kahin nahin gaya, samajh mein aaya?” Usne tahakkumaana andaaz mein kaha.
“Ji……main kisi ko nahin bataunga.” Chaukidaar ne farmaan-bardaari se sar hila diya. Wo ahmaq nahin tha ke aisi cheezon ke barey mein kisi ko batata phirta
Apne kamrey mein aa kar wo itmenaan ke sath so gaya. Uska us din kahin jaane ka iraada nahin tha.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-76/
Prev episode:
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar