Disclaimer
This book is transliteration of Umera Ahmed’s masterpiece Peer-e-Kaamil WITHOUT HER PERMISSION.
This is only for those readers who understand Urdu but can’t read it. On Goodreads, some people asked meabout Roman transliteration of Peer-e-Kamil. I couldn’t find it, so I made a mental note to try and make it available to others for free when I get time. Then I forgot about it because I never get time.
And this morning, I got this book. Some kind soul had enough time to transliterate, print, and spiral bind and bring it home.
Anyone interested in reading the roman version can borrow from me.
And those online can read it here.
P.S. This is NOT English translation. If you want that, it’s available on Amazon.
Wo ek dam hadbada kar uthi. Kamrey mein taariki thi. chand lamhon ke liye use laga wo wahin ho, Khana-e-Kaaba mein. Phir jaise wo haqeeqat mein wapas aa gayi. Us ne uth kar kamrey ki light jalaa di aur phir bed par aa kar baith gayi. Use khwaab puri juziyaat samait yaad tha, yun jaise usne koi film dekhi ho, magar us aadmi ka chehra wo nahin dekh saki thi. uske mudney se pehle uski aankhein khul gayi thin.
“Khush-ul-haan aawaz, Jalaal Ansar ke siwa kis ki ho sakti thi.” Usne socha.
“Magar wo shakhs daraaz qad tha. Jalaal Ansar saanwla tha par us shakhs ke ehraam mein se nikley hue kandhey aur baazuon ki rangat saaf thi aur uski aawaz……… wo shanasaa thi par wo ye nahin pehchaan paa rahi thi ke wo Jalaal ki aawz thi ya kisi aur ki.
Khwaab bahot ajeeb tha magar uske sar ka dard ghayab ho chuka tha aur wo hairaan kun taur par pur sukoon thi. Us ne uth kar kamrey ki light on ki. Wall clock ek baja raha tha. Imama ko yaad aaya wo raat ko Isha ki namaaz padhey baghair hi so gayi thi. usne kapdey bhi tabdeel nahin kiye the na hi soney se pehle wazoo kiya tha. Usne kapdey tabdeel kiye aur apne kamrey se bahar aa gayi.
Sayeeda amma ke kamrey mein raushni nahin thi. wo so rahi thin. Purey ghar mein gehri khamushi chhai hui thi. Sehan mein bulb jal raha tha. Halki halki dhund ki maujoodgi bhi bulb ki raushni mein mehsoos ki jaa sakti thi. Sehan ki diwaron ke sath chadhi sabz belein surkh eenton ki diwaron ke sath bilkul saakit thin. Wo wazoo karne ke liye sehan ke dusri taraf maujood bathroom mein jaana chahti thi magar sehan mein jaane ke bajaye wo bar aamdey ke sutoon ke paas aa kar baith gayi. Apne sweater ki aastinon ko upar karte hue usne apni shirt ki aastinon ke button kholtey hue unhein upar fold kar diya. Chand lamhon ke liye use jhurjhuri aayi. Khunki bahot zyada thi. phir wo un belon ko dekhne lagi. Ek baar phir Jalaal Ansar ke sath shaam ko hone wali mulaqaat use yaad aa rahi thi magar is baar uski baaton ki goonj use ashk baar nahin kar rahi thi.
Dast geeri meri tanhai ki tune hi to ki
Main to mar jata agar sath na hota tera
Teh ba teh teergiyaan zahen pe jab toot’ti hain
Noor ho jaata hai kuch aur haveeda tera
Kuch nahin maangta shaahon se ye shaidaa tera
Is ki daulat hai faqat naqsh-e-kaf-e-paa tera
Ek afsurdah si muskurahat usko honton par namudaar hui. Guzrey hue pichhley saadhe aath saalon mein ye aawaz…….. aur ye alfaaz uske zahen se kabhi maa’doom nahin hue the. Aur phir use kuch der pehle ke khwaab mein sunaai dene wali wo dusri aawaz yaad aayi.
“Labbaik Allahumma Labbaik …… Labbaik Laa Shareeka Laka Labbaik …… Innal Hamda Wanni’mata Laka Wal’mulk Laa Shareeka Lak …… “
Wo aawaz maanus aur shanasaa thi magar Jalaal Ansar ki aawaz ke alawa wo aur kisi aawaz se waaqif nahin thi. aankhein band kar ke usne khwaab mein dekhe hue us manzar ko yaad karne ki koshish ki. Muqaam-e-Multazim, Khana-e-Kaaba ka khula darwaza, Ghilaaf-e-Kaaba ki wo raushan aayaat……… wo pur sukoon, thandi, mo’attar raat…….. Khana-e-Kaaba ke darwazey se phoot’ti wo doodhiya raushni aur sajdah karta talbeeh padha wo mard ………. Imama ne aankhein khol din. Kuch der tak wo sehan mein utri dhund mein nazrein jamaye us aadmi ke barey mein sochti rahi.
Us aadmi ke barhana kandhey ki pusht par zakhm ka ek mundamil shudah nishaan tha. Imama ko hairat ho rahi thi. khwaab ki is tarah ki juziyaat use pehle kabhi yaad nahin rahi thin. Usne zindagi mein pehli baar Khana-e-Kaaba ko khwaab mein dekha tha aur wahan baithey use khwahish hui thi ke kaash wo kabhi usi tarah Masjid-e-Nabvi ﷺ mein Rauza-e-Rasool ﷺ ke saamne khadi ho. Usi tarah Masjid-e-Nabvi ﷺ khaali ho, wahan sirf wo ho. Wo andaza nahin kar saki ke wo kitni der wahan usi tarah baithi rahi. Wo apne gird-o-pesh mein tab lauti jab Sayeeda amma tahajjud padhney ke liye wazoo ki khaatir bahar sehan mein nikli thin. Imama ko wahan is waqt dekh kar wo hairaan hui thin.
“Tumhare sar ka dard kaisa hai?” Uske paas khadey ho kar unhon ne pucha.
“Ab to dard nahin hai.”Imama ne sar utha kar unhein dekha.
“Raat ko khana khaye baghair so gayi thin?” wo uske paas bar aamdey ke thandey farsh par baithtey hue bolin.
Wo khamush rahi. Sayeeda amma ek garm ooni shawl odhey hue thin. Imama ne unke kandhey par apna chehra tika diya. Uske sunn chehrey ko garm shawl se ek ajeeb si aasudgi ka ehsaas hua.
“Ab tum shadi kar lo Aamna!” Sayeeda amma ne usse kaha. Wo usi tarah garm shawl mein apna chehra chhupaye rahi. Sayeeda amma pehli baar ye baat nahin keh rahi thin.
“Aap kar dein.” Wo hamesha unki is baat par khamushi ikhteyaar kar leti thi. kyun? Wahan wo khud bhi nahin jaanti thi laikin aaj pehli baar wo khamush nahin rahi thi.
“Tum sach keh rahi ho?” Sayeeda amma uski baat par hairaan hui thin.
“Main sach keh rahi hoon.”Imama ne sar unke kandhey se hata liya.
“Tumhein koi pasand hai?” Sayeeda amma ne usse puchha. Wo sar jhukaye sehan ke farsh ko dekh rahi thi.
“Koi mujhe pasand hai?” Us ne socha.
“Nahin, mujhe koi bhi pasand nahin hai.” Sayeeda amma ko uski aawaz bharrayi hui lagi. Isse pehle ke wo usse kuch kehtin usne ek baar phir unki shawl mein apna chehra chhupa liya.
“Tumhari shadi ho jaye to main bhi England chali jaaungi.”
Unhon ne uske sar ko thapthapatey hue kaha aur uske sar ko thapthapatey hue unhein ehsaas hua ke wo unki shawl mein munh chhupaye hichkiyon se ro rahi thi.
“Aamna! Aamna beta kya hua?” Unhon ne pareshan ho kar uska chehra uthaane ki koshish ki.
Wo kaamyaab nahin huin. Wo usi tarah unke sath lag kar roti rahi.
“Allah ke liye ………. Kuch to batao, kyun ro rahi ho?” Wo dil girafta ho gayin.
“Kuch nahin bas……… bas aise hi…….. sar mein dard ho raha hai.” Unhon ne zabardasti uska geela chehra upar kiya tha. Wo ab apni aastinon se chehra ponchhtey hue uth khadi hui. Usne Sayeeda amma se aankhein nahin milayi thin. Sayeeda amma hakka bakka use bathroom ki taraf jaate dekhti rahin.
Sayeeda amma uski shadi ki baat karne wali akeli nahin thin. Uski taalim mukammal hone ke baad Dr Sabt Ali ne ek baar phir usse shadi ka zikr kiya tha. Wo nahin jaanti tab usne kyun inkaar kar diya tha. Ye jaanne ke bawajood ke wo ab aazad thi.
“Mujhe kuch arsa job kar lene dein uske baad main shadi kar lungi.” Usne Dr Sabt Ali se kaha tha. Shayad ye pichhley saalon se Dr Sabt Ali pa maali taur par ek bojh banney ka ehsaas tha, jis se wo nijaat haasil karna chahti thi ya pir kahin uske laa sha’oor mein ye cheez thi ke Dr Sabt Ali ko uski shadi par ek baar phir akhrajaat karne padenge aur wo ye chahti thi ke wo un akhrajaat ke liye khud kch jama karne ki koshish kar ley. Usne ye baat Dr Sabt Ali ko nahin batayi thi magar usne un se job ki ijaazat le li thi.
Shayad wo kuch arsa abhi mazeed job karti rehti, magar Jalaal Ansar se is mulaqaat ke baad wo ek takleef dah zehni dhachkey se do chaar hui thi. aur usne ek dam Sayeeda amma ke saamne hahtiyaar daal diya the. Wo nahin jaanti thi. Sayeeda amma ne Dr Sabt Ali se is baat ka zikr kiya ya nahin magar wo khud in dinon mukammal taur par uske liye rishtey ki talaash mein sar gardaan thin aur is koshish ka nateeja Fahad ki surat mein nikla tha.
Fahad ek company mein achchey ohdey par kaam kar raha tha aur uski shohrat bhi bahot achchi thi. Fahad ke ghar waley use pehli hi baar dekh kar pasand kar gaye theaur uske baad Sayeeda amma ne Dr Sabt Ali se us rishtey ki baat ki.
Dr Sabt Ali ko kuch ta’ammul hua……… shayad wo uski shadi ab bhi apne jaanne walon mein karna chahtey the, magar Sayeeda amma ki Fahad aur uske ghar walon ki bey panaah taarifon ke baad aur Fahad aur uske ghar walon se khud milne ke baad unhon ne Sayeeda amma ki pasand par koi aitraaz nahin kiya tha, albatta unhon ne Fahad ke barey mein bahot chhaan been karwayi thi aur phir wo bhi mutmain ho gaye the.
Fahad ke ghar wale ek saal ke andar shadi karna chahte the. Laikin phir achanak unhon ne chand maah ke andar shadi par israar karna shuru kar diya. Ye sirf ittefaaq tha ke Dr Sabt Ali usi dauraan apni kuch masrufiyaat ki wajah se England mein the jab Fahad ke ghar walon ke israar par taarikh tay kar di gayi thi. Sayeeda amma phone par un se mashwara karti rahi thin aur Dr Sabt Ali ne unhein apna intezaar karne ke liye kaha tha. Wo fauri taur par wahan nahin aa sakte the, albatta unhon ne Kulsoom aunty ko wapas Pakistan bhijwa diya tha.
Uski shadi ki tayyari Kulsoom aunty aur Maryam ne hi ki thi jo Rawalpindi se kuch hafton ke liye apni susraal Lahore aa gayi thi. Dr Sabt Ali ne uski shadi ki taarikh tay ho jaane ke baad phone par usse taweel guftgu ki thi. Unki teenon betiyon ki shadi unke apne khaandaan mein hi hui thi aur unke susraal mein se kisi ne bhi jahez nahin liya tha. Magar Dr Sabt Ali ne teenon betiyon ke jahez ke liye makhsoos ki jaane wali raqm unhein tohfatan de di thi.
“Saadhey aath saal pehle jab aap mere ghar aayi thin aur main ne aap ko apni beti kaha tha to main ne aap ke liye bhi kuch raqm rakhi thi. wo raqm aap ki amaanat hai. Aap use waise le lein ya phir main Maryam aur Kulsoom se keh dunga ke wo aap ke jahez ki tayyari par use kharch karein. Sayeeda aapa ki khwahish thi ke shadi unke ghar par ho warna main chahta tha ke ye shadi mere ghar par ho. Aap ke ghar par………” Unhon ne usse kaha tha.
“Mujhe is baar par bahot ranj hai ke main apni chauthi beti ki shadi mein shirkat nahin kar sakunga magar shayad is mein hi koi behtari hai. Main phir bhi aakhri waqt tak koshish karunga ke kisi tarah shadi par aa jaun.”
Wo unki baaton ke jawaab mein bilkul khamush rahi thi. usne kuch bhi nahin kaha tha na hi ye israar kiya tha ke wo apni shadi par apni raqm kharch karegi aur na hi ye ke wo shadi unki raqm se nahin karna chahti. Us din uska dil chaha ek aur ehsaan lene ko. Wo us par itne ehsaan kar chuke the ke ab usein ehsaanaon ki aadat hone lagi thi. use sirf un se ek gila tha ke wo aakhir uski shadi mein shirkat kyun nahin kar rahe the.
Next episode:
https://theothermeunfolded.com/blog/peer-e-kaamil-roman-urdu-umera-ahmed-episode-188/
Prev episode:
https://theothermeunfolded.com/blog/peer-e-kaamil-roman-urdu-umera-ahmed-episode-186/
Stay tuned for more book reviews.
Until next time, happy reading!
~~~
Want more of my trademark philosophy daily? Do three things, not necessarily in that order.
Subscribe to my blog.
Find my books on Amazon.
Show some love!
Shabana Mukhtar